Inga-Kghani Imali Imsuka Wazo Zoke Izinto Ezilimazako?

Ipendulo YeBhayibheli

Awa. IBhayibheli alithi imali yimbi begodu alitjho ukuthi imsuka wazo zoke izinto ezilimazako. Amezwi ajayelekileko athi “imali imsuka wazo zoke izinto ezilimazako” adzubhula ingcenye yeBhayibheli begodu awasiliqiniso. IBhayibheli lithi “ukuthanda imali kumrabhu wakho koke okumbi.”a—1 Thimothi 6:10, IBHAYIBHELI ELICWENGILEKO.

IBhayibheli lithini malungana nemali?

IBhayibheli liyavuma ukuthi imali ilisizo nayisetjenziswa kuhle begodu ingaba “sivikelo.” (UMtjhumayeli 7:12) Ukungezelela kilokho, iBhayibheli liyababuka labo ababanomusa kwabanye, okuhlanganisa ukubapha imali.—IzAga 11:25.

Ngakwelinye ihlangothi, iBhayibheli liyasiyelelisa ngokwenza imali ibe ngeqakatheke khulu ekuphileni kwethu. Lithi: “Indlelenu yokuphila ayingabi nalo ithando lemali, kukulapho naneliseka ngezinto ezikhona.” (Hebheru 13:5) Lisifundisa ukuthi sisebenzise kuhle imali begodu singagijimisi ukunjinga. Kunalokho, kufuze saneliseke ngezinto esizitlhogako, njengokudla, izambatho nendawo yokuhlala.—1 Thimothi 6:8.

**Kubayini iBhayibheli lisiyelelisa ngokuthanda imali?**

Abantu abamarhamaru angekhe bafumane ukuphila okungapheliko. (Efesu 5:5) Ukuba marhamaru kukhambisana nokulotjha iinthombe. (Kolose 3:5) Elinye ibanga kukuthi,abantu abamarhamaru basebenza budisi bona bafumane abakufisako kangangokuthi bangasasebenzisa iinkambisolawulo ezilungileko. IzAga 28:20 zithi loyo “orhaba ubunjinga angeze ahlale amsulwa.” Bangalingeka nokuthi babe ziingebengu, babambe nelwazi lomuntu ngebanga lokufuna imali kuye, bakhwabanise, bathumbe umuntu namkha babulale.

Nanyana ukuthanda imali kungekhe kwabangela umuntu bona enze izinto ezimbi, kungaba neminye imiphumela emimbi. IBhayibheli lithi “labo abazimisele ukunjinga bawela esilingweni nesithiyweni neemfisweni ezinengi ezinganangqondo nezilimazako.”—1 Thimothi 6:9.

Singazuza njani esiyelelisweni seBhayibheli malungana nemali?

Nasingalisi ukwenza izinto esazi bona zilungile nezithabisa uZimu ngebanga lemali, sizokuhlonipheka, samukeleke kuye begodu uzosisekela. UZimu uthembisa labo abazimisele ukumthabisa ukuthi: “Angekhe nginitjhiye begodu angekhe nginilahle.” (Hebheru 13:5, 6) Uyasiqinisekisa nokuthi “umuntu othembekileko uzokufumana iimbusiso ezinengi.”—IzAga 28:20.

Amavesi weBhayibheli amalungana nemali

UMtjhumayeli 7:12: ‘Imali isivikelo.’

Ihlathululo: Imali nayisetjenziswa kuhle ilisizo ngombana iyasivikela.

Lukasi 12:15: “Nanyana umuntu anokunengi, ukuphila kwakhe akuveli ezintweni anazo.”

Ihlathululo: Imali ayikaqakatheki khulu ekuphileni kwethu begodu angeze yasisindisa.

1 Thimothi 6:10: “Ukuthanda imali kumsuka wayo yoke imihlobo yezinto ezilimazako, ngokulwela ukwanelisa ithandwelo abanye baphambukisiwe ekukholweni bazibangela ubuhlungu obunengi.”

Ihlathululo: Ukuba nemali akusikumbi kodwana abantu abathanda imali ebayenza izeqangi ekuphileni kwabo bazibangela imiraro ehlanganisa ukuhlukana kwemindeni nokugula okubangelwa kusebenza ngokudluleleko.

Hebheru 13:5: “Indlelenu yokuphila ayingabi nalo ithando lemali, kukulapho naneliseka ngezinto ezikhona.”

Ihlathululo: Kunokobana senze koke esingakwenza bona sinjinge, sizabe senza kuhle ngokwaneliswa ngalokho esinakho.

Matewu 19:24: “Kubulula ngekamela ukungena entunjeni yenalidi kunomuntu onjingileko ukungena emBusweni kaZimu.”

Ihlathululo: UJesu wamema indoda egade injingile bona imlandele. Indoda le yala ukumlandela ngombana izinto zayo beziqakatheke khulu kiyo. Yeke uJesu bekayelelisa. Umuntu obeka ubunjinga phambili kunoZimu uzibeka engozini yokungafumani ukuphila okungapheliko.

a Iveseli libekwe nangendlela le: “Ukuthanda imali kumsuka wayo yoke imihlobo yezinto ezilimazako.”