Imibuzo Evela Ebafundini

Bekatjho ukuthini umtloli wezAga 30:​18, 19 nakathi, ‘Indlela yendoda nayinentombi,’ ‘irara’ khulu?

Banengi abantu abangawuzwisisi umtlolo lo, kuhlanganise nabantu abazizazi zeBhayibheli. Umtlolo lo nasiwufunda uwoke eBhayibhelini ImiTlolo ECwengileko uthi, “Kunezinto ezintathu ezingirarako, begodu kunezine engingazizwisisiko: Indlela yekhozi ezulwini, indlela yenyoka elitjeni, indlela yomkhumbi elwandle elivulekileko, nendlela yendoda nayinentombi.”—IzA. 30:​18, 19.

Phambilini besizwisisa amezwi athi, ‘indlela yendoda nayinentombi’ ngokuthi akusimamezwi amahle. Kubayini? Umongo wendaba le uveza izinto ezingakhiko begodu awutjho ‘okwaneleko.’ (IzA. 30:​15, 16) Ivesi 20 likhuluma ‘ngomfazi ofebako’ othi akakenzi litho elimbi. Yeke, besicabanga bona iveseli belitjho izinto azenzako kodwana abanye bangazi ngazo. Besicabanga bona njengombana ikhozi liphapha phezulu emkayi namkha inyoka ekhamba hlangana namatje namkha isikepe esikhamba phakathi elwandle, indoda ingenza izinto kodwana abanye bangazi ngazo. Kungebangelo besicabanga ukuthi amagama athi ‘indlela yendoda nayinentombi’ bekaqalisele ezintweni ezisilapheleko nokuthi bekakhuluma ngendoda eganukeja intombi ukwenzela bona itjhinge nayo emabhayini kodwana intombi leyo ingalemuki bona kwenzekani.

Nanyana kunjalo, kunamabanga amahle asenza sikholwe ukuthi amavesi la akhuluma ngezinto ezihle. Umtloli weveseli bekathatjiswa zizinto ebekakhuluma ngazo.

IsiHebheru sakade sisekela umbono wokuthi amavesi la akhuluma ngezinto ezihle. Ngokuya ngokwe-Theological Lexicon of the Old Testament, ibizo lesiHebheru ngesiNdebele elitjhugululwe ngokuthi ‘ezirara’ khulu emtlolweni wezAga 30:18 “uveza isenzakalo lapho umuntu . . . afumana into ethileko irara, kungasi bulula ukuthi ingenzeka namkha iyihle khulu.”

UPhrofesa Crawford H. Toy we-Harvard University e-United States naye uthi iveseli alikhulumi ngezinto ezimbi. Uthi, “Umtloli lo ukhuluma ngobuhle bezinto ezibalwe evesineli.”

Yeke, singatjho ukuthi amezwi akuzAga 30:​18, 19 ahlathulula izinto ezihle khulu, okubonakala kubudisi ukuthi zingenzeka. Njengomtloli weveseli, nathi iyasirara indlela ikhozi elikghona ukuphapha ngayo, indlela iinyoka nanyana zingananyawo ezikghona ukurhurhuba phezu kwelitje ngayo, indlela isikepe esisindako esikghona ukukhamba phezu kwamanzi ngayo nendlela indoda nomfazi abakghona ukuthandana ngayo begodu bahlala ndawonye bathabile.