“Yenzani Lokhu”
ISikhumbuzo Esizokubanjwa Ngo-Apreli 5
1. Kubayini iSikhumbuzo siqakathekile?
1 “Yenzani lokhu khona nizangikhumbula.” (Luka 22:19) Ngamezwi layo, uJesu wayala abalandeli bakhe bona bakhumbule ukufa kwakhe okusihlengo. Ngebanga lalokho okwenziwa sihlengo, alikho ilanga eliqakatheke khulu namtjhana eliligugu kumaKrestu ukudlula iSikhumbuzo saqobe mnyaka. Njengombana iSikhumbuzo somnyaka lo ngo-Apreli 5 sitjhidela, singakutjengisa njani ukuthokoza kwethu uJehova?—Khol. 3:15.
2. Singakutjengisa njani ukuthokoza kwethu ngeSikhumbuzo ngokutaditjha nangokucabangisisa?
2 Lungiselela: Ngokujayelekileko siyazilungiselela izinto esiziqala njengeziqakathekileko. Singazilungiselela iinhliziyo zethu iSikhumbuzo ngokutaditjha njengomndeni izenzakalo zahlangana namalanga kaJesu wamaswaphela ephasini nangokucabangisisa ngazo. (Ezra 7:10) Ingcenye ethileko yemitlolo ekhuluma ngezenzakalwezo ifumaneka e-almanageni nencwadini ethi Ukuhlola ImiBhalo Nsuku Zonke, kodwana irhelo elipheleleko, elikhambisana nezahluko zencwadi ethi Umuntu Omkhulu, lifumaneka emakhasini 23-24 we-Nqabayokulinda kaFebruary 1, 2011.
3. Singakutjengisa njani ukuthokozela kwethu iSikhumbuzo ngokwandisa indlela esihlanganyela ngayo ekonzweni?
3 Tjhumayela: Godu singatjengisa ukuthokoza kwethu ngokuhlanganyela ngokuzeleko ekonzweni. (Luka 6:45) NgoMgqibelo, Matjhi 10, kuzokuba liLanga lakaMagazini elikhethekileko begodu ijima lephasi mazombe lokumemela abantu eSikhumbuzweni lizokuthoma ngoMgqibelo, Matjhi 17. Ungahlela na ubujamo bakho bona ube nesikhathi esingeziweko ekonzweni, mhlamunye ukhonze njengephayona lesigiyani? Kubayini ningacoci ngalokhu njengomndeni ekuKhulekeleni koMndeni okulandelako?
4. Ngiziphi iinzuzo esingazifumana ngokuba khona eSikhumbuzweni?
4 Qala bona sizuza njani ngokuba khona eSikhumbuzweni qobe mnyaka! Ithabo nethando lethu ngoZimu liyakhula njengombana sicabanga ngokuphana kwakaJehova ngokusithumela iNdodana yakhe ekukuphela kwayo njengesihlengo. (Jwa. 3:16; 1 Jwa. 4:9, 10) Lokhu kusitjhukumisela bona singasaziphileli thina. (2 Kor. 5:14, 15) Godu kuvusa nesifiso sethu sokudumisa uJehova tjhatjhalazi. (Rha. 102:19-21) Kwamambala, iinceku zakaJehova ezithembekileko ziqale phambili ethubeni eziyokuba nalo ‘lokumemezela ukufa kweKosi,’ eSikhumbuzweni esizokuba ngo-Apreli 5.—1 Kor. 11:26.