Ogasite

Onani mfundo ziŵili zupezeka mu salimo yamene iyi: (1) Ŵanthu olungama okumana na mavuto. (2) Yehova otipulumusha ku mayeselo ŵasu. Kansi Yehova otipulumusha tyani? Njila imozi yakuchitila vamene ivi ni kutiyavya kunkhala na maganizo aweme pa nkhani ya moyo muli chino chalo. Olo kuti Yehova olonjeza kuti tizankhale osangalala pomutumikila, yove otilonjezalini kuti tikonkhala na moyo uliye nkhaŵa palipano. (Yes. 66:14) Yove otilimbikisa kuti tikoganizila ngako vokhuza sogolo yasu—yamene ni nthawe yatikuti tizankhale na moyo kosasila. (2 Ako. 4:16-18) Palipano, yove otiyavya kuti tipitilije kumutumikila nsiku iliyonse. (Mlr. 3:22-24) Kansi tingaphunzilepo chinji kufumila pa visanzo va atumiki okhulupilika a Yehova, a m’nthawe za m’Baibolo komasoti amasiku ŵano? Tingakumane na mavuto osayembekezeleka. Koma keno tudalila Yehova, yove azalekelini kutisamalila.—Sal. 55:22. Nsanja yophunzila 04.2023 pedji 14-15 ndim. 3-4

Sewo tingaphunzilepo kanthu kufumila pachisanzo cha Yosefe na Mariya amene enze okonzeka kumvwila olamulila akulu-akulu olo panthawe yamene kuchita vamene ivo kwenze kovuta. (Luk. 2:1-6) Mariya penze na vumo ya miyezi 9, yove na Yosefe ekumana na chiyeso cha kumvwila. Mfumu Agusto inkhazikisha lamulo kuti ŵanthu onse a mu Ufumu wa Roma, alute ku tauni ya kwawo kuti akachite kalembela. Yosefe na Mariya eyamba ulwendo woluta ku Betelehemu nsenga wa makilomita 150 (mamailosi 93) ndipo ove enzefunika kukwela nopolika malupili. Ulwendo wamene uyo wenze uipa ngako maka-maka kuli Mariya. Payakine onse aŵili enze na nkhaŵa ponena za mwangalitetezele ove pamozi na mwana wawo wosavyalika. Lomba sembe vinkhala tyani kuti Mariya eyamba kumvwa kuŵaŵa penze akali munjila? Yove enze na Mesiya wa kusogolo mmala mwake. Ove sembe esankha kusamvwila lamulo ya boma. Olo kuti Yosefe na Mariya enze na vifukwa vomvwika vodela nkhaŵa, ove emvwila lamulo yamene iyo. Yehova edalisa kumvwila kwawo. Mariya efwika luweme ngako ku Betelehemu, yove evyala mwana wathanzi, ndipo eyavyasoti pokwanilisha ulosi wa m’Baibolo!—Mik. 5:2. Nsanja yophunzila 10.2023 pedji 8 ndim. 9; pedji 9 ndim. 11-12

Kansi mungachite tyani keno muchita ngako wowa kuti mupeleke ndemanga pamisonkhano? Koma lomba, kuti mulimbikise abale na alongo ŵanu,mufunika kukonzekela luweme. (Miy. 21:5) Mukaziŵa luweme nkhani zamene izo, niyesoti pamunkhala omasuka ngako kulipeleka poyankha. Komasoti, pelekani ndemanga zanu mwachidule. (Miy. 15:23; 17:27) Yankho ifupi yukuchitishani kuchefya nkhaŵa. Keno mungayankhe mwachidule komasoti m’mawu ŵanu-ŵanu, mungawoneshe kuti mwakonzekela luweme komasoti mwaimvwisha luweme nkhani yamene iyo. Lomba tyani keno pavuli pokonkheja ayakine mwa malangizo amene aŵa muwona kuti mukalipitilija kuchita wowa kuti mupeleke ndemanga kamozi olo kaŵili tyala? Nkhalani osimikijila kuti Yehova azatembeje khama yanu pochita vonse vamungakwanishe. (Luk. 21:1-4) Kuchita vonse vatingakwanishe kutanthauzalini kuchita vinthu vatingaleke kwanisha pasewo seka. (Afil. 4:5) Mukoziŵa vinthu vamungakwanishe kuchita, nkhalani na cholinga chovichita, komasoti pemphelani kuti ntima wanu unkhale mmalo poyamba. Cholinga chamene ichi chingankhale kupeleka ndemanga imozi yachidule. Nsanja yophunzila 04.2023 pedji 21 ndim. 6-8

Ntumwi Paulo etiyelekezela na masodja amene onkhala tchelu komasoti ovwala vovwala vakunkhondo. Nsodja watchelu onkhala wokonzeka kuniyata nkhondo nthawe iliyonse. Mwamene umu niye mwavililisoti kuli sewo. Tupitilija kunkhala okonzekela nsiku ya Yehova povwala chovwala cholitetezela panganga cha chikhulupililo na chikondi komasoti chisote cha chiyembekezo. Chovwala panganga chenzeteteza ntima wa nsodja. Chikhulupililo na chikondi vuteteza ntima wasu wophiphilisila. Minkhalidwe yamene iyi izatiyavye kupitilija kutumikila Yehova komasoti kukonkheja Yesu. Chikhulupililo chutisimikijila kuti Yehova azatipase mphaso chifukwa chomusakila-sakila na ntima wasu wonse. (Ahe. 11:6) Nkhalidwe yamene iyi izatilimbikise kunkhala mphela okhulupilika kwa Msogoleli wasu Yesu, olo kuti tikokumana na mavuto. Tingatang’ishe chikhulupililo chasu kuti tikwanishe kupilila mavuto mwa kuphunzila kufumila pa visanzo va masiku ŵano va ŵanthu amene enkhala mphela okhulupilika mosasamala kanthu za chinzunzo olo mavuto azachuma ŵechikumana nawo. Komasoti tingapewe ukuka wokonda chuma mwa kukonkheja ŵanthu amene esankha kunkhala na moyo wosafuna vinthu vinyinji kuti aike vinthu vokhuza Ufumu pa malo oyamba. Nsanja yophunzila 06.2023 pedji 10 ndim. 8-9

