Ingcenye 22
Abapostoli Batjhumayela Ngesibindi
Ibandla lobuKrestu likhula ngamandla namtjhana litlhoriswa
NGEMVA kwamalanga alisumi uJesu abuyele ezulwini, abafundi bakhe abayi-120 bebahlangene ngendlini eJerusalema ngesikhathi Somnyanya wamaJuda wePentekosi lomnyaka ka 33. Khonokho, kwaba khona itjhada elazalisa indlu livela ezulwini elazwakala njengomoya omkhulu uvunguza. Ngokuyisimangaliso abafundi bathoma ukukhuluma amanye amalimi egade bangawazi. Kubayini izinto ezirarakwezi zenzeka? UZimu gade anikele abafundi bakaJesu umoya ocwengekileko.
Ngaphandle, bekunesiqubuthu ngombana bekufike iimvakatjhi zivela kwezinye iindawo zize emnyanyeni. Gade zirarekile ngokuzwa amalimabo akhulunywa ngokutjhelelako bafundi bakaJesu. Ahlathulula lokho okwenzekileko, uPitrosi wakhuluma ngesiphorofido esaphorofidwa nguJuweli sokobana uZimu “uzokuthululela” umoyakhe, ozokudlulisela izipho eziyisimangaliso kulabo abawufumanako. (Juweli 2:28, 29) Ubufakazi obunamandla bomoya ocwengekilekobu bebukhanyisa bona gade kunetjhuguluko eliqakathekileko elenzekileko: UZimu gade sele akhethe ibandla lobuKrestu elitjha eliqeda ukwakhiwa watjhiya u-Israyeli. Labo abagade bafuna ukukhonza uZimu ngendlela eyamukelekako nje, bekufuneka babe balandeli bakaKrestu.
Kuthe kusesenjalo, ukuphikiswa kwarhagala. Amanaba afaka abafundi ejele. Kodwana phakathi nobusuku, ingilozi kaJehova yavula iminyango yejele begodu yatjela abafundi bona baragele phambili nokutjhumayela. Ngamasa, abafundi baragela phambili nokutjhumayela. Bangena etempeleni begodu bathoma ukufundisa ngeendaba ezihle ezimalungana noJesu. Labo egade baphikisana nekholo labo bebasilingekile, begodu babalayela bona balise ukutjhumayela. Ngesibindi abapostoli baphendula bathi: “Kujamele bona simhloniphe uZimu kunabantu.”—IZenzo 5:28, 29.
Ukutlhoriswa kwadlanga. AmaJuda athileko amangalela umfundi uSidefani bona ukhulume kumbi begodu bamkghadlha ngamatje bewafa. Indoda eseseyitja—uSawula weTarsusi—bekakuqalile lokho, begodu bekavumelana nokubulawa kwakhe. Wakhamba waya eDamaseku ukuyokubopha nanyana ngubani omlandeli kaKrestu. Njengombana uSawula gade asendleleni akhamba, kwavela umkhanyo ezulwini wamphazimela mahlangothi woke begodu wezwa ilizwi lithi: “Sawula, Sawula, ungizumelani na?” Aphophele ngebanga lokubethwa mkhanyo, uSawula wabuza wathi: “Ungubani wena?” Kwaphendula ilizwi lathi: “NginguJesu.”—IZenzo 9:3-5.
Ngemva kwamalanga amathathu uJesu wathumela umfundi ibizo lakhe okungu-Ananiyasi bona ayokususa ubuphofu bakaSawula. USawula wabhabhadiswa begodu wathoma ukutjhumayela ngesibindi ngoJesu. Ngemva kwalokho uSawula waba ngumpostoli uPowula begodu waba lilungu lebandla lobuKrestu elitjhisekako.
Abafundi bakaJesu gade balokhu batjhumayela iindaba ezihle ezimalungana noMbuso kaZimu kumaJuda namaSamariya kwaphela. Ingilozi yavela kuKorneliyasi, umphathi webutho lamaRoma osaba uZimu, yamtjela bona athumele abantu bona bayokuthatha umpostoli uPitrosi. Aphekelelwa ngabanye, uPitrosi watjhumayela kuKorneliyasi nomndenakhe. Lapho uPitrosi asakhuluma, umoya ocwengekileko wehlela phezu kwamakholwa angasiwo amaJuda, begodu uPitrosi wathi babhabhadiswe ngebizo lakaJesu. Indlela eyisa ekuphileni okungapheliko besele ivulekele abantu bazo zoke iintjhaba. Ibandla besele likulungele ukurhatjha iindaba ezihle kude begodu kabanzi.
—Isekelwe encwadini yeZenzo 1:1–11:21.
◼ Kwenzekani phakathi noMnyanya wePentekosi?
◼ Amanaba asabela njani ekutjhumayeleni kwabafundi bakaJesu?
◼ Indlela eya ekuphileni okungapheliko yabavulekela njani abantu bazo zoke iintjhaba?
[Itjhadi ekhasini 25]
Genesisi
Eksodosi
Lefitikosi
Numeri
Duteronomi
Joshuwa
Abahluleli
Rude
1 Samuweli
2 Samuweli
1 Amakhosi
2 Amakhosi
1 Imilando
2 Imilando
Ezra
Nehemiya
Esta
Jobhi
AmaRhalani
Iziyema
Umtjhumayeli
Irhubo lamarhubo
Isaya
Jeremiya
Isililo
Ezekiyeli
Danyela
Hosiya
Juweli
Amosi
Obadiya
Jona
Mika
Nahumi
Habakuki
Zefaniya
Hagayi
Zakariya
Malaki
Matewu
Markosi
Luka
Jwanisi
IZenzo ●
KwebeRoma
1 KwebeKorinte
2 KwebeKorinte
KwebeGalatiya
Kwebe-Efesu
KwebeFilipi
KwebeKholose
1 KwebeTesalonika
2 KwebeTesalonika
1 kuThimothi
2 kuThimothi
KuTitosi
KuFilimoni
KumaHebheru
KaJakobosi
1 KaPitrosi
2 KaPitrosi
1 KaJwanisi
2 KaJwanisi
3 KaJwanisi
KaJuda
ISambulo