UKUTHOMISA IKULUMISWANO
ISIFUNDO 2
Vumela Ikulumiswano Izenzakalele
Ikambisolawulo: “Qala bona lihle kangangani ilizwi elikhulunywe ngesikhathi esifaneleko!”—IzA. 15:23.
Lokho UFlebhe Akwenzako
1. Bukela IVIDIYO, namkha ufunde izEnzo 8:30, 31. Ngemva kwalokho uphendule imibuzo elandelako:
UFlebhe wayithoma njani ikulumiswano?
Kubayini indlela uFlebhe enze ngayo yavumela ikulumiswano bona izenzakalele begodu wakghona ukufundisa indoda leyo into etja?
Khuyini Esiyifunda KuFlebhe?
2. Nasivumela ikulumiswano bona izenzakalele, kuba bulula ngomunye umuntu ukuthi atjhaphuluke bekazimisele ukulalela umlayezwethu.
Lingisa UFlebhe
3. Tjhejisisa. Indlela umuntu aqaleka ngayo ebusweni nangendlela ajame ngayo ingakutjela okunengi ngaye. Kghani umuntu lo uyakufuna ukukhuluma nawe? Ungakhuluma ngokuthileko okuseBhayibhelini ngokuthoma ngokumbuza ukuthi, “Kghani bewazi ukuthi . . . ?” Kubalekele ukukatelela umuntu ongafuni ukukhuluma.
4. Bekezela. Ungazizwa ukatelelekile ukuthi kufuze ukhulume ngeBhayibheli khonokho. Linda isikhathi esifaneleko sokuyithula ngendlela yokuthi ikulumiswano izenzakalele. Ngezinye iinkhathi, lokho kungatjho ukulinda bekube ngelinye ilanga lapho uzokuba nethuba lokukhuluma nomuntu loyo.
5. Zivumelanise nobujamo. Umuntu angathoma ukukhuluma ngento ezokurara namkha ebewungakayilindeli. Yeke zimisele ukucoca ngokuthileko okuzokuvumelana nobujamo bomuntu loyo, ngitjho nanyana lokho kungatjho ukucoca ngamaqiniso weBhayibheli ahlukileko kunalawo ebewunawo engqondweni.