Kulilesha ni luso yokwanisha kulamulila maganizo komasoti vochita va munthu. N’vofunika kuti tikwanilishe volinga vasu, makamaka keno kuchita vamene ivo n’kovuta olo keno tufunishishalini. Kumbukilani kuti kulilesha ni mbali ya chitwazi cha mzimu utuŵa, tetyo mukomusenga Yehova kuti akupaseni mzimu utuŵa kuti ukokuyavyani kukulisha nkhalidwe yofunika ngako yamene iyi. (Luk. 11:13; Agal. 5:22, 23) Osati mukoyembekezela vinthu viweme veka-veka. Muli chino chalo, vinthu vizankhalelini mwaungwilo. Keno tuganizila vamene ivi, tingachikwanilishelini cholinga chasu. Payakine tingofunishishalini kukwanilisha cholinga chasu chifukwa chingowoneka monga ni chovuta ngako kuchikwanilisha. Keno vamene ivi vili chendi tetyo kuli mwewo, kansi mungagaŵe cholinga chanu chamene icho kunkhala vitontho-vitontho? Keno cholinga chanu ni kukulisa nkhalidwe iweme, tyani osayamba kuyeja-yeja kuiwonesha mu njila zitontho-zitontho? Keno cholinga chanu ni kuŵelenga Baibolo yonse, kansi mungafupikisheko nthawe yoŵelenga? Nsanja yophunzila 05.2023 pedji 29 ndim. 11-13

Tinganene kuti nthawe zonse munthu akavomela kuphunzila Baibolo, niye kuti ali na mwayi woloŵa mu “Nsewu Utuŵa.” Ayakine ongoyendako tyala kansenga kafupi pavuli pake nofumamo mu nsewu ukulu. Ayakine ofunishisha kupitilija mphela kuyenda mu nsewu wamene uyu mpaka kuyafwika kwakuya. Nkuni kwamene uko? Kuli ŵala ali na chiyembekezo chakuya kululu, “Nsewu Utuŵa” uŵasogolela ku “paladaiso wa Mulungu” wa kululu. (Chiv. 2:7) Kuli ŵala ali na chiyembekezo chonkhala pano pachalo, nsewu ukulu wamene uyu uŵasogolela ku moyo wangwilo kumapeto kwa vyaka 1.000. Keno muyenda pa nsewu ukulu wamene uyu masiku ŵano, osalolesha kuvuli. Komasoti mufunikalini kufumamo mpaka mukasilije ulwendo wanu wofwika mu chalo chanyowani! Nsanja yophunzila 05.2023 pedji 17 ndim. 15; pedji 19 ndim. 16-18

Kuganizila vinthu vonse vawakuchitilani Yehova, kungakulimbikiseni kupeleka moyo wanu kwa Yehova pofuna kumutembeja. (Sal. 116:12-14) Baibolo yunena kuti Yehova niye wamene otipasa “mphaso iliyonse iweme komasoti yangwilo.” (Yako. 1:17) Mphaso ikulu pa zonse ni nsembe ya Mwana wake Yesu. Ganizilani ivi! Dipo yukupasani mwayi wonkhala paushamwali wotang’a na Yehova. Kuyangijila pamene apo, Yehova wakupasani mwayi wakuzankhala na moyo kosasila. (1 Yoh. 4:9, 10) Kupeleka moyo wanu kwa Yehova n’chimozi mwa vinthu vikulu ngako vamungachite powonesha kuti mutembeja mphaso ya dipo komasoti madaliso onse awakupasani Mulungu.—Deut. 16:17; 2 Ako. 5:15. Nsanja yophunzila 03.2024 pedji 5 ndim. 8

Tikowona minkhalidwe iipa ya ŵanthu masiku ŵano, tikumvwa monga ni mwenzemvwila Loti. Yove “evutika ntima ngako na kuloŵelela kwa ŵanthu ofwaya malamulo,” chifukwa yove enzeziŵa kuti Atata ŵasu akululu ozondana na minkhalidwe iipa. (2 Pet. 2:7, 8) Kuyopa Mulungu nomukonda kwechitisha Loti kukana minkhalidwe iipa ya ŵanthu enzemuzenguluke. Sewo nase tunkhala pakati pa ŵanthu amene oyendelalini mfundo za Yehova komasoti amene olemekezelatulini mfundo zake za minkhalidwe iweme. Olo n’tetyo, tingapitilije mphela kunkhala na minkhalidwe iweme keno tupitilija kukonda Mulungu komasoti kumuyopa moyenelela. Yehova otiyavya kuchita vamene ivi kupitila m’malangizo amene opezeka m’buku ya Miyambo. Akhilisitu onse analume na anakazi, atontho-atontho na akulu-akulu angapindule ngako na malangizo anzelu opezeka mu buku ya Miyambo yamene iyi. Keno tuyopa Yehova, tuchita vinthu mosamala popewa kunkhala pa ushamwali na ŵanthu aminkhalidwe iipa. Nsanja yophunzila 06.2023 pedji 20 ndim. 1-2; pedji 21 ndim. 5

