NKHANI YOPHUNZILA N.° 30
NYIMBO N.° 36 Titeteze ntima wasu
Vatingaphunzile kuli Mafumu ŵa Aisiraeli
“Muzawonesoti kusiyana pakati pa munthu wolungama na munthu muipa, komasoti pakati pa munthu otumikila Mulungu na asamutumikila.”—MAL. 3:18.
CHOLINGA CHANKHANI
Kuphunzila nkhani ya mafumu ŵa Aisiraeli kungatiyavye kuziŵa vatufunikila kuchita kuti tikokondwelesha Yehova masiku ŵano.
1-2. Kansi Baibolo yunena chinji vokhuza mafumu ayakine ŵa Aisiraeli?
BAIBOLO yutiuja za analume opitilila 40 amene elamulila monga mafumu ŵa Aisiraeli.a Yove yutifotokozelasoti mosafisa kalikonse za viyakine mwa vinthu venzechita mafumu amene aŵa. Mwachisanzo, olo mafumu aweme echita vinthu viyakine viipa. Ganizilani za Davide yamene yenze mfumu iweme. Yehova enena kuti: “Davide ntumiki wangu . . . enikonkheja na ntima wake wonse nochita vinthu viweme veka-veka pamenso pangu.” (1 Maf. 14:8) Koma olo n’tetyo, mwanalume wamene uyu echita chigololo na mwanakazi wamunecho, ndipo epanga pulani kuti mwanalume wake apaiwe kunkhondo.—2 Sam. 11:4, 14, 15.
2 Baibolo yutiujasoti za vinthu viweme vechichita mafumu amene aliyepitilije kunkhala okhulupilika kwa Yehova. Ganizilani vokhuza Rehobowamu. Yehova efotokoza kuti Rehobowamu enze mfumu yamene “ichita vinthu viipa.” (2 Mbiri 12:14) Koma olo n’tetyo, Rehobowamu echita vinthu viyakine viweme. Mwachisanzo, yove emvwila Yehova pechimulesha kuti osati aniyatane na mafuko 10 ŵa Isiraeli, ndipo eŵalola kuti asankhe mfumu iyakine mmalo mwa yove. Komasoti yove etang’isha chitetezo cha matauni anyinji a muufumu wake nacholinga chofuna kuteteza ŵanthu a Mulungu kuli adani ŵawo.—1 Maf. 12:21-24; 2 Mbiri 11:5-12.
3. Kansi ni makonsho otyani ŵatingalikonshe, ndipo tikambilane chinji munkhani ino?
3 Keno mafumu ŵa Aisiraeli enzechita vinthu viweme komasoti viipa, kansi n’chinji chenzemuyavya Yehova kuziŵa kuti mfumu niyokhulupilika olo yayi? Yankho ya konsho yamene iyi itiyavye kuziŵa vinthu vakufuna Yehova kuli sewo. Tikambilane vinthu vitatu venzeganizila Yehova pofuna kuziŵa keno mfumu iyakine niiweme olo yayi. Choyamba, venzechita kuti aziŵe keno mfumu yenze yolipeleka kuli yove olo yayi. Chachiŵili, venzechita kuti aziŵe keno mfumu yalapa chendi kufumila pansi pa ntima olo yayi. Chachitatu, venzechita kuti aziŵe keno mfumu yupitilija kumutumikila mwanjila yakufuna yove olo yayi.
OVE ENZE OLIPELEKA KWA YEHOVA NA NTIMA WONSE
4. Kansi mafumu okhulupilika enzesiyana tyani na osakhulupilika?
4 Yehova enzesangalala na mafumu amene enzemutumikila na ntima wonse.b Mfumu iweme Yehosafati “isakila-sakila Yehova na ntima wonse.” (2 Mbiri 22:9) Ponena za mfumu Yosiya, mawu oujiliwa onena kuti: “yove akaliyenkhala mfumu, paliye mfumu iyakine yamene ijokela kwa Yehova na ntima wake wonse, na moyo wake wonse, komasoti mphamvu zake zonse.” (2 Maf. 23:25) Lomba tyani ponena za Solomo wamene pavuli pake eyamba kuchita vinthu viipa? Mawu a Mulungu onena kuti: “Aliyetumikile Yehova Mulungu wake na ntima wosayaŵanika.” (1 Maf. 11:4) Ndipo ponena za mfumu iyakine yosakhulupilika zina yake Abiyamu, mawu oujiliwa onena kuti: “Aliyetumikile Yehova Mulungu wake na ntima wake wonse.”—1 Maf. 15:3.
