Uyini Ummoya Ocwengileko?

Ipendulo yeBhayibheli

Ummoya ocwengileko mamandla kaZimu asebenzako. (Mikha 3:8; Lukasi 1:35) UZimu uthumela ummoyakhe ngamandlakhe kunanyana kukuphi ukuthi azalise intandwakhe.​—IRhubo 104:30; 139:7.

EBhayibhelini, ibizo elithi “ummoya” litjhugululwe ebizweni lesiHebheru elithi ruʹach nebizweni lesiGrigi elithi pneuʹma. Esikhathini esinengi, amagama la aqaliselwe emandleni kaZimu asebenzako namkha ummoya ocwengileko. (Genesisi 1:2) Nanyana kunjalo, iBhayibheli libuye lisebenzise amabizo la ngendlela le:

• Ukuphefumula.​—Rhabakhukhu 2:19; IsAmbulo 13:15.

• Umoya.​—Genesisi 8:1; Jwanisi 3:8.

• Amandla aqakathekileko aphilisa izinto ezibumbiweko.​—Jobho 34:14, 15.

• Indlela umuntu aziphatha ngayo namkha enza ngayo izinto.​—Numeri 14:24.

• Iimbunjwa zommoya kuhlanganise uZimu neengilozi.​—1 AmaKhosi 22:21; Jwanisi 4:24.

Zoke izintwezi azibonakali kodwana zidlala indima ebonakalako ebantwini. Ngokufanako, ummoya kaZimu, “njengomoya, awubonakali, angekhe sawubamba begodu unamandla.”​—Expository Dictionary of New Testament Words, itlolwe ngu-W. E. Vine.

IBhayibheli libuye liqalisele emmoyeni ocwengileko kaZimu ‘njengezandla zakhe’ namkha ‘iminwakhe.’ (IRhubo 8:3; 19:2; Lukasi 11:20; madanisa noMatewu 12:28.) Njengomuntu onobukghwari osebenzisa imino nezandla zakhe, uZimu usebenzise ummoyakhe ukwenza izinto ezilandelako:

• Izulu nephasi.​—IRhubo 33:6; Isaya 66:1, 2.

• IBhayibheli.​—2 Pitrosi 1:20, 21.

• Imikarisomraro ebeyenziwa ziinceku zakhe zekadeni nendlela ebezikhuthele ngayo emsebenzinazo wokutjhumayela.​—Lukasi 4:18; IzEnzo 1:8; 1 Korinte 12:4-11.

• Nobuntu obuhle obutjengiswa babantu abamlalelako.​—Galatiya 5:22, 23.

Ummoya ocwengileko awusimumuntu

IBhayibheli nalithi ummoya kaZimu ‘zizandla zakhe’ ‘neminwakhe,’ namkha ‘ukuphefumula,’ akutjho ukuthi ummoya ocwengileko mumuntu. (Eksodusi 15:8, 10) Izandla zomuntu onobukghwari azikghoni ukusebenza ngaphandle kwengqondwakhe nomzimbakhe. Ngendlela efanako, ummoya kaZimu usebenza kwaphela ngendlela awunqophisa ngayo. (Lukasi 11:13) IBhayibheli libuye limadanise ummoya kaZimu namanzi begodu liwuhlobanisa nezinto ezifana nokukholwa nelwazi. Indlela eliwumadanisa ngayo itjengisa ukuthi ummoya ocwengileko awusimumuntu.​—Isaya 44:3; IzEnzo 6:5; 2 Korinte 6:6.

IBhayibheli liveza amabizo kaJehova uZimu nendodanakhe uJesu Krestu kodwana akukho lapha likhuluma khona ngebizo lommoya ocwengileko. (Isaya 42:8; Lukasi 1:31) UStefani owabulawa ngebanga lokubamKrestu, lokha nakabona ikarisomraro yezulwini, wabona abantu ababili ingasi abantu abathathu. IBhayibheli lithi: “Azele ummoya ocwengileko, waqala ezulwini wabona iphazimulo kaZimu nekaJesu ajame ngesandleni sokudla sakaZimu.” (IzEnzo 7:55) Lokha uStefani nakabona umbono kaZimu, ummoya ocwengileko okumumoya kaZimu bewusebenza.