Payakine mweshushiwapo kale na munthu wa m’banja mwanu, olo mwesiya vinthu viyakine vofunika vakuthupi kuti mukoika Ufumu pamalo oyamba. (Mat. 6:33) Pa nkhani yamene iyi, mukokhulupilila kuti Yehova oziŵa vonse vamuchita chifukwa cha yove. (Ahe. 6:10) Tukaikilalini kuti mwewo muwona kuti mawu okonkhapo ŵechilaŵila Yesu ni achendi, yove enena kuti: “Shuwa nukuujani mwewo analume, paliye esiya—ng’anda, enekwake, azilongosi, amama, atata, ŵana, olo minda—chifukwa cha newo na chifukwa cha uthenga uweme, wamene pali pano azafwanelini vinyinji kuwelejela maulwendo 100 nthawe ino. Yove azafwane ng’anda, enekwake, azilongosi, amama, atata, ŵana, na minda pamo na matamano, komasoti nthawe ikuza azafwane moyo wosasila.” (Mko. 10:29, 30) N’vosakaikisha kuti madaliso amwafwana ni anyinji ngako kupambana vinthu vemwisiya pa moyo wanu.—Sal. 37:4. Nsanja yophunzila 03.2024 pedji 9 ndim. 5

Pamene Akhilisitu a ku Yudeya pechikumana na njala ikulu. Abale amu mpingo waku Antiokeya, enze ofunishisha kuŵawonesha chifundo kupitila mu vochita vawo. Ove “esimikija ntima kutumija nthandizo iliyonse yamene sembe ekwanisha kupeleka, kuli abale onkhala ku Yudeya.” (Mach. 11:27-30) Olo kuti abale amene ekhuziwa na njala yamene iyo enzenkhala kutali, Akhilisitu aku Antiokeya enze osimikija ntima kuŵayavya. (1 Yoh. 3:17, 18) Masiku ŵano sewo nase tingawoneshe chifundo tikamvwa kuti olambila ayasu akhuziwa na soka ya chilengedwe. Mokulumija sewo tulipeleka kuyavyapo, payakine mwa kukonsha akulu keno pali ntchito iyakine yatingakate, kupeleka ndalama zoyavya pa ntchito ya pachalo chonse, olo mwa kupemphelela ŵanthu amene akhuziwa na ngozi yamene iyo. Abale na Alongo ŵasu angafunikile thandizo kuti afwane vinthu vofunikila kuti azakwanishe kupulumuka. Mfumu yasu Khilisitu Yesu akazawela kuzapeleka chiweluzo kuli ŵanthu, tufuna kuti yove azatifwane tuwonesha chifundo notiuja kuti “loŵani mu Ufumu.”—Mat. 25:34-40. Nsanja yophunzila 07.2023 pedji 4 ndim. 9-10; pedji 6 ndim. 12

Yesu ekonkheja chisanzo cha Yehova cha kunkhala wololela. Yove enze etumiwa pano pa chalo kuti alalikile kuli “mbelele zotaika za m’ng’anda ya Isilaeli.” Koma yove ewonesha kuti enze wololela pokata ntchito yamene iyo. Pa nthawe iyakine, mwanakazi muyakine wamene enzelini Mwisilaeli emupapatila kuti amupojekele mwana wake mwanakazi wamene ‘enze ekatiwa na chiŵanda mochitisha wowa.’ Yesu mwachifundo echita mokatijana na mwechimusengela mwanakazi wamene uyo, ndipo emupojekela mwana wake mwanakazi. (Mat. 15:21-28) Ganizilani chisanzo chiyakine. Kumayambililo kwa utumiki wake, Yesu enze enena kuti: “Aliyense wokana newo . . . , nane soti nizamukane.” (Mat. 10:33) Koma kansi yove emukana Petulo wamene emukana maulwendo atatu? Yayi. Yesu enzeziŵa kuti Petulo enzelimvwila chisoni ngako pa vinthu vechichita komasoti kuti yove enze munthu wokhulupilika. Pavuli pakuti waushiwa, Yesu ewonekela kuli Petulo ndipo emusimikijila kufumila pansi pa ntima kuti emukhululukila, komasoti kuti akalipitilija kumukonda. (Luk. 24:33, 34) Sewo tawona kuti Yehova Mulungu na Yesu Khilisitu ni ololela. Lomba tyani ponena za sewo? Yehova oyembekezela kuti sewo tinkhale ŵanthu ololela. Nsanja yophunzila 07.2023 pedji 21 ndim. 6-7

Kansi tingaŵauje chinji ŵanthu amene okaikila kuti lonjezo ya Mulungu ya Paladaiso izakwanilishiwe? Choyamba, Yehova elonjeza yeka. Buku ya Chivumbuluso yunena kuti: “Mulungu wamene alinkhezi pa mpando wachifumu enena kuti: ‘Loleshani! Nupanga vinthu vonse kunkhala vanyowani.’” Yehova ali na mphamvu, nzelu komasoti niwofunishisha kukwanilisha lonjezo yake. Chachiŵili, kukwanilishiwa kwa lonjezo yake n’kosimikijilika, chifukwa chakuti kuli yove lonjezo yamene iyi ili monga kuti yakwanilishiwa kale. N’chifukwa chake yove onena kuti: “Mawu aŵa ni odalilika komasoti ni achendi. . . . Vakwanilishiwa!” Chachitatu, paliye chingamukangishe Yehova kusilija ntchito yawayamba. N’chifukwa chake yove enena kuti: “Newo nine Alefa na Omega.” (Chiv. 21:6) Yehova azawoneshe kuti Satana niwawenye ndipo angakwanishelini kukangisha Yehova kukwanilisha cholinga chake. Keno munthu muyakine angalaŵile kuti, “lonjezo yamene iyi ni iweme ngako, koma lomba ingakwanilishiwe lini,” mungaŵelenge nomufotokozela Chivumbulutso 21:5, 6. Pavuli pake nomuwonesha mwakusimikijila lonjezo yake Yehova mwakusaina na siginecha yake.—Yes. 65:16. Nsanja yophunzila 11.2023 pedji 7 ndim. 18-19

