Ingcenye 21

UJesu Sele Avusiwe!

UJesu uzibonakalisa kubafundi bakhe bona abalaye begodu abakhuthaze

ABANYE abafazi egade babafundi bakaJesu bafumana bona ilitje ebeligubuzese ithuna lakaJesu gade lisusiwe ngelanga lesithathu, ngemva kokuhlongakala kwakhe. Ngaphezukwalokho ithuna belinganalitho!

Kwafika iingilozi eembili, enye yathi: “Nifuna uJesu weNazareda. . . . Uvukile.” (Markosi 16:6) Ngaphandle kokuriyada, abafazaba bagijima bona bayokutjela abafundi bakaJesu. Basese sendleleni bahlangana noJesu. Wathi kibo: “Ningasabi, khambani notjela abafowethu bonyana bazangifumana eGaleliya, lapho bazangibona khona.”—Matewu 28:10.

Ngokukhamba kwesikhathi ngalo lona ilangelo, abafundi bakaJesu ababili basuka eJerusalema baya endaweni ye-Emawusi. Umuntu othileko, wakhamba nabo begodu wababuza nokobana gade bakhuluma ngani. Eqinisweni umuntu lo, gade kunguJesu ovusiweko, ovele ngobujamo abangabaziko. Batjengisa ubuso bokudana baphendula bathi, gade bakhuluma ngoJesu. Umuntu lo, wathoma ukukhuluma ngayo yoke iMitlolo emalungana noMesiya. Kwamambala, uJesu besele asizalisile isiphorofido sakaMesiya njengombana sabikezelwa.a Lapho abafundi bakaJesu balemuka bona umuntu lo, nguJesu ovusiweko njengomoya, wanyamalala.

Abafundi ababilaba bakaJesu msinyana babuyela eJerusalema. Nabafika lapho bafumana abanye godu abafundi bakaJesu bahlangene bavale neminyango. Kuthe abafundi ababilaba nabasalandisa abahlangene nakho, uJesu wavela. Qala bona barareka kangangani abafundi bakhe, begodu khenge bayikholelwa nento egade bayibona! UJesu wababuza: “Nisabelani na? . . . Nakhu okutloliweko: UKrestu kufanele atlhage, avuke kwabafileko ngemva kwamalanga amathathu.”—Luka 24:38, 46.

Ngemva kwamalanga ayi-40 okuvuswa kwakhe, uJesu wazibonakalisa kubafundi bakhe ezehlakalweni ezingafaniko. Kwesinyeisehlakalo, wazibonakalisa kwabayi-500! Kungenzeka esehlakalwenesi, kula abanikela isabelo esiqakatheke khulu: “Khambani-ke, niye ebantwini boke nanyana kukuphi nibenze abafundi; . . . nibafundise ukwenza koke, enginilaye ngakho. Yazini bona ngizahlala nginani njalo, bekube sekupheleni kwesikhathi.”—Matewu 28:19, 20.

Emhlanganweni wakhe wamaswaphela nabafundi bakhe abayi-11 abathembekileko, uJesu wabathembisa wathi: ‘Kodwana nizaba namandla bona ningenwe ngumoya ocwengileko, benizaba bofakazi bami, . . . kufikela emaqintelweni wephasi.’ (IZenzo 1:8) Ngemva kwalokho uJesu wakhuphuka, begodu ilifu labavimbela bona bangamboni nakakhuphukela ezulwini.

—Isekelwe encwadini kaMatewu isahluko 28; uMarkosi isahluko 16; uLuka isahluko 24; uJwanisi izahluko 20 begodu no 21; 1 KwebeKorinte 15:5, 6.

[Umtlolo waphasi]

◼ Abafundi bakaJesu bafumana bunjani bona uZimu sele amvusile uJesu?

◼ Yini uJesu ayihlathululela abafundi bakhe ababili endleleni eya-Emawusi?

◼ Ngiziphi iinlayezo uJesu azinikela abafundi bakhe ngaphambi kokobanyana akhuphukele ezulwini?

[Ibhoksi elisekhasini 24]

UMOYA OCWENGEKILEKO

Umoya ocwengekileko kaZimu umumoya onamandla amakhulu ezulwini nephasini. UJehova uZimu waberegisa umoya wakhe, namtjhana amandlakhe, bona adale amazulu nephasi begodu waphefumulela nokutlolwa kweBhayibhili. Umoya lo, ngiwo owabangela immangaliso esele sifunde ngazo bekube nje, kuhlanganise immangaliso ekulu ukuzidlula zoke—ukuvuswa kwakaJesu Krestu njengesibunjwa somoya esikhulu.—kuGenesisi 1:2; 2 KaSamuweli 23:2; IZenzo 10:38; 1 KaPitrosi 3:18.

[Itjhadi ekhasini 24]

Genesisi

Eksodosi

Lefitikosi

Numeri

Duteronomi

Joshuwa

Abahluleli

Rude

1 Samuweli

2 Samuweli

1 Amakhosi

2 Amakhosi

1 Imilando

2 Imilando

Ezra

Nehemiya

Esta

Jobhi

AmaRhalani

Iziyema

Umtjhumayeli

Irhubo lamarhubo

Isaya

Jeremiya

Isililo

Ezekiyeli

Danyela

Hosiya

Juweli

Amosi

Obadiya

Jona

Mika

Nahumi

Habakuki

Zefaniya

Hagayi

Zakariya

Malaki

● Matewu

● Markosi

● Luka

● Jwanisi

IZenzo

KwebeRoma

1 KwebeKorinte

2 KwebeKorinte

KwebeGalatiya

Kwebe-Efesu

KwebeFilipi

KwebeKholose

1 KwebeTesalonika

2 KwebeTesalonika

1 kuThimothi