Imibuzo Evela Ebafundini
Ngimuphi ‘umcabango’ uJehova azowufaka eenhliziyweni zaborhulumende ingasi kade?
Malungana nokuthoma kwesizi elikhulu, isAmbulo 17:16, 17 sithi, “Iimpondo ezilitjhumi ozibonileko nesibandana, zizoyihloya ingwadla ziyitjhabalalise beziyihlubulise begodu zizokudla inyamayo ngokupheleleko ziyitjhise ngomlilo. Ngombana uZimu ukufake eenhliziyweni zabo ukuthi benze ngokomcabangwakhe, iye, bona benze ngokuvumelana nomcabangwakhe ngokuthi banikele isibandana umbuso.” Esikhathini esidlulileko iincwadi zethu bezithi, ‘umcabango’ uJehova azowufaka eenhliziyweni zaborhulumende kukuthi kutjhatjalaliswe ikolo yamala.
Nanyana kunjalo, kunokulungiswa okutlhogekako. ‘Umcabango’ uJehova azowufaka eenhliziyweni zeentjhaba, ngewokuthi zinikele “isibandana umbuso.” Bona uzwisise kuhle bona lokhu kuzaliseka njani, cabanga ngemibuzo elandelako.
Abantu abasesiphorofidwenesi bajamele abobani? “Ingwadla” ibizwa nangokuthi “iBhabhiloni eliKhulu” ijamele umbuso wephasi loke wekolo yamala. ‘Isibandana esibovu be’ sijamele ukuthula kwehlangano eyathoma ukusebenza ngo-1919 njenge-League of Nations nje eyaziwa ngokuthi yi-United Nations. (IsAm. 17:3-5) ‘Iimpondo ezilitjhumi’ zijamele woke amandla karhulumende asekela isibandana semmangweni.
Iingwadla nesibandana zihlobana njani? Ingwadla ‘ihlezi phezu’ kwesibandana, isekela isibandanesi beyilinga ukusilawula nokusenza bona sikghone ukwenza lokho okufuna yingwadla le.
Kuzokwenzekani ngengwadla le? ‘Iimpondo ezilitjhumi’ nesibandana, ‘zizoyihloya ingwadla.’ Zizokutjengisa ukuthi ziyihloye kangangani ingwadla le ziyithathele umnothwayo ziveze nokukhohlakala kwayo. Zizokutjhabalalisa ingwadla le njengombana lokho kumnqopho kaJehova. (IsAm. 17:1; 18:8) Lokho kuzokuba siphelo sazo zoke iinkolo zamala. Nanyana kunjalo, ngaphambi kobana lokho kwenzeke, uJehova uzokwenza into engakhange kheyenzeke ngaphambilini.
Khuyini uJehova azokubangela bona iintjhaba izenze? Ehliziyweni yeempondo ezilitjhumi uzokufaka ‘umcabangwakhe’ okutjho ukuthi ‘uzokunikela amandla nelawulo lawo esibandaneni esibovu be’ i-United Nations. (IsAm. 17:13) Cabanga ngokuthi lokhu kutjho ukuthini. Lokho kutjho ukuthi angekhe kube yinto urhulumende ayicabangako ukuthi anikele amandlawo wokubusa nelawulo esibandaneni. Isiphorofidwesi ngokwaso sitjengisa bona nguJehova ngokwakhe ozokwenza aborhulumendaba benze lokho. (IzA. 21:1; madanisa no-Isaya 44:28.) Kghani lokhu kuzokwenzeka kancanikancani? Awa! Lokhu kuzokwenzeka msinyana. Ngemva kwalokho, isibandana sizokutjhabalalisa ngokupheleleko zoke iinkolo zamala.
Khuyini esingayilindela? Akukafuzi silindele iindaba ezitjengisa ukuthi kancanikancani urhulumende usekela i-United Nations. Kufuze silindele lokhu: Msinyana uJehova uzokwenza boke aborhulumende banikele amandla nelawulo esibandaneni. Lokho nakwenzeka kufuze sazi ukuthi isizi elikhulu sele litjhidele. Okwanje, “asihlaleni siphapheme begodu siqaqulukile” ngombana itjhuguluko sele liseduze!—1 Thes. 5:6.