Pitilijani “kulimbikisana”

1. Mokatijana na 1 Atesalonika 5:11, kansi tonse tukata nawo ntchito yotyani?

KANSI mpingo wanu wikatapo kale ntchito yomanga olo kukonzasoti Ng’anda ya Ufumu? Keno n’tetyo, payakine mukumbukila nthawe yoyamba yemwisonkhana mu Ng’anda ya Ufumu inyowani yamene iyo. Ndipo mwitembeja ngako Yehova. Payakine mwikhuziwa ngako mwakuti mwikangiwa kuimba bwino-bwino nyimbo yoyamba. Ng’anda zasu za Ufumu zomangiwa luweme zuchitisha kuti Yehova atamandiwe. Komalomba pali ntchito iyakinesoti yomanga yamene keno tukata nawo tuchitisha kuti yove atamandike ngako. Ndipo ni yantengo wapatali kupambana ng’anda zonse zatingamange. Ntchito yamene iyi ni yolimbikisa ŵanthu amene owela kung’anda zamene izi zolambilila. Ntumwi Paulo enzeganizila za ntchito yamene iyi pechilemba mawu apa 1 Atesalonika 5:11, lemba yamene yusogolela nkhani yamene iyi.—Ŵelengani.

2. Kansi tikambilane chinji mu nkhani ino?

² Ntumwi Paulo ni chisanzo chiweme cha munthu wamene enzeziŵa kulimbikisa Akhilisitu ayake. Yove enzeŵachitila chifundo. Mu nkhani ino, tikambilane mwechiyavyila abale na alongo ŵake kuti (1) akopilila mayeselo, (2) akonkhala mwantendele, komasoti (3) akokhulupilila ngako Yehova. Tiyeni tiwone vatingachite kuti tikomukonkheja nolimbikisa abale na alongo ŵasu masiku ŵano.—1 Akor. 11:1.

PAULO ENZEYAVYA ABALE NA ALONGO ŴAKE KUPILILA MAYESELO

3. Kansi Paulo ewonesha tyani kuti enzewona vinthu moyenela?

³ Paulo enzekonda ngako abale na alongo ŵake. Pakuti naye enzekumanasoti na mavuto, enzekwanisha kuchitila chifundo Akhilisitu ayake akokumana na mayeselo. Nthawe iyakine ndalama zimusilila ndipo enzefunika kuti akate ntchito kuti akofwana vofunika pa moyo wake na ayake ŵenze nawo. (Mac. 20:34) Paulo enzeziŵa ntchito yopanga matenti. Tetyo, pechifwika ku Korinto, poyamba enzekata ntchito yamene iyi pamozi na Akula na Purisikila. Koma “sondo iliyonse,” enzelalikila kuli Ayuda na Agiriki. Pavuli pake, pechifwika Sila na Timoteyo, “Paulo enkhala bize ngako na ntchito yolalikila mawu a Mulungu.” (Mac. 18:2-5) Nthawe zonse yove enzekumbukila cholinga chake chikulu, chamene chenze kutumikila Yehova. Pakuti enzechita khama pa nkhani yolalikila komasoti kukata ntchito, yove enzekwanisha kulimbikisa abale na alongo ŵake. Eŵakumbusha kuti osati akolola kuti mavuto na udindo wopezela banja vinthu vofunika, kuŵachitishe kuti akonyalanyaza “vinthu vofunika ngako”—vamene ni chilichonse chokhuza kulambila Yehova.—Afil. 1:10.

