Isikhathi SeSikhumbuzo—Lithuba Lokwandisa Ikonzo!
1. Ngimaphi amabanga esinawo wokucabangela ukwandisa ikonzwethu ngoMatjhi, ngo-Apreli nangoMeyi?
1 Ungayandisa na ingcenye yakho ekonzweni ngesikhathi seSikhumbuzo esizako? Abanye abarhuweleli bazokufumana amawolideyi emsebenzini namtjhana esikolweni abangawasebenzisela ikonzo. Kusukela ngo-Apreli 2, sizokuthabela ijima elikethekileko lokumema abantu abanekareko bona babe nathi eSikhumbuzweni ngo-Apreli 17. Ngomgqibelo ngo-Apreli 16, sizokuba neLanga lakaMagazini elikhethekileko. Ngemva kweSikhumbuzo, sizokulinga ngamandla ukuvusa ikareko yalabo ezabe bakhona begodu sibamemele ekulumweni ekhethekileko ezokubekwa ngeveke ka-Apreli 25. Kwamambala, kunamabanga amanengi wokucabangela ukwandisa ikonzwethu ngoMatjhi, ngo-Apreli nangoMeyi.
2. Ngiyiphi enye indlela ehle khulu yokwenza okungeziweko ekonzwenethu?
2 Ubuphayona Besigiyani: Enye indlela ehle khulu yokwenza okungeziweko kukuba yiphayona lesigiyani. Njengombana soke simajadujadu, lokhu kutlhoga ukuhlela kusesenesikhathi nokwenza amatjhuguluko emahlelwenethu. (Iziy. 21:5) Mhlamunye ungatshwilisa eminye imisebenzi ohlale uyenza ngamalanga. (Fil. 1:9-11) Kubayini ungatjengisi abanye ebandleni itjiseko yakho yokuphayona ubone bonyana angeze bahlanganyela nawe njengephayona lesigiyani?
3. Iimndeni ingakuhlela njani ukwenza okungeziweko ekonzwenawo?
3 EkuKhulekeleni Komndeni okulandelako, kungaba kuhle ukucoca ngeemnqopho yenu njengomndeni. (Iziy. 15:22) Ngokubambisana, mhlamunye abanye namtjhana amalungu womndeni angeziweko angaba maphayona inyanga eyodwa namtjhana ezimbalwa. Kuthiwani nengabe uzimisele kodwana awukghoni? Umndeni ungenza ilungiselelo lokwandisa ikonzwawo ngokuhlanganyela esimini ngezinye iinkhathi ntambama namtjhana ngokusebenza isikhathi eside ngeempela veke.
4. Ngiziphi iimbusiso ozozifumana ngokwandisa ikonzwakho ngesikhathi seSikhumbuzwesi?
4 UJehova utjheja koke esikwenzako bona simkhonze begodu uyakuthokozela ukuzinikela kwethu. (Heb. 6:10) Ithabo lifumaneka ngokupha uJehova nabanye. (1 Mil. 29:9; IZe. 20:35) Ungakghona ukwandisa ikonzwakho ngesikhathi seSikhumbuzwesi begodu ufumane ithabo elikhulu neembusiso ezihle?