1, 2. Ngokwencwadi kaHezekiyeli 47:1-12, khuyini uHezekiyeli ayibonako nayifundako? (Qala isithombe esisekuthomeni.)

UHEZEKIYELI ubona godu enye into ekarisako embonwenakhe wethempeli: Kunomlanjana ogeleza usuka esakhiweni esicwengileko! Akhe umcabange alandela umlanjana lo, onamanzi ahlwengileko. (Funda uHezekiyeli 47:1-12.) Ugeleza uvela ngaphasi kobungeno bethempeli bese uvelele esakhiweni sethempeli hlanu kwesango eliqale epumalanga. Ingilozi yarholela uHezekiyeli kude nethempeli njengombana bakhamba balinganisa ibanga. Ingilozi le beyinande idlulisa uHezekiyeli emanzini, begodu Umphorofidi lo, wafumana ukuthi amanzi la ayatjhingela begodu agcina aba mlambo angawuyama kwaphela nange angaduda kiwo!

² UHezekiyeli ufumana ukuthi umlambo lo ugelezela eLwandle eliFileko begodu ulapha itswayi lalo, qobe amanzi womlambo nakathinta ilwandleli elinezinto ezingaphiliko, iimfesi zizala ngapho. Hlanu komlambo ubona ehlukahlukeneko ikhula. Qobe nyanga ikhupha iinthelo ezitja namakari alaphako. Ukubona koke lokhu kungenzeka kwenza uHezekiyeli waba nokuthula nethemba. Kodwana ingcenye le yombono wethempeli beyitjho ukuthini kuye nakilabo adingiswe nabo? Itjho ukuthini kithi namhlanjesi?

Umlambo Osembonweni Bewutjho Ukuthini Kilabo Abadingisiweko?

3. Kubayini amaJuda wekadeni angakhenge acabange ukuthi umlambo uHezekiyeli awubona bewungewamambala?

³ Siyaqiniseka ukuthi amaJuda wekadeni akhenge acabange ukuthi umlambo osembonweni ngewamambala. Kunalokho, ingcenye le yomTlolo beyiwakhumbuza ngesinye isiphorofido sokubuyiselwa, ekungenzeka satlolwa pheze eminyakeni engaphezu kwemakhulu amabili, sitlolwa mphorofidi uJuweli. (Funda uJuweli 3:18.) AmaJuda adingisiweko nawafunda amezwi kaJuweli aphefumulelweko, bewangakalindeli iintaba zamambala bona ‘ziwuluke iwayini elitjha’ namkha imibundu ‘igeleze ibisi’ begodu bewangakalindeli bona umthombo ugeleze ‘uphuma endlini kaJehova.’ Ngokufanako, namanye amaJuda kungenzeka bewazwisisa bona umlayezo wombono womphorofidi uHezekiyeli bewungakhulumi ngomlambo wamambala.a Alo ngimuphi umlayezo uJehova ebekawudlulisela? ImiTlolo isisiza sizwisise ezinye iingcenye zomlayezo lo. Sizokucoca ngeendlela ezintathu isiphorofidwesi esingasiqinisekisa ngazo.

4. (a) Umlambo ebewusembonweni kaHezekiyeli bewuzokwenza amaJuda alindele ziphi iimbusiso ezivela kuJehova? (b) Indlela iBhayibheli elisebenzise ngayo ibizo elithi “umlambo” nelithi ‘amanzi’ isiqinisekisa njani ukuthi uJehova uzokubusisa abantu bakhe? (Funda ibhoksi elithi “Imilambo Yeembusiso Ezivela KuJehova.”)

⁴ Umlambo weembusiso. Kanengi iBhayibheli nayikhuluma ngemilambo namanzi, ifanekisela ukugeleza kweembusiso zakaJehova ezinikela ukuphila. UHezekiyeli wabona umlambo onjalo ugeleza usuka ethempelini, yeke umbono lo bewungenza abantu bakaZimu balindele bona uJehova ababusise ikani nabamlotjha ngendlela ehlwengileko. Bebazokufumana ziphi iimbusiso? Bebazokufundiswa baphristi godu, njengombana besele kwenziwa iminikelo ethempelini besele bazokuqiniseka godu ukuthi bazokuhlanjululwa ezonweni zabo. (Hez. 44:15, 23; 45:17) Ngikho bebazokuhlwengeka godu kwanga bahlanjwe ngamanzi ahlwengileko avela ethempelini.

5. Umlambo osembonweni ubaqinisekisa njani abantu bona kuzokuhlala kuneembusiso zakaJehova ezaneleko?

⁵ Inga-kghani bekuzokuhlala kuneembusiso ezaneleko zawo woke umuntu? Umbono lo wenza woke umuntu azizwe ngcono ngokutjengisa ukwanda kwamanzi ngendlela eyikarisomraro aba manengi kusukela emlanjaneni abe mlambo kungakapheli amakhilomitha amabili! (Hez. 47:3-5) Isibalo samaJuda abuyela enarhenawo kungenzeka besizokwanda kodwana neembusiso zakaJehova bezizokwanda zanelise boke. Umlambo bewufanekisela okunengi!

6. (a) Ngisiphi isithembiso esiqinisekiswa siphorofidwesi? (b) Ngisiphi isiyeleliso esanikelwa mbono lo? (Funda umtlolo waphasi.)

⁶ Amanzi anikela ukuphila. Embonweni kaHezekiyeli, umlambo ugelezela eLwandle eliFileko, uphilise izinto ezinengi ezikilo. Tjheja ukuthi amanzi la anikela ukuphila eemfesini ezinengi ezihlukahlukeneko ezifana nalezi ezifumaneka eLwandle eliKhulu namkha eLwandle leMedithera. Lapho bekunerhwebo lezokuthiya elithuthuke khulu eligwini leLwandle eliFileko hlangana namadorobho amabili ekunobufakazi obutjengisa ukuthi bewamaqalanga amadorobho la. Ingilozi yathi: “Koke kuzokuphila nanyana kukuphi lapho umlambo uya khona.” Kghani lokho bekutjho ukuthi amanzi avela endlini kaJehova bekazokuya koke lapha iLwandle eliFileko elifika khona? Awa. Ingilozi yahlathulula bona ezinye iindawo ezinedaka angeze zafumana amanzi anikela ukuphila. Iindawezo “zizokuhlala zinetswayi.”b (Hez. 47:8-11) Isiphorofidwesi besinesithembiso esiqinisekisa abantu ukuthi ukulotjha okuhlwengileko kuzokubuyiselwa kibo begodu kubenze baphumelele. Kodwana bekunokuthileko ekufuze kutjhejwe: Akusuye woke umuntu ebekazokwamukela iimbusiso zakaJehova namkha alatjhwe.

