Ingcenye 4
Bakuphi Abokhokho Bethu?
1, 2. Yini abantu abanengi abayikholelwako ngabahlongakeleko?
IINGIDI zabantu e-Afrika zikholelwa bonyana ukuhlongakala, akusikho ukuphela kokuphila, kunalokho kudlulela endaweni ethileko yomoya. Abanengi bacabanga bonyana abokhokho babo abahlongakeleko basuka endaweni ebonakalako baye endaweni engabonakaliko, kusuka endaweni yabantu kuya endaweni yomoya.
2 Abezimaba, kukholelwa bonyana baqiniseka ngokusinda kwemindenabo nokuyiphumelelisa. Ngombono lo, imimoya yabezimu ibangani abanamandla, abakwazi ukuletha isivuno esihle, bathuthukise ihlalakuhle, bavikele ekulimaleni. Nabangatjhejwako namtjhana basilingwa, baletha ihlekelele—amalwelwe, ukutlhaga, nemihlolo.
3. Abanye abantu babakhulekela njani abezimu?
3 Abaphilako benza imikgwa nemigidi yokudumisa nokubulunga ubuhlobo obuhle nabezimu. Imikgwa le khulukhulu ibonakala esilahlweni nemilindelweni. Ukukhulekela abezimu kuvezwa nangezinye iindlela. Isibonelo, ngaphambi kokobanyana abanye abantu basele utjwala, bathela obunye phasi, bathelele abezimu. Ngemva kokuphakulula, kunokudla okusala ngepotweni bonyana abezimu nabafikako bakufumane.
4. Yini abantu abanengi abayikholelwako ngomphefumulo?
4 Abanengi bakholelwa bonyana abaphilako banomphefumulo ongafiko nekufa umzimba. Nengabe umuntu gade aphila ipilo ehle, kuthiwa uya ezulwini, namtjhana epharadeyisini, kodwana nengabe umuntu gade aphila ipilo embi, badlumbanyana uya esirhogweni. Kanengi abantu bahlanganisa iimbono le namasiko wekolo. Isibonelo, iphephandaba elibikezela ikonzo yomgcwabo, ngezinye iinkathi lithi umuntu “udlulile” namtjhana “uye kwabaphasi.” Zoke iinkolelwezi zisekelwe eembonweni wokobanyana umphefumulo, namtjhana umoya, uyasinda lapho kufa umzimba. Ithini iBhayibhili ngalokhu?
Umphefumulo Nomoya
5, 6. Ngokuya ngeBhayibhili, uyini umphefumulo?
5 IBhayibhili itjengisa bonyana umphefumulo akusiyo into engaphakathi emntwini; umphefumulo mumuntu ngokwakhe. Isibonelo, lokha uZimu nabumba u-Adamu, “umuntu waba mphefumulo ophilako.” (Genesisi 2:7) U-Adamu khenge anikelwe umphefumulo; gade amphefumulo, umuntu opheleleko.
6 Ngikho, sifunda bonyana imiphefumulo iyabelethwa. (Genesisi 46:18) Ingadla namtjhana izile. (Lefitikosi 7:20; AmaRhalani 35:13) Iyalila beyitsirimezeke. (Jeremiya 13:17; Jona 2:7) Imiphefumulo ingathunjwa, ingagijinyiswa, beyibotjhwe. (Duteronomi 24:7; AmaRhalani 7:5; 105:18) Kwezinye iimBhayibhili ngelimi lokuthoma amavesi la ahlathululwa bonyana “mphefumulo,” kungilapho ezinye ziberegisa amagama “indalo” namtjhana “umuntu.” Woke atjho into efanako.
7. Ngimaphi amavesi weBhayibhili atjengisa bonyana umphefumulo ungafa?
7 Njengombana umphefumulo umumuntu, umuntu nakafako, umphefumulo uyafa. U-Ezekiyeli 18:4 uthi: “Umphefumulo owonayo uyakufa.” NeZenzo 3:23 zithi: “Loyo [umphefumulo] ongalaleliko bona umporofidi uthini, uzahlukaniswa nabantu bakaZimu arhayilwe.” Ngalokho umphefumulo awusiyo into esindako ekuhlongakaleni komuntu.
