Vamungachite kuti mudjaile mpingo wanyowani

KANSI mwewo mwechinjapo kale mpingo? Keno n’tetyo, mosakaikila mungakatijane na vechilaŵila mkwasu muyakine zina yake Jean-Charles, yove enena kuti: “N’chinthulini chipepu kuti udjaile mpingo wanyowani uku usamalila moyo wauzimu wa ŵanthu am’banja mwako panthawe imo na imo.” Kuyangijila pa kusakila ntchito yanyowani, ng’anda, payakinesoti sikulu kuli ŵana ŵawo, ŵanthu akafuluka angafunikesoti kudjaila nyengo, chinkhalidwe, komasoti gawo yanyowani yolalikila.

Nicolas pamozi na Céline ekumana na mavuto ayakine osiyana na ŵatatomola. Beteli yaku France iŵauja kuti akatumikile mumpingo uyakine. Ove enena kuti: “Poyamba sewo tenzesangalala mumpingo wanyowani, koma pavuli pake teyamba kuyewa azishamwali ŵasu. Tenzeve ayasu anyinji mumpingo wasu wanyowani.”a Mukaliganizila mavuto amene aŵa, kansi mungachite tyani kuti vinthu vikuyendeleni luweme mukafulukila mumpingo wanyowani? Kansi ayakine angachite tyani kuti ayavyepo? Kansi ni madaliso otyani ŵamungafwane mwewo komasoti ŵanthu amumpingo wanu wanyowani?

VINTHU 4 VAMENE VINGAKUYAVYENI KUTI MUDJAILE

Kalongosi oŵelenga Baibolo yawatola mu khadibokisi panthawe yopumula. — Mukodalila Yehova

1. Mukodalila Yehova. (Sal. 37:5) Pavuli pa vyaka 20 ali mumpingo wawo, kalongosi muyakine waku Japan zina yake Kazumi, enzefunika kufuluka chifukwa mwanalume wake enze efwana ntchito mudela iyakine. Kansi yove elola tyani kuti Yehova amusogolele panjila yake? Yove enena kuti: “Newo nemukhutulila Yehova vonse vamuntima mwangu ndipo nemuuja mwenenzemvwila. Newo nenzechita wowa, nenzelimvwa kuti nili neka, ndipo nenze na nkhaŵa ngako. Koma nthawe iliyonse nikapemphela, yove enzenipasa mphamvu zenenzefunikila.”

Kansi mwewo mungachite tyani kuti mukodalila ngako Yehova? Molingana na chimuti chamene chufunikila manzi komasoti lito ya chonde kuti chikule, nachosoti chikhulupililo chasu tufunika kuchilyesha luweme mwauzimu kuti chinkhale chotang’a. Nicolas watatomola poyamba, eyamba kudalila ngako Yehova kuti amuyavye mwakuganizila chisanzo cha Abulahamu, Yesu, komasoti ntumwi Paulo amene ewonesha kuti enze olipeleka ngako pochita chifunilo cha Mulungu. Kuphunzila pamweka monkhazikika, kuzakuyavyeni kulimbana na mavuto ŵamukumana nawo pa moyo wanu, komasoti kuzakuyavyeni kuziŵa vamungachite kuti mutang’ishe ayanu mumpingo wanyowani.

Nkulu omvwishila enekwasu aŵili achilumbwana pakufotokoza mwangakatishile ntchito vokujila mawu pa Ng’anda ya Ufumu. — Mukopewa kuyelekezela mpingo wanu wanyowani na wakale

2. Mukopewa kuyelekezela mpingo wanu wanyowani na wakale. (Mlal. 7:10) Jules efuluka ku Benin mu chalo cha Africa noluta ku United States, ndipo ekumana na vuto ya kusiyana vinkhalidwe kwa ŵanthu. Yove enena kuti: “Newo nenzeganiza kuti nufunika kuuja munthu aliyense wanakumana naye za mbili yangu.” Chifukwa cha nkhalidwe yake yamene iyi yove eyamba kulipatula kuli enekwasu amumpingo wamene uyo. Koma pavuli pakuti waŵaziŵa luweme enekwasu, yove echinja kawonedwe kake ka vinthu. Yove enena kuti: “Newo nakhulupilila kuti viliye kanthu kuti ufumila kuni, koma tonse nise olingana. Sewo tusiyana tyala vilaŵilo. Chinthu chofunika nikuvomekeja tyala kuti vinkhalidwe vaŵanthu nivosiyana.” Chifukwa cha vamene ivi tikopewa kulinganija mpingo wasu wanyowani na wakale. Mpainiya muyakine zina yake Anne-Lise, enena kuti: “Newo niliyechinje mpingo na cholinga chakuti nikafwane vinthu venisiya kale kuvuli, nechinja mpingo kuti nikafwane vinthu vanyowani.”