5. Kansi kutumikila Yehova na ntima wosayaŵanika kutanthauza chinji?
5 Koma kansi kutumikila Yehova na ntima wosayaŵanika kutanthauza chinji? Munthu wa ntima wosayaŵanika olambilalini Mulungu chifukwa chowona kuti paliye chiyakine changachite. M’malo mwake, yove omutumikila molipeleka komasoti chifukwa chomukonda. Ndipo yove opitilija kukulisha chikondi na ulemu wake kwa Yehova kwa moyo wake wonse.
6. Kansi tingapitilije tyani kunkhala na ntima wosayaŵanika? (Miyambo 4:23; Mateyo 5:29, 30)
6 Kansi tingachite tyani kuti tikonkheje mafumu okhulupilika notumukila Yehova na ntima wosayaŵanika? Tufunikila kupewa chilichonse chamene chingachitishe kuti tileke kukonda ngako Yehova. Mwachisanzo, tufunika kusamala na vinthu vatulolela olo vatuchita panthawe yopumula. Tufunikilasoti kunkhala osamala na ŵanthu ŵatusankha kuti ankhale azishamwali ŵasu. Tufunikasoti kunkhala osamala nosankha azishamwali aweme kuti tipewe maganizo akuti ndalama niye chinthu chofunika ngako pamoyo wasu. Tikawona kuti tayamba kukonda ngako chinthu chiyakine kupambana mwatukondela Yehova, tikochitapo kanthu mokulumija kuti tipitilije kunkhala okhulupika kwa Yehova.—Ŵelengani Miyambo 4:23; Mateyo 5:29, 30.
7. Ndaŵa yanji kupewa minkhalidwe iipa n’kofunika?
7 Tufunikalini kulola chilichonse kuti chiyaŵanishe ntima wasu. Tikalekankhala menso, tingayambe kuganiza kuti vinthu viipa vingatikhuzelini ndaŵa yakuti tuchita vinyinji potumikila Yehova. Yelekezelani kuti muli moyenda ndipo kunja kuzizila ngako komasoti kuli chimphepo chankuntho. Pavuli pake, mwewo muloŵa m’ng’anda mwanu noyasha mulilo. Koma kansi n’chinji chingachitike keno mungasiye chiseko chosegula? N’voziŵikilatu kuti mphepo yozizila ingaloŵe mokulumija m’ng’anda mwanu. Kansi tuphunzilapo chinji? Tufunikila kuchita vinyinji kuyangijila pakulya chakulya chauzimu chamene chutiyavya kunkhala paushamwali uweme na Yehova. Tufunikilasoti kuzalila viseko vaminkhalidwe iipa, tikochita vamene ivi kuti “mphepo”, kapena kuti kaganizidwe ka ŵanthu asaziŵa Mulungu, osati kaloŵe noyaŵanisha mitima yasu.—Aife. 2:2.
OVE ENZELAPA MOFUMILA PANSI PANTIMA
8-9. Kansi Mfumu Davide na Mfumu Hezekiya echita tyani pechiziŵa kuti Yehova aliyekondwele na vinthu vechichita? (Onani chapa chikuto.)
8 Monga ni mwatawonela kale, Mfumu Davide ichita chimo ikulu ngako. Koma mneneli Natani pechimuzuzula, Davide elapa molichefya. (2 Sam. 12:13) Kufumila pa mawu ŵechilemba yove pa Salimo 51, sewo tukwanisha kuwona kuti yove elapa mofumila pansi pantima. Davide elimvwila chisoni, osati pofuna tyala kupusisha Natani kuti aganize monga walapa, olo pofuna kupewa chilango.—Sal. 51:3, 4, 17
9 Mfumu Hezekiya, ichimwila Yehova. Baibolo yunena kuti: “Ntima wake weyamba kulikuja ndipo vamene ivi vechitisha kuti Mulungu amukalipile yove, Yuda, komasoti Yerusalemu.” (2 Mbiri 32:25) Kansi n’chinji chechitisha kuti Hezekiya alikuje? Payakine enzeliwona kuti niwofunika ngako chifukwa chakuti enze na chuma, egonjesa Asuri, olo chifukwa chakuti matenda ŵake epola modabwisha. Vuwoneka kuti ntima womeka niye wemuchitisha kuti awoneshe katundu wake kuli Ababulo, vamene vechitisha kuti mneneli Yesaya amuzuzule. (2 Maf. 20:12-18) Koma molingana na Davide, Hezekiya elapa molichefya. (2 Mbiri 32:26) Monga vokonkhapo vake, kansi Yehova emuwona tyani Hezekiya? Yove enzemuwona kuti ni mfumu yokhulupilika yamene ‘yenzechita viweme pamenso pa Yehova.’—2 Maf. 18:3.
