Sekutemba

Mulungu wapasa Yesu mphamvu zosilija mavuto onse a ŵanthu. Yesu penzechita vodabwisa, ewonesha kuti angakwanishe kusilija mavuto onse amene paseka tingakwanishelini kuŵasilija. Mwachisanzo, yove ali na mphamvu yotimasula ku mavuto—wamene ni uchimo wetitolela kuli makolo ŵasu komasoti chilichonse chuwela chifukwa cha uchimo kupamikijapo matenda na imfwa. (Mat. 9:1-6; Alo. 5:12, 18, 19) Vodabwisa vechichita viwonesha kuti yove angakwanishe kupojeka “ntundu uliwonse” wa matenda olosoti kuusha akufwa. (Mat. 4:23; Yoh. 11:43, 44) Komasoti, ali na mphamvu yolamulila mphepo ya mphamvu nosilija mizimu iipa. (Mko. 4:37-39; Luk. 8:2) N’volimbikisa ngako kuti Yehova wapeleka mphamvu yotetyo mmanja mwa Mwana wake! Tingankhale osimikijila kuti madaliso akusogolo okhuza Ufumu wa Mulungu azakwanilishiwe. Vodabwisa vechichita Yesu ali pachalo, vutiphunzisa za vinthu vinyinji vati azachite monga Mfumu ya kululu ya Ufumu wa Mulungu. Nsanja yophunzila 04.2023 pedji 3 ndim. 5-7

Keno muli mumpingo ukulu, Payakine anyinji olipeleka kuti ayankhe mwakuti kanyinji-kanyinji kwanja yanu yunyalanyaziwa, mungafune kungoleka kumvwishila. Koma osaleka kuyeja-yeja kuyankha. Mungachite luweme kukonzekela ndemanga zinyinji pa nsonkhano uliwonse. Keno aliye kupaseni mwayi woyankha kumayambililo kwa phunzilo, muzankhale mphela na mwayi woyankha nsonkhano wamene uyo paupitilija kusogolo. Mukokonzekela phunzilo ya Nsanja ya Mulonda, mukoganizila kukatijana kulipo pakati pa ndime iliyonse na mutu ukulu wa phunzilo yamene iyo. Mukachita vamene ivi, mungankhale na ndemanga ziweme zamunganene pa phunzilo yamene iyo. Kuyangijila pamene apo, mungakonzekele kuyankha pa ndime zamene zunena choonadi cha m’Baibolo chovuta kufotokoza. Ndaŵa yanji? Ndaŵa yakuti pangankhale olipeleka atontho tyala angayankhe pa nkhani zamene izo. Lomba kansi mungachite tyani keno mupezalini mwayi woyankha? Ujani osogoja misonkhano konsho yamufuna mwewo kuti mukayankhe. Nsanja yophunzila 04.2023 pedji 21-22 ndim. 9-10.

Yosefe enzenkhala wokonzeka kukonkheja malangizo a Yehova, ndipo vamene ivi vimuchitisa kunkhala mwanalume muweme. Kwa maulwendo atatu onse, elondela malangizo ofumila kwa Mulungu okhuza banja yake. Pa nthawe zonse zamene izi, yove enzemvwila pa nthawe yamene iyo, olo kuti kuchita vamene ivi kwenze kovuta kuli yove. (Mat. 1:20, 2:13-15, 19-21) Mwa kukonkheja malangizo a Mulungu, Yosefe emuteteza Mariya, kumuyavya, komasoti kumusamalila. Ganizilani tyala mwamene vochita va Yosefe mwevichitishila Mariya kuti akomukonda nomulemekeza ngako! Mwewo analume, mungakonkheje Yosefe mwa kusakila-sakila malangizo a m’Baibolo okhuza mwamungasamalilile banja yanu. Keno mukonkheja malangizo amene awo, olo kuti vamene ivi vingafune kuti muchinje ngako, mungawoneshe chikondi kuli mwanakazi wanu ndipo mungatang’ishe banja yanu. Mulongo muyakine waku Vanuatu, wamene wankhala m’banja kwa vyaka 20, enena kuti: “Mwanalume wangu akofufuza malangizo a Yehova noŵakonkheja, numulemekeza ngako. Nulimvwa kunkhala wotetezeka ndipo nudalila pa vosankha vake.” Nsanja yophunzila 05.2023 pedji 21 ndim. 5

Ayuda amene enze oyenelela kujokela ku Babulo, enzefunika “kunkhala ŵanthu atuŵa” kwa Mulungu wawo. (Deut. 7:6) Olo n’tetyo, vamene ivi vutanthauza lini kuti ove enzefunikilalini kuchinja kuti akokondwelesha Yehova. Vuwoneka kuti Ayuda anyinji evyalikila ku Babulo, enze eyoloŵela mwenzechitila vinthu a Babulo komasoti vinthu venzelemekeza. Papita vyaka vinyinji pavuli pakuti Ayuda oyambilila ajokela ku Isiraeli, Bwanankubwa Nehemiya edabwa kuwona kuti ŵana evyalikila ku Isilaeli aliyephunzisiwe olo patontho chilaŵilo cha Ayuda. (Deut. 6:6, 7; Neh. 13:23, 24) Kansi ŵana amene awo sembe ephunzila tyani kukonda Yehova komasoti kumulambila keno enzekumvwalini Chiheberi—chamene chenze chilaŵilo chikulu chilembewa m’Mawu a Mulungu? (Ezara 10:3, 44) Tetyo, Ayuda amene awo enzefunika kuti achinje ngako, koma venze vosavuta kuli ove kuti achinje ku Isilaeli, kwamene kulambila kutuŵa kwenzewejeleshewa patontho-patontho.—Neh. 8:8, 9. Nsanja yophunzila 05.2023 pedji 15 ndim. 6-7

