Okutoba

Kansi mwewo nthawe ziyakine muvutika kunkhala omvwila? Mfumu Davide naye enzekumvwa soti chimozi-mozi, tetyo yove epemphele kwa Mulungu kuti: “Nichilikizeni na ntima wofunishisha.” (Sal. 51:12) Davide enzekonda Yehova. Koma olo n’tetyo, nthawe ziyakine Davide enzevutika kunkhala womvwila ndipo nase nthawe ziyakine tuvutika. Ndaŵa yanji? Choyamba, sewo titolela chibadwa cha kusamvwila kuli makolo ŵasu. Chachiŵili, Satana olekalini kuyeja-yeja kuti atisokoneze na cholinga chakuti tipanduke monga nimwechichitila yove. (2 Ako. 11:3) Chachitatu, tilizengulukiwe na ŵanthu asamvwila a muli chino chalo, ndipo “kaganizidwe kamene aka palipano kokata ntchito muli ŵana osamvwila.” (Aife. 2:2) Sewo tufunikila kuchita khama osati tyala polimbana na chibadwa chasu chauchimo, koma kuti tipewesoti mayeselo a Satana na chalo chake amene cholinga chake ni kutichitisha kuti tinkhale osamvwila. Ndipo tufunikila kuyeja-yeja kumvwila Yehova komasoti ŵanthu amene waŵaika paudindo. Nsanja yophunzila 10.2023 pedji 6 ndim. 1

Kansi tingaphunzile chinji pa chodabwisa cha Yesu choyalusha manzi kunkhala vinyu? Sewo tuphunzilapo nkhalidwe yolichefya. Kulaŵila chendi yove aliye litamande pa chilichonse chechichita. M’malo mwake, yove molichefya komasoti moweleja-weleja epeleka ulemelelo na ulemu wonse kwa Atata ŵake. (Yoh. 5:19, 30; 8:28) Keno tukonkheja chisanzo cha Yesu mwa kupitilija kunkhala olichefya, tizalitamandelini chifukwa cha vinthu vatukwanisha kuchita. Tiyeni tikotamanda Mulungu wodabwisa wamene watipasa mwayi womutumikila. (Yer. 9:23, 24) Tiyeni tikomupasa yove ulemelelo. Tingakwanishelini kuchita chilichonse chiweme paliye thandizo ya Yehova. (1 Ako. 1:26-31) Keno nise olichefya, tufunikalini kulitamanda chifukwa cha viweme vatuchitila ayakine. Tusangalala chifukwa tuziŵa kuti Yehova owona komasoti otembeja pa vatuchita. (Yelekezelani na malemba aŵa. (Mat. 6:2-4; Ahe. 13:16) Kulaŵila chendi, tukondwelesha Yehova tikokonkheja Yesu mwa kuwonesha kulichefya.—1 Pet. 5:6. Nsanja yophunzila 04.2023 pedji 4 ndim. 9; pedji 5 ndim. 11-12

Moujiliwa, ntumwi Paulo elimbikisa Akhilisitu kuti akoganizila vofuna va ayakine. Kansi malangizo amene aŵa tingaŵakatishile ntchito tyani pa misonkhano? Mwakukumbukila kuti ayakine ali monga ni sewo ndipo angakonde kuyankhako.Ganizilani ivi. Tiyelekezele kuti mutandala na azishamwali ŵanu, kansi mungolaŵila ngako mpaka ove kuchita kusoŵa mpata wakuti alaŵileko? N’vowonekelatu kuti mungachitelini tetyo! Mwewo mungafune kuti mukoyaŵana nawo pa vamukambilana. Molingana na vamene ivi, pa misonkhano tufuna kulola ŵanthu anyinji kuti ayankhe. Ndipo njila imozi iweme ngako yolimbikisila abale na alongo ni kuŵapasa mpata kuti afotokoze vakukhulupilila. (1 Ako. 10:24) Tetyo chifukwa chatupelekela ndemanga zachidule, n’chakuti tunkhala tupeleka mpata kuli ayakine kuti ayankheko. Olo pamupeleka ndemanga kaŵili-kaŵili, pewani kulaŵila mfundo zinyinji. Keno mungafotokoze mfundo zonse za mu ndime pangankhale paliyesoti mwayi wakuti ayakine ayankheko. Nsanja yophunzila 04.2023 pedji 22-23 ndim. 11-13

Sewo Keno vinthu vachinja pa moyo wasu tufunika kukumbukila kufunika kopitilija kuyavyako ayakine maka-maka kupitila mu utumiki wa Chikhilisitu. Pa utumiki wasu, sewo tufunikila kunkhala okulumija kuchinja. Ŵanthu amene ŵatulalikila ali na maganizo osiyana-siyana ponena za Mulungu, ndipo ni ofumila m’madela osiyana-siyana na vinkhalidwe vosiyana-siyana. Ntumwi Paulo enzekwanisha kuchinja mokulumija, ndipo sewo tingaphunzilepo kanthu kufumila pa chisanzo chake. Yesu esankha Paulo kunkhala “ntumwi wotumiwa ku mitundu iyakine.” (Alo. 11:13) Tetyo, Paulo elalikila kuli Ayuda, Agiliki, ŵanthu ophunzila, ŵanthu akuminzi, akulu-akulu a boma, komasoti mafumu. Pofuna kuti aŵafwike pantima ŵanthu osiyana-siyana amene awo Paulo enkhala “vinthu vonse kuli ŵanthu osiyana-siyana.” (1 Ako. 9:19-22) Yove enzeganizila ngako kwechifumila ŵanthu amene ŵenzelaŵila nawo komasoti vinthu venzekhulupilila. Vamene ivi vimuyavya kuti akokwanisha kuchinja nolaŵila na munthu aliyense mwanjila yamene ingamuchitishe kunkhala na chidwi ponena za Mulungu. Sewo nase tingayangijile luso yasu mu utumiki keno tingankhale okulumija kuchinja noganizila njila iweme yatingayavyile munthu aliyense payeka-payeka. Nsanja yophunzila 07.2023 pedji 23 ndim. 11-12

