Kansi nimwe okonzeka ‘kuzalondela chalo chanyowani’?

TONSE tuyembekezela mwachidwi kukwanilishiwa kwa lonjezo ya Yesu yakuti: “Osangalala ni ŵanthu ofasa, chifukwa azalondele chalo.” (Mt. 5:5) Ozozewa azalondele chalo akazankhala mafumu na olamulila kululu pamozi na Yesu. (Chiv. 5:10; 20:6) Akhilisitu anyinji masiku ŵano oyembekezela kuzalondela chalo nonkhala na moyo wosasila ali angwilo, antendele, komasoti osangalala. Kuti vamene ivi vizakwanishike, ove azankhale na ntchito yofunika ngako yakuti azakate. Mwachisanzo, ove azayavye kuti chalo chizankhale paladaiso, kuwoneshesha kuti ŵanthu oushiwa ali na vinthu vofunika, komasoti kuŵaphunzisa. Mungachite bwinosoti kuganizila palipano mwamungawoneshele kuti mufunishisha kuzakata nawo ntchito zamene izi.

KANSI NIMWE OKONZEKA KUCHITISHA CHALO KUNKHALA PALADAISO?

Yehova pechilamula ŵanthu kuti “azuje chalo nochilolela,” ewonesha kuti yove enzefuna kuti chalo chonse chinkhale paladaiso. (Gen. 1:28) Lamulo yamene iyi yoyambilila, izakwanilishiwe ŵanthu omvwila akazalondela chalo. Chalo chizankhalelini paladaiso poyamba, chifukwa munda wa Edeni kuliyesoti. Pavuli pa Aramagedo, pazankhale ntchito ikulu yokonza malo osiyana-siyana owonongeka. Izankhale ntchito ikulu ngako!

Vamene ivi vutikumbusha ntchito yenze nayo Aisiraeli pechijokela ku Babulo. Chalo chawo chinkhala matongwe kwa vyaka 70. Koma Yesaya enze enenelatu kuti moyavyiwa na Yehova, azakwanishesoti kuchikonza nonkhala chalo chiweme. Yove elosela kuti: “Azachitishe chipululu chake kunkhala monga ni Edeni, na dela yake ya chipululu kunkhala monga munda wa Yehova.” (Yes. 51:3) Vinthu viŵayendela bwino Aisiraeli. Molingana na vamene ivi, moyavyiwa na Yehova ŵanthu akuti azalondele chalo azakwanishe kuchichitisha kunkhala malo aweme. Ndipo pali vinthu vinyinji vamungachite palipano powonesha kuti mufunishisha kuzakata nawo ntchito yamene iyi.

Njila imozi yamungawoneshele vamene ivi, ni kuwoneshesha kuti nthawe zonse ng’anda yanu ni yaukhondo komasoti yowoneka luweme. Mungachite vamene ivi olo kuti ŵanthu ŵamunkhala nawo pafupi aliye ukhondo. Mungayavyesoti pokata nawo ntchito yotuŵisha pa Ng’anda ya Ufumu na Ng’anda zochitilamo misonkhano ikulu-ikulu. Keno vinthu pa moyo wanu vukulolani, mungalipelekesoti kuti muyavyeko pakachitika masoka achilengedwe mu dela yanu. Mukachita tetyo, mungawoneshe kuti nimwe okonzeka kuyavyako keno pangafunikile thandizo. Likonsheni kuti, ‘Kansi ningaphunzile maluso ayakine ŵaningazakatishila ntchito Yehova akazanilola kunkhala m’chalo chanyowani mpaka kale-kale?’

Gulu ya abale na alongo yuyelesa pa Ng’anda ya Ufumu.

KANSI NIMWE OKONZEKA KUZAYAVYA ŴANTHU AKUTI AZAUSHIWE?

Yesu pechiusha mwana mwanakazi wa Yairo, elamula kuti mwana wamene uyo apasiwe chakulya. (Mk. 5:42, 43) Payakine yenzelini ntchito yovuta kusamalila mwana wa vyaka 12 wamene uyo. Komalomba ganizilani ntchito ikulu yati tizankhale nayo, Yesu akazakwanilisha lonjezo yake yakuti “onse ali mmanda achikumbukilo azamvwe mawu ŵake ndipo azafume.” (Yoh. 5:28, 29) Olo kuti Baibolo yunenalini mwasatane-satane, tingayembekezele kuti ŵanthu akuti azaushiwe azafunike kuyavyiwa kufwana chakulya, malo onkhala, na vovwala. Olo palipano, mungawoneshe kuti nimwe wofunishisha kuzaŵayavya. Onani njila ziyakine zamungawoneshele vamene ivi.