4. Kansi Paulo na Timoteyo eŵayavya tyani Akhilisitu ayawo kuti apilile penzetamanishiwa?

⁴ Pakaliyepita nthawe itali mpingo wa ku Tesalonika pewichingonkhazikishiwa, Akhilisitu kwamene uko eyamba kushushiwa ngako. Ŵanthu achiwawa pechikangiwa kufwana Paulo na Sila, ekata “abale ayakine noluta nawo kuli olamulila a tauni yamene iyo,” oŵilikija kuti: “Ŵanthu onse amene aŵa ochita vinthu moshushana na malamulo a Kaisara.” (Mac. 17:6, 7) Ganizilani mwechichitila wowa Akhilisitu anyowani amene awo, pechiwona kuti ŵanthu a mu tauni yamene iyo aŵaukila. Ove sembe eleka kuchita khama potumikila Yehova, koma Paulo enzefunalini kuti vamene ivi viŵachitikile. Olo kuti Paulo na Sila enzefuna kuchokako, ove ewoneshesha kuti mpingo wanyowani wamene uyo usamaliliwa moyenela. Paulo ekumbusha Akhilisitu a ku Tesalonika kuti: “Titumija Timoteyo . . . , kuti azakulimbikiseni na kukutonthojani pa chikhulupililo chanu, kuti osati papezeke muyakine wopatushiwa na masauso amene aŵa.” (1 Ates. 3:2, 3) Vuwoneka kuti Timoteyo etamanishiwako ku tauni yakwawo ku Lusitara. Yove enze ewonasoti mwamene Paulo mwechilimbikisila abale akwamene uko. Pokumbukila mwechiŵadalisila Yehova, Timoteyo sembe ekwanisha kusimikijila abale na alongo anyowani amene awo kuti nawo vinthu viŵayendelasoti luweme.—Mac. 14:8, 19-22; Ahe. 12:2.

5. Kansi m’bale muyakine zina yake Bryant epindula tyani pechiyavyiwa na nkulu?

⁵ Kansi Paulo elimbikisasoti Akhilisitu ayake mu njila iyakine yotyani? Pa ulwendo wawo wojokela ku Lusitara, Ikoniyo na Antiokeya, Paulo na Baranaba ‘eika akulu mumpingo uliwonse.’ (Mac. 14:21-23) Mosakaikila, analume amene esankhiwa amene awo enzelimbikisa mipingo yamene iyo monga mwakuchitila akulu masiku ŵano. Ganizilani vechinena m’bale muyakine zina yake Bryant. Yove enena kuti: “Nili na vyaka 15, atata ŵangu efumapo pa ng’anda ndipo amayi ŵangu echosewa. Nenzelimvwa kuti nili neka ndipo nifoka.” Kansi n’chinji chimuyavya Bryant kupilila? Yove enena kuti: “Nkulu muyakine zina yake Tony, enzelaŵila nane kumisonkhano nthawe ziyakine. Enifotokozela za ŵanthu ayakine amene ekumanapo na mayeselo koma nopitilija mphela kunkhala osangalala. Eniŵelengela lemba ya Salimo 27:10 ndipo kanyinji-kanyinji enzenifotokozela vokhuza Hezekiya, wamene enkhala mphela wokhulupilika olo kuti atata ŵake enzelini chisanzo chiweme.” Kansi vechichita nkulu wamene uyu vimuyavya tyani Bryant? Yove enena kuti: “Pakuti Tony enilimbikisa, niyamba utumiki wa nthawe zonse wanusangalala nawo.” Akulu, mukonkhala tchelu kuti muthandize ŵanthu amene ali monga ni Bryant, amene angafunikile “mawu aweme” olimbikisa.—Miy. 12:25.

6. Kansi Paulo ekatishila ntchito tyani nkhani za ŵanthu akale polimbikisa abale na alongo ŵake?

⁶ Paulo ekumbusha Akhilisitu ayake kuti na mphamvu za Yehova, “nkumbi ukulu wa mboni” wepilila mavuto. (Ahe. 12:1) Paulo enzeziŵa kuti nkhani za ŵanthu akale amene ekwanisha kupilila mavuto osiyana-siyana, sembe ziyavya abale na alongo amene awo kunkhala otang’a ntima komasoti kupitilija kuganizila za “tauni ya Mulungu wamoyo.” (Ahe. 12:22) N’chimozi-mozisoti masiku ŵano. Ni ŵani asalimbikisiwa akoŵelenga nkhani zokhuza mwamene Yehova mwechiyavyila Gidiyoni, Baraki, Davide, Samueli, na ayakinesoti anyinji? (Ahe. 11:32-35) Lomba tyani ponena za visanzo va atumiki a Mulungu masiku ŵano? Ku likulu ya pachalo chonse, kanyinji-kanyinji tulondela makalata ofumila kuli abale na alongo amene ofotokoza kuti chikhulupililo chawo chitang’a pavuli poŵelenga mbili ya moyo wa mmozi wa atumiki a Yehova okhulupilika a masiku ŵasiku ŵano.