Mosasamala kanthu kuti tufunishisha kukwanilisha cholinga chasu olo kupasiwa malangizo ŵatufunikila, tingakumane mphela na mavuto osayembekezeleka. Mwachisanzo, tingakumane na “vinthu vosayembekezeleka” vamene vingatitolele nthawe yatufunikila kuti tikwanilishe cholinga chasu. (Mlal. 9:11) Payakine tingakumane na vuto yamene ingatifokeshe komasoti kutichitisha kunkhala na mphamvu zitontho. (Miy. 24:10) Chifukwa chakuti tiliye ungwilo tingachite vinthu vamene vingatichitishe kuti vinkhale vovuta ngako kukwanilisha cholinga chasu. (Alo. 7:23) Olo payakine tingalimvwe kunkhala oŵeŵa. (Mat. 26:43) Kansi n’chinji chingatiyavye kulimbana na mavuto amene aŵa? Mukokumbukila kuti keno pachitika chinthu chakukangishani kukwanilisha cholinga chanu, vutanthauzalini kuti nimwe ofoka. Baibolo yunena kuti tingakumane na mavuto moweleja-weleja. Koma olo n’tetyo. Mwa kupitilija kuyeja-yeja kukwanilisha cholinga chanu olo pa nthawe yamene kuchita vamene ivi ni kovuta, muwonesha kuti mufuna kukondwelesha Yehova. Yehova osangalala ngako akawona kuti muyeja-yeja kukwanilisha cholinga chanu! Nsanja yophunzila 05.2023 pedji 30 ndim. 14-15

Kuchita upainiya kuŵayavya alumbwana kuziŵa mwangakatile ntchito mokatijana na ŵanthu osiyana-siyana. Vuŵayavyasoti kuti akokatishila ntchito ndalama mwanzelu. (Afil. 4:11-13) Sitepi iweme kuti munthu ankhale ntumiki wa nthawe zonse, n’kuchita upainiya wothandiza, vamene vuŵayavya kuchita upainiya wonkhazikika. Kuchita upainiya kungakusegulileni mwayi wolemba mafomu a utumiki wanthawe zonse, kupamikijapo utumiki wa ntchito zomanga, olo pa beteli. Abale Achikhilisitu ofunikila kunkhala na cholinga chakuti ayenelele kutumikila abale na alongo ŵawo monga akulu a mumpingo. Baibolo yunena kuti mwanalume wamene oyeje-yeja kuti afwane udindo wamene uyu, ‘okumbwa ntchito iweme.’ (1 Tim. 3:1) Choyamba ofunikila kuyenelela kutumikila monga ntumiki wothandiza. Ntumiki wothandiza oyavya akulu kusamalila abale na alongo mumpingo. Akulu na atumiki othandiza, onse otumikila abale na alongo ŵawo molichefya komasoti okata ntchito yolalikila mwakhama. Nsanja yophunzila 12.2023 pedji 28 ndim. 14-16

Mfumu Yosiya enze akali mulumbwana pechiyamba kusakila-sakila Yehova. Yove enzefunishisha kuziŵa za Yehova na kuchita chifunilo chake. Koma olo n’tetyo, vinthu venze vovuta pa moyo wa mfumu yachilumbwana yamene iyi. Yove enzefunikila kusogolela pa kulambila kutuŵa pa nthawe yamene kulambila kwawenye kwenze paliponse. Ndipo yove echita chendi vamene ivo! Akaliyekwanisha vyaka 20, Yosiya eyamba kuchosa kulambila kwawenye mu ntundu wamene uyo. (2 Mbiri 34:1, 2) Olo kuti nimwe ntontho, mwewo mungasankhe kukonkheja chisanzo cha Yosiya mwa kusakila-sakila Yehova nophunzila kutembeja minkhalidwe yake. Kuchita vamene ivi kungakuyavyeni kuti mulipeleke kwa yove. Kansi kulipeleka kwamene uko kuzatanthauze chinji pa moyo wanu wa nsiku na nsiku? Luka wamene ebatizika ali na vyaka 14 enena kuti: “Kufumila lelo nikoika kutumikila Mulungu pa malo oyamba pa moyo wangu ndipo nikoyeja-yeja kuchita vinthu vomukondwelesha.” (Mko. 12:30) Mwewo muzadalisiwe ngako mukankhala ofunishisha kuchita chimozi-mozi! Nsanja yophunzila 09.2023 pedji 11 ndim. 12-13

