Wangena ahlula eJerusalema akhwele udumbana

Kghani Iimphorofido ZakaMesiya Zifakazela Bona UJesu BekanguMesiya?

Ipendulo yeBhayibheli

Iye. Nakasephasini, uJesu wazalisa iimphorofido ezinengi ezimalungana “noZesiweko oMbusi,” loyo ozokuba “Msindisi Wephasi.” (Danyela 9:25; 1 Jwanisi 4:14) Nangemva kokuhlongakala kwakhe, uJesu waragela phambili azalisa iimphorofido zokuba nguMesiya.—IRhubo 110:1; IzEnzo 2:34-36.

Kutjho ukuthini ukuthi “Mesiya”?

Igama lesiHebheru elithi Ma·shiʹach (Mesiya) nelifana nalo lesiGirigi elithi Khri·stos (Krestu) womabili atjho ukuthi “Ozesiweko.” Yeke, igama elithi “Jesu Krestu” litjho ukuthi “Jesu Ozesiweko,” namkha “Jesu uMesiya.”

Ngeenkhathi zeBhayibheli, bona umuntu afumane isikhundla esikhethekileko bekathelwa ngamafutha ehloko lokha nakazeswako. (Levitikusi 8:12; 1 Samyela 16:13) UJesu wabekwa nguZimu bona abe nguMesiya, okusikhundla esiphezulu. (IzEnzo 2:36) Nanyana kunjalo, kunokobana uJesu azeswe ngamafutha, uZimu wamzesa ngommoya ocwengileko.—Matewu 3:16.

Kghani isiphorofido sakaMesiya singazaliswa babantu abanengi?

Awa. Njengombana umtlhala womuno ungewomuntu munye, neemphorofido zeBhayibheli ezimalungana noMesiya namkha uKrestu zizaliseka emntwini munye. Nanyana kunjalo, iBhayibheli liyasiyelelisa “kuzokuvela aboKrestu bamala nabaphorofidi bamala, bazokwenza iimbonakaliso neemangaliso ezikulu bona badurhise ngitjho nabakhethiweko nakukghonekako.”—Matewu 24:24.

Kghani uMesiya angavela esikhathini esizako?

Awa. IBhayibheli labikezela bona uMesiya bekazokuvela eenzukulwaneni zeKosi uDavida yakwa-Israyeli. (IRhubo 89:3, 4) Nanyana kunjalo, imininingwana yokubelethwa kwamaJuda kufikela kuDavida yalahleka, okungenzeka bona yatjhatjalaliswa lokha amaRoma nakahlula iJerusalema ngo-70 C.E.a Kusukela ngesikhatheso, bekubudisi bona umuntu anikele ubufakazi bokobana uvela emndenini kaDavida. Ngokungafaniko, imininingwana yokubelethwa kwakaJesu beyisesekhona ngesikhathi sakhe, ngitjho namanabakhe abhalelwa kumphikisa bona usizukulwana sakaDavida.—Matewu 22:41-46.

Ziyingakhi iimphorofido ezikhuluma ngoMesiya eBhayibhelini?

Akukghonakali bona sitjho inani ekungilo patsi leemphorofido ezikhuluma ngoMesiya. Ngokwesibonelo, indlela ekubalwa ngayo iimphorofido ingahluka eendimeni ezikhuluma ngokukhanyako ngesiphorofido sakaMesiya. Indima esemtlolweni ka-Isaya 53: 2-7 ikhuluma ngezinto ezimbalwa ezimalungana nesiphorofido sakaMesiya. Abanye bangabala indima le njengesiphorofido sinye, kukulapho abanye baqale iingcenyezi njengesiphorofido esihlukileko.

