NKHANI YOPHUNZILA N.° 23
NYIMBO N.° 2 Yehova niye zina yanu
Kansi zina ya Yehova niyofunika tyani kuli mwewo?
“‘Mwewo nimwe mboni zangu,’ wanena tetyo Yehova.”—YES. 43:10.
CHOLINGA CHA NKHANI INO
Munkhani ino tiwone vatingachite kuti tikowonesha kuti Yehova ni ntuŵa komasoti kuti vonse vechinena Satana vokhuza yove ni vawenye.
1-2. Kansi tuziŵa tyani kuti zina ya Yehova niyofunika ngako kuli Yesu?
PALIYE chinthu chilichonse chamene ni chofunika ngako kuli Yesu kupambana zina ya Yehova. Paliye munthu wamene echita vinyinji pofuna kuti zina ya Yehova iziŵike kupambana mwechichitila Yesu. Munkhani yapita tiwona kuti Yesu enze wokonzeka kufwa pofuna kuwonesha kuti Yehova ni ntuŵa komasoti kuti njila zake zonse zochitila vinthu niziweme. (Mko. 14:36; Ahe. 10:7-9) Pavuli pa Ulamulilo wa vyaka 1.000, Yesu azajoshele Ulamulilo mofunishisha kuli Atata ŵake chifukwa ofuna ngako kuti zina ya Yehova ilemekezewe. (1 Ako. 15:26-28) Vinthu vonse vechichita Yesu vuwonesha kuti okonda ngako Yehova.
2 Yesu ewela pano pa chalo kuzauja ŵanthu vinthu vonse venzefuna Yehova kuti ŵanthu aviziŵe. (Yoh. 5:43; 12:13) Eziŵisha ophunzila ŵake zina ya Atata ŵake. (Yoh. 17:6, 26) Penzephunzisa ŵanthu komasoti kuchita vodabwisa ewonesha kuti Yehova niye emupasa nzelu komasoti mphamvu zochitila vinthu vamene ivo. (Yoh. 10:25) Komasoti penzesenga Yehova kuti akololela ophunzila ŵake, Yesu euja Yehova kuti achite vamene ivo ‘chifukwa cha zina yake.’ (Yoh. 17:11) Nivowonekelatu kuti zina ya Mulungu niyofunika ngako kuli Yesu kupambana chinthu chilichonse. Lomba, kansi munthu anganene tyani kuti niwophunzila wa Yesu keno oziŵalini olo kukatishila ntchito zina ya Yehova?
3. Kansi tikambilane chinji munkhani ino?
3 Monga Akhilisitu amene oyeja-yeja kukonkheja mendo a Yesu, nase tulemekeza zina ya Atata ŵake. (1 Pet. 2:21) Munkhani ino, tikambilane chifukwa chechitisha kuti Yehova apeleke zina yake kuli ŵanthu olalikila “uthenga uweme wa Ufumu.” (Mat. 24:14) Tikambilanesoti vayutanthauza zina ya Yehova kuli aliyense wa sewo.
“ŴANTHU OZIŴIKA NA ZINA YANU”
4. (a) Kansi Yesu eŵapasa ntchito yotyani ophunzila ŵake akaliye jokela kululu? (b) Kansi ni makonsho otyani owela okhuza ntchito yamene iyo?
4 Pechisala patontho kujokela kululu Yesu euja ophunzila ŵake kuti: “Muzankhale na mphamvu. Ndipo muzankhale mboni zangu mu Yelusalemu, ku Yudeya konse na ku Samaliya, mpaka kwachulekejela chalo.” (Ntchi. 1:8) Tetyo, ophunzila amene awo enzefunikila kulalikila uthenga uweme kulikonse, osati tyala mu madela ŵa Aisilaeli. Mu kuluta kwa nthawe ŵanthu pa chalo chonse sembe enkhala na mwayi wonkhala ophunzila a Yesu. (Mat. 28:19, 20) Koma Yesu enena kuti: “Muzankhale mboni zangu.” Kansi ophunzila anyowani enzefunika kuziŵa zina ya Yehova, olo enzengofunika tyala kunkhala ophunzila a Yesu? Mfundo zufotokozewa mu chapitala 15 cha buku ya Ntchito zutiyavya kuyankha konsho yamene iyi.