Pamene ntumwi Paulo penzelemba kalata yamene iyi, mpingo waku Tesalonika wenze ukaliye kwanisha chaka chimozi wankhazikishiwa kale. Analume amene enze esankhiwa kuti akosogolela mpingo wamene uyo payakine enzeziŵalini vinthu vinyinji ndipo payakine enzephoniyesha vinthu viyakine vinyinji. Koma olo n’tetyo, ove enzewamila kupasiwa ulemu. Chisauso chikulu pachuvwendela, sewo tufunika kudalila ngako akulu kupambana kale yonse kuti akotisogolela. Payakine vingankhale vosakwanishika kulondela malangizo aku likulu yapa chalo chonse komasoti ofesi ya nthambi; tetyo, nichinthu chofunika kuphunzililatu palipano kukonda komasoti kulemekeza akulu amumpingo wasu. Mosasamala kanthu za vinthu vingatichitikile, tiyeni tipitilije kunkhala oganiza luweme, tufunikalini kuganizila ngako pa vinthu vakuphoniyesha, koma tufunikila kuika maganizo ŵasu pa mfundo yakuti Yehova osogolela analume okhulupilika amene aŵa kupitila mwa Khilisitu. Molingana na chisote chamene chuteteza mutu wa nsodja, chiyembekezo chasu cha chipulumuso chuteteza maganizo ŵasu. Tuziŵa kuti vinthu vachingatipase ichi chalo ni vatyala-tyala. (Afil. 3:8) Chiyembekezo chasu chutiyavya kupitilija kunkhala odekha komasoti onkhazikika. Nsanja yophunzila 06.2023 pedji 11-12 ndim. 11-12

Ŵanthu ŵala amene oitiwa na “mwanakazi wopusa” ofunikila kupanga chosankha: Kansi ove avomele kuitiwa kwamene uko kapena akane? Pali vifukwa vomvwika vopewela minkhalidwe ya chiwele-wele. “Mwanakazi wopusa” ofotokozewa monga ni munthu wala wamene onena kuti: “Manzi oiŵa onzuna.” (Miy. 9:17) Kansi “manzi oiŵa” ni chinji? Baibolo yuyelekezela kuyonana kwa pakati pa mwanalume na mwanakazi wake na manzi osisimula. (Miy. 5:15-18) Mwanalume na mwankazi amene alungulana mwa lamulo ololewa kusangalala poyonana. Vamene ivi, ni vosiyana ngako na “manzi oiŵa.” Vamene ivi, vingatanthauze kuyonana koleshewa. Kanyinji-kanyinji, vamene ivi vuchitika mofisa monga ni mwavilili na kawalala wamene oiŵa mofisa. “Manzi oiŵa” angawoneke monga ni aweme mwapadela makamaka keno oiŵa amene awo oganiza monga kuti paliye aliyense angaziŵe vinthu vachita. Vamene ivi ni vinthu vomvwisha chisoni ngako! Yehova owona vinthu vonse. Keno sewo tingaluze madaliso a Yehova, chamene ichi chingankhale chinthu choŵaŵa komasoti chiipa ngako, vamene ivi niye vingatichitikile ndipo kulaŵila chendi vamene ivi ni vinthulini “vonzuna” kapena vokondwelesha.—1 Ako. 6:9, 10. Nsanja yophunzila 06.2023 pedji 22 ndim. 7-9

Kansi mungachite tyani keno m’kupita kwa nthawe mapemphelo olo utumuki wanu vayamba kunkhala mwachiyoloŵezi? Mukopewa kuganiza kuti Yehova wakuchoselani mzimu wake utuŵa. Monga wanthu ochimwa, maganizo ŵasu ochinja nthawe na nthawe. Mukawona kuti mwaleka kuchita vinthu mwakhama, mukoganizila chisanzo cha Paulo. Yove enzekonkheja Yesu mwakhama, koma Paulo enzeziŵa kuti nthawe ziyakine ntima wake wenzefunishisha lini kuchita vinthu venzefunika kuti achite. Paulo enze wosimikija ntima kuchita utumiki wake mosasamala kanthu za mwenzemvwila muntima mwake. Namwe soti mungachite luweme kupewa kusankha vinthu mokatijana na mwamumvwila muntima mwanu. Nkhalani osimikija ntima kuti mukochita vinthu viweme olo kuti ntima wanu nthawe ziyakine ufunalini kuti muchite vamene ivo. Keno mungapitilije kuchita vinthu viweme, m’kupita kwa nthawe nawo maganizo ŵanu azachinje. Kupitilija kuchita vinthu vauzimu monga kuphunzila pamweka, kupemphela, kusonkhana, komasoti kukata ntchito yolalikila, kuzakuyavyeni kupitilija kukonkhelela Yesu pavuli pakuti mwabatizika.—1 Ako. 9:16. Nsanja yophunzila 03.2024 pedji 11-12 ndim. 12-13

Sewo nase tingawoneshe kuti tukonda abale na alongo ŵasu ponkhala azishamwali ŵawo, nopatula nthawe yotandala nawo pamozi. Anyinji a sewo tili m’mipingo mwamene muli abale na alongo ofumila mmadela osiyana-siyana, komasoti aminkhalidwe yosiyana-siyana. Tingakulishe chikondi chasu kuli ove mwakuika maganizo ŵasu pa minkhalidwe yawo iweme. Tikaphunzila kuwona ŵanthu monga nimwakuŵawonela Yehova, tuwonesha kuti tuŵakonda. Chikondi chizankhale chofunika ngako pa chisauso chikulu. Chisauso chikulu chikezeyamba, kansi Yehova azatiteteze tyani? Ganizilani vamene Yehova vechilangiza ŵanthu ŵake kuti achite pa nthawe yamene Babulo wakale penzeukiliwa, yove enena kuti: “Mwewo ŵanthu ŵangu lutani mukaloŵe m’vipinda vanu va nkati ndipo mukavale viseko. Mukafisame kwakanthawe mpaka ukali wangu upite.” (Yes. 26:20) Vuwoneka kuti mawu amene aŵa okata soti ntchito kuli sewo amene tizakumane na chisauso chikulu. Nsanja yophunzila 07.2023 pedji 6-7 ndim. 14-16

