U-Arhostosi Uzokuba Yinyanga Yomlando Womsebenzi!
Iphetjhana Elitjha Elizabe Likhanjiswa Ephasini Mazombe
1. Ngiliphi ijima elikhethekileko elizokubanjwa ephasini mazombe njengombana sizokuhlanganisa iminyaka eli-100 yomBuso?
1 Iminyaka eli-100 yokubelethwa komBuso kaZimu iyatjhidela. Qala bona kufaneleka kangangani bona sidumise uJehova ngokuhlanganyela ejimeni elikhethekilekweli! Hlangana nenyanga ka-Arhostosi sizokuhlanganyela ejimeni lephasi mazombe lokukhambisa iphetjhana elitjha elinesihloko esithi, Singazifumanaphi Iimpendulo Zemibuzo Eqakatheke Khulu Epilweni? Iphetjhaneli likhuthaza abafundi bona baqale iimpendulo eBhayibhelini begodu lihlathulula nendlela i-jw.org/nr engabasiza ngayo.
2. Singahlanganyela njani ‘ekurhuweleleni okukhulu kokudumisa uJehova’ okuzokuba ngo-Arhostosi?
2 Ukurhuwelela Okukhulu Kokudumisa: Ukusiza abarhuweleli bona bandise ikonzo yabo, kwenziwe ilungiselelo elikhethekileko bona nanyana ngubani ofuna ukungenela ubuphayona besigiyani ngenyanga ka-Arhostosi abungenele. Hlangana nenyanga leyo, abarhuweleli ababhabhadisiweko bazokuvunyelwa bona bangaphayona benze ifuneko yama-awara ama-30. Njengombana u-Arhostosi anaboLesihlanu, aboMgqibelo, naboSondarha abahlanu, abarhuweleli abanengi abasebenza umsebenzi wokuziphilisa namtjhana abangena isikolo phakathi neveke bangakghona ukungenela ubuphayona besigiyani. Nengabe unesifundo seBhayibheli esithuthukako namtjhana umntwana ongathabela ukuba mrhuweleli, khuluma nomthintanisi wesihlopha sabadala msinyana. Qala bona kuzokukhuthaza kangangani ngabanjalo ukuhlanganyela nathi njengabarhuweleli hlangana nenyanga eqakathekileko le! Nanyana amaphayona amanengi wesikhathi esizeleko aphumula ngenyanga ka-Arhostosi ngemva kokuhlanganisa ifuneko yama-awara wawo womnyaka, angakghona ukuhlela ukwenzela bona ahlanganyele ngokuzeleko ejimeni elikhethekilekweli. Kwanje sikhathi sokobana imindeni icoce ngendlela ezokuhlanganyela ngayo ‘ekurhuweleleni okukhulu kokudumisa uJehova’ okuzokuba ngo-Arhostosi.—Ezr. 3:11; IzA. 15:22.
3. Ngiliphi ithemba esinalo ngejima elikhethekilekweli?
3 Nanyana sakhe sahlanganyela ejimeni elifanako ngaphambilini, sithemba bona leli lizokuqopha umlando. Singakghona na ukufikelela inani elitjha lama-awara, abarhuweleli, amaphayona wesigiyani hlangana nenyanga ka-Arhostosi? Njengombana siqeda umnyaka wekonzo ka-2014, kwanga uJehova angabusisa imizamo yabantu bakhe ephasini mazombe yokwenza inyanga ka-Arhostosi ibe yinyanga ekulu yokufakaza!—Mat. 24:14.