5. Kansi atumwi komasoti akulu aku Yelusalemu ewonesha tyani kuti ŵanthu onse ofunika kuziŵa zina ya Yehova? (Onanisoti chithunzi.)
5 Mu 49 C.E., akulu aku Yelusalemu ekumana kuti akambilane keno ŵanthu amitundu iyakine enzefunikila kutendewa kuti ankhale Akhilisitu. Kumapeto kwa makambilano ŵawo Yakobo nsaza wake wa Yesu elaŵila mawu akuti: “[Petulo] wafotokoza luweme mwechichitila Mulungu pocheukila ŵanthu amitundu iyakine pa nthawe yoyamba kuti pakati pawo atolepo ŵanthu oziŵika na zina yake.” Kansi Yakobo enzenena vokhuza ŵani? Pokata mawu a mneneli Amosi yove enenasoti kuti: “Nizachite vamene ivi kuti ŵanthu amene awo asala asakile-sakile Yehova na ntima wonse, amusakile-sakile pamozi na mitundu yonse ya ŵanthu oitiwa na zina yangu, wanena tetyo Yehova wamene ochita vinthu vamene ivi.” (Ntchi. 15:14-18) Vamene ivi vutanthauzalini tyala kuti ophunzila anyowani amene awo enzengophunzila vokhuza Yehova, koma ove ‘enzeitiwasoti na zina yake.’ Vamene ivi vutanthauza kuti ove enzeyavya ŵanthu ayakine kuti aziŵe zina ya Mulungu, komasoti sembe eyamba kuziŵika kuti opanamila zina yamene iyo.
Pa nsonkhano wa Bungwe Yutonga mu nthawe ya Akhilisitu oyambilila, analume okhulupilika amene aŵa eziŵa kuti Akhilisitu ofunika kunkhala ŵanthu oziŵika na zina ya Mulungu (Onani ndime 5.)
6-7. (a) Kansi Yesu enze ewela kuzachita chinji pano pa chalo? (b) Kansi ni chifukwa chotyani chikulu ngako chechitisha kuti Yesu awele pano pa chalo?
6 Zina ya Yesu yutanthauza kuti “Yehova ni Mpulumusi,” ndipo vinthu vechichita Yesu vuwonesha kuti ndiye njila yechikatishila ntchito Yehova populumusha ŵanthu amene omukhulupilila. Yesu ewela pano pa chalo kuzapeleka moyo wake chifukwa cha ŵanthu. (Mat. 20:28) Mwanjila yamene iyi ŵanthu ali na mwayi wokhululukiliwa machimo ŵawo komasoti kunkhala na moyo kosasila.—Yoh. 3:16.
7 Koma, ndaŵa yanji ŵanthu enzefunikila nsembe ya dipo? Chifukwa cha vinthu vechitika mmunda wa Edeni. Mokatijana na mweinenela nkhani yapita makolo ŵasu oyambilila Adamu na Hava epandukila Yehova ndipo eluza mwayi wonkhala na moyo kosasila. (Gen. 3:6, 24) Koma Yesu ewela pano pa chalo kuzachita chinthu chofunika ngako kupambana kupulumusha ŵanthu. Satana enze elaŵila wenye uipa ngako wokhuza Yehova. (Gen. 3:4, 5) Tetyo, ŵanthu enzefunika kuziŵa kuti Yehova aliye phoniyeshe chinthu chilichonse komasoti kuti zina yake ni ituŵa. Komasoti Yesu enze munthu muweme ngako pochita vamene ivi chifukwa chakuti yove opanamila Yehova ndipo echita vonse venzefuna Atata ŵake mosaphoniyesha kalikonse.
Kansi munthu anganene tyani kuti niwophunzila ngaye-ngaye wa Khilisitu, keno oziŵalini zina ya Atata ŵake komasoti kuikatishila ntchito?