8. Uyini umoya ebantwini?
8 Umoya nomphefumulo akufani. Ebantwini, umoya mamandla wokuphila abenza bakwazi ukuberega. Umoya ufana negezi. Igezi ingenza ifen namtjhana ifriji iberege kodwana ngeze yenza umoya namtjhana yenze izinto zibe makhaza. Ngendlela efanako umoyethu usenza sibone, sizwe, sicabange. Kodwana umoya ngokwawo ngeze wazenza iintwezi ngaphandle kwamehlo, iindlebe nobuqhopho. Kungalokho iBhayibhili ithi ngomuntu: “Umoya wakhe uyaphuma, yena abuyele emhlabathini wakhe; ngalona lolosuku amacebo akhe ayaphela.”—AmaRhalani 146:4.
9. Yini umphefumulo nomoya okungakwenzi?
9 NgokweBhayibhili, akunamphefumulo namtjhana umoya otjhiya umzimba ekufeni wona uragele phambili uphila ephasini lomoya.
Ubujamo Babahlongakeleko
10. Ithini iBhayibhili ngesimo sabahlongakeleko?
10 Bunjani ke, ubujamo babahlongakeleko? Njengombana uJehova kunguye owabumba abantu, uyakwazi lokho okwenzeka kithi nasifako. ILizwi lakhe lifundisa bonyana abafileko abaphili, abezwa, ababoni, begodu abanamkhumbulo. IBhayibhili ithi:
● “Abafileyo . . . abazi-lutho.”—Umtjhumayeli 9:5.
● “Uthando lwabo, nokuzonda kwabo, nomhawu wabo sekuphelile.”—Umtjhumayeli 9:6.
● “Akukho-msebenzi, namcabango, nakwazi, nakuhlakanipha endaweni yabafileyo [emazindleni], lapho uya khona.”—Umtjhumayeli 9:10.
11. Ngemva kokona kwaka-Adamu, wathini uJehova kuye?
11 Cabanga ngalokho iBhayibhili ekutjhoko ngokhokho wethu wokuthoma, u-Adamu. UJehova wabumba u-Adamu “ngomhlabathi.” (Genesisi 2:7) Nengabe u-Adamu walalela umthetho kaJehova, gade azakuhlala unomphela nangethabo ephasini. Ngalokho u-Adamu khenge alalela umthetho kaJehova, isigwebo saba kukufa. Wayaphi u-Adamu nakahlongakalako? UZimu wathi kuye: “[Uzakubuyela] emhlabathini, lokhu wathathwa kuwo; ngokuba ungumhlabathi, uyakuphenduka umhlabathi.”—Genesisi 3:19.
12. Kwenzakani ku-Adamu nahlongakalako?
12 Gade akuphi u-Adamu ngaphambi kobanyana uJehova amenze ngethuli? Gade angekho. Negade uJehova athi u-Adamu ‘uzakubuyela emhlabathini’ gade Atjho bonyana ngeze asaphila, uzakuba njengethuli. U-Adamu khenge aragele phambili aphila ephasini lomoya. Khenge ‘adlulele’ endaweni yabezimu. Akhenge aye ezulwini namtjhana esirhogweni. Wadlulela ebujamweni bokungaphili; akhenge asaba khona.
13. Kwenzekani ebantwini neembandaneni ekufeni?
13 Kwenzeka into efanako kibo boke abantu na? Iye, iyenzeka. IBhayibhili iyahlathulula: “Konke [abantu neembandana] kuvela othulini, konke kubuyela othulini.”—Umtjhumayeli 3:19, 20.