7. Imithi esembonweni ehlanu komlambo yawaqinisekisa ngani amaJuda adingisiweko?

⁷ Imithi ezokunikela ukudla nelaphako. Kuthiwani ngemithi ehlanu komlambo? Yenza kube kuhle khulu. Begodu yenza ihlathululo le ikhanye. Siyaqiniseka ukuthi uHezekiyeli nabantu bekhabo bekubathabisa ukucabanga ngeenthelo ezizokuvela emithini le, iintjalo ezitja qobe nyanga! Lokho bekubaqinisekisa bona uJehova uzobanikela ilwazi elizobenza batjhidelane naye. Tjheja nokuthi amakari wemithi le “azokuba ngewokulapha.” (Hez. 47:12) UJehova bekazi ukuthi ngaphezu kwakho koke, abadingisiweko bebazokutlhoga ukulatjhwa okungokomfanekiso begodu wathembisa ukukwenza lokho. Indlela akwenza ngayo lokho ihlathululiwe kwezinye iimphorofido zokubuyiselwa kokulotjha okuhlwengileko njengombana sibonile esaHlukweni se-9 encwadini le.

8. Khuyini etjengisa ukuthi umbono kaHezekiyeli bewuzokuzaliseka ngendlela ekulu?

⁸ Nanyana kunjalo, njengombana sibonile esaHlukweni se-9, abadingisiweko ababuyileko babona ukuzaliseka okulinganiselweko kweemphorofidwezi. Ngibo abantwaba abenza iimphorofidwezi zingazaliseki ngendlela ekulu. UJehova bekazababusisa njani ngendlela epheleleko, nababuyela eendleleni zabo ezimbi, bangamlaleli begodu bangamlotjhi ngendlela ayamukelako? AmaJuda athembekileko bewezwa ubuhlungu nawabona indlela amanye amaJuda aziphatha ngayo. Nanyana kunjalo, labo abalotjha uJehova ngokuthembeka bebazi ukuthi iinthembiso zakhe zihlala zifezeka. (Funda uJotjhuwa 23:14.) Kungebangelo, ngelinye ilanga umbono kaHezekiyeli uzokuzaliseka ngendlela ekulu. Kodwana nini?

Umlambo Uyageleza Namhlanjesi!

9. Umbono kaHezekiyeli wethempeli uzaliseka nini ngendlela ekulu?

⁹ Njengombana sibonile esaHlukweni se-14 sencwadi le, umbono kaHezekiyeli wethempeli uzaliseka khulu “emihleni yokuphela,” isikhathi lapho ukulotjha okuhlwengileko kwenzeka khona khulu kunanini ngaphambilini. (Isa. 2:2) Ingcenye le yombono kaHezekiyeli izaliseka njani namhlanjesi?

10, 11. (a) Ngiziphi iimbusiso ezigeleza njengomlambo kithi namhlanjesi? (b) Iimbusiso ezivela kuJehova zibe njani zinengi bona zanelise abantu bakhe emihleni yokuphela njengombana banda?

¹⁰ Umlambo weembusiso. Amanzi ageleza avela endlini kaJehova asikhumbuza ngaziphi iimbusiso namhlanjesi? Sikhunjuzwa ngazo zoke izinto ezihle uJehova asenzela zona bona sibe netjhebiswano elihle naye. Kokuthoma, mamandla ahlwengisako womhlatjelo wesihlengo sakaKrestu, enza kukghonakale bona izono zethu zilitjalelwe. Amaqiniso acwengileko weliZwi lakaZimu abuye afaniswe nokunikelwa ukuphila, okumamanzi ahlwengisako. (Efe. 5:25-27) Iimbusiso ezinjalo zigeleze njani esikhathini sethu?

¹¹ Ngo-1919 bekuneenkulungwana ezimbalwa kwaphela zabantu abalotjha uJehova begodu bezithabile ngebanga lelwazi ebezilifumana elizitjhideza kuZimu. Eminyakeni eyalandelako isibalo sazo besisolo sanda. Namhlanjesi abantu bakaZimu babalelwa eengidini ezingaphezu kwezibunane. Inga-kghani amanzi ahlwengileko la weqiniso akghonile ukuhlala ageleza? Iye! Manengi khulu amaqiniso aseBhayibhelini esihlathululelwe wona. Eminyakeni edlulileko, abantu bakaZimu bebasolo bafumana amabhiliyoni wamaBhayibheli, iincwadi, abomagazini, iincwajana namaphetjhana. Njengomlambo ongokomfanekiso uHezekiyeli awubonako, ukugeleza kwamaqiniso ahlwengileko kwande khulu kwakghona ukusiza abantu abafuna ukwazi uZimu ephasini loke. Sele kusikhathi eside kugadangiswa iincwadi ezisekelwe eBhayibhelini begodu nje kusetjenziswa izinzolwazi lethu i-jw.org, iincwadi ezinjalo sezifumaneka eensetjenzisweni ze-elektroniki ngamalimi angaphezu kwama-900! Amanzi weqiniso la abathinta njani abantu abaneenhliziyo ezilungileko?

12. (a) Siwubone njani umlayezo weqiniso wenza abantu babe nobuhlobo obuhle noJehova begodu babe nepilo? (b) Umbono lo usinikela siphi isiyeleliso esifike ngesikhathi namhlanjesi? (Funda nomtlolo waphasi.)

¹² Amanzi anikela ukuphila. UHezekiyeli watjelwa ukuthi: “Koke kuzokuphila nanyana kukuphi lapho amanzi aya khona.” Cabanga ngendlela umlayezo weqiniso ogelezele ngayo kibo boke labo abeze enarheni engokomfanekiso ebuyiselweko. Amaqiniso weBhayibheli alethele iinkulungwana zabantu abaneenhliziyo ezihle ukuphila okungokomfanekiso. Nanyana kunjalo, umbono lo ubuye ube siyeleliso esifike ngesikhathi, sokuthi akusibo boke abazokulalela amaqiniso la. Njengeendawo eziseLwandle eliFileko ezingekhe zifumane amanzi wokuphila ezisembonweni kaHezekiyeli, kunabantu abangekhe baphenduke abazokwala ukwamukela nokwenza ngokwalokho amaqiniso akutjhoko.c Kwanga singenza koke okusemandleni ukungazifumani hlangana nabantwabo!—Funda uDuteronomi 10:16-18.

13. Ngiziphi iimfundo esingazifumana emithini esembonweni?

¹³ Imithi ezokunikela ukudla nelaphako. Inga-kghani imithi engokomfanekiso ehlanu komlambo ineemfundo ezikhuthazako kithi namhlanjesi? Kunjalo. Khumbula ukuthi imithi le iveza iinthelo ezimnandi ezitja qobe nyanga begodu amakarazo ayalapha. (Hez. 47:12) Isikhumbuza ukuthi silotjha uZimu osipha koke esikutlhogako ngesandla esivulekileko bona sibe nobuhlobo obuhle naye. Namhlanjesi abantu abanengi abawazwisisi amaqiniso aseBhayibhelini. Ngokuhlukileko, qala lokho uJehova akunikela abantu bakhe. Wakhe wafunda isihloko esithileko eencwadini zethu, wacula ingoma yokuphetha emhlanganweni omncani namkha omkhulu, waqeda ukubukela ividiyo esehlelweni lethu leBroadcasting ngemva kwalokho wazizwa ubusisekile ngokufumana ilwazi elikutjhideza kuZimu? Kwamambala uZimu uyasitlhogomela. (Isa. 65:13, 14) Inga-kghani ukuzwisisa lokho okutjhiwo liBhayibheli kuyasisiza bona siphile ngendlela esizuzisako nethabisa uZimu? Iseluleko esihle esisifumanako esisekelwe eliZwini lakaZimu, siyasisiza silwisane nokuziphatha kumbi ngokomseme, ukuba marhamaru nokungabi nokukholwa. UJehova usenzele nelungiselelo lokusiza amaKrestu agulako ngokomfanekiso ngebanga lokwenza isono esikhulu. (Funda uJakopo 5:14.) Kwamambala sibusisekile njengombana kutjengisa umbono kaHezekiyeli wemithi.