Nkhalani na mbili yakuti nimwe ololela.” Tingalikonshe kuti: ‘Kansi ŵanthu oniwona kuti nine munthu wololela komasoti wokulumija kuchinja? Olo payakine ove oniwona kunkhala munthu wanthota olo wakumvwa vake veka? Kansi numvwishila ŵanthu akolaŵila nogonjela pa vakufuna ove keno kuchita vamene ivo n’koyenelela?’ Tikankhala ololela ngako niyesoti patukonkheja Yehova na Yesu pa nkhani ya kulolela. Sewo tufunikila kunkhala ololela komasoti okulumija kuchinja vinthu vikasintha pa moyo wasu. Kuchinja kwa vinthu kungatiletele mavuto osayembekezeleka. Sewo tingalwale matenda akulu mwazizizi. Payakine tingakumane na mavuto azizizi a kuchinja kwa vinthu pa nkhani ya zachuma, kapena pa nkhani ya zandale vamene vingachitishe moyo wasu kunkhala wovuta ngako. (Mlal. 9:11;) Olo kuchinja pa nkhani ya utumiki wasu chingankhale chiyeso kuli sewo. vinthu vingatiyendele luweme keno sewo tingakonkheje njila izi 4 zokonkhapo: (1) mukovomeleja kuti vinthu vachinja, (2) mukololesha pa vinthu vakusogolo, (3) mukowona vinthu viweme vamene vuchitika pa moyo wanu, komasoti (4) mukoyavya ŵanthu ayakine. Nsanja yophunzila 07.2023 pedji 21-22 ndim. 7-8

Mneneli Danieli enze mulumbwana a Babulo pechimutola monga mkaidi noluta naye ku Babulo kutali na ku Yerusalemu. Koma n’vowonekelatu kuti—Danieli eŵachitisha chidwi ngako ŵanthu amene emutola. “Ove [ewona] kuti yove enze munthu wa mawonekedwe aweme,” komasoti kuti enzewofumila m’banja yolemekezeka. (1 Sam. 16:7) Tetyo, ove emuphunzisa kuti akotumikila m’ng’anda ya chifumu. (Dan. 1:3, 4, 6) Yehova enzemukonda Danieli, chifukwa cha nkhalidwe iweme yenze nayo. Payakine Danieli enze na vyaka 20 tyala pamene Yehova pechimutomola pamozi na Nowa komasoti Yobu, analume amene kwa vyaka vinyinji enkhala opanga mbili iweme na Mulungu. (Gen. 5:32; 6:9, 10; Yobu 42:16, 17; Eze. 14:14) Yehova epitilija kukonda Danieli panthawe yonse ya moyo wake utali komasoti wosangalasa.—Dan. 10:11, 19. Nsanja yophunzila 08.2023 pedji 2 ndim. 1-2

Mukafuna kuti mugule ng’anda. N’voziŵikilatu kuti mwewo mungafune kuziŵa chilichonse chokhuza ng’anda yamene iyo. Sewo nase tingachite chimozi-mozi tikoŵelenga komasoti kuphunzila Baibolo. Lomba kansi tingachite tyani kuti tiziziŵe luweme mfundo za m’Baibolo? Keno mungoiŵelenga moutuka, mwewo mungaphunzile tyala mfundo—“zoyambilila za m’Mawu opatulika a Mulungu.” (Ahe. 5:12) Koma molingana na mwavilili na kuloŵa ng’anda kuti muiziŵe luweme, mwewo mufunikilasoti kuphunzila Baibolo mosamala kuti muimvwishe luweme ngako. Tikoyeja-yeja kumvwisha luweme osati tyala chonadi cha m’Baibolo cheka, komasoti chifukwa chake mwewo muchikhulupilila. Kuti timvwishe luweme mbali zonse za m’Mawu a Mulungu, sewo tufunikila kuphunzila mfundo zikulu-zikulu za cho nadi cha m’Baibolo. Ntumwi Paulo elangiza abale na alongo ŵake Achikhilisitu kuti akophunzila Mawu a Mulungu mwakhama na cholinga chakuti ‘akwanishe kuziŵa luweme muluvumo mwake, ntali-ntali mwake, kukwela kwake, komasoti kunoka kwake’ kwa chonadi. Mwakuchita tetyo, ove sembe ekwanisha ‘kuzika miju na kunkhala onkhazikika’ m’chikhulupililo chawo. (Aife. 3:14-19) Sewo nase tufunikilasoti kuchita chimozi-mozi. Nsanja yophunzila 10.2023 pedji 18 ndim. 1-3

M’Baibolo muli visanzo va ŵanthu amene enze oleza ntima. Mungachite luweme kuphunzila mosamala visanzo va ŵanthu amene aŵa. Mwachisanzo, olo kuti Davide ezozewa akali ntontho kuti azankhale mfumu ya Isilaeli, yove eyembekezela kwa vyaka vinyinji kuti alondele ufumu. Simiyoni na Ana enzelambila Yehova mokhulupilika pamene penzeyembekezela Mesiya wolonjezewa. (Luk. 2:25, 36-38) Pamuphunzila nkhani zamene izi, sakilani mayankho a makonsho aŵa okonkhapo: Kansi n’chinji chiyavya munthu wamene uyu kunkhala woleza ntima? Kansi kunkhala woleza ntima kwimuyavya tyani? Kansi ningamukonkheje tyani? Mwewo mungapindulesoti mwa kuphunzila za ŵanthu amene aliye woneshe kuleza ntima. (1 Sam. 13:8-14) Mungachite luweme kulikonsha kuti: ‘Kansi n’chinji chiŵachitisha kuti osati aleze ntima? Kansi n’vokonkhapo votyani vechikumana navo?’ Nsanja yophunzila 08.2023 pedji 25 ndim. 15

