Isifundo 5

Abangani BakaZimu Bazakuhlala Epharadeyisini

IPharadeyisi angeze lafana nephasi esihlala kilo namhlanjesi. UZimu akhenge afune bonyana iphasi lizaliswe miraro namatlhuwo, ubuhlungu nokutlhaga. Esikhathini esizako, uZimu uzokwenza iphasi libe yiPharadeyisi. Lizakuba njani iPharadeyisi? Akhe sibone bonyana iBhayibhili ithini:

Abantu abalungileko. IPharadeyisi lizakuba likhaya labangani bakaZimu. Bazakwenzelana izinto ezihle. Bazakuphila ngeendlela zakaZimu zokulunga.—Iziyema 2:21.

Ukudla okunengi. Indlala ngeze yaba khona ePharadeyisini. IBhayibhili ithi: “Kuzokuba nekoroyi enengi [namtjhana ukudla] ephasini.”—AmaRhalani 72:16.

Izindlu ezihle nomberego othabisako. Epharadeyisini umndeni nomndeni uzakuba nekhaya elithi wona. Umuntu nomuntu uzakwenza umberego oletha ithabo lamambala.—Isaya 65:21-23.

Ukuthula ephasini loke. Ngeze kusaba nabantu abalwako nabafela epini. ILizwi lakaZimu lithi: “[UZimu] Uphelisa inturhu.”—AmaRhalani 46:8, 9.

Ipilo ehle. IBhayibhili iyathembisa: “Abahlala khona [ePharadeyisini] ngeze batjho bonyana: ‘Ngiyagula.’” (Isaya 33:24) Begodu akuzukuba nomuntu ongakwaziko ukukhamba, ongaboniko, ongezwako namtjhana osimumu.—Isaya 35:5, 6.

Ukuphela kobuhlungu, amatlhuwo, nokufa. ILizwi lakaZimu lithi: “Ukufa angekhe kusaba khona, nokulila nobuhlungu angekhe kusaba khona, ngombana izinto zokuthoma zidlulile.”—ISambulo 21:4.

Abantu abambi bazabe bangasekho. UJehova uyathembisa: “Kodwana abambi . . . bayokuquntwa ephasini, nabangathembekiko bayokuruthulwa kilo.”—Iziyema 2:22.

Abantu bazokuthandana bebahloniphane. Ngeze kusaba khona ukungalungi, ukugandelelana, ukuba marhamaru, nehloyo. Abantu bazokuba nebumbano baphile ngokuvumelana neendlela zakaZimu zokulunga.—Isaya 26:9.