Ezinye iimphorofido ezikhuluma ngoMesiya ezizaliswe nguJesu

Isiphorofido	Sifumaneka kuphi	Ukuzaliseka kwaso
Isizukulwana saka-Abrahama	Genesisi 22:17, 18	Matewu 1:1
Iinzukulwana zendodana ka-Abrahama u-Isaka	Genesisi 17:19	Matewu 1:2
Wabelethelwa esitjhabeni sakwaJuda	Genesisi 49:10	Matewu 1:1, 3
Wavela ebukhosini beKosi uDavida	Isaya 9:7	Matewu 1:1
Wabelethwa litlawana	Isaya 7:14	Matewu 1:18, 22, 23
Wabelethelwa eBhetlehema	Mikha 5:2	Matewu 2:1, 5, 6
Wabizwa ngokuthi ngu-Imanuwelib	Isaya 7:14	Matewu 1:21-23
Ekuthomeni bekanganakeki	Isaya 53:2	Lukasi 2:7
Abentwana babulalwa ngemva kokubelethwa kwakhe	Joromiya 31:15	Matewu 2:16-18
Wasuka eGibhide	Hosiya 11:1	Matewu 2:13-15
Bekabizwa ngokuthi Mnarazethac	Isaya 11:1	Matewu 2:23
Kwafika isithunywa ngaphambi kwakhe	Malaki 3:1	Matewu 11:7-10
Wazeswa kobana abe nguMesiya ngo-29 C.E.d	Danyela 9:25	Matewu 3:13-17
UZimu wavuma ukuthi uyiNdodanakhe	IRhubo 2:7	IzEnzo 13:33, 34
Watjhisakalela indlu kaZimu	IRhubo 69:9	John 2:13-Jwanisi 2:13-17
Umtjhumayeli weendaba ezimnandi	Isaya 61:1	Lukasi 4:16-21
Ukutjhumayela emphakathini weGalile ngokukhanya okukhulu	Isaya 9:1, 2	Matewu 4:13-16
Umenzi wemikarisomraro njengoMosi	Duteronomi 18:15	IzEnzo 2:22
NjengoMosi, bekakhuluma imicabango kaZimu	Duteronomi 18:18, 19	Jwanisi 12:49
Walapha ukugula kwabanengi	Isaya 53:4	Matewu 8:16, 17
Akhenge azidosele amehlo	Isaya 42:2	Matewu 12:17, 19
Wazwelana nabagandelelekileko	Isaya 42:3	Matewu 12:9-20; Markosi 6:34
Wembula ubulungiswa bakaZimu	Isaya 42:1, 4	Matewu 12:17-20
UMeluleki oMuhle	Isaya 9:6, 7	Jwanisi 6:68
Wafundisa ngebizo lakaJehova	IRhubo 22:22	Jwanisi 17:6
Wakhuluma asebenzisa imifanekiso	IRhubo 78:2	Matewu 13:34, 35
UMdosiphambili	Danyela 9:25	Matewu 23:10
Abanengi bebangakholelwa kuye	Isaya 53:1	Jwanisi 12:37, 38
Ilitje elikhubako	Isaya 8:14, 15	Matewu 21:42-44
Waliwa babantu	IRhubo 118:22, 23	IzEnzo 4:10, 11
Bamhloya ngaphandle kwesizathu	IRhubo 69:4	Jwanisi 15:24, 25
Wangena ahlula eJerusalema akhwele udumbana	Zakariya 9:9	Matewu 21:4-9
Wadunyiswa bentwana	IRhubo 8:2	Matewu 21:15, 16
Weza ngebizo lakaJehova	IRhubo 118:26	Jwanisi 12:12, 13
Wajikelwa mumuntu amthembako	IRhubo 41:9	Jwanisi 13:18
Wathengiswa ngebanga leempaparwana ezima-30 zesilivae	Zakariya 11:12, 13	Matewu 26:14-16; 27:3-10
Abangani bamtjhiya	Zakariya 13:7	Matewu 26:31, 56
Abofakazi bamala bafakaza ngokujamelene naye	IRhubo 35:11	Matewu 26:59-61
Wathula phambi kwabamsolako	Isaya 53:7	Matewu 27:12-14
Bamkhafulela ngamathe	Isaya 50:6	Matewu 26:67; 27:27, 30
Wabetjhwa ehloko	Mikha 5:1	Markosi 15:19
Warithwa	Isaya 50:6	Jwanisi 19:1
Akhenge azibuyiselele kilabo ebebambetha	Isaya 50:6	Jwanisi 18:22, 23
Abadosiphambili bomBuso bamlukela amano	IRhubo 2:2	Lukasi 23:10-12
Wabetjhelwa izandla neenyawo esigodweni sokuhlunguphazwa	IRhubo 22:16	Matewu 27:35; Jwanisi 20:25
Abantu benza ifumbe ngezambatho zakhe	IRhubo 22:18	Jwanisi 19:23, 24
Wabalwa hlangana nezoni	Isaya 53:12	Matewu 27:38
Wahloywa, wathukwa	IRhubo 22:7, 8	Matewu 27:39-43
Waphathwa kabuhlungu ngebanga lezoni	Isaya 53:5, 6	1 Pitrosi 2:23-25
Kwabonakala ngasuthi uZimu umlahlile	IRhubo 22:1	Markosi 15:34
Bamnikeza iwayini elivangwe nenyongo bona asele	IRhubo 69:21	Matewu 27:34
Bekomile ngaphambi kobana ahlongakale	IRhubo 22:15	Jwanisi 19:28, 29
Wanikela ummoyakhe kuZimu	IRhubo 31:5	Lukasi 23:46
Wanikela ngepilwakhe	Isaya 53:12	Markosi 15:37
Waba sihlengo sokususa izono	Isaya 53:12	Matewu 20:28
Amathambo akhenge aphuke	IRhubo 34:20	Jwanisi 19:31-33, 36
Bamhlaba	Zakariya 12:10	Jwanisi 19:33-35, 37
Wabulungwa nabanjingileko	Isaya 53:9	Matewu 27:57-60
Wavuswa ekufeni	IRhubo 16:10	IzEnzo 2:29-31
Umuntu owamthengisako wajanyiselelwa ngomunye	IRhubo 109:8	IzEnzo 1:15-20
Uhlezi ngesidleni sakaZimu	IRhubo 110:1	IzEnzo 2:34-36