Ntumwi Petulo enze wokhulupilika; yove aliye lole kuti chilichonse chimuchitishe kuwelela nvuli. Yove ewonesha kuti enzewokhulupilika pa nthawe iyakine Yesu pechilaŵila vinthu vamene ophunzila ŵake enzevimvwishalini. (Yoh. 6:68, 69) Mmalo moyembekezela kapena kuti aŵafotokozele tanthauzo yake, anyinji esankha kuleka kukonkha Yesu. Koma Petulo aliye leke. Yove eziŵa kuti Yesu yeka niye enze na “mawu a moyo wosasila.” Yesu enzeziŵa kuti Petulo na atumwi ayakine amuthaŵe. Olo n’tetyo, Yesu ewonesha kuti enzekhulupilila kuti Petulo azachinje nopitilija kunkhala wokhulupilika. (Luk. 22:31, 32) Yesu enzemvwisha kuti “mzimu . . . niwofunishisha koma muŵili niwofoka.” (Mko. 14:38) Mokatijana na vamene ivi, olo kuti Petulo enze emukana kuti omuziŵalini, Yesu aliye taye ntima chifukwa cha ntumwi wake wamene uyu. Yesu pechiushiwa ewonekela kuli Petulo—vuwoneka kuti panthawe yamene iyo Petulo enze yeka. (Mko. 16:7; Luk. 24:34; 1 Ako. 15:5) Vamene ivi vimulimbikisa ngako ntumwi wamene uyu wamene enze wokhumudwa! Nsanja yophunzila 09.2023 pedji 22 ndim. 9-10

Mulungu okhululukila kapena kuti kuziŵilija machimo a ŵanthu amene omukhulupilila. (Sal. 32:1, 2) Yove oŵakhululukila na ntima wonse ndipo okumbukilalini soti machimo ŵawo. Ŵanthu amene awo Mulungu oŵawona monga aliye chophoniya komasoti olungama chifukwa cha chikhulupililo chawo. Olo kuti Abulahamu, Davide, na olambila ayakine okhulupilika a Mulungu eitiwa olungama, ove enze ochimwa komasoti aliye ungwilo. Koma chifukwa cha chikhulupililo chawo, Mulungu enzeŵawona kuti aliye chophoniya, maka-maka akaŵalinganija na ŵanthu asamukhulupilila. (Aife. 2:12) Molingana na mwechifotokozela luweme ntumwi Paulo mu kalata yake, chikhulupililo n’chofunika ngako kuti munthu ankhale paushamwali na Mulungu. Vamene ivi niye vechichita Abulahamu na Davide, ndipo nase tufunikila kuchita chimozi-mozi. Nsanja yophunzila 12.2023 pedji 3 ndim. 6-7

Masiku ŵano, Akhilisitu onse ali na mwayi wopeleka nsembe kwa Yehova, mwa kukatishila ntchito nthawe, mphamvu komasoti vinthu vawo popitisha pasogolo Ufumu wa Mulungu. Sewo tingawoneshe kuti tutembeja mwayi wasu wolambila Yehova mwa kumupasa nsembe zasu ziweme ngako. Ntumwi Paulo efotokoza mbali zosiyana-siyana za kulambila kwasu zamene tufunikilalini kuziwaya-waya. (Ahe. 10:22-25) Vamene ivi vupamikijapo kuvwendela kwa Yehova mpemphelo, kulengeza patuŵa za chiyembekezo chasu, kusonkhana pamozi monga mpingo, komasoti kutang’ishana muyake na muyake ‘tiyangijile kuchita vamene ivi maka-maka patuwona kuti nsiku ya [Yehova] yavwendela.’ Kumapeto kwa buku ya Chivumbuluso mngelo wa Yehova elaŵila vinthu ivi vokonkhapo kwa maulwendo aŵili pofuna kusimikijila, yove enena kuti: ‘Lambilani Mulungu!’ (Chiv. 19:10; 22:9) Tiyeni tikokumbukila nthawe zonse za mfundo ikulu ya choonadi yunena za kachisi nkulu wa Yehova komasoti mwayi watili nawo wolambila Mulungu wasu nkulu. Nsanja yophunzila 10.2023 pedji 29 ndim. 17-18

Tonse tufuna “kupitilija kukondana.” Koma olo n’tetyo, sewo tufunikalini kuluŵa vechitichenjeja Yesu kuti “chikondi cha ŵanthu anyinji chizachepe.” (Mat. 24:12) Yesu aliye nene kuti anyinji mwa ophunzila ŵake azaleke kuwoneshana chikondi. Koma sewo tufunikila kunkhala tchelu kuti tipewe kusokonezewa na mzimu uliye chikondi wa ŵanthu a muli chino chalo pa mwatuchitila vinthu na ŵanthu ayakine. Patuganizila vamene ivi mmaganizo mwasu, tiyeni tilaŵijane konsho iyi yofunika ngako: Kansi n’chinji chingatiyavye kuziŵa keno tukonda ngako enekwasu na azilongosi ŵasu? Njila imozi yatingaziŵile kukula kwa chikondi chasu nikuwona mwatuchitila vinthu pamoyo wasu. (2 Ako. 8:8) Petulo etomola chimozi mwavinthu vatufunika kuganizila, yove enena kuti: “Kupambana vonse mukonkhala okondana ngako pakuti chikondi chufwichila machimo anyinji.” (1 Pet. 4:8) Tetyo, vatuchita enekwasu na ezilongosi ŵasu akaphoniyesha vinthu olo akachita chinthu chiyakine chamene chatikhumudwisa, vingatiyavye kuziŵa keno chikhulupililo chasu n’chotang’a. Nsanja yophunzila 11.2023 pedji 10-11 ndim. 12-13