Mfumu Davide na Hezekiya elapa molichefya pechiziŵa kuti Yehova wakhumudwa na vinthu viipa vechichita (Onani ndime 8-9.)
10. Kansi mfumu Amaziya echita tyani pechizuzuliwa?
10 Mosiyana na vamene ivi, Amaziya Mfumu ya Ayuda yenzechita vinthu viweme “koma osati na ntima wonse.” (2 Mbiri 25:2) Kansi yove ephoniyesha chinji? Pavuli pakuti Yehova wamuyavya kuti agonjese Aedomu, Amaziya eyamba kulambila milungu yawo.c Mneneli wa Yehova pechiwela kuzakambilana naye za nkhani yamene iyo, mfumu yamene iyo iliyefune kumumvwishila ndipo imupitikisha.—2 Mbiri 25:14-16.
11. Mokatijana na 2 Akolinto 7:9, 11, kansi tufunika kuchita chinji kuti Yehova atikhululukile? (Onanisoti vithunzi.)
11 Kansi tuphunzila chinji pa visanzo vamene ivi? Tikachita chimo tufunika kulapa ndipo tikochita vonse vatingakwanishe popewa kuwelejasoti. Lomba kansi tingachite tyani keno talondela malangizo kuli akulu amumpingo pankhani zatuwona kuti nizosafunika ngako? Tikopewa kuganiza kuti Yehova otikondalini, kapena kuti akulu otizonda. Nawo mafumu aweme ŵa Aisirraeli enzepasiwa malangizo komasoti chizuzulo. (Ahe. 12:6) Tikapasiwa malangizo tufunikila (1) kuŵalondela molichefya, (2) kuchinja, komasoti (3) kupitilija kutumikila Yehova na ntima wosayaŵanika. Tikalapa machimo ŵasu, Yehova otikhululukila.—Ŵelengani 2 Akolinto 7:9, 11.
Tikazuzuliwa tufunikila (1) kuvomekeja molichefya, (2) kuchinja, komasoti (3) kupitilija kutumikila Yehova na ntima wosayaŵanika (Onani ndime 11.)f
OVE ENZESOGOLELA PAKULAMBILA KWACHENDI
12. Kansi mafumu okhulupilika enzechita vinthu votyani vamene ni vosiyana na venzechita mafumu osakhulupilika?
12 Mafumu amene Yehova enzeŵawona kuti ni okhulupilika enzesogolela pakulambila kwachendi. Komasoti enzeyavya ŵanthu a Yehova kuti akochitasoti chimozi-mozi. N’chendi kuti enzephoniyesha vinthu viyakine molingana na mwatawonela kale. Koma ove enze olitwala kwa Yehova yeka ndipo enzekata ntchito mwamphanvu posilija kulambila kwawenye m’chalo chawo.d
13. Ndaŵa yanji Yehova enzewona kuti mfumu Ahabu ni yosakhulupilika?
13 Ndaŵa yanji Yehova enzewona kuti mafumu ayakine ni osakhulupilika? N’vowonekelatu kuti nivonselini venzechita ove vamene venze viipa. Olo Mfumu iipa ngako Ahabu iwonesha ntima wolichefya ngako, ndipo ilapa chifukwa chopaya Naboti. (1 Maf. 21:27-29) Yove imangasoti matauni komasoti iwina nkhondo zinyinji polimbana na adani ŵa Aisiraeli. (1 Maf. 20:21, 29; 22:39) Koma Ahabu echita chinthu chiyakine chamene chenze chiipa ngako. Mochilikiziwa na mwanakazi wake, yove elimbikisa ŵanthu akuti akolambila mafano. Chifukwa cha vamene ivi, tinganene kuti yove enzeve ntima wolapa.—1 Maf. 21:25, 26.
14. (a) Ndaŵa yanji Yehova enzewona kuti mfumu Rehobowamu niwosakhulupilika? (b) Kansi mafumu osakhulupilika enzechita vinthu votyani?
