IBhayibheli Lithini Ngokufaka I-Makeup Nangokuzirhabisa Ngoburhanyarhanya?
Ipendulo yeBhayibheli
Nanyana iBhayibheli lingatjho okunengi ngendaba le, alikajamelani ne-makeup, uburhanyarhanya namkha ezinye iindlela zokuzirhabisa. Nanyana kunjalo, kunokuthi lidzimelele ekuqalekeni kwangaphandle, iBhayibheli likhuthaza “isambatho sokungonakali somoya onokuthula nobumnene.”—1 Pitrosi 3:3, 4.
Akusikumbi Ukuzirhabisa Bona Sibe Bahle
Abafazi abathembekileko eBhayibhelini bebazirhabisa. URabega, owatjhada nendodana ka-Abrahama u-Isaka, bekafake icici legolide epumulweni, imikghabiso yegolide nobunye uburhanyarhanya obubizako abufumana njengesipho ku-Abrahama obekazokuba ngusosokanakhe. (Genesisi 24:22, 30, 53) Ngokufanako, no-Esta wavuma ‘ukuthuthukiswa ubuhle’ khona azokulungela ukuba yindlovukazi yemBusweni wePheresiya. (Esta 2:7, 9, 12) Kubokala ngasuthi ngesikhathi athuthukiswa ubuhle, kwasetjenziswa izinto “ezihlukahlukeneko ze-makeup.”—I-New International Version; Easy-to-Read Version.
IBhayibheli likhuluma kuhle ngoburhanyarhanya. Ngokwesibonelo, umuntu onikela iseluleko esihle umadaniswa ‘necici legolide . . . endlebeni ezwako.’ (IzAga 25:12) Ngokufanako, uZimu umadanisa indlela aphatha ngayo isitjhaba sakwa-Israyeli nendoda erhabisa umkayo ngemikghabiso yesandleni, ngemincamo nangamacici. Imikghabiso le yenza isitjhabesi saba ‘sihle khulu.’—Hezekiyeli 16:11-13.
Okungasiliqiniso nge-makeup nangoburhanyarhanya
Amala: Kweyoku-1 Pitrosi 3:3, iBhayibheli liyakwala ‘ukuluka iinhluthu nokufaka imikghabiso yegolide.’
Iqiniso: Endabeni le, iBhayibheli lisifundisa ukuthi ukuba nobuntu obuhle kuqakatheke ukudlula ukuzirhabisa namkha ukuqaleka kwangaphandle. (1 Pitrosi 3:3-6) Akhona namanye amavesi weBhayibheli asekela indaba le.—1 Samyela 16:7; IzAga 11:22; 31:30; 1 Thimothi 2:9, 10.
Amala: Ngebanga lokuthi indlovukazi embi uJezebheli ‘beyipenda amehlo,’ lokho kutjho ukuthi akukalungi ukusebenzisa i-makeup.—2 AmaKhosi 9:30.
Iqiniso: UJezebheli, obekamthakathi nombulali, wajeziselwa izenzo zakhe ezikhohlakeleko, ingasi ngebanga lendlela ebekaqaleka ngayo.—2 AmaKhosi 9:7, 22, 36, 37.