Imibono engakafaneli ngommoya ocwengileko

Amala: Ummoya ocwengileko umumuntu begodu uyingcenye kaziquntathu, njengombana kutlolwe kweyoku-1 kaJwanisi 5:7, 8 eBhayibhelini laka-King James.

Iqiniso: Emtlolweni woku-1 kaJwanisi 5:7, 8 iBhayibheli laka-King James lifake amabizo athi “ezulwini, nguBaba, nguLizwi noMmoya Ocwengileko begodu laba abathathu bamunye. Kunabantu abathathu abanikela ubufakazi ephasini.” Nanyana kunjalo, abarhubhululi bafumane ukuthi amezwi la akakatlolwa ngumpostoli uJwanisi, yeke akukafuzi abeseBhayibhelini. UPhrofesa u-Bruce M. Metzger watlola wathi: “Amezwi la amamala begodu akukafuzi abeseTestamendeni eliTjha.”​—A Textual Commentary on the Greek New Testament.

Amala: IBhayibheli linokunikela ummoya ocwengileko izenzo zomuntu yeke lokho kutjho ukuthi umumuntu.

Iqiniso: Ngezinye iinkhathi imiTlolo inokunikela ummoya ocwengileko izenzo zomuntu kodwana lokho akutjho ukuthi umumuntu. IBhayibheli libuye likhulume ngokuhlakanipha, ngokufa nesono ngasuthi babantu. (IzAga 1:20; Roma 5:17, 21) Ngokwesibonelo, ukuhlakanipha kuthiwa ‘kunemisebenzi’ ‘nemiphumela’ begodu isono siyadosana, siyabulala besimarhamaru.​—Matewu 11:19; Lukasi 7:35; Roma 7:8, 11.

Ngokufanako, lokha umpostoli uJwanisi adzubhula uJesu, wakhuluma ngommoya ocwengileko ‘njengomsizi’ (pa·ra′kle·tos) obekazobanikela ubufakazi, abanqophise, akhulume, abalalele, amemezele, aphazimulise bekamukele. (Jwanisi 16:7-15) Nanyana kunjalo, uJwanisi nakaqalisela emmoyeni ocwengileko ngesinye isikhathi, ibizo alisebenzisako elithi pneuʹma nesabizwana asisebenzisako bezingahlukanisi ubulili.​—Jwanisi 14:16, 17.

Amala: Ukubhabhadiselwa ebizweni lommoya ocwengileko kutjho ukuthi umumuntu.

Iqiniso: Ngesinye isikhathi iBhayibheli lisebenzisa “ibizo” ukujamiselela amandla namkha igunya. (Duteronomi 18:5, 19-22; Esta 8:10) Lokho kuyafana namezwi asetjenziswa esiKhuweni athi “ebizweni lomthetho,” lokho akutjho ukuthi umthetho mumuntu. Umuntu obhabhadiselwa “ebizweni lommoya ocwengileko” ulemuka amandla nendima edlalwa mmoya ocwengileko ekuzaliseni intando kaZimu.​—Matewu 28:19.

Amala: Abapostoli bakaJesu nabanye abafundi bokuthoma bebakholelwa ukuthi ummoya ocwengileko mumuntu.

Iqiniso: IBhayibheli nomlando azikufakazeli lokho. I-Encyclopædia Britannica ithi: “Ihlathululo yokuthi uMmoya Ocwengileko umuMuntu waphezulu . . . yavela ku-Council of Constantinople emkhangisweni ka-381.” Lokhu bekungaphezu kweminyaka ema-250 ngemva kokufa kwabapostoli bokugcina.