Ŵanthu ofasa ni amphamvu osati ofoka. Munthu ofunika kunkhala wamphamvu kuti apitilije kunkhala wodekha keno olimbana na mavuto. Kufasa ni mbali imozi ya “vitwazi va mzimu.” (Agal. 5:22, 23) Mawu Achigiliki akuti “kufasa” nthawe ziyakine enzeŵakatishila ntchito ponena za mahosi akusanga ochita kuteka. Yelekezelani kuti muwona hosi yamene ili paname modekha. Yove ni yodekha, koma olo n’tetyo ni yamphamvu. Lomba sewo taŵanthu, kansi tingachite tyani kuti tikulishe nkhalidwe ya kufasa panthawe imo na imo nonkhala amphamvu? Tingachitelini vamene ivi mwa sewo seka. Chisinsi chake ni kusenga mzimu wa Mulungu, nomusenga Mulungu kuti atiyavye kukulisha nkhalidwe yamene iyi iweme. Pali ŵanthu anyinji amene akwanisha kuphunzila kunkhala ofasa. Amboni anyinji ochita vinthu mofasa akakumana na oshusha ndipo vamene ivi vuyavya ayakine kunkhala na maganizo aweme ponena za Mboni.—2 Tim. 2: 24, 25. Nsanja yophunzila 09.2023 pedji 15 ndim. 3

M’mensomphenya ochitisha wowa, ntumwi Yohani ewona akulu 24 olambila Yehova kululu. Ove enzetamanda Mulungu novomekeja kuti yove ni wowamila kulondela “ulemelelo na ulemu.” (Chiv. 4:10, 11) Angelo okhulupilika alisoti na vifukwa votamanda nolemekeza Yehova. Ove ali naye pamozi kululu ndipo omuziŵa luweme. Ove owona minkhalidwe yake kupitila mu vinthu vakuchita. Akomuwona okata ntchito, ove olimbikisiwa kuti akomutamanda. (Yobu 38:4-7) Nase tufunikasoti kumutamanda Yehova m’mapemphelo ŵasu. Tingachite vamene ivi mwa kumuuja chifukwa chatumukondela komasoti chifukwa chatumulemekezela. Pamuŵelenga nophunzila Baibolo, yejani kuziŵa minkhalidwe ya Yehova yamene yukusangalasani. (Yobu 37:23; Alo. 11:33) Pavuli pake muujeni Yehova mwamumvwila chifukwa cha minkhalidwe yamene iyi. Tingatamande soti Yehova chifukwa otiyavya sewo komasoti chifukwa oyavya abale na alongo onse Achikhilisitu.—1 Sam. 2:1, 2. Nsanja yophunzila 05.2023 pedji 3-4 ndim. 6-7

Mu 1919, Babulo Nkulu eleka kulamulila ŵanthu a Mulungu. Mu chaka chamene ichi, “kapolo wokhulupilika na wanzelu” eyamba kukata ntchito kuti ŵanthu a mitima iweme ayambe kuyenda mu “Nsewu Utuŵa.” (Mat. 24:45-47; Yes. 35:8) Ntchito yechikata ayakine kuvuli “yowamya nsewu” wamene uyu, iyavya ŵanthu amene eyamba kuyenda mu nsewu wamene uyu kuti aphunzile vinyinji vokhuza Yehova na cholinga chake. (Miy. 4:18) Ove sembe ekwanishasoti kuchinja moyo wawo kuti ukatijane na vakufuna Yehova. Yehova enzeyembekezela lini kuti ŵanthu ŵake achinje vinthu vonse kamozi na kamozi. M’malo mwake, yove watuŵisha ŵanthu ŵake mwa patontho-patontho. Tikosangalala keno tukondwelesha Mulungu wasu pa chilichonse chatuchita! Nsewu uliwonse ufunikila kuwamyiwa nthawe zonse kuti unkhale uweme. Kufumila mu 1919, ntchito yowamya nsewu wamene ni “Nsewu Utuŵa” yankhala yupitilija kuchitika na cholinga chakuti ŵanthu anyinji akwanishe kufuma mu Babulo Nkulu. Nsanja yophunzila 05.2023 pedji 17 ndim. 15; pedji 19 ndim. 16

Bungwe yutonga yukatasoti ntchito yophunzisa akwasu amene oyavya m’makomiti osiyana-siyana a m’Bungwe yutonga. Akwasu amene oyavya m’Bungwe yutonga, alikale na maluso anyinji ndipo ni okonzeka kupitilija kukata ntchito yosamalila mbelele za Khilisitu. Ozozewa osilijila akezeluta kululu chisauso chikulu chikezesala patontho kuchitika, atumiki a Yehova azapitilije kulambila Mulungu mokhulupilika. Chifukwa chakuti Yesu Khilisitu akotiyavya, sewo tizaleke lini kulambila Yehova. N’chendi kuti panthawe yamene iyo sewo tizaukiliwe na gogi waku magogi wamene ni nkatijano wamitundu. (Eze. 38:18-20) Koma kuukila kwamene uku kuzankhale kwakanthawe katontho ndipo kuzapambanelini. Kuukila kwamene uku kuzakwanishelini kuchitisha ŵanthu a Yehova kuleka kulambila Mulungu. Mosakaikila, Yehova azatipulumushe! M’mesomphenya ŵake, ntumwi Yohane ewona “gulu ikulu” ya mbelele ziyakine za Khilisitu, ndipo Yohane eziŵa kuti “gulu ikulu” yamene iyo “niya ŵanthu amene efuma muchisauso chikulu.” (Chiv. 7:9, 14) Mosakaikila, Yehova azatipulumushe! Nsanja yophunzila 02.2024 pedji 5-6 ndim. 13-14