PAULO EWONESHA ABALE NA ALONGO ŴAKE MWANGANKHALILE MWANTENDELE

7. Kansi tuphunzilapo chinji pa malangizo a Paulo opezeka pa Aroma 14:19-21?

⁷ Tulimbikisa abale na alongo ŵasu keno tuyeja-yeja kulimbikisa ntendele mumpingo. Tulolalini kuti kusiyana maganizo pa nkhani zosiyana-siyana kutiyaŵanishe. Komasoti tuyumililalini ufulu wasu pa nkhani zamene zufwayalini mfundo za m’Baibolo. Ganizilani chisanzo pa nkhani yamene iyi. Mumpingo wa Chikhilisitu ku Roma mwenze Ayuda na ŵanthu a mitundu iyakine. Kufumila pa nthawe yechisiya kukata ntchito Chilamulo cha Mose, penzevesoti malamulo olesha kulya vakulya viyakine. (Mk. 7:19) Kufumila pa nthawe yamene iyo, Akhilisitu ayakine Achiyuda enzewona kuti angalye vakulya va ntundu uliwonse. Koma olo n’tetyo, ayakine enzewona kuti ni bwinolini kulya vakulya viyakine. Ivi vichitisha kuti mumpingo munkhale kuyaŵikana. Paulo esindika kufunika konkhala mwantendele ndipo enena kuti: “Ni bwino kusalya nyama olo kusamwa vinyu olo kusachita kalikonse kamene kokhumudwisa m’bale wako.” (Ŵelengani Aroma 14:19-21.) Pamene apa Paulo eyavya Akhilisitu ayake amene awo, kuwona kuti kukangana pa nkhani zamene izi sembe kwileta chisokonezo pakati pawo komasoti mumpingo. Yove enze wokonzekasoti kuchinja mwenzechitila vinthu kuti osati akhumudwise ŵanthu ayakine. (1 Akor. 9:19-22) Nase masiku ŵano tingalimbikise ayakine komasoti kunkhala nawo pantendele, keno tupewa kukangana pa nkhani zamene aliyense ofunika kusankha yeka.

8. Kansi Paulo echita chinji pechiwona kuti nkhani iyakine ingasokoneze ntendele mumpingo?

⁸ Paulo epeleka chisanzo chiweme ponkhala mwantendele na ŵanthu amene enzesiyana naye maganizo pa nkhani ziyakine zofunika. Mwachisanzo, ayakine mumpingo enzefuna kuti Akhilisitu amene enzelini Ayuda akochita mdulidwe, payakine chifukwa choyopa kushushiwa na Ayuda ayakine. (Aga. 6:12) Paulo aliyekatijane na maganizo amene aŵa, koma m’malo moyumilila kuti ŵanthu amene awo akonkheje maganizo ŵake, molichefya yove esenga malangizo kuli atumwi na akulu ku Yerusalemu. (Mac. 15:1, 2) Vamene ivi vechichita, viyavya Akhilisitu amene awo kuti akosangalala ndipo mumpingo mwenze ntendele.—Mac. 15:30, 31.

9. Kansi tingamukonkheje tyani Paulo?

⁹ Keno tumvwishishanalini pa nkhani iyakine, tulimbikisa ntendele posenga malangizo kuli abale ŵawasankha Yehova kuti akosogolela mumpingo. Kanyinji-kanyinji, malangizo ofumila m’Baibolo tingaŵafwane m’mabuku ŵasu olo kufumila pa malangizo ayakine opelekewa na gulu. Keno tuyeja-yeja kukonkheja malangizo amene aŵa m’malo moyumilila maganizo ŵasu, tuyavya kuti mumpingo munkhale ntendele.

10. Kansi Paulo echita chinthu chiyakinesoti chotyani polimbikisa ntendele mumpingo?

¹⁰ Paulo enzelimbikisa ntendele poganizila minkhalidwe iweme ya abale na alongo ŵake, osati venzephoniya. Mwachisanzo, kumapeto kwa kalata yechilembela Akhilisitu a ku Roma, yove etomola mazina anyinji. Ndipo nthawe zinyinji enzefotokoza vinthu viweme venzechita ŵanthu amene awo. Tingakonkheje Paulo potembeja kufumila pansi pantima minkhalidwe iweme yali nayo abale na alongo ŵasu. Tikochita vamene ivi, tingayavye kuti abale na alongo ŵasu mumpingo akokatijana komasoti akokondana ngako.