14 Ganizilani chisanzo chiyakine cha mfumu yosakhulupilika—Rehobowamu. Monga nimwatawonela kale poyamba, yove echita vinthu vosiyana-siyana viweme muufumu wake. Koma pavuli pakuti ufumu wake wankhazikika, yove eleka kumvwila Chilamulo cha Yehova noyamba kulambila milungu yawenye. (2 Mbiri 12:1) Kufumila panthawe yamene iyo kuluta kusogolo, yove enzechita nthawe ziyakine walambilako Yehova, nthawe ziyakinesoti walambila milungu yawenye. (1 Maf. 14:21-24) Mfumu Rehobowamu na Ahabu ni ovelini ŵeka epatuka pakulambila kwachendi. Kulaŵila chendi, mafumu anyinji osakhulupilika enze na mulandu wochilikiza kulambila kwawenye munjila ziyakine. N’vowonekelatu kuti pamenso pa Yehova kunkhala wolitwala pakulambila kwachendi, chenze chinthu chofunika ngako kuti aziŵe keno mfumu niiweme olo iipa.
15. Ndaŵa yanji kulambila kwachendi n’kofunika ngako kwa Yehova?
15 Ndaŵa yanji Yehova enzewona nkhani yakulambila kunkhala yofunika ngako? Chifukwa chimozi n’chakuti mafumu enze na udindo wosogolela ŵanthu a Mulungu pakulambila kwachendi. Komasoti ŵanthu akayamba kulambila milungu yawenye, enzechitasoti machimo ayakine aipa ndipo enzechitila ayawo vinthu viipa ngako. (Hos. 4:1, 2) Kuyangijila pamene apo, mafumu pamozi na ŵanthu ŵenzelamulila, enze ntundu wolipeleka kwa Yehova. N’chifukwa chake Baibolo yulinganija kulambila milungu yawenye na kuchita chigololo. (Yer. 3:8, 9) Munthu akachita chigololo onkhala kuti wachita chimo iipa ngako kuli mwanalume olo mwanakazi wake. Molingana na vamene ivi, ntumiki wolipeleka wa Yehova akaleka kunkhala wokhulupilika kuli yove, vumuŵaŵa ngako muntima mwake.e—Deut. 4:23, 24.
16. Kansi munthu wolungama osiyana tyani na munthu muipa pamenso pa Yehova?
16 Kansi tingaphunzilepo chinji? N’vowonekelatu kuti tufunika kunkhala osimikija ntima popewa chilichonse chukatijana na kulambila kwawenye. Koma tufunika kunkhalasoti olipeleka pakulambila kutuŵa nonkhala na vochita vinyinji potumikila Yehova. Mneneli Malaki, efotokoza luweme chusiyanisha munthu muweme na muipa pamenso pa Yehova. Yove elemba kuti: “Muzawonesoti kusiyana pakati pa munthu wolungama na munthu muipa, komasoti pakati pa munthu wamene otumikila Mulungu na asamutumikila.” (Mal. 3:18) Tetyo, tufunikalini kulola chilichonse, olo uchimo wasu na vinthu vatuphoniyesha kuti vitifokeshe noleka kutumikila Yehova. Kuleka kutumikila Yehova ni chimo ikulu ngako.
17. Ndaŵa yanji mufunika kuchita vinthu mosamala mukafuna kusankha munthu wamungalungulane naye?
17 Keno mwewo nimwe mbeta ndipo musakila munthu kuti mulungulane naye, kansi mukwanisha kuwona kukatijana kwa mawu a Malaki na ukwati? Munthu muyakine angaŵe na minkhalidwe inyinji iweme, koma keno yove otumikilalini Mulungu wachendi, kansi angaŵe muweme kapena wolungama pamenso pa Yehova? (2 Ako. 6:14) Keno mwewo mungalungulane na munthu wotetyo, kansi yove angakuyavyeni pavinthu vauzimu? Ganizilani ivi: Anakazi a Mfumu Solomo amene enzetumikilalini Yehova, payakine minkhalidwe yawo iyakine yenze iweme. Koma chifukwa chakuti enzetumikilalini Yehova, patontho na patontho eyaŵanisha ntima wa Solomo ndipo yove eyamba kulambila milungu yawenye.—1 Maf. 11:1, 4.
18. Kansi makolo ofunika kuŵaphunzisa chinji ŵana ŵawo?
18 Makolo angakatishile ntchito nkhani za Mafumu ŵa Aisiraeli kuti ayavye ŵana ŵawo kunkhala na ntima wofuna kutumikila Yehova mpaka kale-kale. Ayavyeni ŵana ŵanu kuziŵa kuti Yehova owona kuti munthu ni muweme olo muipa, powona mwakuchitila vinthu pankhani yakulambila kwachendi. Awonesheni kupitila m’mawu komasoti vochita vanu kuti kuchita vinthu vauzimu monga kuphunzila Baibolo, kupezeka pamisonkhano, komasoti kulalikila kukonkhala chinthu chofunika ngako pamoyo wasu. (Mat. 6:33) Keno mungaleke kuchita tetyo, ŵana ŵanu angawone kuti kunkhala wa Mboni za Yehova kutanthauza tyala “kunkhala m’banja ya chipembezo cha Mboni.” Monga vokonkhapo vake, ove angawone kuti kulambila kwachendi n’chinthu chosafunika ngako, olo kulekelatu kutumikila Yehova.