Yehova elonjeza Abulahamu Pechikwanisha vyaka 75 aliye mwana. Kansi Abulahamu ewona kukwanilishiwa kwa lonjezo yamene iyi? Osati ngako-ngako. Papita vyaka 25 kufumila pechitauka Mmana wa Firate, Abulahamu ewona kuvyalika kodabwisa kwa mwana wake Isaki, ndipo pavuli pa vyaka viyakine 60 azizukulu ŵake Esau na Yakobo evyalika. (Ahe. 6:15) Koma Abulahamu aliyewone mbadwa zake pezenzenkhala ntundu ukulu noloŵa m’Chalo Cholonjezewa. Koma olo n’tetyo, munthu wokhulupilika wamene uyu, enze paushamwali wotang’a na Nyamalenga wake. (Yako. 2:23) Ndipo Abulahamu akazaushiwa, azasangalale ngako kumvwa kuti chikhulupililo na kuleza ntima kwake vileta madaliso kumitundu yonse! (Gen. 22:18) Kansi tuphunzilapo chinji? Payakine sewo tingakwanishe lini kuwona malonjezo onse a Yehova okwanilishiwa. Koma olo n’tetyo, keno tingankhale oleza ntima monga ni Abulahamu, tingankhale na chidalilo chakuti Yehova azatidalise palipano, komasoti azatidalise ngako m’chalo chanyowani chamene chawalonjeza.—Mko. 10:29,30. Nsanja yophunzila 08.2023 pedji 24 ndim. 14

Penze akali ntontho Mfumu Uziya enze wolichefya. Yove ephunzila “kuyopa Mulungu wachendi.” Yove enkhala na moyo kwa vyaka vokwanila 68, ndipo kwa nthawe yonse yamene iyi ya moyo wake Yehova enzemudalisa. (2 Mbiri 26:1-4) Uziya egonjesa adani anyinji a mitundu iyakine komasoti etang’isha chitetezo cha Yerusalemu. (2 Mbiri 26:6-15) N’vowonekelatu kuti Uziya esangalala na vonse vechimuyavya Mulungu kuti akwanishe kuchita. (Mlal. 3:12, 13) Mfumu Uziya enzefuna kuti nthawe zonse ŵanthu akokonkheja malangizo ŵake. Kansi vamene ivi vemuchitisha kuganiza kuti angakwanishe kuchita chilichonse chakufuna? Eye, tinganene tetyo chifukwa nsiku iyakine Uziya molikuja eganiza zoloŵa mʼkachisi kuti akapeleke nsembe pa guwa, vamene venze vinthu vosaloleka kuti mafumu akochita. (2 Mbiri 26:16-18) Nkulu wa ansembe Azariya emuzuzula, koma Uziya ekalipa ngako. N’vomvwisha chisoni kuti Uziya ewononga mbili yake monga ntumiki wokhulupilika ndipo elangiwa na matenda amankhutu. (2 Mbiri 26:19-21) Kuti yove enze epitilija kunkhala wolichefya, moyo wake sembe winkhala uweme ngako! Nsanja yophunzila 09.2023 pedji 10 ndim. 9-10

Olo pechinkhala Nkhilisitu wozozewa, Petulo enzefunika kulimbana na vofoka vake. Mu 36 C.E., Petulo enzepo pamene Koneliyo wamene enze wachikunja wosatendewa pechizozewa na mzimu utuŵa wamene wenze umboni woonekelatu wakuti “Mulungu aliye sankho” komasoti kuti akunja angankhalesoti mbali ya mpingo wa Chikhilisitu. (Mach. 10:34, 44, 45) Tetyo Petulo enzelimvwa kunkhala womasuka kulya pamozi na ŵanthu amitundu iyakine vamene enze akaliyevichitapo kuvuli konse. Koma olo n’tetyo, Akhilisitu ayakine Achiyuda enzewona kuti Ayuda na akunja enzefunikilalini kulyela pamozi. Ŵanthu ayakine amene enze na maganizo ophoniyeka pechifwika ku Antiokeya, Petulo eleka kulya pamozi na abale ŵake achikunja payakine chifukwa choyopa kukhumudwisa Akhilisitu Achiyuda. Ntumwi Paulo pechiziŵa chinyengo chamene icho emuzuzula Petulo pamenso pa ŵanthu. (Agal. 2:13, 14) Olo kuti yove ekumana na vuto yamene iyi, Petulo epilila. Nsanja yophunzila 09.2023 pedji 22 ndim. 8

Kulifufuza mofumila pansi pa ntima kungakuyavyeni kuziŵa mbali ziyakine zamufunikila kuwamya, koma osataya ntima. “Yehova ni muweme ntima” yove azakuyavyeni kuti muchinje. (1 Pet. 2:3) Ntumwi Petulo etisimikijila kuti: “Mulungu . . . azasilijishe kukuphunzisani.” Nthawe iyakine Petulo elimvwa kunkhala wosayenelela kuŵa pa menso pa mwana wa Mulungu. (Luk. 5:8) Koma na thandizo yachikondi yofumila kwa Yehova na Yesu, Petulo epilila monga wophunzila wa Khilisitu. Tetyo, Petulo elolewa ‘kuloŵa mwaulemelelo mu Ufumu wosasila wa Ambuye na Mpulumusi wasu Yesu Khilisitu.’ (2 Pet. 1:11) Yamene iyi nidaliso ikulu ngako! Keno mwewo mungapilile molingana na mwechichitila Petulo nolola kuphunzisiwa na Yehova, mwewo namwe muzalondele madaliso a moyo wosasila. Mwewo muzankhale “osimikija kuti chikhulupililo chanu chizachitishe kuti miyoyo yanu ipulumuke.”—1 Pet. 1:9. Nsanja yophunzila 09.2023 pedji 30 ndim. 14; pedji 31 ndim. 16-17