11. Kansi tingachite tyani kuti tinkhazikishe ntendele tikaphoniyana maganizo na ayakine?

¹¹ Nthawe ziyakine olo Akhilisitu otang’a mwauzimu angaphoniyane maganizo olo kukangana. Vamene ivi vichitikilapo kale Paulo na muyake wapantima Baranaba. Analume aŵili amene aŵa ephoniyana maganizo pa nkhani yakuti atole Maliko pa ulwendo wawo wokonkhapo waumishonale. Pakati pawo peyambika “nkangano woyofya” mwakuti mpaka epatukana. (Mac. 15:37-39) Koma pavuli pake, analume atatu amene aŵa echita vinthu mokatijana, vamene vuwonesha kuti enzewona ntendele komasoti mgwilizano mumpingo kunkhala wofunika ngako. (1 Akor. 9:6; Akol. 4:10) Sewo nase tufunika kusilija kusamvwana kulikonse kwatingankhale nako na ayakine mumpingo, nopitilija kuwona minkhalidwe iweme yali nayo. Tikochita tetyo, tilimbikise ntendele na mgwilizano.—Aef. 4:3.

PAULO ETANG’ISHA CHIKHULUPILILO CHA ABALE NA ALONGO ŴAKE

12. Kansi ni mavuto ayakine otyani ŵakukumana nawo abale na alongo ŵasu?

¹² Tulimbikisa abale na alongo ŵasu keno tuŵayavya kuti akokhulupilila ngako Yehova. Ayakine onyozewa na achibale ŵawo amene ni Mbonilini, ayawo aku ntchito olo aku sikulu. Ayakine olwala matenda akulu olo kuvutika maganizo chifukwa chokhumudwa na vinthu viyakine. Palisoti ayakine amene ankhala otumikila Yehova kwa vyaka vinyinji ndipo kwa nthawe itali ankhala oyembekezela mapeto a ichi chalo. Vinthu monga ni vamene ivi vingayese chikhulupililo cha Akhilisitu masiku ŵano. Akhilisitu a m’nthawe ya atumwi enzekumanasoti na mavuto monga ni amene aŵa. Lomba kansi Paulo echita tyani kuti alimbikise abale na alongo ŵake amene aŵa?

13. Kansi Paulo eŵayavya tyani ŵala amene enzenyozewa chifukwa cha vinthu venzekhulupilila?

¹³ Paulo ekatishila ntchito Malemba poyavya abale na alongo ŵake kutang’isha chikhulupililo chawo. Mwachisanzo, vingachitike kuti Akhilisitu amene enze Ayuda enzevutika kuyankha achibale ŵawo akoŵanyoza ponena kuti Chiyuda niye chipembezo chachendi osati Chikhilisitu. N’voziŵikilatu kuti kalata ya Paulo yoluta kuli Aheberi ilimbikisa ngako Akhilisitu amene aŵa. (Ahe. 1:5, 6; 2:2, 3; 9:24, 25) Mfundo zokhutilisha zechiŵalembela, sembe ziŵayavya kuti akoyankha ŵanthu amene enzeŵashusha. Masiku ŵanosoti, tingayavye Akhilisitu ayasu amene onyozewa kuti akokatishila ntchito mabuku oyavya pophunzila Baibolo pofotokoza vakukhulupilila. Komasoti keno achilumbwana ŵasu onyozewa chifukwa chakuti okhulupilila kuti vinthu vichitalengewa, tingaŵayavye kufwana mfundo zamene zingaŵayavye kufotokoza chifukwa chake okhulupilila vamene ivo, kupitila mu kabuku kakuti Kodi Zamoyo Zinachita Kulengedwa? komasoti kakuti, Mmene Moyo Unayambira Mafunso—5 Ofunika Kwambiri.

