MOYO WASU WA CHIKHILISITU
Makolo, phunzisani ŵana ŵanu vinthu vakufunikila kuziŵa
Tunkhala m’chalo chamene ŵanthu owona chiweme kunkhala chiipa komasoti chiipa kunkhala chiweme. (Yes 5:20) N’vovwisha chisoni kuti, ŵanthu ayakine ochita vinthu vakuzonda Yehova, kupamikijapo vinthu viipa monga kuyonana kwa analume olo anakazi ŵeka-ŵeka. Azishamwali aku sikulu olo ŵanthu ayakine angayeje-yeje kukopa ŵana ŵasu ofunika ngako kuti akochita vinthu vakuchita ove. Kansi mwewo mungakonzekeleshe tyani ŵana ŵanu kuti akokwanisha kulimbana na vinthu vamene ivi komasoti viyeso viyakine vangakumane navo?
Aphunziseni ŵana ŵanu kuti aziŵe malamulo a Yehova. (Le 18:3) Patontho na patontho phunzisani ŵana ŵanu vayunena Baibolo pa nkhani yokhuza kuyonana koyenelela mokatijana na nsinkhu wawo. (De 6:7) Likonsheni kuti: ‘Kansi nuŵaphunzisa ŵanu ŵangu kuti akowonesha chikondi ngacho-ngacho, kufunika kokatishila ntchito vovwala voyenelela, kuwona ayakine kunkhala ofunika komasoti kulemekeza vinthu vachisinsi va ŵanthu ayakine? Kansi ŵana ŵangu angakwanishe kuziŵa vangachite keno ŵanthu ayakine oŵakamija kuti alolele volaula olo keno oŵakakamija kuti achite vinthu vakuwona Yehova kuti ni viipa?’ Kuziŵilatu vinthu vinyinji kungaŵayavye kupewa mavuto. (Miy 27:12; Mla 7:12) Mukophunzisa ŵana ŵanu, niye kuti muwonesha chikondi kuli mphaso yanu yofunika ngako yofumila kwa Yehova.—Sl 127:3.
LOLELANI VIDIYO YAKUTI MANGANI NYUMBA YOLIMBA—MUZITETEZA ANA ANU KU “ZINTHU ZOIPA,” NDIPO PAVULI PAKE YANKHANI MAKONSHO AŴA:
Kansi ndaŵa yanji ayakine okaikila kuphunzisa ŵana ŵawo nkhani zokhuza kuyonana?
Ndaŵa yanji makolo ofunika kuphunzisa ŵana ŵawo, “malangizo a Yehova na kaganizidwe kake”?—Aef 6:4
Kuziŵa vinthu kuteteza
Kansi gulu ya Yehova yupeleka chinji poyavya makolo kuti akophunzisa ŵana ŵawo nkhani zokhuza kuyonana?—w19.05-CN pedji 12, bokosi
Ndaŵa yanji mwewo mufunika kukambilana nawo ŵana ŵanu nthawe zonse, mavuto akaliye yamba?