Tingakwanishelini kumvwila lamulo ya Yesu yokhuza chikondi, keno tuwonesha chikondi kuli ayakine mumpingo nozondana na ayakine. N’chendi kuti tingankhale okatijana ngako na ayakine kupambana ayakine, monga ni mwenzechitila Yesu. (Yoh. 13:23; 20:2) Koma ntumwi Petulo otikumbusha kuti tufunikila kuyeja-yeja ‘kukonda gulu yonse ya akwasu’—kuwonesha chikondi ngacho-ngacho—kuli enekwasu na azilongosi ŵasu onse. (1 Pet. 2:17) Petulo otilimbikisa kuti “tikokondana ngako mofumila pansi pa ntima.” (1 Pet. 1:22) Pa nkhani yamene iyi kukondana “ngako” kutanthauza kuwonesha chikondi munthu muyakine olo pa nthawe yamene kuchita vamene ivo n’kovuta. Mwachisanzo, tyani keno m’kwasu watikhumudwisa? Chibadwa chasu chingatilimbikise kuti tiwejele mmalo mowonesha chikondi. Petulo, ephunzila kufumila kuli Yesu kuti Mulungu okondwelalini na kuwejela chinthu chiipa. (Yoh. 18:10, 11) Petulo elemba kuti: “Munthu akakuchitilani chiipa osamuwejela na chiipa , akakuchitilani chipongwe osamuwejela na chipongwe. Mmalo mwake mukoŵachitila viweme ndaŵa Mulungu ekusankhani kuti mukodalisa ayakine kuti namwe azakudaliseni.” (1 Pet. 3:9) Mukolola kuti chikondi ngacho-ngacho chikokuchitishani kunkhala aweme ntima, komasoti kuganizila ayakine. Nsanja yophunzila 09.2023 pedji 28-29 ndim. 9-11

Sewo tudabwa kuwona mwana mwakukulila mokulumija nonkhala munthu nkulu. Kukula kwamene uku kuchitika pakweka mwachibadwa. Koma keno sewo tufuna kukonkheja chendi chisanzo cha Yesu, tufunikila kuchita khama. (1 Ako. 13:11; Ahe. 6:1) Kuti tikwanilishe cholinga chamene ichi, tufunikila kutang’isha ushamwali wasu na Yehova. Sewo tufunikilasoti kuyavyiwa na mzimu wake utuŵa kuti tikulishe minkhalidwe yakukondwela nayo yove. Chinthu chiyakine soti chofunika, n’kukulisha maluso amene angatiyavye pamoyo wasu wa nsiku na nsiku, komasoti kukonzekela maudindo ŵatingezenkhala nawo kusogolo. (Miy. 1:5) Yehova epanga ŵanthu mwanjila yakuti akonkhala mwanalume olo mwanakazi. (Gen. 1:27) N’vosavuta kuziŵa kuti mwanalume ni wosiyana na mwanakazi, koma palisoti njila ziyakine zakusiyana. Mwachisanzo, Yehova elenga mwanalume na mwanakazi kuti ankhale na maudindo osiyana, tetyo ove ofunikila kunkhala na minkhalidwe komasoti maluso amene angaŵayavye kukwanilisha maudindo ŵawo amene awo.—Gen. 2:18. Nsanja yophunzila 12.2023 pedji 18 ndim. 1-2

Kansi Yesu enzefuna kuti ŵanthu akoikatishilasoti ntchito zina ya Atata ŵake? Mosakaikila. Asogoleli ayakine avipembezo enzekhulupilila kuti n’kusoŵa ulemu kukatishila ntchito zina ya Mulungu, koma Yesu aliyelole kuti mwambo wosakatijana na malemba wamene uyo umukangishe kutamanda zina ya Atata ŵake. Nthawe iyakine Yesu epojeka munthu waviŵanda wamene enzenkhala mu dela ya Agerasa. Ŵanthu eyamba kuchita naye wowa ngako Yesu mwakuti emupapatila kuti afumemo mu dela yamene iyo. (Mko. 5:16, 17) Koma olo n’tetyo, Yesu enzefuna kuti ŵanthu aziŵe zina ya Mulungu. Tetyo, yove euja mwanalume wamene uyo kuti akalaŵile kuli ŵanthu, osati za vinthu vechichita yove, koma vinthu vechichita Yehova kuli mwanalume wamene uyo. (Mko. 5:19.) Mpakapano, Yesu akalifuna mphela—kuti zina ya Atata ŵake iziŵike paliponse! (Mat. 24:14; 28:20) Tikachita mbali yasu pa nkhani yamene iyi, Mfumu yasu Yesu Khilisitu yukondwela ngako. Nsanja yophunzila 02.2024 pedji 10 ndim. 10

