Kansi Mfumu ya Ufumu wa Mulungu niŵani?
Mulungu eujila olemba Baibolo anyinji kuti alembe vinthu vingatiyavye kuziŵa bwino-bwino za wala wamene enzekuzankhala Mfumu ya Ufumu wa Mulungu. Wotonga wamene uyu azankhale:
Wosankhiwa na Mulungu. “Newo nankhazikisha mfumu yangu. . . . Ndipo nikupase mitundu ya ŵanthu kunkhala chuma chako, nikupase chalo chonse kunkhala chako.”—Salimo 2:6, 8.
Woloŵa m’malo mwa Mfumu Davide. “Pakuti kuli sewo kwavyalika mwana. Sewo tapasiwa mwana mwanalume . . . Utongi wake wolingana na wa kalonga udzafwike kutali ndipo ntendele uzasile lini pampando wachifumu wa Davide komasoti mu ufumu wake, kuti yove achitishe ufumu wamene uyo kunkhazikika.”—Yesaya 9:6, 7.
Wovyalikila ku Betelehemu. “Wewo Betelehemu. . . , “muli wewo mudzafume munthu wamene ati adzakhale wotonga . . . Pakuti yove azankhale nkulu mpaka kosilijila kwa chino chalo.”—Mika 5:2, 4.
Enyozewa nopaiwa. “Yove enyozewa komasoti ŵanthu enzemupatula. . . . Yove elasiwa chifukwa cha volakwa vasu. Efwaiwa chifukwa cha machimo ŵasu.”—Yesaya 53:3, 5.
Eushiwa kwa akufwa ndipo epasiwa ulemelelo. “Pakuti muzauleke lini m’Manda moyo wangu. . . . Kukwanja yanu ngayo kuli chisangalalo mpaka kale-kale.”—Salimo 16:10, 11.
Yesu Khilisitu wotonga muweme
Mu mbili yonse ya ŵanthu, ni munthu mmozi tyala wamene ivi vonse vemuchitikila, wamene ni Mfumu iweme, munthu wamene uyu ni Yesu Khilisitu. Kulaŵila chendi, mmgelo euja Mariya, amaiŵake a Yesu kuti: “Yehova Mulungu adzam’pase mpando wachifumu wa Davide atata ŵake, . . . Ndipo Ufumu wake uzasile lini.”—Luka 1:31-33.
Yesu aliyenkhalepo ntongi wa chino chalo. M’malo mwa vamene ivi, yove azatonge ŵanthu pano pachalo ali kululu monga Mfumu ya Ufumu wa Mulungu. N’chinji chumuchitisha yove kunkhala Mfumu iweme? Tiyeni tiwone vechichita yove ali pano pachalo.
Yesu enzemvwila chifundo ŵanthu. Yesu eyavya analume na anakazi, alumbwana, achikulile, olemela olo osauka. (Mateyu 9:36; Maliko 10:16) Munthu wamankhutu pechichondelela kuti: “Keno mufuna, munganituŵishe,” Yesu ekatiwa na chifundo ndipo emupojeka.—Maliko 1:40-42.
Yesu etiphunzisa mwatingamutemweshele Mulungu. Yove enena kuti: “Mungakwanishe lini kunkhala kapolo wa Mulungu na wa chuma nthawe imozi.” ‘Enenasoti kuti, tufunikila kuchitila ayasu vinthu vatufuna kuti ove atichitile’—yamene iyi niye yutomolewa kuti Chilamulo chachinkhalidwe. Kuyangijila pamene apo Yesu ewonesha soti kuti, Mulungu okondwela lini tyala na vatuchita yayi koma okondwelasoti na mwatuganizila na mwatumvwila. N’chifukwa chake kuti timukondweleshe Mulungu, tufunikila kusamala na vatuganiza muntima mwasu na mwatumvwila. (Mateyu 5:28; 6:24; 7:12) Yesu etiphunzisa kuti, kuti tinkhale osangalala, tufunikila kuphunzila vinthu vakufuna Mulungu kuti sewo tichite, pavuli pake tikovichita chendi.—Luka 11:28.
Yesu etiphunzisa tanthauzo ya chikondi. Mawu a Yesu na vochita vake venze vamphamvu ndipo yove ekwanisha kuŵafwika pantima ŵanthu enzemutetekela. “Ŵanthu enzenkhala odabwa ngako na kaphunzisidwe kake, chifukwa enzeŵaphunzisa monga ni munthu waudindo.” (Mateyu 7:28, 29) Yove eŵaphunzisa kuti: “Mukokonda adani ŵanu.” Epemphelela soti ayakine mwa ŵala emupaya kuti: “Atata, ŵakhululukileni, chifukwa oziŵa lini vakuchita.”—Mateyu 5:44; Luka 23:34.
Yesu owamilila chendi kunkhala Wotonga pa chalo chonse chifukwa yove ni wamphamvu komasoti muweme ntima. Komalomba ayambe nthawe yanji kutonga?