Kansi tingachite tyani kuti tilondele mzimu utuŵa? Tingousenga mpemphelo, kuphunzila mawu oujiliwa a Mulungu komasoti kunkhala okatijana na gulu yake yamene yusogolelewa na mzimu. Kuchita vamene ivi kungatiyavye kuti tikulishe “minkhalidwe ya mzimu utuŵa.”(Agal. 5:22, 23) Mulungu opeleka mzimu wake kuli ŵanthu ŵala amene opitilija kunkhala na maganizo aweme komasoti minkhalidwe iweme. Yove angapitilijelini kutipasa mzimu wake keno sewo tili na maganizo aipa ndipo tuŵakonkheja. (1 Ates. 4:7, 8) Kuti tipitilije kulondela mzimu utuŵa, tufunikilalini soti “kunyoza mawu aulosi.” (1 Ates. 5:20) Mawu akuti “maulosi,” pa nkhani yamene iyi opanamila mauthenga opangiwa na mzimu wa Mulungu amene opamikijapo uthenga wonena za nsiku ya Yehova komasoti kufupika kwa nthawe yamene yasala. Sewo tuyejalinisoti kutalimphisha nthawe yaikuti izafwike nsiku yamene iyi m’maganizo ŵasu, poganiza kuti Aramagedo izafwikelini pa nthawe yatikali na moyo. Mmalo mwake, sewo tuwonesha kuti tuyembekezela—kuti nsiku yamene iyi ifwike kwalombapano komasoti kuti tuikumbukila—popitilija kunkhala bize na “ntchito zuwonesha kuti nise olipeleka.”—2 Pet. 3:11, 12. Nsanja yophunzila 06.2023 pedji 12 ndim. 13-14

Kansi sewo monga Akhilisitu tufunikila kuchita tyani keno pachipangizo chasu cha makono pawela chithunzi cholaula? Tufunikila kuleka kuchilolesha nthawe yamene iyo. Keno tukumbukila kuti ushamwali wasu na Yehova ni chuma cha ntengo wapatali ngako kuzankhale kosavuta kuchita vamene ivo. Olo vithunzi viyakine vamene ni vosalaula vingatichitishe kunkhala na chilako-lako choyonana. Ndaŵa yanji tufunikila kuvipewa? Ndaŵa tufunalini olo patontho peka kuti tichite chigololo mu ntima mwasu. (Mat. 5:28, 29) Nkulu muyakine waku Thailand zina yake David enena kuti: “Newo nulikonsha kuti: ‘Olo kuti vithunzi vamene ivo ni vosalaula, kansi Yehova angakondwele keno newo ningapitilije kuvilolesha?’ Kuganiza mwanjila yamene iyi kuniyavya kuchita vinthu mwa nzelu.” Kuyopa kuchita chinthu chilichonse chamene chingakhumudwise Yehova kungatiyavye kuchita vinthu mwanzelu. Kuyopa Mulungu niye “chiyambi,” kapena kuti maziko, a nzelu. Nsanja yophunzila 06.2023 pedji 23 ndim. 12-13

“Vipinda vankati” vingatanthauze mipingo yasu. Pa chisauso chikulu tizafwane chitetezo chakulonjeza Yehova, keno sewo tingapitilije kunkhala okatijana na Akhilisitu ayasu. Tetyo, yeja-yejani mwamungakwanishile kuti mukokonda ngako akwasu na akalongosi ŵanu. Kupulumuka kwasu kungadalile pa kuchita vamene ivo! “Nsiku ikulu ya Yehova” izalete mavuto kuli ŵanthu. (Zef. 1:14, 15) Ŵanthu a Yehova nawo azakumane soti na mavuto. Koma keno tukonzekela palipano, tizankhale odekha noyavyako ayakine. Tizapilile mavuto aliwonse ŵatingakumane nawo. Okhulupilila ayasu akazakumana na mavuto, tizachite vonse vatingakwanishe poŵayavya mwa kuŵawonesha chifundo, komasoti kuŵapasa vinthu vakufunikila. Ndipo tikaphunzililatu kukonda akwasu na akalongosi ŵasu palipano, tizaŵawoneshe chikondi kusogolo. Tetyo, Yehova azatipase mphaso ya moyo wosasila m’chalo mwamene masoka onse am’chilengedwe komasoti visauso, vizakumbukiliwelini soti.—Yes. 65:17. Nsanja yophunzila 07.2023 pedji 7 ndim. 16-17