14, 15. (a) Singafundani endabeni yeendawo lapho amanzi weLwandle eliFileko angafiki khona eembonweni kaHezekiyeli? (b) Umlambo osembonweni kaHezekiyeli usizuzisa njani namhlanjesi?

¹⁴ Ngesikhathi esifanako singafunda okuthileko eendaweni eziseLwandle eliFileko ezingakhenge zifumane amanzi wokuphila. Asifuni ukwenza bona iimbusiso zakaJehova zingagelezi ekuphileni kwethu. Kungaba buhlungu bona singafumani ukulatjhwa njengabantu abanengi abaphila ephasineli. (Mat. 13:15) Kunalokho, kuyasithabisa ukuzuza eembusisweni ezigeleza njengomlambo. Nasizimiselako ukusela amanzi ahlwengileko, okumaqiniso avela eliZwini lakaZimu, nasabelana nabanye ngamaqiniso ngokutjhumayela, nasifumana isiyalo esinethando, ukududuzwa namkha isizo elivela ebadaleni ababandulwe yinceku ethembekileko, singacabanga ngomlambo ongokomfanekiso osembonweni kaHezekiyeli. Umlambo lo unikela ukuphila begodu uyalapha nanyana kukuphi lapha utjhinga khona!

¹⁵ Kuthiwani ngokuzaliseka kombono womlambo esikhathini esizako? Njengombana sizokubona, umlambo lo uzokugeleza ngendlela ekulu ePharadesi elizako.

Okuzokutjhiwo Mbono Lo Epharadesi

16, 17. (a) Kungayiphi indlela amanzi wokuphila azokwanda ngayo khulu ePharadesi? (b)  Sizokuzuza njani emlanjeni lo weembusiso ePharadesi?

¹⁶ Inga-kghani uyazibona usepharadesi, unabangani nomndeni nithabela ukuphila? Ukufunda ngombono kaHezekiyeli womlambo kungakusiza ukghone ukuzibona usepharadesi. Kungenzeka njani lokho? Cabanga ngezinto ezintathu ezitjengisa ithando ezisembonweni lo.

¹⁷ Umlambo weembusiso. Umlambo ongokomfanekiso uzokuba mkhulu khulu ePharadesi ngombana ngeze utlhogomele abantu ngelwazi elibenza bathande uZimu kwaphela, kunalokho uzobanikela nezinto abazitlhogako bona baragele phambili baphila. NakuBusa uJesu imiNyaka eyiKulungwana, uMbuso kaZimu uzokusiza abathembekileko bona bazuze esihlengweni ngendlela ekulu. Kancanikancani, bazokwenziwa bona bangasabi nesono, angekhe kusaba nokugula, abodorhodere, abahlwengikazi, iimbhedlela, netjhorensi yezepilo. Amanzi wokuphila azokugelezela iingidi zabantu abasinde e-Arimagedoni, “isiqubuthu esikhulu” esivela “esizini elikhulu.” (IsAm. 7:9, 14) Nanyana iimbusiswezi zizokubonakala zizihle khulu kodwana nazimadaniswa nalokho okuzokwenzeka ngokukhamba kwesikhathi zizokubonakala zizincani khulu. Njengombana sibonile embonweni kaHezekiyeli, umlambo lo uzokuba mkhulu wanelise boke abantu.

18. Kungayiphi indlela “umlambo wamanzi wokuphila” uzokuba mkhulu hlangana nemiNyaka eyiKulungwana?

¹⁸ Amanzi anikela ukuphila. Hlangana nemiNyaka eyiKulungwana, “umlambo wamanzi wokuphila” uzokuba mkhulu. (IsAm. 22:1) Abantu abanengi khulu bazokuvuswa ekufeni, banikelwe ithuba lokuphila ngokungapheliko ePharadesi. Iimbusiso ezizokuza ngoMbuso zizokuhlanganisa ukuphila kwabanengi ebesele bahlongakele, abantu ebebalele, banganamandla begodu balithuli lephasi. (Isa. 26:19) Nanyana kunjalo, inga-kghani boke abavusiweko bazokuphila ngokungapheliko?

19. (a) Khuyini etjengisa bona amanzi amatjha weqiniso avela kuZimu azokufumaneka ePharadesi? (b) Kungayiphi indlela abanye abantu ‘bazokuhlala banetswayi’ esikhathini esizako?

¹⁹ Ngamunye kuzokufuze akhethe. Kuzokuvulwa imisongo emitjha ngesikhatheso. Yeke amanzi aqabulako avela kuJehova azokuhlanganisa amaqiniso amatjha neenqophiso ezitjha. Akuthabisi na ukucabanga ngalokho? Nanyana kunjalo, abanye angeze bafune ukulalela iinqophiso ezitjha, kunalokho bazokukhetha ukungamlaleli uJehova. Abanye kungenzeka bahlubuke hlangana nemiNyaka eyiKulungwana kodwana angeze bavunyelwa bona babange itjharagano ePharadesi. (Isa. 65:20) Singakhumbula umbono kaHezekiyeli begodu sicabange ngeendawezi ezingakhenge zifumane amanzi wokuphila, ezinganakho ukuphila ‘ezinetswayi.’ Qala bona kubudlhadlha obungangani ngalabo abanekani abangafuni ukusela amanzi aligugu la wokuphila! Ngemva kwemiNyaka eyiKulungwana isiqhema seenhlubuki sizokuba sehlangothini lakaSathana. Boke abangavumi ukubuswa nguJehova ngokulunga bazokuqalana nomphumela ofanako, ukufa unomphela.—IsAm. 20:7-12.

20. Ngiliphi ilungiselelo elenziweko bona sizuze hlangana nemiNyaka eyiKulungwana elisikhumbuza ngemithi eyabonwa nguHezekiyeli?