8. Kansi ophunzila onse a Yesu ofunikila kuvomekeja chinji?
8 Ophunzila onse a Yesu, Ayuda komasoti ŵanthu amitundu iyakine enzefunikila kuvomekeja Munecho wa chipulumuso chawo, wamene ni Atata ŵake a Yesu, Yehova Mulungu. (Yoh. 17:3) Kuyangijila pamene apo, ove sembe eyamba kuziŵika na zina ya Mulungu monga ni mwechichitila Yesu. Enzefunikasoti kuziŵa kufunika kotuŵisha zina yamene iyo. Kupulumuka kwawo kwenzedalila mfundo zamene izi. (Ntchi. 2:21, 22) Tetyo ophunzila onse okhulupilika a Yesu enzefunika kuphunzila vokhuza Yehova komasoti Yesu. Nivosadabwisa kuti posilija pemphelo yake ili pa Yohani 17 Yesu enena kuti: “Newo nachitisha kuti aziŵe zina yanu ndipo nipitilije kuŵaziŵisha zina yamene iyi kuti nawosoti akowonesha chikondi monga ni mwemwichiwoneshela mwewo kuti nanesoti ninkhale wokatijana na ove.”—Yoh. 17:26.
“MWEWO NIMWE MBONI ZANGU”
9. Kansi tingawoneshe tyani kuti zina ya Yehova niyofunika ngako kuli sewo?
9 Tetyo, ophunzila okhulupilika a Yesu enzefunikila kuchita chidwi na kutuŵishiwa kwa zina ya Yehova. (Mat. 6:9, 10) Ove ofunikila kuwona zina ya Yehova kunkhala yapalulu ngako kupambana mazina onse. Vamene ivi vupamikijapo kuchitapo kanthu. Koma, kansi tingachite tyani kuti tituŵishe zina ya Yehova komasoti kuwonesha kuti vechinena Satana vokhuza Yehova venzelini vachendi?
10. Kansi machapitala 42 mpaka 44 a buku ya Yesaya onena vokhuza chinji? (Yesaya 43:9; 44:7-9) (Onani soti chithunzi.)
10 Lemba ya Yesaya 42 mpaka 44 yufotokoza vatingachite kuti tituŵishe zina ya Yehova. Muma chapitala amene aŵa, Yehova osenga ŵanthu amene omutumikilalini kuti apeleke umboni uwonesha kuti milungu yawo niyachendi. Yove oitasoti mboni kuti ziwele kuzachitila umboni vokhuza milungu yamene iyo. Koma paliye angakwanishe kuchitila umboni milungu yawenye yamene iyo!—Ŵelengani Yesaya 43:9; 44:7-9.
Sewo a Mboni za Yehova tusimikijila kuti paliye Mulungu muyakine koma Yehova yeka, kupitila mu vinthu vatulaŵila komasoti vatuchita (Onani ndime 10-11.
11. Kansi Yehova oŵauja kuti tyani ŵanthu ŵake pa Yesaya 43:10-12?
11 Ŵelengani Yesaya 43:10-12. Yehova ouja ŵanthu ŵake kuti: “Mwewo nimwe mboni zangu, ndipo newo nine Mulungu wanu.” Yehova okonsha ŵanthu ŵake kuti: “Kansi palisoti Mulungu muyakine kupatulapo newo?” (Yes. 44:8) Tetyo, sewo tili na mwayi woyankha konsho yamene iyi. Kupitila mu vinthu vatulaŵila komasoti kuchita, sewo tuchitila Umboni kuti Yehova yeka niye Mulungu wachendi. Zina yake niyapalulu kupambana mazina ayakine onse. Sewo tuwonesha kuti tumukonda ngako Yehova kupitila muvinthu vatuchita pa moyo wasu komasoti kuti nise okhulupilika kuliyove—olo kuti Satana otiyesa. Mwanjila yamene iyi sewo tili na mwayi woyavya potuŵisha zina yake.