Mawu a Mulungu ofotokoza za ŵanthu okhulupilika monga ŵanthu amphamvu. Koma ayakine mwa ŵanthu amene awo, ni nthawe zonselini penzelimvwa kuti ni amphamvu. Mwachisanzo, nthawe ziyakine Mfumu Davide enzelimvwa kuti ni ‘wotang’a monga ni lupili’, koma nthawe ziyakine yove ‘esokonezeka.’ (Sal. 30:7) Olo kuti Samisoni enze na mphamvu zodabwisa moyavyiwa na mzimu wa Mulungu, yove enzeziŵa kuti paliye kuyavyiwa na Mulungu, “angafoke nonkhala monga ni ŵanthu onse.” (Ower. 14:5, 6; 16:17) Analume okhulupilika amene aŵa enze na mphamvu chifukwa chakuti Mulungu enzeŵayavya. Naye ntumwi Paulo enzeziŵa kuti enzefunikila mphamvu zofumila kwa Mulungu. (2 Ako. 12:9, 10) Molingana na anyinji a sewo, Paulo naye enzelimbana na matenda. (Agal. 4:13, 14) Yove enzevutika kuchita vinthu viweme. (Alo. 7:18, 19) Nthawe ziyakine enzenkhala na nkhaŵa komasoti wokaikila-kaikila. (2 Ako. 1:8, 9) Koma olo n’tetyo, Paulo akankhala wofoka, enzefwana mphamvu. Motyani? Yehova enzemupasa mphamvu zenzefunikila. Yove enzemutang’isha Paulo. Nsanja yophunzila 10.2023 pedji 12 ndim. 1-2

Keno nthawe ziyakine muliwona kuti nimwe osafunika, mukokumbukila kuti Yehova ngaye-ngaye niye wamene ekudonsani kuti mukomutumikila, osati munthu muyakine. (Yoh. 6:44) Yove owona viweme kuli aliyense wa sewo. Yove oziŵa mwaulili ntima wasu. Ndipo otiziŵa luweme ngako kupambana mwatuliziŵila seka. (1 Sam. 16:7; 2 Mbiri 6:30) Tetyo, Yehova akawonesha kuti okuwonani kuti nimwe ofunika ngako, osati mukokaikila. (1 Yoh. 3:19, 20) Petenze tikaliyephunzila chonadi, ayakine asewo tenzechita vinthu vamene tingoliimba navo mulandu mpaka pano. (1 Pet. 4:3) Olo ŵanthu amene atumikila Yehova mokhulupilika kwa nthawe itali angolimbana mphela na vinthu viyakine vakuphoniyesha. Lomba tyani ponena za mwewo? Kansi nthawe ziyakine mukaikila kuti Yehova wakukhululukilani? Pa nkhani yamene iyi, mungachite luweme kukumbukila kuti olo atumiki okhulupilika a Yehova olimbana na maganizo monga ni amene aŵa. Mwachisanzo, ntumwi Paulo enzekhumudwa ngako akaganizila vinthu venzephoniyesha. (Alo. 7:24) N’chendi kuti Paulo elapa machimo ŵake ndipo pavuli pake ebatizika. Koma olo n’teyo, yove enzeliwona kunkhala “ntontho ngako pa atumwi onse” komasoti “wochimwa ngako.”—1 Ako. 15:9; 1 Tim. 1:15. Nsanja yophunzila 03.2024 pedji 27 ndim. 5-6

Phunzilo imozi yatingaphunzilepo pa vosankha viipa vechisankha Mfumu Yehoasi, ni yakuti sewo tufunikila kupanga azishamwali aweme amene angatiyavye kunkhala na minkhalidwe iweme—azishamwali amene okonda Yehova komasoti amene ofuna kumukondwelesha. Sewo tufunikilalini kutandala tyala na ŵanthu amene ŵatulingana nawo misinkhu. Kumbukilani kuti Yehoasi enze ntontho ngako pomulinganija na shamwali wake Yehoyada. Pa nkhani ya kusankha azishamwali mungachite luweme kulikonsha kuti: ‘Kansi ove oniyavya kutang’isha chikhulupililo changu mwa Yehova? Kansi ove onilimbikisa kuti nikokonkheja mfundo za Yehova pa moyo wangu? Kansi ove olaŵila vokhuza Yehova na choonadi chake cha ntengo wapatali? Kansi ove olemekeza mfundo za Yehova? Kansi ove onipasa malangizo nikafunikila chendi vamene ivo?’ (Miy. 27:5, 6, 17) Kulaŵila chendi, mwewo mufunikilalini azishamwali amene okondalini Yehova. Koma keno azishamwali ŵanu okonda Yehova, ove—azakuyavyeni nthawe zonse!—Miy. 13:20. Nsanja yophunzila 09.2023 pedji 9-10 ndim. 6-7

Zina yakuti alefa ni zina ya bii yoyamba mu afabeti ya Chigiriki, ndipo yakuti omega ni bii yosilijila. Mwakukatishila ntchito mawu akuti “Alefa na Omega,” Yehova otiyavya kumvwisha kuti yove akayamba kuchita chinthu chiyakine, niyekuti azachisilijishe bwino-bwino mpaka pamapeto. Pavuli pakuti Yehova walenga Adamu na Hava, efotokoza kuti: “Muvyalane, mupake, muzuje chalo, soti muchilolele.” (Gen. 1:28) Pa nthawe yamene iyi, tinganene kuti mwanjila iyakine, Yehova enena kuti yove ni “Alefa.” Yove elaŵila momvwika luweme za cholinga chake: Nthawe yamene ŵana omvwila ŵa Adamu na Hava sembe ezuja chalo nochitisha kuti chinkhale paladaiso. Cholinga chake chamene ichi chikazakwanilishiwa Yehova azankhale monga wanena kuti yove ni “Omega.” Pa nthawe yechisilija kulenga “kululu na chalo komasoti vinthu vonse vili mwamene umo,” Yehova elaŵila mawu owonesha kuti cholinga chake chizakwanilishiwe elonjeza kuti azakwanilishe chendi cholinga chake chokhuza ŵanthu komasoti chalo. Cholinga chake chamene ichi chizakwanilishiwe kumapeto kwa nsiku yamene iyi ya 7.—Gen. 2:1-3. Nsanja yophunzila 11.2023 pedji 5 ndim. 13-14