Nawo akulu, ofunika kupewa kulinganija mpingo wakale na mpingo wawo wanyowani. Keno enekwasu mumpingo wanyowani ochita vinthu mosiyana na mpingo wasu wakale, vutanthauzalini kuti ove ni ophoniya. N’chinthu chanzelu kuziŵa mwavilili vinthu mumpingo wasu wanyowani tikaliyenenapo maganizo ŵasu. (Mlal. 3:1, 7b) Vunkhala luweme kuphunzisa enekwasu kupitila muchisanzo chasu chiweme, kupambana kuchitaŵakakamija kuti akoganiza monga nimwatuganizila sewo.—2 Ako. 1:24.

Enekwasu aŵili opukuta mawindo a Ng’anda ya Ufumu. — Mukonkhala na vochita vinyinji mumpingo

3. Mukochita vinyinji mumpingo wanu wanyowani. (Afil. 1:27) Olo kuti kufuluka nikovuta ndipo kungatiwonongele nthawe ikulu, n’chinthu chofunika ngako kuyamba kupezeka pamisonkhano mumpingo wasu wanyowani mokulumija, ndipo tikochita vamene ivi pamenso na pamenso. Kulaŵila chendi, keno enekwasu mumpingo wanu wanyowani okuwonanilini ku Ng’anda ya Ufumu, kansi angakwanishe tyani kukuyavyani? Kalongosi muyakine zina yake Lucinda, wamene onkhala ku South Africa efulukila mutauni iyakine ikulu pamozi na banja yake. Yove enena kuti: “Azishamwali ŵangu enilangiza kuti nikoyeja-yeja kufwana azishamwali mumpingo wasu wanyowani, kukata nawo pamozi ntchito yolalikila, komasoti kupezeka pamisonkhano. Sewo telipelekasoti kuti enekwasu akokatishila ntchito ng’anda yasu pochita misonkhano ya utumiki wakumunda.”

“Kuyeja-yeja mokatijana” kuchita vinthu vauzimu pamozi nenekwasu na akalongosi mumpingo wanu wanyowani kungakuyavyeni ngako kuti “mukokhulupilila uthenga uweme.” Akulu amumpingo wa Anne-Lise watatomola poyamba, emulimbikisa kuti akoyeja-yeja kuloŵa muutumiki nenekwasu na akalongosi osiyana-siyana mumpingo wawo. Kansi vokonkhapo vake venze votyani? Yove enena kuti: “Pakaliye pita nthawe itali, newo neziŵa kuti kuloŵa muutumiki na ŵanthu osiyana-siyana kuyavya ngako kuti udjaile mpingo wanyowani.” Kuyangijila pamene apo, keno mukata nawo ntchito zotuŵisha nowamyasoti Ng’nda ya Ufumu, muzawoneshe kuti muwona mpingo wanu wanyowani kunkhala wanu. Keno mwewo mulipeleka ngako pokata nawo ntchito zamene izi, enekwasu na akalongosi amumpingo akomasuka namwe ngako ndipo muzalimvwe monga muli m’banja yanyowani yauzimu.

Mabanja awili olyela chakulya pamozi. — Fwanani ayanu anyowani

4. Fwanani ayanu anyowani. (2 Ako. 6:11-13) Njila iweme ngako yamungafwanile ayanu, nikuwonesha kuti muli na chidwi ngacho-ngacho na ŵanthu. Tetyo, mukofwika mokulumija pa Ng’anda ya Ufumu, komasoti mukosalilila pavuli pamisonkhano kuti mukwanishe kutandala nenekwasu noŵaziŵa luweme. Mukoyeja-yeja kuti muziŵe mazina ŵawo. Keno mukumbukila mazina yenekwasu, nowonesha kuwama ntima, komasoti kunkhala womasuka na ŵanthu, vizachitishe kuti ove akomasuka namwe ngako ndipo muzavutikelini kuti mufwane azishamwali aweme.

Mmalo moyeja-yeja kuti muwoneke kunkhala munthu muweme ngako pofuna kuti ŵanthu akukondeni, ŵaloleni ayanu kuti aziŵe kuti nimwe munthu wotyani. Phunzilani kufumila kuli Lucinda wamene enena kuti: “Sewo tukatijana ngako nenekwasu chifukwa tuyamba nisewo kuŵaitila kung’anda kwasu.”

‘MUKOLONDELANA’

Enekwasu ayakine ochita wowa kusonkhana mu Ng’anda ya Ufumu mwamene muli ŵanthu anyinji ŵasaziŵa. Lomba kansi mwewo mungachite tyani poŵayavya kuti adjaile mpingo wawo wanyowani? Ntumwi Paulo etilangiza kuti “londelannani monga nimwechichitila Khilisitu kukulondelani kuti ulemelelo ulute kwa Mulungu.” (Alo. 15:7) Pokonkheja Khilisitu, akulu angayavye ofalisa anyowani kulimvwa kuti alondelewa. (Onani bokosi yakuti “Vingakuyavyeni kuti vinthu vikuyendeleni luweme mukachinja mpingo.”) Koma olo n’tetyo, enekwasu onse kupamikijapo ŵana, angakwanishe kuyavya alwendo kuti adjaile.