²⁰ Imithi yokudla nelaphako. UJehova akafuni namunye kithi bona angakufumani ukuphila okungapheliko. Bona aqiniseke ukuthi siyalifumana ithuba elithabisakweli asinikela lona, uzokuqinisekisa ukuthi kuba nelungiselelo elifana nelemithi eyabonwa nguHezekiyeli. Nanyana kunjalo, ePharadesi abantu bazokufumana ilwazi elibatjhideza kuZimu begodu uzobatlhogomela bona baragele phambili baphila. UJesu Krestu nabayokubusa naye abazii-144 000 bayokuba makhosi ezulwini imiNyaka eyiKulungwana. Njengesigaba sabaphristi, abazii-144 000 bazabe banikela abantu iimbusiso zomhlatjelo kaKrestu wesihlengo, basiza abantu abathembekileko bona baphelele. (IsAm. 20:6) Ilungiselelo lokulapha enyameni nelitjhideza abantu kuZimu, lisikhumbuza ngemithi eyabonwa nguHezekiyeli hlanu komlambo, imithi eneenthelo ezakhako, namakari alaphako. Umbono kaHezekiyeli ukhambisana nesinye isiphorofido esihle esatlolwa ngumpostoli uJwanisi. (Funda isAmbulo 22:1, 2.) Amakari womuthi abonwa nguJwanisi “bekungewokulapha iintjhaba.” Iinkulungwana ezinengi khulu zabantu abathembekileko zizokuzuza emisebenzini ezabe yenziwa baphristi abazii-144 000.

21. Ukucabanga ngombono kaHezekiyeli womlambo kukuthinta njani begodu sizokucoca ngani ngokulandelako? (Funda ibhoksi elithi “Umlanjana Uba Mlambo Omkhulu!”)

²¹ Njengombana ucabanga ngomlambo uHezekiyeli awubona embonweni, kghani awubi nokuthula nethemba? Qala bona ziinkhathi ezithabisa kangangani ezizakwezi. Akhe ucabange, eminyakeni eziinkulungwana edlulileko, uJehova usinikele iimphorofido ezisisiza sicabange bona kuzabe kunjani epharadesi. Uyasibekezelela begodu uyasimema bona sibone ukuzaliseka okukhulu kwesiphorofidwesi. Kghani zabe ulapho? Mhlamunye uyazibuza ukuthi inga-kghani ikhona kwamambala indawakho ePharadesi. Ngokulandelako, akhe sibone imitlolo ephethako yesiphorofido sakaHezekiyeli ukuthi isiqinisekisa ngani.

1, 2. (a) UHezekiyeli wafumana ziphi iinqophiso ezivela kuJehova? (b) Sizokucoca ngamiphi imibuzo?

UHEZEKIYELI uqeda ukubona umbono omenze wakhumbula okwenzeke pheze eminyakeni engaba ma-900 ngesikhathi sakaMosi noJotjhuwa. Ngesikhatheso, uJehova wahlathululela uMosi bona imikhawulo yeNarha yesiThembiso izokuphelela kuphi, kwathi ekukhambeni kwesikhathi, watjela uJotjhuwa bona iinkoro zakwa-Israyeli kufuze zihlukaniselane njani inarha leyo. (Num. 34:1-15; Jotj. 13:7; 22:4, 9) Kodwana nje, ngomnyaka ka-593 B.C.E., uJehova uyala uHezekiyeli nadingiswe nabo bona babe iNarha yesiThembiso hlangana neenkoro zakwa-Israyeli godu!—Hez. 45:1; 47:14; 48:29.

² Umbono lo bewunamuphi umlayezo oya kuHezekiyeli nalabo adingiswe nabo? Kubayini umbono lo ukhuthaza abantu bakaZimu namhlanjesi? Kghani uzokuzaliseka ngendlela ekulu esikhathini esizako?

Umbono Osiqinisekisa Ngeendlela Ezine

3, 4. (a) Umbono kaHezekiyeli wabaqinisekisa ngaziphi iindlela ezine abadingisiweko? (b) Ngisiphi isiqinisekiso esizokufunda ngaso esahlukwenesi?

³ Umbono wamaswaphela uHezekiyeli awufumanako usezahlukweni ezilithoba zencwadakhe. (Hez. 40:1–48:35) Bewuqinisekisa abadingiswa ngeendlela ezine ngokubuyiselwa kwesitjhaba sakwa-Israyeli. Bewubaqinisekisa njani? Kokuthoma, ukulotjhwa kwakaZimu okuhlwengileko bekuzokubuyiselwa ethempelini lakhe. Kwesibili, abaphristi abalungileko nabelusi bebazokurhola isitjhaba esibuyiselweko. Kwesithathu, ilifa eliyinarha belizokubekelwa labo abazokubuyela kwa-Israyeli. Kwesine, uJehova bekazokuba nabo ahlale hlangana nabo godu.

⁴ Isahluko se-13 nese-14 zencwadi le zikhulume ngokuthi izinto ezimbili zokuthoma ebezizokwenzeka kwamambala, okukubuyiselwa kokulotjha kweqiniso nokurholwa belusi abalungileko bezizokwenzeka njani. Esahlukwenesi, sizokudzimelela entweni yesithathu, isithembiso selifa lenarha. Esahlukweni esilandelako, sizokufunda ngesithembiso sokuba khona kwakaJehova.—Hez. 47:13-21; 48:1-7, 23-29.

“Inarha Le . . . Inikelwe Nina Njengelifa”

5, 6. (a) Embonweni kaHezekiyeli ngiyiphi indawo ebekufuze yabiwe? (Qala isithombe esisekuthomeni.) (b) Beyiyini ihloso yombono wokwabiwa kwenarha?

⁵ Funda uHezekiyeli 47:14. Embonweni, uJehova wenza uHezekiyeli waqala isiqetjhana senarha ingasikade ebesizokufana “nesimu ye-Edeni.” (Hez. 36:35) Ngemva kwalokho, uJehova wathi: “Le yindawo ozoyaba njengenarha elilifa yeenkoro ezili-12 zakwa-Israyeli.” (Hez. 47:13) ‘Indawo’ ebeyizokwabiwa beyiyinarha ebuyiselweko yakwa-Israyeli, leyo abadingiswa ebebazokubuyela kiyo. Ngokulandelako, njengombana kutlolwe kuHezekiyeli 47:15-21, uJehova wahlathulula imininingwana yangaphandle yemikhawulo yenarha yoke ngokunembileko.

⁶ Beyiyini ihloso yombono lo wokwabiwa kwenarha? Ihlathululo yokulinganiswa kwemikhawulo ngokunembileko, beyiqinisekisa uHezekiyeli nalabo adingiswe nabo ukuthi inarhabo abayithandako beyizokubuyiselwa. Cabanga indlela isiqinisekisweso esivela kuJehova esihlathululwe kuhle ngayo, ukuthi yazithinta njani iinhliziyo zabadingisiweko! Kghani abantu bakaZimu bakade bayifumana inarhabo leyo abayifumana njengelifa? Iye bayifumana.

7. (a) Khuyini eyathoma ukwenzeka ngo-537 B.C.E. begodu isikhumbuzani? (b) Ngimuphi umbuzo esizokucoca ngawo kokuthoma?