19. Ndaŵa yanji munthu wamene eleka kutumikila Yehova angankhalesoti paushamwali na Mulungu? (Onanisoti bokosi yakuti “Mwewo mungakwanishe kujokelasoti kwa Yehova!”)
19 Keno munthu waleka kutumikila Yehova, kansi vutanthauza kuti angankhalelinisoti paushamwali na Mulungu? N’vowonekelatu kuti yayi. Yove onkhala mphela na mwayi wowonesha kuti walapa noyambasoti kulambila Yehova munjila yakufuna yove. Kuti akwanishe kuchita vamene ivi angafunike kuleka kunkhala wolikuja novomela thandizo yofumila kuli akulu. (Yako. 5:14) Koma kuti ankhalesoti paushamwali na Yehova ofunika kuyeja-yeja mwakhama!
20. Keno tukonkheja mafumu okhulupilika ŵa Aisiraeli, kansi Yehova akotiwona tyani?
20 Lomba kansi nimaphunzilo otyani ŵataphunzila kuli mafumu ŵa Aisiraeli? Tingakonkheje chisanzo cha mafumu okhulupilika keno tupitilija kunkhala olipeleka kwa Yehova pomutumikila na ntima wosayaŵanika. Tufunika kuphunzilapo kanthu tikaphoniyesha vinthu, tufunika kulapa noyamba kuchita vinthu viweme. Komasoti tikokumbukila nthawe zonse kufunika kolambila Yehova molipeleka wamene ni yove yeka Mulungu wachendi. Mukapitilija kunkhala okhulupilika kwa Yehova mwa njila yamene iyi yove azakuwoneni kuti muchita viweme pamenso pake.
NYIMBO N.° 45 Kusinkhasinkha kwa ntima wangu
a Munkhani ino mawu akuti “mafumu ŵa Aisiraeli” onena za mafumu onse ameme elamulila ŵanthu a Yehova, keno elamulila tyala mafuko aŵili ŵa Ayuda, keno elamulila mafuko 10 ŵa Aisiraeli, olo keno elamulila ntundu wonse wa Isiraeli ukaliye yaŵanika.
b KUMVWIKISHA LUWEME: Kanyinji-kanyinji, Baibolo yukatishila ntchito mawu akuti “ntima” ponena za mwalili munthu nkati mwake. Vamene ivi vupamikijapo vinthu vakufunishisha, maganizo ŵake, vochita vake, chifukwa chakuchitila vinthu viyakine, komasoti volinga vakufuna kukwanilisha pamoyo wake.
c Vuwoneka kuti kale-kale, venzelini vachilwendo kuli mafumu ayakine kuti ayambe kulambila milungu yamitundu yechigonjesa.
d Mfumu Asa echita machimo akulu-akulu ngako. (2 Mbiri 16:7, 10) Olo n’tetyo, Baibolo yunena kuti Asa echita viweme pamenso pa Yehova. Olo kuti poyamba enze ekana kumvwila malangizo, vuwoneka kuti pavuli pake yove elapa. Kulaŵila chendi, Yehova ewona vinthu vinyinji viweme muli yove kupambana viipa venzechita. Chinthu chofunika ngako n’chakuti Asa enzelambila Yehova yeka, ndipo enzeyeja-yeja mwakhama kuti asilije kulambila kwawenye mu ufumu wake.—1 Maf. 15:11-13; 2 Mbiri 14:2-5.
e Mungakwanishe kuwona kuti kulambila n’chinthu chofunika ngako kwa Yehova chifukwa malamulo aŵili oyamba m’chilamulo cha Mose enzelesha kulambila mulungu aliyense kupatulapo Yehova.—Eks. 20:1-6.
f MAWU OFOTOKOZA CHITHUNZI : Nkulu muyakine wachilumbwana owonesha nkhaŵa zali nazo mkwasu muyakine pakumufotokozela viyoloŵezi vake vakumwa walwa. Mkwasu wamene uyo olondela malangizo molichefya, ndipo ochinja nopitilija kutumikila Yehova mokhulupilika.