Incwadi YesAmbulo​—Itjho Ukuthini?

Ipendulo yeBhayibheli

Igama lesiGirigi lencwadi yesAmbulo elithi, A·po·kaʹly·psis (imbubhiso), litjho “Ukuvumbulula” namkha “Ukuveza.” Igameli litjengisa okutjhiwo sisAmbulo, esiveza iindaba ebezisolo zifihlekile begodu siveza izenzakalo ebezizokwenzeka ngemva kwesikhathi eside sitloliwe. Iimphorofido ezinengi ezivela encwadini le zisazokuzaliseka.

Okusencwadini yesAmbulo

• Isethulo.​—IsAmbulo 1:1-9.

• Imilayezo kaJesu eya emabandleni alikhomba.​—IsAmbulo 1:10–3:22.

• Umbono kaZimu asesihlalweni sakhe sobukhosi ezulwini.​—IsAmbulo 4:1-11.

• Imilandelande yemibono, omunye ulandela omunye:

  • Amatshwayo alikhomba.​—IsAmbulo 5:1–8:6.

  • Iimbhorompita ezilikhomba, ezintathu zokugcina zibikezela abomaye abathathu.​—IsAmbulo 8:7–14:20.

  • Izitja ezilikhomba, ngasinye sinesibetho esijamele isahlulelo sakaZimu ebesizokwehlela iphasi.​—IsAmbulo 15:1–16:21.

  • Imibono yokutjhatjalaliswa kwamanaba kaZimu.​—IsAmbulo 17:1–20:10.

  • Imibono yeembusiso ezivela kuZimu zezulwini nephasini.​—IsAmbulo 20:11–22:5.

• Isiphetho.​—IsAmbulo 22:6-21.

Iindlela zokuzwisisa incwadi yesAmbulo

1. Okutjhiwo sisAmbulo kuhle, akuthusi namkha kwenze labo abalotjha uZimu basabe. Nanyana abanengi bahlanganisa ibizo elithi “imbubhiso” nehlekelele ekulu, incwadi yesAmbulo ithoma begodu iphetha ngokuthi labo abafundako, bazwisise bebasebenzise lokho abakufundako bazokuthaba ngokwenza lokho.​—IsAmbulo 1:3; 22:7.

2. IsAmbulo sisebenzisa “amatshwayo” amanengi ekungakafuzi siwathathe ngendlela angayo.​—IsAmbulo 1:1.

3. Izinto ezinengi ezikulu namatshwayo encwadini yesAmbulo kukhulunywa ngazo ekuthomeni eBhayibhelini:

   • UJehova​— ‘uZimu weqiniso ezulwini’ noMdali wazo zoke izinto.​—Duteronomi 4:39; IRhubo 103:19; IsAmbulo 4:11; 15:3.

   • UJesu Krestu​—“iMvana kaZimu.”​—Jwanisi 1:29; IsAmbulo 5:6; 14:1.

   • USathana uDeveli​—inaba lakaZimu.​—Genesisi 3:14, 15; Jwanisi 8:44; IsAmbulo 12:9.

   • IBhabhiloni eliKhulu​—njengeBhabhiloni lakade (iBhabheli), linaba lakaJehova uZimu nabantu bakhe begodu limthombo wamala afundiswa ziinkolo.​—Genesisi 11:2-9; Isaya 13:1, 11; IsAmbulo 17:4-6; 18:4, 20.

   • ‘Ilwandle’​—babantu abakhohlakeleko abaphikisana noZimu.​—Isaya 57:20; IsAmbulo 13:1; 21:1.

   • Izinto ezifana nalezo ebezisetjenziswa ethaberinakeli lakade ebelisetjenziselwa ukulotjha uZimu, kuhlanganise nomfaji wesivumelwano, ilwandle lerhalasi (isitja sokuhlambela) iimbani, imihlatjelo yepepho ne-aldara lemihlatjelo.​—Eksodusi 25:10, 17, 18; 40:24-32; IsAmbulo 4:5, 6; 5:8; 8:3; 11:19.

   • Iimbandana​—zijamele aborhulumende babantu.​—Danyela 7:1-8, 17-26; IsAmbulo 13:2, 11; 17:3.

   • Iinomboro zisetjenziswe ngokomfanekiso.​—IsAmbulo 1:20; 8:13; 13:18; 21:16.

4. Imibono isebenza “elangeni leKosi,” elathoma nakujanyiswa umBuso kaZimu ngo-1914 begodu uJesu wathoma ukubusa njengeKosi. (IsAmbulo 1:10) Yeke singalindela ukuzaliseka okukhulu kwesAmbulo esikhathini sethu.

5. Ukuzwisisa incwadi yesAmbulo, sitlhoga izinto ezifanako ezisisiza sizwisise iBhayibheli liloke, kuhlanganise nokuhlakanipha okuvela kuZimu nesizo lalabo esele bayizwisisa.​—IzEnzo 8:26-39; Jakopo 1:5.