N’chinthu chofunika ngako kunkhala m’banja ya Yehova m’masiku ŵano osilijila amene ni ovuta ngako. Vinthu muli chino chalo pavuipila-ipila, Yehova watipasa banja yauzimu ya akwasu na azilongosi amene ni okatijana. (Sal. 133:1) Yove otiyavyasoti kutang’isha banja yamene iyi komasoti kunkhala osangalala. (Aife. 5:33–6:1) Mulungu otipasasoti nzelu zatufunikila kuti tikwanishe kulimbana na nkhaŵa zasu nonkhala na ntendele wamuntima. Koma olo n’tetyo, tufunika kuchita khama kuti tipitilije kutumikila Yehova mokhulupilika. Ndaŵa yanji tunena tetyo? Chifukwa chakuti nthawe ziyakine tingakhumudwe na vochita olo vinthu vakulaŵila ayakine. Tingolimbanasoti na kusoŵa ungwilo kwasu, maka-maka keno tuphoniyesha chinthu chimo na chimo moweleja-weleja. Tufunika kulimbikila kupemphela kwa Yehova (1) keno m’kwasu olo kalongosi wachita vinthu viyakine votikhumudwisa, (2) keno muyasu wa muukwati wachita vinthu viyakine votikhumudwisa, komasoti (3) keno taphoniyesha chinthu chiyakine chikulu. Nsanja yophunzila 03.2024 pedji 14 ndim. 1-2

Nthawe ziyakine, mwewo mungamvwe vakukumana navo enekwasu na azilongosi amene esankha kuchita vinyinji potumikila Yehova. Payakine mungamvwe vechikumana navo akwasu na akalongosi amene eloŵa mu Sikulu ya Akhilisitu olalikila za Ufumu, olo ŵanthu amene efulukila kudela yamene kwenzefunikila thandizo. Keno vinthu pa moyo wanu vukulolani, namwe mungachite luweme kuchita chimozi-mozi. Ŵanthu a Yehova nthawe zonse osakila njila kuti achite vinyinji potumikila Mulungu. (Mach. 16:9) Kansi mungachite tyani keno mwewo mungakwanilishelini volinga monga ni vamene ivi chifukwa cha mwavilili vinthu pamoyo wanu? Mukopewa kuganiza kuti nimwe atyala-tyala chifukwa chakuti mukwanishalini kuchita vinyinji monga ni mwakuchitila akwasu ayanu. Chofunika n’kupitilija kupilila. (Mat. 10:22) Osaluŵa kuti Yehova osangalala ngako na vinthu vamukwanisha kuchita molingana na mwavilili vinthu pa moyo wanu komasoti luso yanu. Vamene ivi vizakuyavyeni kupitilija kukonkhelela Yesu pavuli pakuti mwabatizika.—Sal. 26:1. Nsanja yophunzila 03.2024 pedji 10 ndim. 11

Yehova elonjeza kuti akotikhululukila sewo tikalapa machimo ŵasu. (Sal. 86:5) Tetyo, tikokhulupilila kuti mawu ŵechilaŵila Yehova ni achendi komasoti kuti yove otikhulukila. Mukokumbukila kuti Yehova ni Mulungu wololela. Ndipo oyembekezelalini kuti tikomuchitila vinyinji kupambana vatingakwanishe. Yove otembeja vonse vatumuchitila, malingana keno tuvichita na ntima wonse. Komasoti mukoganizila visanzo va m’Baibolo va ŵanthu amene enzetumikila Yehova na ntima wawo wonse. Ganizilani za ntumwi Paulo. Yove ekata ntchito mwakhama kwa vyaka vinyinji, eyenda misenga ya makilomita masauzande anyinji, komasoti eyavya ponkhazikisha mipingo inyinji. Koma vinthu pevichinja pamoyo wake noleka kuchita vinyinji monga ni mwenzechitila poyamba, kansi Yehova eyamba kuwona ntchito zake kunkhala zatyala-tyala? Yayi. Paulo epitilija kuchita vangakwanishe, ndipo Yehova emudalisa. (Mach. 28:30, 31) Molingana na vamene ivi, vinthu vatukwanisha kuchita potumikila Yehova vingachinje m’kupita kwa nthawe. Koma chinthu chofunika ngako ni ntima wofuna kutumikila Mulungu. Nsanja yophunzila 03.2024 pedji 27 ndim. 7, 9

Kupitila m’mapemphelo ŵake kwa Yehova, Yesu epeleka chisanzo kuli ophunzila ŵake kuti akomukonkheja. Pa utumiki wake wonse, Yesu enzepemphela pafupi-pafupi. Yove enzefunika kupatula nthawe yopemphela chifukwa nthawe zinyinji enzenkhala bize komasoti pakati pa ŵanthu anyinji. (Mko. 6:31, 45, 46) Yove enzeuka mmawa ngako kuti afwane nthawe yopemphela payeka. Nthawe iyakine, yove epemphela usiku wonse akaliye panga chosankha chiyakine chofunika. (Luk. 6:12, 13) Komasoti Yesu epemphela moweleja-weleja usiku wakuti apaiwe mmawa mwake pa nthawe yenze eika maganizo ŵake onse pakukwanilishiwa kwa mbali yovuta ngako ya utumiki wake pano pa chalo. (Mat. 26:39, 42, 44) Chisanzo cha Yesu chutiphunzisa kuti mosasamala kanthu za bize yatunkhala nayo, tufunika kupatula nthawe yopemphela. Molingana na Yesu, tingafunike kupatula nthawe yopemphela mmawa ngako payakine usiku. Tikochita vamene ivi, tuwonesha kuti tutembeja mphaso yapadela yechitipasa Yehova yamene iyi ya pemphelo. Nsanja yophunzila 05.2023 pedji 3 ndim. 4-5.