12. Kansi ulosi wapa Yesaya 40:3, 5 wikwanilishiwa tyani?
12 Keno tuteteza zina ya Yehova olo kuti mbili yake, tukonkheja Yesu Khilisitu. Yesaya eloselasoti kuti Woyamba kusegulila njila ‘azakonze njila ya Yehova.’ (Yes. 40:3) Kansi ulosi wamene uyu sembe wikwanilishiwa tyani? Yohani M’batizi ekonzela njila Yesu wamene ewela mu zina ya Yehova komasoti enzelaŵila mu zina Yake. (Mat. 3:3; Mko. 1:2-4; Luk. 3:3-6) Ulosi wamene uyu unenasoti kuti: “Ulemelelo wa Yehova uzawonekele.” (Yes. 40:5) Kansi vinthu venze tyani? Yesu pechiwela pano pa chalo enzepanamila Yehova mosaphoniyesha kalikonse, ndipo enzechita vinthu molingana ndendende na Yehova.—Yoh. 12:45.
13. Kansi tingamukonkheje tyani Yesu?
13 Molingana na Yesu sewo nise Mboni za Yehova. Tuziŵika na zina ya Yehova ndipo tuuja munthu aliyense watakumana naye vokhuza ntchito zake zodabwisa. Koma kuti tinkhale mboni ziweme za Yehova tufunika kuziŵisha ŵanthu vokhuza vinthu vonse vechichita Yesu potuŵisha zina ya Yehova. (Ntchi. 1:8) Paliye munthu aliyense wamene echitila umboni luweme ngako vokhuza Mulungu kupambana mwechichitila Yesu, ndipo sewo tukonkheja chisanzo chake. (Chiv. 1:5) Kansi tingawoneshesoti tyani kuti zina ya Yehova niyofunika ngako kuli sewo?
MWATUWONESHELA KUTI ZINA YA YEHOVA NIYOFUNIKA KULI SEWO
14. Mokatijana na Salimo 105:3, kansi tikumvwa tyani tikaganizila vokhuza zina ya Yehova?
14 Sewo tuimekela zina ya Yehova. (Ŵelengani Salimo 105:3.) Yehova osangalala ngako akawona kuti sewo tuimekela zina yake. (Yer. 9:23, 24; 1 Ako. 1:31; 2 Ako. 10:17) ‘Kulitumba mwa Yehova’ kutanthauza kumumekela chifukwa chakuti yove ni Mulungu wasu. Sewo tuwona kuti ni mwayi ukulu kuyavya, kulemekeza komasoti kuteteza mbili yake. Tufunikalini kuchita nsoni kuujako ayasu aku ntchito, ayasu akusikulu, azishamwali ŵasu komasoti ŵanthu ayakine kuti nise a Mboni za Yehova! Mdyelekezi ofuna kuti tileke kuujako ayakine za zina ya Yehova. (Yer. 11:21; Chiv. 12:17) Komasoti Satana na ŵanthu amene ali mu vipembezo vawenye niye ofalisa wenye wokhuza zina ya Yehova. (Yer. 23:26, 27) Koma chifukwa chakuti sewo tukonda zina ya Yehova tunkhala osangalala ‘nthawe zonse.’ —Sal. 5:11; 89:16.
15. Kansi kuita pa zina ya Yehova kutanthauza chinji?
15 Sewo tupitilija kuita pa zina ya Yehova. (Yow. 2:32; Alo. 10:13, 14) Kuita pa zina ya Yehova kupamikijapo vinthu vinyinji osati tyala kungoziŵa zina yemene iyo noikatishila ntchito. Tufwika pomuziŵa luweme Yehova Mulungu keno tumudalila kuti atiyavye komasoti kutisogolela. (Masal. 20:7; 99:6; 116:4; 145:18) Kuita pa zina ya Yehova kutanthauzasoti kuujako ayakine zina yake komasoti minkhalidwe yake iweme ngako. Ndipo tuŵayavya kuchinja moyo wawo kuti akokondwelesha Mulungu komasoti kuti azapulumushiwe.—Yes. 12:4; Ntchi. 2:21, 38.