Ulwendo wovuta wofuma ku Babulo kuluta ku Isilaeli, sembe witola pafupi-fupi miyezi 4, koma Yehova elonjeza kuti vuto iliyonse yamene yenzewoneka monga ingaŵakangishe kujokela izachosewe. Ayuda okhulupilika eziŵa kuti kujokela ku Isilaeli kwenze na madaliso anyinji kupambana nsembe zilizonse zamene sembe ezipeleka. Daliso ikulu yenzepamikijapo kulambila kwawo. Mu Babulo mwamene umo mwenzeve kachisi wa Yehova. Kwenzeve guwa ya nsembe yamene Aisilaeli sembe ekwanisha kupelekelapo nsembe zenzefunikila mokatijana na Chilamulo cha Mose, ndipo penzeve ansembe enzelinganijiwe kuti apeleke nsembe zamene izo. Mu tauni yamene iyi mwenzesoti ŵanthu anyinji amene enzelambila milungu yawenye kupambana ŵala amene enzelemekeza Yehova kapena kuti mfundo zake. Tetyo, Ayuda masauzande anyinji amene enzekonda Yehova enzeyembekezela kujokela kwawo kuti akakwanishe kujoshela kulambila kutuŵa. Nsanja yophunzila 05.2023 pedji 14-15 ndim. 3-4

Kuti tipitilije kuyenda “monga ni ŵana a kungweleŵela” sewo tufunika kuyavyiwa na mzimu utuŵa. Ndaŵa yanji? Chifukwa chakuti muli chino chalo chiipa n’chinthu chovuta ngako kunkhala atuŵa m’minkhalidwe yasu. (1 Ates. 4:3-5, 7, 8) Mzimu utuŵa wa Mulungu ungatiyavye kulimbana na maganizo aichi chalo, kupamikijapo nzelu za ŵanthu komasoti maganizo ŵawo amene okatijanalini na mfundo za Yehova. Mzimu utuŵa ungotiyavyasoti kuchita “chilichonse chiweme, chilichonse cholungama na chachendi.” (Aife. 5:9) Njila iyakine yamene ingatiyavye kulondela mzimu utuŵa wa Mulungu, ni pemphelo. Yesu enena kuti Yehova “azapeleke na ntima umozi mzimu wake utuŵa kuli ŵala omusenga.” (Luk. 11:13) Kuyangijila pamene apo, tulondelasoti mzimu utuŵa wa Mulungu keno tutamanda Yehova tikankhala pamisonkhano. (Aife. 5:19, 20) Minkhalidwe iweme yatingankhale nayo moyavyiwa na mzimu utuŵa niye yamene ingatiyavye kuti tikochita vinthu vakukondwela navo Yehova. Nsanja yophunzila 03.2024 pedji 23-24 ndim. 13-15

Kansi mungachite tyani kuti munkhale oleza ntima ngako? Mukopemphela kuti munkhale oleza ntima ngako. Kuleza ntima ni mbali ya vitwazi va mzimu. (Agal. 5:22, 23) Tetyo, tingapemphele posenga mzimu utuŵa nomusenga Yehova kuti atiyavye kukulisha vitwazi va mzimu wamene uyo. Tikakumana na vinthu voyesa kuleza ntima kwasu ‘tikopitilija kusenga’ mzimu utuŵa kuti utiyavye kunkhala oleza ntima. (Luk. 11:13) Tingamusengesoti Yehova kuti akotiyavya kuwona vinthu monga ni mwakuviwonela yove. Pavuli popemphela, tufunikila kuchita vonse vatingakwanishe kuti tikonkhala oleza ntima nsiku iliyonse. Keno tupemphela moweleja-weleja posenga kuleza ntima noyeja-yeja kuti tinkhale oleza ntima ngako, nkhalidwe yamene iyi izazike miju muntima mwasu nonkhala mbali ya umunthu wasu. Mukoganizila ngako visanzo va m’Baibolo. M’Baibolo muli visanzo vinyinji va ŵanthu amene enze oleza ntima. Mwakuganizila nkhani zamene izi, sewo tingaphunzile njila zatingawoneshele kuleza ntima. Nsanja yophunzila 08.2023 pedji 22 ndim. 10-11

Yesu esimikijila ntumwi Petulo kuti Yehova amuyavye. Yesu pechiushiwa ekatasoti nsomba modabwisa pamozi na Petulo komasoti atumwi ayakine. (Yoh. 21:4-6) N’vosakaikisha kuti chodabwisa chamene ichi chimusimikijila Petulo kuti Yehova sembe ekwanisha kumupasa vinthu vofunikila pa moyo wake. Vuwoneka kuti ntumwi wamene uyu ekumbukila mawu a Yesu akuti Yehova azasamalile ŵanthu amene “oika Ufumu na mfundo zolungama pamalo oyamba.” (Mat. 6:33) Mokatijana na vamene ivi, Petulo eika pasogolo utumiki wake osati ntchito yopaya nsomba. Yove echitila umboni motang’a ntima pa Pentekosite wamu 33 C.E., ndipo eyavya ŵanthu masauzande kuti alondele uthenga uweme. (Mach. 2:14, 37-41) Pavuli pake, yove eyavya Asamariya na ŵanthu amitundu iyakine kuti alondele Khilisitu. (Mach. 8:14-17; 10:44-48) Yehova ekatishila ntchito Petulo mwanjila yodabwisa kuti alete ŵanthu amitundu yosiyana-siyana mumpingo. Nsanja yophunzila 09.2023 pedji 20 ndim. 1; pedji 23 ndim. 11