Venzechita Ayuda pa kulambila kwawo. Chihema chenzenkhala na—bwalo. Bwalo yamene iyi yenze malo akulu amene enzenkhala nkati mwa mpanda. Guwa ya nsembe zoputija ikulu ya nkuwa yenzenkhala nkati mwa bwalo yachihema pamozi na dishi ya manzi yankuwa mwamene mwenzesambila ansembe akaliye yamba kuchita utumiki wawo wopatulika. (Eks. 30:17-20; 40:6-8) Masiku ŵano akwake ozozewa a Khilisitu otumikila mokhulupilika m’bwalo ya nkati pano pachalo ya kachisi wauzimu. Dishi ikulu ya manzi, yukumbusha akwake ozozewa a Khilisitu chinthu chiyakine chofunika ngako, komasoti yukumbusha Akhilisitu onse kuti ofunika kupitilija kunkhala atuŵa mwakuthupi komasoti mwauzimu. Lomba kansi “gulu ikulu” yulambilila kuni? Ntumwi Yohani eiwona “ili paname pasogolo pa mpando wachifumu” vamene vutanthauza m’bwalo yakunja mwamene, “mwakuchitila utumiki wopatulika usiku na nzuwa mu kachisi wake.” (Chiv. 7:9, 13-15) Nise otembeja ngako kuti tili na malo m’makonzedwe a Yehova amene aŵa akulambila kutuŵa! Nsanja yophunzila 10.2023 pedji 28 ndim. 15-16

Njila iyakine yakutitang’ishila Yehova, ni kupitila muli akulu. (Yes. 32:1, 2) Tetyo, mukankhala na nkhaŵa mukoŵafotokozela akulu mwamumvwila. Mukolondela mosangalala thandizo yangakupaseni. Yehova angakupaseni mphamvu kupitila muli ove. Chiyembekezo chasu chozikiwa m’Baibolo chingatipase mphamvu, sewo tili na chiyembekezo chantengo wapatali cha moyo wosasila—mosasamala kanthu keno tizankhale M’paladaiso pano pachalo kapena mu Ufumu wa kululu—Yove azatipase mphamvu. (Alo. 4:3, 18, 19) Chiyembekezo chasu chutitang’isha kuti tikwanishe kupilila mavuto, kulalikila uthenga uweme komasoti kuchita mautumiki osiyana-siyana mumpingo. (1 Ates. 1:3) Chiyembekezo chimo na chimo chamene ichi niye chitang’isha ntumwi Paulo. Yove ‘enzesokonezeka maganizo,’ ‘kusila nzelu,’ ‘kutamanishiwa,’ komasoti ‘kuwishiliwa pansi.’ Moyo wake wenze chendi pangozi. (2 Ako. 4:8-10) Paulo efwana mphamvu kuti akwanishe kupilila mwakuika maganizo ŵake pa chiyembekezo. (2 Ako. 4:16-18) Paulo enzeganizila vokhuza chiyembekezo chamene icho, ndipo monga vokonkhapo vake, yove enzelimvwa kuti ‘onkhala wanyowani nsiku iliyonse.’ Nsanja yophunzila 10.2023 pedji 15-16 ndim. 14-17

Nthawe ziyakine tingowona kuti Mulungu ofunikila kutiyankha mokulumija mapemphelo ŵasu. Koma kulaŵila chendi, Yehova oziŵa nthawe iweme yangatiyavyile. (Ahe. 4:16) Tikaleka kuyankhiwa mokulumija pavatasenga kwa Mulungu, payakine tingaganize kuti yankho ya Yehova ni yakuti ‘Ng’ang’a.’ Koma n’voziŵikilatu kuti yankho ya Yehova ingankhale yakuti ‘Yembekezako patontho.’ Mwachisanzo, ganizilani za nkwasu wachilumbwana wamene enzepemphela kuti apole matenda ŵake. Kuti Yehova enze emupojeka modabwisa, Satana sembe enena kuti nkwasu wamene uyo epitilija kutumikila Yehova pachifukwa tyala chakuti Mulungu emupojeka ku matenda ŵake. (Yobu 1:9-11; 2:4) Kuyangijila soti pamene apo, Yehova enkhazikisha kale nthawe yakuti azasilije matenda onse. (Yes. 33:24; Chiv. 21:3, 4) Tetyo, nthawe yamene iyo ikaliyefwika sewo tingayembekezele lini kuti Mulungu akotipojeka modabwisa. Tetyo, m’kwasu wamene uyu enzefunikila kusenga Yehova kuti amupase tyala mphamvu na ntendele wamuntima, kuti akwanishe kupilila matenda ŵake amene awo nopitilija kutumikila Mulungu mokhulupilika. Nsanja yophunzila 11.2023 pedji 24 ndim. 13