⁷ Ngo-537 B.C.E., eminyakeni ema-56 ngemva kokuthi uHezekiyeli afumane umbono, iinkulungwana zabadingisiweko zathoma ukubuyela enarheni yakwa-Israyeli nokuhlala kiyo. Izenzakalwezo zakade zisikhumbuza izinto ezifanako ezenzeka ebantwini bakaZimu namhlanjesi. Ngendlela efanako, nabo babelwe inarha. Ngayiphi indlela? UJehova uvumele abantu bakhe bona bangene enarheni engokomfanekiso begodu bayithathe kube ngeyabo. Yeke ukubuyiselwa kweNarha yesiThembiso yakade, kungasifundisa okunengi ngokubuyiselwa kwenarha engokomfanekiso yabantu bakaZimu namhlanjesi. Kodwana ngaphambi kokuthi sifunde ngeemfundwezo, kokuthoma akhe siphendule umbuzo othi, “Kubayini singaphetha ngokuthi inarha engokomfanekiso ikhona namhlanjesi?”

8. (a) UJehova wajamiselela u-Israyeli ngasiphi isitjhaba? (b) Iyini inarha engokomfanekiso namkha ipharadesi? (c) Yaba khona nini begodu bobani ebebahlala kiyo?

⁸ Embonweni awunikela uHezekiyeli esikhathini esidlulileko, uJehova watjengisa ukuthi iimphorofido ngokubuyiselwa kwaka-Israyeli bezizokuzaliseka khulu ngemva kokuthi ‘incekwakhe uDavida,’ okunguJesu Krestu athome ukubusa abe yiKosi. (Hez. 37:24) Lokho kwenzeka ngo-1914 C.E. Ngesikhatheso u-Israyeli besele ajanyiselelwe babantu bakaZimu, okungu-Israyeli ongokomfanekiso, owenziwa maKrestu azesiweko. (Funda uMatewu 21:43; 1 Pitrosi 2:9.) Nanyana kunjalo, uJehova akhenge ajamiselele isitjhaba sakwa-Israyeli ngesitjhaba esingokomfanekiso kwaphela kodwana nenarha yakwa-Israyeli ngenarha engokomfanekiso namkha ipharadesi. (Isa. 66:8) Njengombana sibonile esaHlukweni se-17 sencwadi le, inarha engokomfanekiso yindawo ehle namkha la kwenziwa khona umsebenzi,lapho abazesiweko abaseleko bebalotjha khona uJehova kusukela ngo-1919. (Funda ibhoksi 9B, elithi “Kubayini Sithi Ngo-1919?”) Ngokukhamba kwesikhathi, labo abanethemba lokuphila ephasini ‘okungezinye izimvu’ nabo bathoma ukuhlala enarheni engokomfanekiso. (Jwa. 10:16) Njengombana ipharadesi elingokomfanekiso liragela phambili lithuthuka namhlanjesi, iimbusiso zalo zizokubonwa kuhle ngokungeneleleko kwaphela ngemva kwe-Armagedoni.

Ukuhlukanisa Inarha Ngokulingana Nangokunembileko

9. Ngiziphi iinqophiso ezinemininingwana uJehova azikhuphako ngokwabiwa kwenarha?

⁹ Funda uHezekiyeli 48:1, 28. Ngemva kokwenza imikhawulo yenarha, uJehova wahlathulula imininingwana yokuthi inarha kufuze ihlukaniswe njani. Walayela bona amafa weenkoro ezili-12 ahlukaniswe ngokulingana nangokunembileko kusukela etlhagwini kufikela esewula, ukuthoma ngekoro yakwaDani emkhawulweni wenarha wetlhagwini kufikela ekorweni yakwaGadi emkhawulweni wesewula. Ngalinye lamafa ali-12 la, belinomuda otjhinga phasi wendawo esuka ngaphandle komkhawulo wenarha ongepumalanga kufikela eLwandle eliKhulu namkha eLwandle leMedithera, ngetjingalanga.—Hez. 47:20.

10. Kungenzeka bona ingcenye le yombono yabaqinisekisa ngani abadingisiweko?

¹⁰ Kungenzeka bona ingcenye le yombono yabaqinisekisa ngani abadingisiweko? Imininingwana uHezekiyeli ayinikelako ngokuhlukaniswa kwenarha, kufuze ukuthi yabathabisa abadingisiweko ngebanga lokuthi inarha beyizokuhlukaniswa kuhle. Ukungezelela kilokho, ukuhlukaniswa kwenarha ngendlela elinganako kizo zoke iinkoro ezili-12 kwaqinisekisa ukuthi woke umuntu oye ekudingisweni uzokufumana ilifa lakhe enarheni ebuyiselweko. Akakho ebekazokubuya azifumane angananarha namkha anganakhaya.

11. Ngiziphi iimfundo esingazifunda esiphorofidweni sombono wokwabiwa kwenarha? (Funda ibhoksi elithi “Ukwabiwa KweNarha.”)

¹¹ Ngiziphi iimfundo ezikhuthazako ezifumaneka embonweni lo esingazifunda namhlanjesi? INarha yesiThembiso ebuyiselweko beyinganandawo yabaphristi, amaLevi namakhosana kwaphela kodwana beyinendawo yawo woke amalunga weenkoro ezili-12. (Hez. 45:4, 5, 7, 8) Kuyafana nanamhlanjesi, ipharadesi elingokomfanekiso alinandawo yabaseleko abazesiweko nalabo abahlangana ‘nesiqubuthu esikhulu’ abadosa phambili kwaphela kodwana libuye libe nendawo yawo woke amalunga wesiqubuthu esikhulu.a (IsAm. 7:9) Nanyana ungaba mncani kangangani umsebenzi esiwenza ehlanganweni, sinendawo evikelekileko nomsebenzi oqakathekileko enarheni engokomfanekiso. Qala bona kududuza kangangani ukuzwa lokho!

Izinto Ezimbili Eziqakathekileko Ezingafaniko, Zitjho Ukuthini Kithi Namhlanjesi?

12, 13. Ngisiphi isinqophiso esikhanyako uJehova asinikelako ngokwabelwa kweenkoro ingcenye yenarha?

¹² Ezinye zeenqophiso zokwabelana kwenarha kungenzeka zamrara uHezekiyeli ngebanga lokuthi bezingafani nalezo uZimu azinikela uMosi. Cabanga ngeendlela ezimbili ezihluke ngazo. Enye imalungana nenarha bese enye nabahlali bayo.

¹³ Kokuthoma, inarha. UMosi wayalwa bona anikele iinkoro ezikulu indawo evulekileko ukudlula iinkoro ezincani. (Num. 26:52-54) Nanyana kunjalo, embonweni kaHezekiyeli uJehova wanikela iinqophiso ezikhanyako ukuthi kwabelwe zoke iinkoro “izabelo ezilinganako.” (Hez. 47:14) Ngikho amafa weenkoro ezili-12 bekufuze alingane kusukela emkhawulweni wetlhagwini kufikela emkhawulweni wesewula. Woke ama-Israyeli kungayi ngokuthi ngewayiphi ikoro, bewazokuzuza ngendlela efanako ezintweni ezivezwa yiNarha yesiThembiso enamanzi aneleko.