Papita vyaka Pafupi-fupi viŵili kufumila panthawe yamene a Babulo yechiwononga Yerusalemu, Mfumu Nebukadinezara yaku Babulo ilota maloto osoŵesha ntendele okhuza fano ikulu. Yove elamula analume ŵake onse anzelu, kupamikijapo Danieli kuti aiuje vayalota komasoti tanthauzo yake. Kuti ove ekangiwa kuchita vamene ivo mfumu sembe iŵapaya onse. (Dan. 2:3-5) Danieli enzefunika kuchitapo kanthu mokulumija, kuleka kuchita tetyo, ŵanthu anyinji sembe echifwa. Yove “eluta kwa mfumu kuyasenga kuti imupase nthawe kuti azamasulile maloto ŵake.” (Dan. 2:16) Kuchita vamene ivo, kwenzefunikila kutang’a ntima komasoti chikhulupililo. Paliye umboni uwonesha kuti Danieli enze emasulilapo kale maloto kuvuli. Yove euja ayake kuti ‘asenge chifundo kwa Mulungu wakululu kuti aŵaululile chinsinsi chamene icho.’ (Dan. 2:18) Yehova eyankha mapemphelo amene awo. Moyavyiwa na Mulungu, Danieli ekwanisha kumasulila maloto a Nebukadinezara. Chifukwa cha vamene ivi Danieli pamozi na ayake epulumuka. Nsanja yophunzila 08.2023 pedji 3 ndim. 4

Mukoganizila mapindu amene owela chifukwa cha kuleza ntima. Tikankhala oleza ntima, tukhala osangalala komasoti odekha. Tetyo, kunkhala oleza ntima kungativye kunkhala na thanzi iweme mwakuthupi komasoti mwa mmaganizo. Tikochita vinthu moleza ntima na ŵanthu ayakine, tingankhale nawo pa ushamwali uweme. Mpingo wonse unkhala wokatijana. Tikakhala osakulumija kukalipa ndipo munthu muyakine watikalipisha, tizapewe kuikulisha vuto yamene iyo. (Sal. 37:8; Miy. 14:29) Koma kupambana vonse tikankhala oleza ntima, tunkhala tukonkheja Atata ŵasu akululu, ndipo tizankhale nawo paushamwali wotang’a. Kunkhala woleza ntima ninkhalidwe iweme ngako yamene yupindulisha aliyense wa sewo! Olo kuti nthawe ziyakine vingankhale vovuta kunkhala oleza ntima, moyavyiwa na Yehova, tingapitilije kukulisha nkhalidwe yamene iyi. Komasoti pamene patuyembekezela moleza ntima chalo chanyowani, tingankhale na chidalilo chakuti “linso ya Yehova ili pali ŵanthu amene omuyopa, amene oyembekezela kuwama ntima kwake kosasila.” (Sal. 33:18) Tiyeni tonse tinkhale osimikija ntima kuti tipitilije kuvwala kuleza ntima. Nsanja yophunzila 08.2023 pedji 22 ndim. 7; pedji 25 ndim. 16-17

Yakobo enena kuti payakine munthu wotetyo anganene kuti ali na chikhulupililo, koma vochita vake vuwonesha kuti yove chikhulupililo aliye. (Yako. 2:1-5, 9) Yakobo enena za munthu wamene wawona “mkwake olo mulongosi wake wosauka ndipo aliye chakulya” koma yove osachitapo kanthu kuti amuyavye. (Yako. 2:14-17) Yakobo etomola za Rahabi monga chisanzo cha munthu wamene ewonesha kupitila mu vochita vake kuti enze na chikhulupililo. (Yako. 2:25, 26) Yove echimvwa vokhuza Yehova, ndipo eziŵa kuti Mulungu enzeyavya Aisilaeli. (Yos. 2:9-11) Yove ewonesha chikhulupililo kupitila mu vochita vake—eteteza azondi aŵili Achiisilaeli amene miyoyo yawo yenze pangozi. Monga vokonkhapo vake, olo kuti mwanakazi wamene uyu enze aliye ungwilo ndipo enzelini Mwisilaeli, ewonewa kunkhala wolungama monga ni mwevinkhalila na Abulahamu. Kufumila kuli Rahabi, sewo tuphunzila kuti n’chinthu chofunika ngako kuwonesha kupitila mu vochita vasu kuti tili na chikhulupililo. Nsanja yophunzila 12.2023 pedji 5-6 ndim. 12-13

Sewo monga Akhilisitu tukhutilalini nophunzila tyala mfundo zoyambilila za m’Baibolo. Moyavyiwa na mzimu utuŵa wa Mulungu, tunkhala ofunishisha kuphunzila “olo vinthu vikulu-vikulu va m’Mawu a Mulungu.” (1 Ako. 2:9, 10) Tyani kunkhazikishako pulogilamu yophunzila pamweka yamene ingakuyavyeni kuvwendela ngako kwa Yehova? Mungaphunzilesoti njila zenzefuna Yehova kuti Aisilaeli akozikatishila ntchito pomulambila, nozilinganija na njila zolambilila za Chikhilisitu. Olo payakine mungasankhe kuti muphunzile vinyinji vokhuza maulosi amene ŵechikwanilisha Yesu pa moyo wake komasoti pa utumiki wake pano pa chalo. Ayakine mwa mayankho ŵawo andandalikiwa m’bokosi yakuti “Nkhani zamungaphunzile pa phunzilo ya pamweka.” Mungafwane chisangalalo chikulu pophunzila nkhani zamene izi pokatishila ntchito Índice das Publicações da Torre de Vigia kapena Buku ya Mboni za Yehova yofufuzila nkhani. Kuphunzila Baibolo mosamala, kungatang’ishe chikhulupililo chanu komasoti kungakuyavyeni kuti ‘mumuziŵe chendi Mulungu.’—Miy. 2:4, 5. Nsanja yophunzila 10.2023 pedji 18-19 ndim. 3-5