Samisoni ephoniyesha vinthu ngako, koma yove aliyewelele mvuli. Yove enzesakila mpata kuti akwanilishe utumiki wechimupasa Yehova wolimbana na Afilisiti. (Ower. 16:28-30) Samisoni epapatila Yehova kuti: “Niloleni niŵawejele Afilisiti.” Mulungu wachendi eyankha pemphelo ya Samisoni, ndipo emuwejela mphamvu zake zodabwisa. Monga vokonkhapo vake, vinthu vimuyendela luweme ngako Samisoni panthawe yamene iyi kupambana kuvuli konse. Olo kuti Samisoni ekumana na vokonkhapo viipa va vophoniya vake, yove aliyeleke kuyeja-yeja kuchita chifunilo cha Yehova. Olo kuti taphoniyesha vinthu viyakine ndipo tufunikila kuzuzuliwa kapena kuluza udindo uyakine, tufunikilalini kuwelela mvuli. Mukokumbukila kuti Yehova oŵeŵalini nase. (Sal. 103:8, 9) Mosasamala kanthu za vinthu vatuphoniya, yove azapitilije kutikatishila ntchito monga ni mwechichitila na Samisoni. Nsanja yophunzila 09.2023 pedji 6 ndim. 15-16

Kupilila kwanu kuchitisha Yehova kukondwela namwe. Ivi vutanthauzalini kuti Yehova okondwela mwewo mukokumana na mayeselo olo mavuto. Mulungu okondwela na mwewo. Kupilila kwanu kuchitisha kuti mwewo munkhale ovomelejeka kwa Mulungu. Yamene iyi ni daliso ikulu ngako! (Sal. 5:12) Mukokumbukila kuti Abulahamu ekumana na mavuto ndipo pechiŵapilila mokhulupilika, Yehova ekondwela naye. Yehova enzemuwona monga nshamwali wake komasoti munthu wolungama. (Gen. 15:6; Alo. 4:13, 22) N’chimozi-mozi soti na sewo. Sikuti Yehova okondwela nase chifukwa cha kupaka kwa ntchito zatukata pomutumikila olo chifukwa cha maudindo ŵatili nawo. Yove okondwela nase chifukwa cha kupilila kwasu mokhulupilika. Ndipo mosasamala kanthu za nsinkhu, mwavilili vinthu pamoyo wasu, kapena maluso ŵatingankhale nawo, tonse tingakwanishe kupilila. Kansi pali vuto iliyonse yamupilila mokhulupilika lomba teti? Keno n’tetyo, ziŵani kuti mukondwelesha Yehova. Kuziŵa kuti Mulungu okondwela nase kungankhale na vokonkhapo viweme ngako pamoyo wasu. Vamene ivi vingatang’ishe chiyembekezo chasu. Nsanja yophunzila 12.2023 pedji 11 ndim. 13-14

Mwanalume wachikhilisitu ofunikila kuphunzila kulaŵila luweme. Vamene ivi vutanthauza kuti yove ofunikila kumvwishila noziŵa mwakumvwila ŵanthu ayakine. (Miy. 20:5) Yove angafunikile kunkhala tchelu na lizu, mwachuwonekela chinso, komasoti muŵili wamunthu wakulaŵijana naye. Mwewo mungakwanishe kuchita vamene ivi peka-peka keno mupatula nthawe yotandala na ŵanthu ayakine. Keno mwewo nthawe zonse mukatishila ntchito vipangizo vamakono polaŵijana na ŵanthu monga ma imelo, mamesedji, vamene ivi vingachitishe kuti munkhale muliye luso polaŵijana na ŵanthu pamenso na pamenso. Tetyo mukofwana nthawe yotandala na ayakine pa menso na pamenso. (2 Yoh. 12) Mwanalume wachikhilisitu wotang’a mwauzimu ofunikila kulifwanila yeka vofunika vapa moyo wake, komasoti wa ŵanthu am’banja mwake. (1 Tim. 5:8) Mulumbwana angaphunzile ntchito olo luso iyakine ali kusekondale. Mulimonse mwavingankhalile pamoyo wanu, mwewo mungachite luweme kuphunzila luso yamene ingezekuyavyani kufwana ntchito. (Mach. 18:2, 3; 20:34; Aife. 4:28) Nkhalani na mbili iweme mwakunkhala munthu wakhama pantchito komasoti wolimbikila mpaka pamapeto. Mukachita tetyo, muzankhale na mwayi wofwana ntchito nonkhalisha pantchito yamene iyo. Nsanja yophunzila 12.2023 pedji 27 ndim. 12-13

Baibolo ikolaŵila za “nsiku ya Yehova” yunena za nthawe yakuti azaweluze adani ŵake Yehova nopulumusha ŵanthu ŵake. M’masiku a kuvuli, nthawe ziyakine Yehova enzepeleka chiweluzo. (Yes. 13:1, 6; Eze. 13:5; Zef. 1:8) Mu nthawe yasu ino, “nsiku ya Yehova” izayambe na kuukiliwa kwa Babulo Nkulu ndipo izafwike pa chimake pa nkhondo ya Aramagedo. Kuti tizapulumuke pa “nsiku” yamene iyo, tufunikila kukonzekela palipano. Pa nkhani ya “chisauso chikulu” Yesu aliye nene tyala kuti tufunika kunkhala okonzekela “chisauso chikulu” koma enenasoti kuti “pitilijani kunkhala okonzeka.” (Mat. 24:21; Luk. 12:40) Mu kalata yake yoyamba youjiliwa yoluta kuli Atesalonika, ntumwi Paulo ekatishila ntchito mafanizo anyinji kuti ayavye Akhilisitu kupitilija kukonzekela nsiku ikulu ya chiweluzo ya Yehova. Paulo enzeziŵa kuti nsiku ya Yehova ingafwikiletulini pa nthawe yamene iyo. (2 Ates. 2:1-3) Koma olo n’tetyo, yove elimbikisa abale ŵake kukonzekela nsiku yamene iyo monga kuti ifwike mailo, ndipo nasesoti tingakonkheje malangizo ŵake. Nsanja yophunzila 06.2023 pedji 8 ndim. 1-2