14. Iinqophiso zakaJehova malungana nalabo abavela kwezinye iinarha bezihluke njani kilezo ebezisemThethweni kaMosi?

¹⁴ Kwesibili, abahlali. UmThetho kaMosi bewuvikela abantu abavela kwezinye iinarha begodu ubavumela bona balotjhe uJehova kodwana bebangananarha ababelwe yona. (Lev. 19:33, 34) Nanyana kunjalo, lokho uJehova akutjela uHezekiyeli nje, bekungaphezu kwalokho akutjho emThethweni. UJehova wathi: “Ninikele umuntu ovela kwenye inarha ohlala nani ilifa endaweni yekoro yalapho ahlala khona.” Ngomyalo loyo, uJehova bekasusa umehluko omkhulu hlangana nama-Israyeli nabantu abahlala enarheni kodwana abavela kwenye inarha. (Hez. 47:22, 23) Enarheni ebuyiselweko uHezekiyeli ayibona embonweni, wayelela bona abahlali bebalotjha uJehova ngobunye nangokulingana.—Lev. 25:23.

15. Ngiliphi iqiniso elingatjhugulukiko ngoJehova elaqinisekiswa ziinqophiso ngenarha nabantu abahlala kiyo?

¹⁵ Iinqophiso ezimbili uHezekiyeli azifumanako ngenarha nabantu kufuze bona zabaqinisekisa abadingisiweko. Bebazi bona uJehova uzobabela indawo elinganako, kungayi ngokuthi bama-Israyeli ngokubelethwa namkha babantu abavela kwezinye iinarha abalotjha uJehova. (Ezr. 8:20; Nerh. 3:26; 7:6, 25; Isa. 56:3, 8) Iinqophiswezi beziqinisekisa into eqakathekileko nengeze yatjhuguluka, ukuthi kuJehova boke abantu abamlotjhako baligugu begodu bayalingana. (Funda uHagayi 2:7.) Namhlanjesi kunganandaba ukuthi sinethemba lokuphila ephasini namkha ezulwini siyawazisa amaqiniso afanako.

16, 17. (a) Sizuzani ngokufunda imininingwana malungana nenarha nabantu abahlala kiyo? (b) Sizokucoca ngani esahlukweni esilandelako?

¹⁶ Sizuza njani ngokucabanga ngemininingwana yenarha nabahlali? Sikhunjuzwa bona ukulingana nebumbano kufuze kube bubuntu obukhamba phambili kubafowethu nabodadwethu ephasini loke. UJehova akakhethi. Yeke kufuze sizibuze ukuthi: ‘Inga-kghani nami angikhethi njengoJehova? Inga-kghani ngiphatha woke umuntu engilotjha naye ngehlonipho kunganandaba ukuthi ngewayiphi ikoro namkha ubujamo bakhe ekuphileni bunjani?’ (Rom. 12:10) Kuyasithabisa ukuthi uJehova usinikele ithuba elilinganako lepharadesi elingokomfanekiso, lapho senzela khona uBabethu wezulwini umsebenzi ocwengileko womphefumulo woke begodu sithabela iimbusiso zakhe.—Gal. 3:26-29; IsAm. 7:9.

¹⁷ Nje, akhe sicoce ngesiqinisekiso sesine sengcenye yamaswaphela yombono kaHezekiyeli, isithembiso sokuthi uJehova uzokuba nabadingisiweko. Ngiziphi iimfundo esingazifunda esithembisweneso? Sizokufumana ipendulo esahlukweni esilandelako.

1, 2. (a) Ngiyiphi ingcenye ekhethekileko yenarha ebekufuze ibekelwe ngeqadi? (Qala isithombe esisekuthomeni.) (b) Umbono lo, ubaqinisekisa ngani abadingisiweko?

EMBONWENAKHE wamaswaphela, uHezekiyeli ufunda ngengcenye yenarha ezokubekelwa ihloso eqakathekileko. Ingcenye leyo kunikelwa ngayo ingasi njengelifa lekoro yama-Israyeli kodwana iba mnikelo kaJehova. UHezekiyeli ubuye afunde ngedorobho eliphuma phambili elinegama elikarisako. Ingcenye le yombono inikela abadingisiweko ukuqakatheka kwesiqinisekiswesi: UJehova uzokuba nabo nababuyela endawenabo abayithandako.

² UHezekiyeli usinikela ihlathululo enabileko yomnikelo loyo. Akhe sihlolisise indaba le, enokunengi esingakufunda njengombana siziinceku zakaJehova zeqiniso.

‘Umnikelo Ocwengileko Kuhlanganise . . . Nedorobho’

3. Ngiziphi iindawo ezihlanu ezenza inarha uJehova ayikhethileko begodu bezisetjenziselwa ini? (Funda ibhoksi elithi, “Umnikelo Enizowubekela Ngeqadi.”)

³ Ingcenye ekhethekileko yenarha beyingaba makhubithi azii-25 000 (amakhilomitha ali-13) kusukela etlhagwini kufikela esewula begodu ibe makhubithi azii-25 000 kusukela epumalanga kufikela etjingalanga. Ingcenye le yenarha beyibizwa ngokuthi “mnikelo opheleleko.” Beyihlukaniswe ngeengcenye ezintathu. Ingcenye ephezulu bekungeyamaLevi bese ephakathi beyibekelwe ithempeli nabaphristi. Iingcenye ezimbilezi bezenza ‘umnikelo ocwengileko.’ Ingcenye encani ephasi, namkha “indawo eseleko,” beyisetjenziselwa izinto “ezijayelekileko.” Bekungeyedorobho.—Hez. 48:15, 20.

4. Singafundani endabeni yomnikelo oya kuJehova?

⁴ Singafundani endabeni le ngeminikelo eya kuJehova? Ngokuthi athome ngokubekela eqadi inarha yomnikelo okhethekileko bese ngemva kwalokho inarha yeenkoro, uJehova watjengisa indlela okuqakatheke ngayo ukubeka indawo le yokumlotjha phambili. (Hez. 45:1) Akunakuzaza bona kunengi abadingisiweko abakufunda endleleni inarha eyabiwa ngayo. Ukulotjha uJehova bekufuze kuze qangi ekuphileni kwabo. Nanamhlanjesi, siqala indlela esilotjha ngayo uJehova, njengokufunda iliZwi lakhe, ukuya emhlanganweni yobuKrestu nokutjhumayela iindaba ezimnandi, njengezinto eziza qangi kithi. Nasilingisa uJehova ngokwenza izinto eziza qangi ekuphileni kwethu, sitjengisa bona ukumlotjha kwethu kuza qangi ekuphileni kwethu.

“Idorobho Lizokuba Phakathi Kwayo”

5, 6. (a) Bekungelabobani idorobho? (b) Idorobheli belingakaqaliseli kuphi begodu kubayini?