Kansi mungachite chinji palipano powonesha kuti nimwe okonzeka kuzalondela chalo chanyowani?

Abale na alongo osangalala ku gilaundi ya ndeke pakulondela ŵanthu amene awela ku nsonkhano wa m’vyalo ku Paris.

Keno papelekewa chilengezo chakuti wopanamila dela awele kuzayendela mpingo wanu, kansi mungalipeke kuti muzalye naye pamozi chakulya ku ng’anda kwanu? Keno atumiki apadela a nthawe zonse amene enzetumikila pa Beteli utumiki wawo wasila nowela mumpingo wanu, olo keno wopanamila dela utumiki wake wasila, kansi mungamuyavye kufwana malo onkhala? Keno mu dela yanu muzachitike nsonkhano wapadela olo wachigawo, kansi mungalipeleke kuti muzakate nawo ntchito nsonkhano ukaliyeyamba komasoti pavuli pakuti wachitika, olo kulondela alwendo?

KUKONZEKELA KUZAKATA NAWO NTCHITO YOPHUNZISA ŴANTHU AKUTI AZAUSHIWE

Mokatijana na vatuŵelenga pa Machitidwe 24:15, tuyembekezela kuti ŵanthu mabiliyoni anyinji azaushiwe. Anyinji mwa ŵanthu amene aŵa, ni ŵala amene enzeve mwayi woziŵa Yehova. Koma ove azankhale na mwayi wamene uyu pavuli pakuti aushiwa.a Atumiki okhulupilika a Mulungu komasoti aluso niye akuti azayayve ŵanthu amene aŵa kuphunzila za Mulungu. (Yes. 11:9) Mwanakazi muyakine zina yake Charlotte, wamene elalikila mwakhama ku Europe, South America, na ku Africa, oyembekezela mwachidwi kuzakata nawo ntchito yamene iyi. Yove enena mosangalala kuti: “Nuyembekezela mwachidwi kuzaphunzisa ŵanthu akuti azaushiwe. Keno nuŵelenga za munthu muyakine wamene enkhalako m’masiku akuvuli, kanyinji-kanyinji nuganiza kuti: ‘Kuti munthu wamene uyu enzemuziŵa Yehova, sembe enze na moyo uweme ngako.’ Nuyembekezelalini kuti nizakumbushe ŵanthu akuti azaushiwe vinthu vechiphoniya.”

Olo atumiki okhulupilika a Yehova amene enkhalako Yesu akaliyewela pano pachalo, azafunike kuphunzila vinthu vinyinji. Ganizilani za chisangalalo komasoti mwayi ukulu wati tizankhale nawo, wofotokozela Danieli kukwanilishiwa kwa maulosi ŵechilemba yove koma pa nthawe yamene iyo enzeŵamvwishalini. (Dan. 12:8) Olo muganiza kuti Rute na Naomi azamvwe tyani akazaziŵa kuti banja yawo yenze munzela wovyalikila Mesiya? Tizasangalale kuphunzisa ŵanthu pachalo chonse, ndipo pazaŵeve kutamanishiwa olo kusokonezewa na vochitika va ichi chalo chiipa!

Mulongo opeleka kapepala kuli mama wamene ali m’chipinda chochapila vovwala.

Kansi mungachite tyani palipano pokonzekela kuzaphunzisa ŵanthu akuti azaushiwe? Njila imozi yatingachitile vamene ivi, ni kuyeja-yeja kunkhala mphunzisi muweme wa Mawu a Mulungu komasoti kulalikila nthawe zonse. (Mt. 24:14) Olo kuti mungakwanishelini kukata ntchito yolalikila mwamufunila palipano chifukwa cha nsinkhu wanu olo mwavilili vinthu pa moyo wanu, mungawoneshe mphela kuti mufunishisha kuzaphunzisa ŵanthu akuti azaushiwe mwa kuchita vonse vamungakwanishe pokata nawo ntchito yolalikila palipano.

Tingachite bwino kulikonsha makonsho aŵa: Kansi newo nuyembekezela mwachidwi kuzalondela chalo chanyowani? Kansi nuyembekezela mwachidwi kukwanilishiwa kwa lonjezo ya kuzalolela chalo, nolondela ŵanthu akuti azaushiwe? Mungawoneshe kuti nimwe okonzeka kuzankhala na moyo wosasila pano pachalo, mwa kukata nawo ntchito zolingana na zati muzakate mukazalondela chalo!

a Onani nkhani yakuti, ‘Kuyavya ŵanthu anyinji kuti ankhale olungama’ mu Nsanja ya Mulonda ya September 2022.