Cham’ma 1970 ku Japan m’chigawo cha Toyko, kwenzemangiwa ng’anda iyakine ya mmululu yamene yenze itali ngako. Ŵanthu enzekaikila kuti ng’anda yamene iyo ingapitilijelini kunkhala yotang’a, chifukwa mu tauni yamene iyo mwenzechitika vivomelezi kaŵili-kaŵili. Kansi ŵanthu amene enzemanga ng’anda yamene iyo, echita tyani kuti ikwanishe kupilila kuvivomelezi? Akaswili amene emanga ng’anda yamene iyo eipanga kuti inkhale yotang’a koma yokwanisha kunyang’anya mosavuta na cholinga chakuti ikokwanisha kupilila kuvivomelezi. Akhilisitu, ali monga ni ng’anda itali yamene iyo. Mwanjila yotyani? Mkhilisitu ofunikila kupitilija kuwona vinthu mwa njila iweme pankhani ya kunkhala wotang’a komasoti kukwanisha kuchinja vinthu mosavuta. Yove ofunikila kunkhala wotang’a komasoti wosanyang’anyika pokonkheja malamulo a Yehova komasoti mfundo zake. Yove ni “wokonzeka kumvwila” ndipo owaya-waya lini. Mwanjila iyakine ofunikila kunkhala “wololela” kapena kuti wokwanisha kuchinja mosavuta keno kuchita vamene ivo n’kokwanishika komasoti n’kofunikila. (Yako. 3:17) Mkhilisitu wamene okwanisha kuwona vinthu mwa njila iweme, azapewe kunkhala wotang’a monyanyila kapena wololela monyanyila. Nsanja yophunzila 07.2023 pedji 14 ndim. 1-2

Komasoti pechikula, Yesu enzefunika kulimbana na Satana Mdyelekezi wamene enzemuyesa kuti achimwe, mpaka efwika pomuuja mosapita mmbali kuti achite vinthu mosakhulupilika kwa Mulungu. (Mat. 4:1-11) Satana enzewosimikija ntima kumuchimwisha Yesu na cholinga chakuti akangiwe kulipila dipo. Pautumiki wake wapano pa chalo, Yesu epilila mayeselo ayakine anyinji. Adani ŵake emutamanisha komasoti enzeyeja-yeja kuti amupaye. (Luk. 4:28, 29; 13:31) Yove enzefunikila kupilila vophoniya va ophunzila ŵake. (Mko. 9:33, 34) Pa nthawe yenzekumana na mavuto pa moyo wake, ŵanthu emunzunza komasoti kumunyoza. Pavuli pake, yove echifwa imfwa yoŵaŵa ngako, komasoti yochitisha nsoni. (Ahe. 12:1-3) Yove enzefunikila kupilila mbali yosilijila ya mavuto ŵake payeka, mosadalila chitetezo cha Yehova. (Mat. 27:46) N’vowonekelatu kuti Yesu etamana ngako kuti apeleke dipo. Tikaganizila vinthu vonse vechilolela Yesu kulitana chifukwa cha sewo, chikondi chasu kuli yove chukula ngako. Nsanja yophunzila 01.2024 pedji 10-11 ndim. 7-9

Tufunikila kunkhala oleza ntima kuti tinkhale pa ushamwali uweme na ayasu. Kuchita vamene ivi, kutiyavya kumvwishila mosamala ayasu akolaŵila. (Yako. 1:19) Kuleza ntima kutiyavyasoti kunkhala mwantendele na ayasu. Kutitetezasoti kupewa kulaŵila olo kuchita vinthu mosawama ntima tikasokonezeka maganizo. Komasoti keno nise oleza ntima tizapewe kukalipa munthu muyakine akazatikhumudwisa. Mmalo mowejela ‘tizapitilije kulolelana muyake na muyake nokhululukilana na ntima wonse.’ (Akol. 3:12, 13) Kuleza ntima kungatiyavyesoti kupanga vosankha viweme. Mmalo mochita vinthu moutuka kapena tikaliye ganiza, tikopatula nthawe yofufuza nkhani zokhuzana na vosankha vatili navo, pavuli pake nopanga chosankha chiweme. Mwachisanzo, keno tusakila-sakila ntchito tingankhale na ntima wofuna kuvomela ntchito iliyonse yamene ingapezeke olo kuti ntchito yamene iyo ingasokoneze kulambila kwasu Yehova. Mmalo mwake, kutalimpha kwa nsenga watingoyenda poluta ku ntchito, komasoti mwaingakhuzile banja yasu na ushamwali wasu na Yehova. Tikankhala oleza ntima tizapewe kupanga vosankha viipa. Nsanja yophunzila 08.2023 pedji 22 ndim. 8-9

Chifukwa chakuti muliye ungwilo, nthawe ziyakine mungakhumudwe. Koma mwewo mungafwane mphamvu zokuyavyani kupilila mayeselo aliwonse keno mukokumbukila za lonjezo yemwilonjeza Yehova pa nthawe yemwelipeleka kuli yove. Ndaŵa yanji tunena tetyo? Pa nthawe yemwipeleka moyo wanu kwa Yehova, mwewo mwelikana mweka. Kulipeleka kutanthauza kupewa ntima wofuna kuchita chilichonse chamene Yehova angakondwele lini nacho. (Mat. 16:24) Chifukwa cha vamene ivi, mukezekumana na chiyeso mwewo muzafunike lini kuwononga nthawe poganizila vamungachite, chifukwa muziŵa kale vamufunikila kuchita. Chifukwa chakuti mwasankhilatu vamungachite, muzafunike tyala—kupitilija kunkhala okhulupilika kwa Yehova. Muzapitilije kunkhala osimikija ntima kuchita vakukondwela navo Yehova nokonkheja chisanzo cha Yobu. Olo pa nthawe yenzekumana na vinthu vovuta ngako, yove enena kuti: “Mpaka nizamwalile, newo nizalekelini kunkhala wokhulupilika!”—Yobu 27:5. Nsanja yophunzila 03.2024 pedji 9 ndim. 6-7