⁵ Funda uHezekiyeli 48:15. Bekuyini ukuqakatheka ‘kwedorobho’ nendawo eliyizungezileko? (Hez. 48:16-18) Embonweni, uJehova watjela uHezekiyeli ukuthi: ‘Isabelo sedorobho . . . sizokuba ngesendlu yakwa-Israyeli.’ (Hez. 45:6, 7) Nje-ke, idorobho nenarha ezonjwe lidorobheli ‘bezingasingezomnikelo ocwengileko’ kaJehova ebekufuze ‘ubekelwe ngeqadi.’ (Hez. 48:9) Njengombana sinalokhu engqondweni, akhe sihlole lokho idorobheli elingasifundisa khona namhlanjesi.

⁶ Nasizakufumana iimfundo edorobheneli, akhe sibone lokho idorobheli ebelingekhe libe ngikho. Belingekhe liqalisele eJerusalema elakhiwe kabutjha nethempeli lalo. Kubayini? Ngombana idorobho elabonwa nguHezekiyeli embonweni belingekhe libe nethempeli phakathi kwalo. Okhunye, idorobheli belingakaqaliseli kinanyana ngiliphi idorobho ebelisenarheni ebuyiselweko kwa-Israyeli. Kubayini? Ngombana akunadorobho ebelinezinto ezihlathululwe embonweni lo elakhiwa badingiswa ababuyileko namkha iinzukulwana zabo. Ukungezelela kilokho, idorobheli belingekhe liqalisele edorobheni lezulwini. Kubayini? Ngebanga lokuthi lakhiwa endaweni ebeyibekelwe ‘okujayelekileko [namkha, engakacwengeki]’ ebekuhlukile emakhiweni eyakhiwa enarheni ebeyibekelwe ukulotjha okucwengileko.—Hez. 42:20.

7. Beliyini idorobho uHezekiyeli alibona begodu bekubonakala lijameleni? (Qala isithombe esisekuthomeni.)

⁷ Liyini idorobho uHezekiyeli alibonako? Khumbula ukuthi wabona idorobho embonweni ofanako, lapho abona khona inarha. (Hez. 40:2; 45:1, 6) lliZwi lakaZimu liveza bona inarha iqalisele enarheni engokomfanekiso, nje-ke idorobho nalo kufuze liqalisele edorobheni elingokomfanekiso. Litjho ukuthini ibizo elithi “idorobho”? Ibizweli linomqondo wabantu abahlala ndawonye basiqhema begodu bahlelekile bebanobunye. Ngikho, idorobho elabonwa nguHezekiyeli lihleleke kuhle begodu kubonakala lijamele ihlangano enqophisako.

8. Abanqophisi bebanqotjhiswa yini begodu kubayini kunjalo?

⁸ Ilungiselelweli lokunqophisa elisephasini lakhiwa bobani? Umbono kaHezekiyeli uveza bona idorobheli lisebenza ngaphakathi enarheni engokomfanekiso. Nje-ke, ihlangano enqophisako namhlanjesi inqophisa abantu bakaZimu kikho koke abakwenzako. Khuyini etjengisa bona idorobho lijame phezu kwenarha ejayelekileko namkha engakacwengeki? Kusikhumbuza bona idorobho alikaqaliseli elungiselelweni lokunqophisa lezulwini kodwana lephasini, ebelilokhu lisebenza bona kuzuze boke abahlala epharadesi elingokomfanekiso.

9. (a) Bobani abanqophisi bephasini namhlanjesi? (b) Khuyini uJesu azoyenza hlangana nemiNyaka eyiKulungwana?

⁹ Bobani abakha ilungiselelweli lokunqophisa ephasini? Embonweni kaHezekiyeli, odosa phambili kurhulumende wedorobho bekabizwa ngokuthi ‘yikosana.’ (Hez. 45:7) Bekamtlhogomeli wabantu kodwana bekangasuye umLevi namkha umphristi. Ikosana le, isenza sicabange ngabatlhogomeli bamabandla namhlanjesi abangakazeswa ngommoya. Abelusaba abanendaba abavela ‘kwezinye izimvu’ baziinceku ezithembekileko zombuso kaKrestu wezulwini. (Jwa. 10:16) Hlangana nemiNyaka eyiKulungwana ezako, uJesu uzokukhetha bekabeke “ephasini loke” abadala abafanelekako, namkha ‘amakhosana.’ (Rhu. 45:16) Banqotjhiswa mBuso wezulwini, bazokutlhogomela abantu bakaZimu hlangana nemiNyaka eyiKulungwana.

“UJehova Ulapho”

10. Idorobheli belibizwa ngokuthini begodu lokhu kusiqinisekisa ngani?

¹⁰ Funda uHezekiyeli 48:35. Igama ledorobho lithi “UJehova Ulapho.” Igameli lisiqinisekisa bona uJehova ukhona edorobheneli. Ngokutjengisa uHezekiyeli idorobheli eliphakathi nendawo, bekufana nokuthi uJehova watjela abadingisiweko ukuthi: ‘Ngizokuba nani godu!’ Kusikhuthazo tle lesi!

11. Ngiziphi iimfundo esizifunda embonweni kaHezekiyeli wedorobho nalokho okutjhiwo ligama lawo?

¹¹ Ngiziphi iimfundo esizifunda engcenyeni le yesiphorofido sakaHezekiyeli? Igameli labanqophisi abanjengedorobho liyasiqinisekisa namhlanjesi njengombana siziinceku zakaZimu, ukuthi uJehova unabantu bakhe abathembekileko ephasini nje begodu uzokuhlala anabo. Igameli ligandelela neqinisweli: Idorobho likhona, ingasi ukunikela amandla kunanyana ngimuphi umuntu kodwana ukuveza indlela uJehova anethando nazwisisa ngayo. Ngokwesibonelo, uJehova akakanikeli abanqophisako ilungelo lokuhlukanisa inarha, ngendlela abantu abangabona ngayo. Kunalokho, uJehova ulindele bona abanqophisi bahloniphe ilungiselelo lokwaba namkha ilungelo, lelo alinikele iinceku zakhe, kuhlanganise ‘abatlhagako.’—IzA. 19:17; Hez. 46:18; 48:29.

12. (a) Khuyini eqakathekileko ngedorobheli begodu lokhu kufanekiselani? (b) Ingcenye le yombono inikela abelusi abamaKrestu siphi isikhumbuzo esiqakathekileko?

¹² Khuyini okhunye okukarisako ngedorobho elibizwa ngokuthi “UJehova Ulapho”? Njengombana amadorobho wekadeni bekanamaboda awavikelako anamasango ambalwa, idorobheli belinamasango ali-12. (Hez. 48:30-34) Amasango amanengi la (amathathu ehlangothini ngalinye ledorobho) kutjengisa ukuthi abanqophisi bedorobheli bayangeneka begodu woke umuntu olotjha uZimu angakghona ukuya kibo. Ukungezelela kilokho, ukuba kwedorobho namasango ali-12 kugandelela ukuthi idorobheli livulekele woke umuntu, ‘yoke indlu yakwa-Israyeli.’ (Hez. 45:6) Ukwazi bona idorobheli linamasango amanengi, kwenza kube bulula ukungena kilo, yeke lokho kusikhumbuzo esiqakathekileko kubatlhogomeli abamaKrestu. UJehova ufuna kube bulula ukukhuluma nabo begodu ufuna bakulungele ukusiza boke abahlala epharadesi elingokomfanekiso.