Vingakuyavyeni kuti vinthu vikuyendeleni luweme mukachinja mpingo:

Vamungachite: Ziŵishani akulu ampingo wanu wakale komasoti ampingo wanu wanyowani kukali nthawe yokwanila. Fufuzani kuti muziŵe kwaili Ng’anda ya Ufumu komasoti nthawe ya misonkhano. Panthawe yoyamba kupezeka pamisonkhano mu Ng’anda ya Ufumu yamene iyo, liziŵikisheni kuli akulu komasoti kuli enekwasu.

Vangachite akulu: Mulembi wamumpingo wanu wakale ofunika kutumija kalata yokuziŵikishani kumpingo wanu wanyowani komasoti khadi yolembapo ntchito za wofalisa ndipo ofunika kuchita vamene ivi mokulumija ngako. Komiti ya utumiki yufunika kuika ofalisa anyowani m’kagulu ka utumiki wakumunda pakaliyepita nthawe itali akafwika mumpingo wawo. Vingankhalesoti voyavya kuli wopanamila kagulu kupanga ulwendo wotang’isha komasoti wokondwelesha kuli ofalisa anyowani.

Kulondela ŵanthu ayakine kupamijapo kuŵatandaja luweme, ndipo kungapamikijeposoti kuŵayavya mwanjila ziyakine. Mwachisanzo, kalongosi eyavya kalongosi muyakine wamene efulukila mumpingo wawo mwa kumuwonesha tauni nomuyavya mwangakatishile ntchito thilansipoti. Kalongosi wanyowani wamene uyo edabwa ngako na vechichita kalongosi muyake, ndipo vamene ivo vemuyavya kuti adjaile mpingo wake wanyowani.

VINGAKUYAVYENI KUTI MUPITE PASOGOLO

Mphanzi kuti ikwanishe kumela mangala noyamba kundalala, yufunika kuchinja nkhanda yake maulwendo osiyana-siyana. Molingana na vamene ivi, mukafulukila mumpingo uyakine, mwewo muzafunikile kuchosa wowa uliwonse wamene ungakukangisheni kuti mumele mangala noyamba kundalala, kulaŵila mwanjila iyakine, kuti muchite vinyinji potumikila Yehova. Nicolas pamozi na Céline ŵatatomola poyamba enena kuti: “Kufulukila mumpingo uyakine nikosi iweme ngako. Kuti tikwanishe kudjaila dela iyakine komasoti enekwasu osiyana-siyana, sewo tenzefunika kuphunzila minkhalidwe yanyowani.” Jean-Charles watatomola poyamba efotokoza mapindu ŵechifwana pamozi na banja yake, yove enena kuti: “Petifulukila mumpingo wanyowani, ŵana ŵasu ekula ngako mwauzimu ndipo enkhala paushamwali wotang’a na Mulungu. Pavuli pamyezi itontho tyala, mwana wasu mwanakazi eyamba kutolamo mbali pa misonkhano ya mkati mwasondo ndipo mwana wasu mwanalume enkhala wofalisa wosabatizika.”

Kansi mungachite tyani keno mufuna kufulukila kudela kwamene kufunikila thandizo, koma vinthu pa moyo wanu vukulolani lini? Keno vili tetyo pa moyo wanu katishilani ntchito malangizo ŵatatomola munkhani ino mumpingo wamuli pali pano. Mukachita tetyo, muzalimvwe monga kuti muli mumpingo uyakine wanyowani. Tetyo mukodalila Yehova. Pitilijani kunkhala na vochita vinyinji mumpingo wanu potumikila pamozi nenekwasu osiya-siyana mwamungakwanishile, komasoti mwakupanga azishamwali anyowani olo kulimbikisa azishamwali ŵamuli nawo kale. Mungalipelekesoti kuti muyavye enekwasu anyowani olo ŵanthu amene ofunikila thandizo. Kuchita vamene ivi, kungakuyavyeni kuti munkhale otang’a mwauzimu chifukwa chakuti chikondi niye chuziŵikisha Akhilisitu ngawo-ngawo. (Yoh. 13:35) Nkhalani osimikija kuti “Mulungu osangalala na nsembe zotetyo.”—Ahe. 13:16.

Olo kuti kudjaila n’chinthu chovuta, enekwasu anyinji akwanisha kudjaila bwino-bwino mpingo wawo wanyowani, ndipo namwesoti mungakwanishe! Anne-Lise enena kuti: “Kuchinja mpingo kwaniyavya kuti nifwane azishamwali anyowani.” Kazumi okhulupilila kuti kuchinja mpingo kwamuyavya kuwona thandizo ya Yehova mwanjila yenze akaliyewonapo kufumila kale yonse. Tyani ponena za Jules? Yove enena kuti: “Azishamwali ŵenifwana eniyavya kuti nikowona mpingo wamene uyo kunkhala wangu. Pali pano newo nuwona kuti mpingo wamene uyo niwangu, ndipo vinganivute ngako kuti nichinjesoti.”

a Onani nkhani ya mutu wakuti “Kulimbana ndi Malingaliro a Kulakalaka Kumudzi Kwanu mu Utumiki wa Mulungu”, mu Nsanja ya Olonda ya 15 Meyi, 1994.