Yehova wamene ni “Mulungu wachikondi” ali pamozi nase! (2 Ako. 13:11) Yove ochita chidwi na aliyense payeka-payeka. Sewo tili na chidalilo kuti nise “ozengulukiwa na kuwama ntima kosasila.” (Sal. 32:10) Tikaganizila ngako mwakutiwoneshela chikondi chake Mulungu niyesoti patumukhulupilila ngako, ndipo tulimvwa kuti tili naye paushamwali wotang’a. Tingapemphele kuli yove momasuka nomufotokozela kufunika kwa chikondi chake kuli sewo. Tingamufotokozele nkhaŵa zasu zonse tili na chidalilo kuti atimvwishe komasoti niwokonzeka kutiyavya. (Sal. 145:18, 19) Molingana na mwatukopekela na mulilo pa nsiku yozizila, sewo tukopekasoti na chikondi cha Yehova. Olo kuti chikondi cha Yehova n’champhamvu, chikondi chamene ichi n’chotang’asoti ngako. Tetyo, mukonkhala osangalala chifukwa chakuti Yehova okukondani. Ndipo tiyeni tonse tilole kuti chikondi cha Mulungu chitilimbikise kunena kuti: “Ntima wangu ukonda Yehova”!—Sal. 116:1. Nsanja yophunzila 01.2024 pedji 31 ndim. 19-20

Yesu echita vinyinji kupambana kuuja tyala ŵanthu kuti zina ya Mulungu ni Yehova. Ayuda ŵenzelaŵila nawo Yesu enzeiziŵa kale zina ya Mulungu, koma Yesu “niye munthu eyamba . . . kufotokoza za Mulungu.” (Yoh. 1:17, 18) Mwachisanzo, Malemba Achiheberi onena kuti Yehova ni wachifundo komasoti wozula na kuwama ntima kosasila. (Eks. 34:5-7) Yesu emvwikisha luweme nkhani yamene iyi mufanizo ya mwana woloŵelela. Tikoŵelenga vokhuza nkhani ya tata wamene ewona mwana wake akuza patali, noutuka kuyakumana naye, kumukumbatila, komasoti kumukhululukila mofumila pansi pa ntima, sewo tunkhala na chithunzi-thunzi chiweme chachifundo komasoti kuwama ntima kosasila kwa Yehova. (Luk. 15:11-32) Yesu etiphunzisa za umunthu ngawo-ngawo wa Atata ŵake. Nsanja yophunzila 02.2024 pedji 10 ndim. 8-9

Yehova otonthoja nosisimula ŵanthu amene ovutika maganizo. Kansi tingakonkheje tyani Yehova pochitila ayakine chifundo komasoti kuŵatonthoja? Njila imozi yatingachitile vamene ivi ni kukulisha minkhalidwe iyakine yamene ni yokatijana na kutonthoja ayakine. Kansi iyakine mwa minkhalidwe yamene iyo niyotyani? Kansi n’chinji chingatiyavye kupitilija kuwonesha chikondi na cholinga chakuti “tipitilije kutonthojana” nsiku iliyonse? (1 Ates. 4:18) Sewo tufunikila kukulisha minkhalidwe iweme monga kuchitilana chifundo, kukonda enekwasu, komasoti kuwama ntima. (Akol. 3:12; 1 Pet. 3:8) Kansi minkhalidwe yamene iyi ingatiyavye tyani? Keno tuwonesha chifundo kuli abale ŵasu mofumila pansi pa ntima, tizankhale ofunishisha ngako kuŵayavya pakukumana na mavuto. Monga ni mwechinenela Yesu “pakamwa polaŵila vutaikila muntima. Koma munthu muweme ofumya viweme m’chuma chake chiweme.” (Mat. 12:34, 35) Kutonthoja akwasu na azilongosi ŵasu amene okumana na mavuto ni njila yofunika ngako yatuwoneshela kuti tuŵakonda. Nsanja yophunzila 11.2023 pedji 10 ndim. 10-11

Sewo tufunika kusenga thandizo keno tufuna kuti tiŵamvwishe luweme maulosi amene ali m’Baibolo. Ganizilani fanizo iyi. Tiyelekezele kuti mwewo mwaluta kudela yamene muiziŵalini koma muyanu wamene wamuli naye oiziŵa luweme ngako dela yamene iyo. Yove oziŵa malo ngawo-ngawo amene ŵamuli komasoti kwamene kwaikuya njila iliyonse. N’voziŵikilatu kuti mwewo mungasangalale kuti muyanu wamene uyo wavomela kuyenda namwe pamozi! Molingana na vamene ivi, Yehova oziŵa kuti tilipani mu mndandanda yake ya nthawe, komasoti vinthu vamene vili kusogolo kwasu. Tetyo, kuti timvwishe ulosi wa m’Baibolo tufunikila kumusenga Yehova molichefya kuti atiyavye. (Dan. 2:28; 2 Pet. 1:19, 20) Molingana na kolo iliyonse iweme, Yehova ofuna kuti ŵana ŵake ankhale na sogolo iweme. (Yer. 29:11) Koma mosiyana na kolo iliyonse, Yehova angatiuje vinthu vamene vikuti vichitike kusogolo, ndipo yove nthawe zonse olaŵila vachendi. Yove echitisha kuti maulosi alembewe m’Mawu ŵake kuti tikokwanisha kuziŵilatu vinthu vofunika vikaliyechitika.—Yes. 46:10. Nsanja yophunzila 08.2023 pedji 8 ndim. 3-4