14. Ngiliphi ithemba ngabahlongakeleko?
14 IBhayibhili ithembisa bonyana uZimu uzakuvusela abafileko ekuphileni epharadesini ephasini. (Jwanisi 5:28, 29; IZenzo 24:15) Kodwana isikhatheso siseza. Okwanjesi basalele emazindleni. (Jwanisi 11:11-14) Akufuneki sibasabe namtjhana sibakhulekele, njengombana bangeze basirhelebha namtjhana basilimaza.
15, 16. USathana walinga njani ukwenza abantu bakholelwe bonyana abafileko abakafi kwamambala?
15 Umbono wokobanyana asifi kwamambala umamala arhatjhwa nguSathana. Ukuthonya abantu ngamala la, yena namadimonakhe balinga abantu bacabange bonyana amalwelwe nemiraro kubangelwa mimoya yabafileko. Kuliqiniso bonyana eminye imiraro ibangelwa madimoni ngokwawo. Kuliqiniso godu nokobanyana eminye imiraro ayibangelwa mamandla angaphezu kwajayelekileko. Kodwana akusilo iqiniso bonyana abalele ekufeni bangasilimaza.
16 Kunenye godu indlela amadimoni alinga ngayo ukwenza abantu bacabange bonyana lokho okutjhiwo yiBhayibhili ngabahlongakeleko akukakalungi. Akhohlisa abantu bacabange bonyana bakhe babona namtjhana bakhuluma nabahlongakeleko. Amadimoni enza lokhu ngeembono, amabhudango, ababikindaba bemimoya, nangezinye iindlela. Namtjhana kunjalo, abantu abathintani nabafileko, kodwana bathintana namadimoni azenza abantu abafako. Ngikho uJehova akhalimela ngamandla ababikindaba bemimoya nalabo ababuza kwabafileko.—Duteronomi 18:10-12; Zakariya 10:2.
Abahlongakeleko Ngeze Basirhelebha
Ikosi eqakathekileko yeTjhingalanga Afrika yahlongakala ngo-1990. Gade inabafazi abahlanu nabantwana abanengi. Beyinamabhizinisi amabili angenisa imali enengi.
Ikosi le nayihlongakalako, abantu bomndenayo benza umgidi abakholelwa bonyana udumisa umoya wayo. Abafazi bayo bambatha iinzilo ezinzima, bakera butjhapha, bagoma kancani, bangasahlamba. Balila barhuwelela amalanga alikhomba ngemva kwesilahlo. Ngokulandelako, ngokuvumelana nesiko lendawo, umndeni woke wahlangana neenhlobo ukuzokugidinga umnyanya wokuvala amasiko wesilahlo—umnyanya wokudla nokusela okukhambisana nokugida.
Kwamambala, nengabe ikosi gade ikgona, beyizakubulunga beyitjhudubaze khulu umndeni wayo othandekako! Kodwana khenge kwenzeke lokho. Amabhizinisi wayo awa. Umndeni walwela ilifa, ngokukhamba kwesikhathi waphadlhalala. Kwanjesi umndeni omkhulu wekosi okhe wazala abantu wasala nabantu abancani kwaphela.
Abahlongakeleko Ngeze Basilimaza
Emakhaya weNigeria, indoda yahlongakala yabulungwa. Ngokukhamba kwesikhathi, umfazi wendoda le wafikelwa libhudango bonyana indoda yakhe ifuna iwatjhayo. Ngalokho wathatha iwatjhi wayibulunga hlanu komzimba wayo.
Isokana ibizo lalo elinguDunikan lingabonwa, layemba iwatjhi le belayiberegisa iminyaka eminengi beyafa. Khenge lilimale. Nengabe indoda ehlongakeleko le gade inamandla kwabaphilako, kwamambala beyizolijezisa isokana eleba iwatjhalo emazindleni!
[Umbuzo Yesifundo]
Ibhoksi: Ngiziphi izinto ezitjengisa bonyana abahlongakeleko ngeze basirhelebha namtjhana basilimaze?