Penzetonga Mulungu, volengewa vonse venze vokatijana komasoti venzenkhala mwantendele
Ndaŵa yanji tufunikila Ufumu wa Mulungu?
Kumayambililo kwa mbili ya ŵanthu, Nyamalenga wasu, wamene zina yake ni Yehova, ni yove yeka enzetonga. Yove enzetonga mu njila yachikondi. Yove epanga malo aweme ngako kuti ŵanthu akonkhalamo—munda wa Edeni. Komasoti eŵapasa vakulya vinyinji na ntchito yofunika kuti akokata. (Genesis 1:28, 29; 2:8, 15) Ŵanthu sembe enkhala mu ntendele kuti enze epitilija kunkhala omvwila ulamulilo wachikondi wa Mulungu.
Ŵanthu oyambilila ekana Mulungu monga Wolamulila
Baibolo yunena za mngelo muyakine wopanduka, Satana Mdyelekezi wamene eshusha ufulu wa Mulungu wotonga. Yove enena kuti ŵanthu angankhale osangalala paliye kutongewa na Mulungu. Vomvwisha chisoni, n’vakuti makolo ŵasu oyambilila, Adamu na Hava, ekonkha njila ya Satana nopandukila Mulungu.—Genesis 3:1-6; Chivumbulutso 12:9.
Adamu na Hava ekana kuti Mulungu ankhale ntongi wawo, chifukwa cha vamene ivi ove etaya mwayi wonkhala mpaka kale-kale m’Paladaiso na moyo wangwilo. (Genesis 3:17-19) Vechisalula vechizokhuza soti ŵana ŵawo ŵechivyala. Baibolo yunena kuti, chifukwa chakusamvwila kwa Adamu, “uchimo wiloŵa m’chalo, na imfwa kupitila mu uchimo.” (Aroma 5:12) Uchimo wileta vokonkhapo viipa komasoti voyofya chifukwa chakuti: “Munthu otamanisha munthu muyake pomutonga.’ (Mlaliki 8:9) M’mawu ayakine tingalaŵile kuti, keno ŵanthu olilamulila ŵeka, mavuto opakila-pakila.
KUYAMBA KWA UTONGI WA ŴANTHU
Nimurodi epandukila Yehova
Ntongi woyamba waumunthu wamene otomolewa m’Baibolo ni Nimurodi. Ndipo yove epandukila utongi wa Yehova. Kufumila nthawe ya Nimurodi, ŵanthu amphamvu okatishila ntchito utongi wawo powononga ayawo. Vyaka 3.000 kuvuli Mfumu Solomo elemba kuti: “Niwona misozi ya okandililiwa, soti paliye oŵatonthoja. Koma M’manja mwa okandililiwa mwenze mphamvu.”—Mlaliki 4:1.
Vinthu masiku ŵano viliyechinje. Mu 2009, buku ya bungwe ya United Nations inena kuti “chimozi mwa vinthu vamene vuyambisha mavuto pachalo chonse ni utongi uipa.”
NTHAWE YOCHITAPO KANTHU
Chalo chufunikila utongi uweme komasoti maboma aweme. Ndipo ivi niye vechilonjeza Nyamalenga wasu!
Utongi wa ŵanthu olo unkhale wabwino tyani, ukwanisha lini kusilija mavuto a ŵanthu
Mulungu ankhazikishe Ufumu, kapena kuti boma, yamene izaloŵe m’malo mwa maboma onse a ŵanthu, soti “izankhalepo mpaka kale-kale.” (Danieli 2:44) Uyu niye Ufumu wakupemphelela ŵanthu mamiliyoni anyinji. (Mateyu 6:9, 10) Koma Mulungu azatongelini yeka yayi, mmalo mwake, esankha muyakine enkhalapo monga munthu kuti ankhale Mfumu. Kansi Mulungu wasankha ŵani?