Indaba 77
Bebangekhe Bakhuleke Esithombeni
UYAKHUMBULA uzwa ngamasokana amathathu la? Bangani bakaDanyela ababhala ukudla lokho egade kungakalungi. Abantu beBhabhiloni bababiza bona nguMishaka, uShedireki no-Abedʹniko. Kodwana akhe ubaqale kwanje. Kubayini bangafuni ukukhothama esithombenesi njengaboboke abanye? Akhe sibone.
Uyayikhumbula iimthetho uJehova ayitlola ngokwakhe ebizwa bonyana Mithetho eliTjhumi? Wokuthoma weemthetho le ngilo: ‘Ungakhulekeli nanyana ngimuphi uzimu ngaphandle kwami.’ Amasokana alapha la alalela umthetho lo, namtjhana bekungasiyo into ebulula ukuyenza.
Ikosi yeBhabhiloni uNebukadinezari, wabiza abantu abanengi abaqakathekileko bonyana bazokukhulekela isithombe asibekilekwesi. Uqeda ukuthi kibo boke abantu: ‘Nenizwa itjhada leempondo, iindonodono nezinye iinliliswa zombhino, kufanele nikhothame nikhulekele isithombe serhawudesi. Nanyana ngubani ongakhange akhothame akhuleke esithombenesi, uzokuphoswa khonokho emlilweni otjhisa bhe.’
UNebukadinezari nekezwa bona uMishaka, uShedireki no-Abedʹniko akhenge bakhothame, wakwata khulu. Wathi balethwe kuye. Wabanikela elinye ithuba bona bakhothame. Kodwana amasokana amathathu la, bekathembele kuJehova. Batjela uNebukadinezari bonyana: ‘UZimethu esimkhulekelako uzosisindisa. Kodwana namtjhana angasisindisi asizukukhothama esithombeni sakho serhawuda.’
Nakezwa lokho, uNebukadinezari wakwata ukudlula phambilini. Walayela wathi ngomlilo egade useduze: ‘Basani umlilo loyo utjhise ngokuphindwe kakhomba kunokujayelekileko!’ Gade anamadoda anamandla khulu ebuthweni lakhe abamba uShedireki uMishaka, no-Abedʹniko abaphosa emlilweni otjhisako. Umlilo lo gade utjhisa kangangobanyana amadoda anamandla lawo abulawa lilangabu. Kodwana kuthiwani ngamasokana amathathu abawaphosela emlilweni?
Ikosi yaqala hlangana nelangabu lomlilo, yabethwa livalo khulu. Yabuza: ‘Kanti akhenge sibophe amadoda amathathu sawaphosa emlilweni otjhisa bhe?’
Iinceku zayo zaphendula zathi: ‘Iye,siwaphosile.’
Yathi: ‘Kodwana ngibona amadoda amane akhambakhamba emlilweni. Awakabotjhwa, nomlilo awuwatjhisi. Indoda yesine ifana nozimu.’ Ikosi yatjhidela hlanu komnyango weziko lomlilo yarhuwelela: ‘Shedireki! Mishaka! Abedʹniko! Phumani, nina nceeku zakaZimu oPhezukoke!’
Nebaphumako, woke umuntu wabona bona abakalimali. Ikosi yathi: ‘Akadunyiswe uZimu kaShedireki, uMishaka, no-Abedʹniko! uthumele ingilozakhe yabaphulusa ngombana akhenge bakhulekele nanyana ngimuphi uzimu ngaphandle kwakaZimabo.’
Lesi akusiso isibonelo sokuthembeka kuJehova ekufuneka sisilandele?
Eksodosi 20:3; Danyela 3:1-30.