Kghani Uzokuba LiPhayona LeSigiyani?
1. Kubayini isikhathi sesiKhumbuzo kusikhathi esihle sokwandisa ikonzwethu?
1 Isikhathi sesiKhumbuzo sikhathi esihle sokwandisa ikonzwethu. Sikhathi lapho sibona khona ithando lakaJehova elikhulu ngokunikela ngeNdodana yakhe njengesihlengo. (Jwa. 3:16) Nathi sithaba khulu ngalokho uJehova asenzele khona, begodu lokhu kusenza sikhulise isifiso sethu sokutjela abanye ngoJehova nangalokho akwenzela isintu. (Isa. 12:4, 5; Luka 6:45) Godu sikhathi lapho sithabela khona ijima elikhethekileko lokumema abangani nabantu abasesimini bona bazokuhlanganyela nathi esiKhumbuzweni. Ngemva kwalokho, kufuze silinge ukuhlawulela ikareko yalabo ebebakhona esiKhumbuzweni. Kghani ungandisa ikonzwakho ngokuba liphayona lesigiyani ngoMatjhi, ngo-Apreli nofana ngoMeyi?
2. Kubayini uMatjhi ayinyanga ehle khulu yobuphayona besigiyani?
2 Yenza INyanga KaMatjhi Ibe NgeKhethekileko: UMatjhi uzokuba yinyanga ekhethekileko yobuphayona besigiyani. Labo abafaka isibawo bangakhetha bona bangenza ifuneko yama-awara ama-30 namtjhana ama-50. Nengabe nikhanjelwe mbonisi wesifunda hlangana nenyanga kaMatjhi, amaphayona wesigiyani angahlanganyela kiwo woke umhlangano azabe anawo namaphayona wesikhathi esizeleko nakhethekileko. Ijima lokukhambisa iimemo zesiKhumbuzo, esizokubanjwa ngeLesibili ngoMatjhi 26, 2013, liluliwe kuneminyaka egadungileko begodu lizokuthoma ngoMatjhi 1. Ukungezelela kilokho, uMatjhi uneemveke ezihlanu ezipheleleko. Ngalokho kungaba kuhle bona ukucabangele ukwenza inyanga le ibe ngekhetheke khulu emnyakeni.
3. Singahlela njani bona sandise ikonzwethu?
3 Hlela Nje: Nje sikhathi sokubuyekeza ihlelo lakho begodu uqale bona ngimaphi amatjhuguluko atlhogekako bonyana ukghone ukuphayona. Ukubambisana komndeni kuqakathekile, ngalokho sebenzisani isikhathi sokuKhulekela komNdeni bona nicoce ngeminqopho yomndenenu begodu nenze nehlelo. (IzA. 15:22) Nengabe angeze wakghona ukuphayona, ungadani. Ungakghona na ukutjhentjha ihlelo lakho bona usebenze isikhathi eside ngamalanga ophume ngawo? Ungakghona na ukuya esimini ilanga elilodwa phakathi neveke?
4. Ngiziphi iinzuzo esizozifumana nasandisa ikonzwethu ngoMatjhi, ngo-Apreli nangoMeyi?
4 Njengombana sandisa ikonzwethu ngoMatjhi, ngo-Apreli nangoMeyi, sizokufumana ithabo nokwaneliseka ekukhonzeni uJehova nokupha abanye. (Jwa. 4:34; IzE. 20:35) Okuqakatheke khulu, imizamwethu yokuzinikela izokuletha ithabo kuJehova.—IzA. 27:11.