16. Kansi tingawoneshe tyani kuti Satana ni wawenye?
16 Nise okonzeka kutamana chifukwa cha zina ya Yehova. (Yako. 5:10, 11) Keno tunkhala okhulupilika kwa Yehova tikakumana na mavuto tupeleka umboni wakuti Satana niwawenye. Mu nthawe ya Yobu, Satana elaŵila wenye ponena za ŵanthu otumikila Yehova kuti: “Munthu angapeleke chilichonse chali nacho kuti apulumushe moyo wake.” (Yobu 2:4) Satana enena kuti ŵanthu otumikila Yehova keno vinthu vuŵayendela luweme, koma akayamba kukumana na mavuto angaleke kumutumikila. Yobu esimikijila kuti vamene ivi nivawenye. Nasesoti masiku ŵano tingawoneshe kuti vechinena Satana ni vawenye keno tupitilija mphela kunkhala okhulupilika kwa Yehova. Sewo tusimikijila na ntima wonse kuti Yehova azatisamalile chifukwa cha zina yake.—Yoh. 17:11.
17. Kansi tingailemekeze motyani zina ya Yehova monga ni mwayunenela lemba ya 1 Petulo 2:12?
17 Tuwonesha kuti tulemekeza zina ya Yehova. (Miy. 30:9; Yer. 7:8-11) Chifukwa chakuti ŵanthu otiziŵa kuti nise a Mboni za Yehova, vinthu vatuchita vingatamande zina ya Yehova olo kuinyozesha. (Ŵelengani 1 Petulo 2:12.) Tetyo, tufunika kuchita vonse vatingakwanishe kuti tilemekeze zina ya Yehova, mu vinthu vatulaŵila komasoti vochita vasu. Tikachita tetyo olo kuti tiliye ungwilo tizapitilije mphela kulemekeza zina ya Yehova.
18. Kansi tingachitesoti tyani kuti tikowonesha kuti zina ya Yehova niyofunika ngako kuli sewo? (Onanisoti mawu amnyansi.)
18 Tulemekeza ngako zina ya Yehova kupambana mbili yasu. (Sal. 138:2) Ndaŵa yanji kuchita vamene ivi ni kofunika ngako? Chifukwa chakuti tuchita vinthu vokondwelesha Yehova, ŵanthu angosangalalalini nase olo kutilaŵilila vinthu viipa.a Yesu elolela kufwa imfwa yochitisha nsoni monga ni kapondo kuti alemekeze zina ya Yehova. Yove aliye dandaule ngako chifukwa cha vinthu venzemuganizila ŵanthu chifukwa yove enzelini kapondo. (Ahe. 12:2-4) Cholinga chake chenze kuchita chifunilo cha Mulungu.—Mat. 26:39.
19. Kansi mukumvwa tyani mukaganizila vokhuza zina ya Yehova, ndipo ndaŵa yanji?
19 Sewo tumekela mwayi watili nawo wotumikila Yehova komasoti woitiwa kuti Mboni za Yehova. Chifukwa chakuti zina ya Yehova niyofunika ngako kuli sewo, tizapitilije kumutamanda olo kuti ŵanthu ayakine otinyoza. Zina ya Yehova niyofunika ngako kuli sewo kupambana mbili yasu. Tetyo, tiyeni tipitilije kutamanda zina ya Yehova motang’a ntima olo kuti Satana ochita vonse vangakwanishe kuti atikangishe kuchita vamene ivi. Tikachita tetyo, tizawoneshe kuti zina ya Yehova niyofunika ngako kuli sewo monga ni mwechichitila Yesu Khilisitu.
NYIMBO N.° 10 Tamandani Yehova Mulungu wasu!
a Olo munthu wokhulupilika Yobu, esokonezeka maganizo ayake atatu penzewononga mbili yake. Poyamba ŵana ŵake pechipaiwa komasoti katundu wake pewiwonongewa “Yobu aliye chimwe olo kupasa mulandu Mulungu kuti wamuchitila vinthu viipa.” (Yobu 1:22; 2:10) Koma olo ni tetyo, ayake penzemuyopejela kuti waphoniyesha vinthu viyakine Yobu eyamba kuteteza mbili yake ndipo “elaŵila vinthu mosaganiza luweme.” Yove ewona kuti kuteteza mbili yake nikofunika ngako kupambana kutuŵisha zina ya Mulungu olo kuti mbili yake.—Yobu 6:3; 13:4, 5; 32:2; 34:5.