Kghani UZimu Ukiyo Yoke Indawo, eZulwini nePhasini?
Ipendulo yeBhayibheli
UZimu ubona koke begodu ungenela la afuna khona. (IzAga 15:3; Hebheru 4:13) Nanyana kunjalo, iBhayibheli alifundisi ukuthi uZimu ukhona koke—okutjho ukuthi ukiyo yoke into. Kunalokho, litjengisa ukuthi umumuntu begodu unendawakhe yokuhlala.
UZimu unjani: UZimu mumuntu wommoya. (Jwanisi 4:24) Akabonakali ebantwini. (Jwanisi 1:18) Imibono ngoJehova etlolwe eBhayibhelini itjengisa ukuthi unendawo ethileko ahlala kiyo. Alimvezi ukuthi ukiyo yoke indawo.—Isaya 6:1, 2; IsAmbulo 4:2, 3, 8.
Indawo kaZimu yokuhlala: UZimu uhlala endaweni yommoya, okuyindawo ehluke khulu kunephasini. Endaweni le, uZimu ‘unendawakhe yokuhlala esezulwini.’ (1 AmaKhosi 8:30) IBhayibheli liveza ukuthi kunelanga la iingilozi ‘zaziveza phambi’ kwakaJehova,a lokho kutjengisa ukuthi uZimu unendawo ahlala kiyo ngokunqophileko.—Jobho 1:6.
Nangabe uZimu akasikiyo yoke indawo, inga-kghani unendaba nami?
Iye. UZimu unendaba khulu nawo woke umuntu. Nanyana ahlala endaweni yommoya, uZimu uyabatjheja begodu uyabatlhogomela labo abasephasini abafuna ukumthabisa. (1 AmaKhosi 8:39; 2 IinKronike 16:9) Cabanga ngendlela uJehova atjengisa ngayo ukuthi unendaba kangangani ngalabo abamlotjha ngokusuka ehliziyweni:
Nawuthandazako: Nawuthoma ukuthandaza uJehova uwuzwa khonokho umthandazwakho.—2 IinKronike 18:31.
Nawugandelelekileko: “USomnini useduze nabanehliziyo ephukileko, usindisa abanommoya odanileko.”—IRhubo 34:19.
Lokha nawutlhoga isinqophiso: UJehova ‘uzakufundisa, akubonise indlela ozakukhamba ngayo’ asebenzisa iliZwi lakhe iBhayibheli.—IRhubo 32:8.
Imibono engakafaneli ngokuba khona kukaZimu kiyo yoke indawo
Amala: UZimu ukiyo yoke indalo.
Iqiniso: UZimu akahlali ephasini namkha kwezinye izinto azidalileko. (1 AmaKhosi 8:27) Kuliqiniso ukuthi iinkwekwezi nezinye izinto ezibumbiweko ‘ziphazimulisa uZimu.’ (IRhubo 19:2) Nanyana kunjalo, uZimu akahlali endalwenakhe njengalokha umuntu ogwalako angahlali ezintweni azigwalileko. Umgwalo ungasitjela okuthileko ngomuntu owugwalileko. Ngendlela efanako, iphasi lisitjela ‘ngobuntu obungabonakaliko’ boMdali, njengamandlakhe, ukuhlakanipha nethando.—Roma 1:20.
Amala: UZimu kufuze abe kiyo yoke indawo ukuthi azi zoke izinto begodu abe namandla.
Iqiniso: Ummoya kaZimu ocwengileko, umamandla kaZimu asebenzako. Ngommoyakhe ocwengileko, uZimu angakghona ukwenza nanyana yini, nanyana kukuphi, nanyana kungisiphi isikhathi ngaphandle kokuthi abe khona lapho ngokwakhe.—IRhubo 139:7.
Amala: IRhubo 139:8 lifundisa ukuthi uZimu ukhona koke nalithi: “Lokha nangikhuphukela emazulwini, wena ulapho! Lokha nangendlala umkghadami endaweni yabafileko, wena ukhona.”
Iqiniso: Umtlolo lo awukhulumi ngendawo kaZimu yokuhlala. Ufundisa ukuthi akunandawo ekude engavimba uZimu bona asisize.
a UJehova ligama lakaZimu elifumaneka eBhayibhelini.