UMosisi—INdoda YeThando

LIYINI ITHANDO?

Ithando lihlanganisa amazizo adephileko ngabanye. Umuntu onethando utjengisa ngamezwakhe nangezenzo bona uzizwa njani ngalabo abathandekako kuye, ngitjho nanyana ukwenza njalo kutlhoga ukuzidela komuntu mathupha.

UMOSISI WALITJENGISA NJANI ITHANDO?

UMosisi watjengisa ithando ngoZimu. Ngayiphi indlela? Nokho, khumbula amezwi atlolwe ku-1 Jwanisi 5:3: “Ngombana ukumthanda uZimu kuthobela imilayo yakhe.” UMosisi waphila ngekambisolawulo leyo. Kikho koke uZimu ambawa bona akwenze—kusukela esabelweni esithusa njengokuqalana noFaro onamandla kuye ekumbaweni bona ayokwenza umsebenzi obonakala ulula njengokululela intonga yakhe phezu kweLwandle Elibomvu—uMosisi walalela. Nofana umlayo bewulula namtjhana ubudisi ukuwulalela, uMosisi wavuma. “Wenza njalo.”—Eksodosi 40:16.

UMosisi watjengisa ithando ngama-Israyeli akunye nawo. Ayelela bona uJehova usebenzisa uMosisi bona anqophise abantu bakhe, ngalokho aletha iimraro ehlukahlukeneko kuMosisi. Siyafunda: “Abantu bebasolo bajame phambi kwakaMosisi kusukela ekuseni bekube sentambama.” (Eksodosi 18:13-16) Cabanga bona bekudinisa kangangani ngoMosisi bona alalele—i-iri ngemva kwe-iri—njengombana ama-Israyeli amthululela okuwatshwenyako! Nokho, uMosisi bekakuthabela ukusiza abantu abathandako.

Ngaphandle kokuwalalela, godu uMosisi wathandazela abathandekako bakhe. Bewathandazela nalabo abamonileko! Ngokwesibonelo, lokha udadwabo likaMosisi uMiriyamu anghonghoyila ngoMosisi, uJehova wambetha ngobulepheru. Kunokobana athabe ngesijezisweso, khonokho uMosisi wambawela, athandaza: “Zimu ngiyabawa! Mlaphe ngiyakurabhela!” (Numeri 12:13) Bekungaba yini okhunye ngaphandle kwethando ebekungenza uMosisi bona enze umthandazo ocabangelako lo?

NGIZIPHI IIMFUNDO ESINGAZIFUMANA?

Singasilingisa isibonelo sakaMosisi ngokuhlawulela ithando elidephileko ngoZimu. Ithando elinjalo lisitjhukumisela bona silalele imilayo ngokusuka ‘ehliziyweni.’ (Roma 6:17) Nesilalela uJehova ngosuka ehliziyweni, senza ihliziywakhe ithabe. (IzAga 27:11) Godu sizizuzisa thina. Kikho koke, nesikhonza uZimu ngethando lamambala, angekhe senze izinto ezilungileko kwaphela kodwana kuzosithabisa ukuzenza!—IRhalani 100:2.

Enye indlela esingalingisa ngayo uMosisi kuhlawulela ithando lokuzidela ngabanye. Nengabe abangani namtjhana amalunga womndeni basitjela ngokubatshwenyako, ithando lisenza (1) sibalalele ngosuka ehliziyweni; (2) zwelana nabo, okukuzizwa ngendlela abazizwa ngayo; begodu (3) sibazise bona sinendaba nabo.

NjengoMosisi, singabathandazela abathandekako bethu. Ngezinye iinkhathi singazizwa singasi lisizo nebasitjela ngemiraro yabo. Singazwelana nabo ngokuthi, “Ngibuhlungu, engingakwenza kukuthandazela.” Khumbula: “Ukuthandaza komuntu olungileko kunamandla khulu.” (Jakobosi 5:16, The Kingdom New Testament) Imithandazo yethu ingabangela uJehova bona enzele umuntu okuthileko ebekangekhe amenzele khona. Ngalokho-ke, ngikuphi okungcono esingabenzela khona esibathandako okudlula ukubathandazela na?a

Angekhe wavuma na bona singafunda likhulu kuMosisi? Nanyana bekamumuntu ofana nathi, wabeka isibonelo esiveleleko sekholo, ukuthobeka nethando. Nesiragela phambili simlingisa ngokuseduze, sizozizuzisa thina nabanye.—Roma 15:4.