Mawu ŵechikatishila ntchito ntumwi Petulo akuti “kukondana ngako,” otanthauza “kutambulula.” Mbali yachiŵili ya vesi yamene iyi yufotokoza vachuchita chikondi ngacho-ngacho. Chove chufwichila machimo ŵa akwasu. Vamene ivi tingaviyelekezele mwanjila iyi yokonkhapo: Sewo tilikate chikondi chasu na manja onse aŵili monga ni chinyula chitali, ndipo tuchitambulula luweme-luweme mpaka chove chuvingilija machimo, osati imozi kapena aŵili, koma “machimo anyinji.” Kuziŵilija machimo ni njila iweme ngako yokhululukilana. Molingana na nyula yamene yuziŵilija chilonda, chikondi chuziŵilija vofoka na vophoniya va ŵanthu ayakine. Chikondi chasu chufunikila kunkhala champhamvu ngako kuti chikotiyavya kukhululuka vinthu vakutiphoniyela okhulupilila ayasu—olo kuti nthawe ziyakine vamene ivi vingafune kuti tikoyeja-yeja ngako. (Akol. 3:13) Keno sewo tukwanisha kukhululukila ayakine, tuwonesha kuti chikondi chasu n’chotang’a komasoti kuti tufuna kuchita vinthu vokondwelesha Yehova. Nsanja yophunzila 11.2023 pedji 11-12 ndim. 13-15

Mfumu Yosiya pechikula eyamba kuwamyasoti kachisi. Ntchito yomanga yameneiyo ili nkati, ŵanthu efwana “buku ya Chilamulo cha Yehova yokopelewa na kwanja ya Mose.” Mfumu peichimvwa kuŵelengewa kwa buku yamene iyo, nthawe yamene iyo ichitapo kanthu noyamba kukonkheja malamulo amene awo. (2 Mbiri 34:14, 19-21) Kansi mwewo mungakonde kuti mukoŵelenga Baibolo nthawe zonse? Keno mwiyamba kale kuyeja-yeja, kansi vuyenda tyani? Kansi mulemba mavesi amene angakuyavyeni pa moyo wanu? Yosiya penze na vyaka 39, echita vinthu vamene vemupaisha. Yove elidalila m’malo mosenga Yehova kuti amusogolele. (2 Mbiri 35:20-25) Pamene apa pali phunzilo kuli sewo. Viliye kanthu kuti tili na vyaka vingani ndipo tankhala m’choonadi kwa nthawe itali tyani, sewo tufunikila kupitilija kusakila-sakila Yehova. Vamene ivi vupamikijapo kumusenga nthawe zonse kuti akotisogolela, kuphunzila mawu ŵake, komasoti kukonkheja malangizo ŵa Akhilisitu otang’a mwauzimu. Vamene ivi vizatiyavye kupewa kuchita machimo akulu-akulu nonkhala osangalala ngako pa moyo wasu.—Yako. 1:25. Nsanja yophunzila 09.2023 pedji 12 ndim. 15-16

Baibolo yutomola za anakazi anyinji aminkhalidwe iweme amene enzekonda Yehova komasoti kumutumikila. Anakazi amene aŵa ‘enzechita vinthu mosapitilila malile’ komasoti enze “okhulupilika mu vinthu vonse” (1 Tim. 3:11) Kuyangijila pamene apo, azilongosi achisimbi angafwane akalongosi otang’a mwauzimu mumpingo wawo ndipo angaphunzile vinyinji kufumila kuli ove. Azilongosi achisimbi, kansi mwewo muziŵapo kalongosi aliyense wamene ni chisanzo chiweme? Mungachite luweme kukonkheja minkhalidwe yake iweme; pavuli pake ganizilani za njila ya mwamungaiwoneshele. Chofunika ngako kuti Nkhilisitu ankhale wotang’a mwauzimu ni kulichefya. Keno mwanakazi ni wolichefya, onkhala paushamwali uweme na Yehova komasoti na ŵanthu ayakine. Mwanakazi wamene okonda Yehova okonkheja molichefya malangizo. (1 Ako. 11:3) Yehova efotokoza za ŵanthu ŵechipasa udindo wosogolela mpingo, komasoti amene ali na udindo wosogolela banja. Mfundo yamene iyi niyofunika ngako mumpingo komasoti m’banja. Nsanja yophunzila 12.2023 pedji 18-19 ndim. 3-5

Yehova oyembekezela kuti mwanalume akokonda mwanakazi wake komasoti kumuchilikiza mwakuthupi, mwa mmaganizo komasoti mwauzimu. Kulemekeza anakazi, na kunkhala odalilika, vingezekuyavyani monga mwanalume wapa banja. Pavuli pakuti mwaloŵa m’banja, mwewo mungankhale tata. Kansi mungaphunzile chinji kwa Yehova pankhani yonkhala tata muweme? (Aife. 6:4) Yehova euja Mwana ŵake Yesu, mofumila pansi pantima kuti omukonda komasoti okondwela naye. (Mat. 3:17) Pavuli pakuti mwankhala tata, mukoŵasimikijila ŵana ŵanu nthawe zonse kuti muŵakonda. Mukoŵatembeja mofumila pansi pa ntima wanu pavinthu viweme vakwanisha kuchita. Tata wamene okonkheja chisanzo cha Yehova, oyavya ŵana ŵake kuti akule nofwika ponkhala Akhilisitu otang’a mwauzimu. Mwewo mungakonzekeletu palipano mwakusamalila mwachikondi ŵanthu am’banja mwanu na amumpingo, komasoti mwakulaŵila mawu owonesha kuti muŵakonda notembeja pavakuchita.—Yoh. 15:9. Nsanja yophunzila 12.2023 pedji 28-29 ndim. 17-18