14. Kansi Paulo enzechitasoti chinji olo kuti enzenkhala bize na ntchito yolalikila komasoti kuphunzisa?

¹⁴ Paulo elimbikisa abale na longo ŵake kuti akowonesha chikondi pochita “ntchito ziweme.” (Ahe. 10:24) Yove eyavya abale na alongo ŵake amene aŵa osati na mawu tyala, komasoti na vochita. Mwachisanzo, Akhilisitu aku Yudeya pechivutika na njala, Paulo eyavyako poŵapasa vinthu vofunika. (Mac. 11:27-30) Ndipo olo kuti Paulo enzenkhala bize ngako na ntchito yolalikila nophunzisa, nthawe zonse enzesakila-sakila njila zoyavyila ayakine pa vinthu venzefunikila. (Aga. 2:10) Pochita vamene ivi, yove elimbikisa Akhilisitu ayake amene awo kuti akodalila Yehova kuti akoŵayavya. Sewo nase masiku ŵano, keno tulipeleka pokatishila ntchito nthawe, mphamvu komasoti luso yasu poyavya ayakine pa nthawe ya masoka a m’chilengedwe, tuyavya abale na alongo kutang’isha chikhulupililo chawo. Vamene ivi niye vuchitikasoti keno nthawe zonse tuyavyako pa ntchito ya pachalo chonse na ndalama zasu. Keno tuyavya munjila zamene izi komasoti ziyakine, tuchitisha abale na alongo ŵasu kuti akokhulupilila kuti Yehova aŵasiyelini olo patontho.

15-16. Kansi tufunika kuchita tyani vinthu na ŵanthu amene chikhulupililo chafoka?

¹⁵ Paulo epitilija kulimbikisa ŵanthu amene chikhulupililo chawo chenze chifoka. Enzeŵachitila chifundo komasoti kulaŵila nawo mowama ntima. (Ahe. 6:9; 10:39) Mwachisanzo, mu kalata yake yoluta kuli Aheberi, moweleja-weleja ekatishila ntchito mawu owonesha kuti naye enzefunikasoti kukonkheja malangizo amene awo ŵenzepeleka. (Ahe. 2:1, 3) Molingana na Paulo, nase tupitilija kulimbikisa ŵanthu amene chikhulupililo chawo chafoka poŵawonesha kuti tuŵaganizila. Komasoti tikochita vamene ivi tuwonesha kuti tuŵakonda. Kulaŵila nawo mwachikondi komasoti mowama ntima kungaŵalimbikise ngako.

¹⁶ Paulo eŵalimbikisa abale na alongo ŵake amene awo kuti Yehova enzeziŵa ntchito ziweme zenzechita. (Ahe. 10:32-34) Nase tingachite vamene ivi keno tuyavya Mkhilisitu muyasu wamene chikhulupililo chake chafoka. Tingamukonshe kuti atifotokozele mwechiyambila choonadi olosoti kumulimbikisa kuti aganizile mwechimuyavyilako kale Yehova kuvuli. Tingakatishile ntchito mpata wamene uyu, kumusimikijila kuti Yehova aliyeluŵe ntchito zowonesha chikondi zechichita yove komasoti kuti amusiyelini. (Ahe. 6:10; 13:5, 6) Kutandala nawo mwa njila yamene iyi, kungalimbikise abale na alongo ŵasu okondewa amene aŵa kuti apitilije kutumikila Yehova.

“PITILIJANI KULIMBIKISANA”

17. Kansi ni luso yotyani yatufunika kupitilija kukulisha?

¹⁷ Molingana na munthu okata ntchito zomanga-manga, wamene m’kupita kwa nthawe luso yake yuyangijilika, nase tingayangijile vatuchita polimbikisana. Tingayavye ayakine kupilila mayeselo ŵakukumana nawo, poŵafotokozela visanzo va ŵanthu akale amene epilila. Tingalimbikise ntendele pofotokoza vinthu viweme vakuchita, kupewa vinthu vamene vingasokoneze ntendele komasoti kunkhazikisha ntendele pakankhala kuphoniyana maganizo. Komasoti tingapitilije kutang’isha chikhulupililo cha abale na alongo ŵasu poŵafotokozela mfundo za choonadi, poŵayavya kufwana vakufunikila komasoti kutang’isha chikhulupililo cha ŵala amene efoka.

18. Kansi nimwe osimikija kuchita chinji?

¹⁸ Abale na alongo amene oyavya pa ntchito yomanga ng’anda za gulu, onkhala osangalala komasoti okhutila. Tingonkhala osangalala komasoti okhutila keno tuyavya abale na alongo ŵasu mumpingo kunkhala na chikhulupililo chotang’a. Mosiyana na ng’anda zamene m’kupita kwa nthawe zuwonongeka, vokonkhapo pa vinthu vatuchitila ayakine vinkhalepo mpaka kale-kale! Tetyo, tiyeni tinkhale osimikija kupitilija mphela “kutonthojana na kulimbikisana.”—1 Ates. 5:11.