a I-Cyclopedia yaka-McClintock no-Strong ithi: “Akunakuzaza bona imininingwana yokubelethwa kwesitjhaba samaJuda nemindeni yakhona yatjhabalaliswa lokha iJerusalema nayirhayilwako, ingasi ngaphambilini.”

b Igama lisiHebheru elithi Imanuweli, litjho ukuthi “UZimu Unathi,” limhlathulula kuhle uJesu okunguMesiya. Ukuba khona kwakhe ephasini neemsebenzakhe kuyatjengisa bona uZimu unabantu abamlotjhako.—Lukasi 2:27-32; 7:12-16.

c Igama elithi “Mnazaretha” kungenzeka livela kelesiHebheru elithi neʹtser elitjho “ukuhluma.”

d Bona ufumane imininingwana eBhayibhelini yokulandelana kweenkhathi kufikela ngo-29 C.E. okumnyaka uMesiya afika ngawo, funda isihloko esithi “Indlela Isiphorofido SakaDanyela Esabikezela Ngayo Ukufika KwakaMesiya.”

e Isiphorofidwesi sisencwadini kaZakariya, kodwana umtloli weBhayibheli uMatewu uthi “sakhulunywa ngomphorofidi uJoromiya.” (Matewu 27:9) Kubonakala ngasuthi incwadi kaJoromiya beyibekwa ibe ngeyokuthoma engcenyeni yemiTlolo ebeyibizwa ngokuthi “Abaphorofidi.” (Lukasi 24:44) UMatewu usebenzisa “uJoromiya” ukuqalisela kizo zoke iincwadezi okufaka hlangana incwadi kaZakariya.