Olo kuti nise atumiki okhulupilika a Yehova, sewo tingakumane mphela na mavuto komasoti matenda mosayembekezeleka molingana na ŵanthu onse. Koma kuyangijila pamene apo, sewo tingashushiwe olo kutamanishiwa na adani a ŵanthu a Mulungu. Olo kuti Yehova otitetezalini kumavuto monga ni amene aŵa, yove olonjeza kuti akotiyavya. (Yes. 41:10) Moyavyiwa na yove, sewo tingapitilije kunkhala osangalala, kupanga vosankha viweme, komasoti kupitilija mphela kunkhala okhulupilika kuli yove olo patulimbana na mavuto akulu ngako. Yehova Mulungu olonjeza kutipasa chinthu chiyakine chayunena Baibolo kuti “ntendele wa Mulungu.” (Afil. 4:6, 7) Ntendele wamene uyu utanthauza chitetezo na ntendele wamuntima, wamene uwela chifukwa chonkhala paushamwali wapadela na yove. Ntendele wamene uyu “upambana kuganiza ngako kulikonse”; wamene uyu ni ntendele wodabwisa ngako kupambana mulimonse mwatingaganizile. Kansi mwewo mwedabwapo kale chifukwa chonkhala na ntendele pavuli popemphela kwa Yehova mofumila pansi pa ntima? “Ntendele wa Mulungu” niye wamene wechitisha kuti mwewo mumvwe tetyo. Nsanja yophunzila 01.2024 pedji 20 ndim. 2; pedji 21 ndim. 4

Kukonda Mulungu kuchitisha ŵanthu okhulupilika kunkhala na ntima wofuna kutamanda zina yake. Mfumu Davide enzeziŵa kuti kutamanda zina ya Yehova ni kutamanda Yehova ngaye-ngaye. Zina ya Yehova yupamikijapo soti mbili yake, vamene ivi vutikumbushasoti za minkhalidwe iweme na vinthu vodabwisa vakuchita Mulungu. Davide enzefuna kuwonesha kuti zina ya Mulungu ni ituŵa na kuitamanda. Yove enzefuna kuti “chilichonse chankati mwake” chikotamanda zina ya Mulungu—kutanthauza kuti na ntima wake wonse. Molingana na vamene ivi, Alevi enzenkhala pasogolo potamanda zina ya Yehova. Ove molichefya evomekeja kuti mawu ŵawo enze osakwanila kuti apeleke chitamando choyenelela ku zina yopatulika ya Yehova. (Neh. 9:5) Mosakaikila, kulichefya kwamene uku kwekondwelesha ngako ntima wa Yehova. Nsanja yophunzila 02.2024 pedji 9 ndim. 6

Yehova azawonelini kuti nimwe ofoka chifukwa chakuti muliye kwanilishe cholinga chanu chamene chenze chosakwanishika. (2 Ako. 8:12.) Mukophunzilapo kanthu pa mavuto ŵanu. Mukokumbukila vinthu vemwikwanilishapo kale. Baibolo yunena kuti “Sikuti Mulungu ni wosalungama kuti angaluŵe ntchito yanu.” (Ahe. 6:10) Tetyo mwewo namwe osaluŵa vinthu vemwikwanisha kale kuchita. Mukoganizila za volinga vemwikwanilishapo kale. Vingankhale—luweme kunkhala paushamwali na Yehova, kuuja ayakine vokhuza yove, olo kubatizika. Monga mwemwipitila pasogolo nokwanilisha volinga vanu vauzimu m’masiku akuvuli, mungakwanishe soti kupitilija kukwanilisha cholinga chanu chalombapano. Na thandizo ya Yehova, mungakwanilishe cholinga chanu. Nthawe zonse mukoyeja kuwona mwakukuyavyilani Yehova ndipo vamene ivi vizakuyavyeni kunkhala osangalala pamuyeja-yeja kukwanilisha volinga vanu. (2 Ako. 4:7) Keno mwewo mungaleke kufoka, muzalondele madaliso anyinji.—Agal. 6:9. Nsanja yophunzila 05.2023 pedji 31 ndim. 16-18

Yehova nthawe zonse osakila njila zowoneshela atumiki ŵake kuti oŵakonda komasoti osangalala na vakuchita. Baibolo yunena za maulwendo aŵili amene Yehova euja Yesu kuti ni Mwana wake wokondewa komasoti kuti osangalala naye. (Mat. 3:17; 17:5) Kansi mungasangalale kumvwa mawu a Yehova monga ni amene aŵa? Masiku ŵano Yehova olaŵilalini na ŵanthu mwasiteleti, koma okatishila ntchito Mawu ŵake Baibolo. Sewo ‘tingamvwe’ mawu a Yehova owonesha kuti okondwela nase tikoŵelenga mawu a Yesu opezeka m’Mabuku authenga uweme. Yesu enzekonkheja luweme ngako minkhalidwe iweme ya Atata ŵake. Tetyo, tikoŵelenga mawu owonesha kuwama ntima amene ŵenzekatishila ntchito Yesu polaŵila na ŵanthu aliye ungwilo, tikowona kuti ni Yehova ngaye-ngaye wamene otiuja mawu amene awo. (Yoh. 15:9, 15) Koma keno tukumana na mavuto vutanthauzalini kuti Mulungu waleka kukondwela nase. Koma mosiyana ngako na vamene ivi, mayeselo otipasa mwayi wowonesha kuti tumukonda ngako Mulungu komasoti tumudalila.—Yako. 1:12. Nsanja yophunzila 03.2024 pedji 28 ndim. 10-11