Ganizilani mawu akuti “wazuja” pa lemba ili palulu. Buku iyakine imasulila mawu amene aŵa ponena kuti “kuwela kuli sewo monga mmana.” Fanizo yamene iyi yuwonesha kuti Yehova oŵakonda chendi ngako ozozewa! Akhilisitu ozozewa oziŵa kuti ove “okondewa na Mulungu.” (Yuda 1) Mtumwi Yohani efotokoza mwenzemvwila pechilemba kuti: “Ganizilani za chikondi chikulu chatiwonesha Atata potiita kuti ŵana ŵake!” (1 Yoh. 3:1) Kansi Yehova okonda tyala Akhilisitu ozozewa ŵeka? Yayi, Yehova wawonesha chikondi chake kuli sewo tonse. Kansi n’chinji chutisimikijila ngako za chikondi cha Yehova? Ni mphaso ya dipo. Mwakupeleka mphaso yamene iyi—Mulungu wawonesha chikondi chikulu mu mbili yonse ya moyo wa ŵanthu!—Yoh. 3:16; Alo. 5:8. Nsanja yophunzila 01.2024 pedji 28 ndim. 9-10

Vesi yamene iyi yufotokoza njila iyakine yechigonjesela wowa wake Davide. Olo kuti moyo wake wenze pangozi, yove enzeganizila vangamuchitile Yehova. Davide enzeziŵa kuti Yehova azamupulumushe panthawe iweme. Ndipo kulaŵila chendi, Yehova enze enenelatu kuti Davide niye ati azankhale Mfumu yokonkhapo ya Isilaeli. (1 Sam. 16:1, 13) Davide enzeziŵa kuti vinthu vonse vechilonjeza Yehova vizachitike chendi. Kansi Yehova olonjeza kuti azakuchitileni chinji mwewo? Sewo tuyembekezelalini kuti yove akotiteteza ku mavuto onse. Koma olo n’tetyo, vuto iliyonse yamungakumane nayo muli chino chalo chiipa, Yehova azaisilije mu chalo chanyowani chamene chikuza. (Yes. 25:7-9) Kulaŵila chendi, Nyamalenga wasu ali na mphamvu zokwanila kuusha akufwa, kupojeka olwala, komasoti kuchosa oshusha onse.—1 Yoh. 4:4. Nsanja yophunzila 01.2024 pedji 6 ndim. 12-13

Mukoganizila chifukwa chemwilipelekela nobatizika. Mwewo mwichita vamene ivo chifukwa mwenzefuna kunkhala ku mbali ya Yehova. Ganizilani vamene vikuchitishani kukhulupilila kuti mwafwana choonadi. Mwewo mwimuziŵa Yehova ndipo mwiyamba kumulemekeza nomukonda monga Atata ŵanu a kululu. Chikhulupililo chanu chiyamba kukula ndipo chikuchitishani kuti mulape. Mwewo mwileka kuchita vinthu vakuzondana navo Yehova ndipo mwiyamba kuchita vinthu vomukondwelesha. Mwewo mwiyamba kumvwa bwino pa nthawe yemwiziŵa kuti Mulungu wakukhululukilani. (Sal. 32:2) Mwewo mwiyamba kupezeka pa misonkhano ya Chikhilisitu komasoti mwiyamba kuujako ŵanthu ayakine za vinthu viweme vemwenze phunzila. Monga Mkhilisitu wolipeleka komasoti wobatizika, mwewo lomba muyenda munjila yaku moyo ndipo muzachite vonse vamungakwanishe kuti mupitilije kuyenda munjila yamene iyi. (Mat. 7:13, 14) Tetyo tiyeni tipitilije kunkhala otang’a polipeleka kwa Yehova nonkhala osanyang’anyika pomvwila malamulo ŵake. Nsanja yophunzila 07.2023 pedji 17 ndim. 14; pedji 19 ndim. 19

Kuganizila vemwilaŵila m’pemphelo pemwenzelipeleka kwa Yehova, kungakuyavyeni kupilila mayeselo aliwonse. Mwachisanzo, kansi mwewo mungakumbwile kuyona na munthu wamene ali kale pabanja? N’vosakaikisha kuti mungachite lini tetyo! Mwelonjeza kwa Yehova m’pemphelo kuti muzachitelini vinthu monga ni vamene ivi. Keno mwewo mulolalini kuti muntima mwanu muloŵe maganizo aipa, muzafunikelini kukata ntchito yovuta ngako pochosa maganizo aipa m’maganizo mwanu pavuli pake. Mukachita tetyo, “muzayende lini munjila ya ŵanthu aipa.”(Miy. 4:14, 15) Kuganizila chisanzo cha Yesu kungatiyavye ngako pa nkhani yamene iyi. Yove enze wosimikija ntima kuti nthawe zonse akokondwelesha Atata ŵake, ndipo molingana na Yesu, nase tufunishisha kuti nthawe zonse tikochita vinthu vakukondwela navo Atata ŵasu. (Mat. 4:10; Yoh. 8:29) Kulaŵila chendi, mavuto komasoti mayeselo azakupaseni mwayi wowonesha kuti mufuna ‘kupitilija kukonkhelela’ Yesu. Komasoti mukokhulupilila kuti Yehova azakuyavyeni kuchita vamene ivi. Nsanja yophunzila 03.2024 pedji 9-10 ndim. 8-10