Abantu BakaZimu ‘Bayangena Bona Bazokulotjha’ Begodu ‘Basebenza Edorobheni’

13. Khuyini uJehova ayitjho ngemisebenzi ehlukahlukeneko abantu ebebazoyenza?

¹³ Akhe sibuyeleni emva esikhathini sakaHezekiyeli sifumane imininingwana engeziweko ayitlola ngombono wokwabiwa kwenarha. UJehova wakhuluma ngabantu abenza imisebenzi ehlukahlukeneko. Abaphristi “abasebenza endaweni ecwengileko” bekufuze benze imihlatjelo begodu batjhidele kuJehova bebamlotjhe. Bese amaLevi ‘asebenza ethempelini’ bekufuze “atlhogomele imisebenzi yalo nazo zoke izinto okufuze zenziwe kilo.” (Hez. 44:14-16; 45:4, 5) Ukungezelela kilokho, bekuzokuba neensebenzi hlanu kwedorobho. Bezibobani iinsebenzezi?

14. Iinsebenzi ezihlanu kwedorobho zisikhumbuza ini?

¹⁴ Iinsebenzi ezihlanu kwedorobho bezivela “kizo zoke iinkoro zakwa-Israyeli.” Bezisiza. Umsebenzazo bekukutjala iintjalo ‘ezizokunikela abasebenzi bedorobheni ukudla.’ (Hez. 48:18, 19) Kghani ilungiselelweli alisikhumbuzi ngethuba esinalo namhlanjesi? Iye. Namhlanjesi boke abahlali abasepharadesi elingokomfanekiso banethuba lokusekela umsebenzi wabafowabo bakaKrestu abazesiweko nomsebenzi owenziwa ‘siqubuthu esikhulu’ uJehova ababeke bona badose phambili. (IsAm. 7:9, 10) Indlela eyihloko esibasekela ngayo, kuzimisela ukulalela isinqophiso senceku ethembekileko.

15, 16. (a) Ngimiphi eminye imininingwana esingayifumana embonweni kaHezekiyeli? (b) Sinethuba lokuhlanganyela kimiphi imisebenzi efanako?

¹⁵ Umbono kaHezekiyeli ubuye ube neminye imininingwana esingafunda kiyo malungana nomsebenzethu wokutjhumayela. Ngimiphi imininingwana leyo? UJehova wathi amalunga weenkoro ezili-12 ezingasimaLevi bewazokusebenza eendaweni ezimbili: esirhodlweni sethempeli nemadlelweni wedorobho. Bewuyini umsebenzawo eendawenezi? Esirhodlweni sethempeli, zoke iinkoro ‘bezingena bona ziyokulotjha’ ngokwenza imihlatjelo kuJehova. (Hez. 46:9, 24) Endaweni le, woke amalunga weenkoro bekeza asekele idorobho ngokuthi alime kilo. Khuyini esingayifunda ngesibonelo seensebenzezi?

¹⁶ Namhlanjesi, amalunga wesiqubuthu esikhulu anethuba lokuhlanganyela emisebenzini efana nale ebeyenziwa embonweni kaHezekiyeli. Alotjha uJehova “ethempelini lakhe” ngokunikela ngemihlatjelo yokudumisa. (IsAm. 7:9-15) Lokhu akwenza ngokuhlanganyela emsebenzini wokutjhumayela nokukhuluma ngokukholwa kwawo emihlanganweni yobuKrestu. Aqala indlela le yokulotjha uJehova njengeqakatheke khulu. (1 Kron. 16:29) Ukungezelela kilokho, abantu abanengi bakaZimu bayakghona ukusekela ihlanganwakhe ngeendlela ezinengi. Ngokwesibonelo, basiza emisebenzini yokwakha nokutlhogomela amaWolo womBuso nemakhiwo yegatja begodu basiza nakweminye imisebenzi eyenziwa yihlangano kaJehova. Abanye basekela imisebenzi le ngokuthi banikele ngemali. Singatjho bona imisebenzi le bayenzela, “iphazimulo kaZimu.” (1 Kor. 10:31) Bawenza ngetjiseko umsebenzabo begodu bathabile ngombana bayazi ukuthi uJehova “uthatjiswa khulu mihlatjelo enjalo.” (Heb. 13:16) Kghani uyawasebenzisa amathuba la?

“Kunezulu Elitjha Nephasi Elitjha Esililindele”

17. (a) Ngikuphi ukuzaliseka okukhulu kombono kaHezekiyeli esizokubona esikhathini esizako? (b) Hlangana nemiNyaka eyiKulungwana, bobani abazokuzuza ebanqophisini abanjengedorobho?

¹⁷ Inga-kghani esikhathini esizako sizokubona ukuzaliseka kombono kaHezekiyeli ngendlela ekulu? Iye! Cabanga ngalokhu: UHezekiyeli wabona ukuthi ingcenye yenarha ebizwa ngokuthi “mnikelo ocwengileko” beyiphakathi nendawo. (Hez. 48:10) Ngendlela efanako, ngemva kwe-Arimagedoni, kunganandaba bona sizabe sihlala kuphi, uJehova uzabe anathi. (IsAm. 21:3) Hlangana nemiNyaka eyiKulungwana, abanqophisako abanjengedorobho, okuzabe kungilabo abakhethiweko bazokutlhogomela abantu bakaZimu ephasini, bazokutlhogomela iphasi loke ngokukhupha iinqophiso ngethando kibo boke ezabe baphila ‘ephasini elitjha.’—2 Pit. 3:13.

18. (a) Kubayini singaqiniseka bona abanqophisi abanjengedorobho bazokuvumelana nokubusa kwakaZimu? (b) Igama ledorobho lisiqinisekisa ngani?

¹⁸ Kubayini siqiniseka bona labo abanjengedorobho abanqophisako bazokuhlala basekela indlela uZimu abusa ngayo? Ngombana iliZwi lakaZimu likwenza kukhanye bona idorobho elisephasini elinamasango ali-12 lifanekisela idorobho elisezulwini elinamasango ali-12, okuliJerusalema eliTjha, elakhiwa ngilabo abayokubusa noKrestu abazii-144 000. (IsAm. 21:2, 12, 21-27) Lokhu kutjengisa bona labo abanqophisako ephasini bazokuqinisekisa bebenze zoke iinqunto ezenziwa mBuso kaZimu wezulwini. Igama ledorobho elithi “UJehova Ulapho” lisiqinisekisa ngokuthi ukulotjha okuhlwengileko kuzokuhlala kukhona begodu kuphuphuma ngokungapheliko ePharadesi. Qala bona silindelwe lingomuso elihle kangangani!