Yenza Isikhathi SesiKhumbuzo Sibe Ngesithabisako!
1. Ngiyiphi enye indlela esingandisa ngayo ithabo lethu hlangana nesikhathi sesiKhumbuzo?
1 Ungathanda na ukwandisa ithabo lakho hlangana kwakaMatjhi, kwaka-Apreli noMeyi? Enye indlela ongakwenza ngayo lokhu kukwandisa ukutjhumayela kwakho, nakukghonakalako ube liphayona lesigiyani. Lokhu kuzolingezelela njani ithabo lakho?
2. Ukutjhumayela ngokungeziweko kuzolandisa njani ithabo lethu?
2 Yandisa Ithabo Lakho: UJehova wasenza bona sithabe begodu saneliseke ngokumkhonza njengombana sizalisa itlhogwethu engokomoya esibelethwe nayo. (Mat. 5:3) Godu wasitlama ngendlela yokobana sithabe nasipha abanye. (IzE. 20:35) Ukutjhumayela kusivumela bona sikwenze kokubili—sikhonze uZimu nokobana sisize abantu. Ngalokho kulindelekile bona nasihlanganyela ngokungeziweko ekonzweni nethabo lethu lizokwanda. Ukungezelela kilokho, nasitjhumayela ngokungeziweko, namakghonwethu azokuloleka. Njengombana sifumana amakghono, sakha ukuzithemba begodu sinciphisa nokuthukwa. Sizokuba namathuba amanengi wokunikela ubufakazi nokuthomisa iimfundo zeBhayibheli. Koke lokhu kwenza ukutjhumayela kuthabise khulu.
3. Kubayini uMatjhi no-Apreli kuzokuba ziinyanga ezihle ngokukhethekileko zokuthatha ubuphayona besigiyani?
3 UMatjhi no-Apreli kuzokuba ziinyanga ezihle ngokukhethekileko zokuthatha ubuphayona besigiyani ngombana singakhetha bona sihlanganisa ifuneko yama-awara ama-30 namkha ama-50. Ukungezelela kilokho, ukuthoma ngoMgqibelo, kaMatjhi 22, ukuragela phambili bekufike uMvulo wesiKhumbuzo, ka-Apreli 14, sizokuhlanganyela ejimeni elithabisakweli lokumemela abanye bona babekhona esiKhumbuzweni. Ngethabo amabandla azokuba majadu njengombana abanengi bazabe basebenza ‘ngokubambisana’ ukuhlanganisa isimu enengi ngendlela ekungakghonakala ngayo ngesikhathi esibekiweko. —Zef. 3:9.
4. Yini ekufuze siyenze nasifuna ukuthatha ubuphayona besigiyani?
4 Lungiselela Nje: Nawungakanzi njalo, hlela isikhathi uhlole ihlelo lakho ubone bonyana ngiwaphi amatjhetjho ongawenza ukwenzela bona wandise ikonzwakho inyanga eyodwa namkha ezingeziweko. Thandaza ngendaba leyo. (Jak. 1:5) Khuluma ngayo nomndenakho nabanye ebandleni. (IzA. 15:22) Uzokufumana bona naphezu kweentjhijilo zepilo nokusebenza isikhathi esizeleko, nawe ungaba nethabo elifumaneka ngokuthatha ubuphayona besigiyani.
5. Uzokuba yini umphumela wokwandisa ikonzwethu ngesikhathi sesiKhumbuzwesi?
5 UJehova ufuna abakhulekeli bakhe bona bathabe. (Rhu. 32:11) Nasisebenza ngamandla bona sandise ikonzwethu ngesikhathi sesiKhumbuzwesi, angekhe sandise ithabo lethu kwaphela, sizokuthabisa noBabethu wezulwini.—IzA. 23:24; 27:11.