Kansi zina ya Yehova niyofunika tyani kuli Yesu?

1-2. (a) Kansi Yesu echita tyani pa usiku wake wosilijila akaliye paiwa? (b) Kansi tikambilane makonsho otyani munkhani ino?

Penze pachinayi nchingulo, pansiku ya Nisani 14 muchaka cha 33 C.E., ndipo Yesu enze esala patontho kuti apelekewe, kuweluziwa, kushushiwa, kutamanishiwa komasoti kupaiwa. Yove enze echingosilija kwalombapano kulya chakulya chapadela mu chipinda chapalulu pamozi na atumwi ŵake okhulupilika. Pavuli pachakulya chamene icho, Yesu euja atumwi ŵake amene awo mawu osilijila pofuna kuŵalimbikisa. Komasoti pechisala patontho kufuma muchipinda chamene icho chammululu, Yesu epanama nopeleka pemphelo yochitisha chidwi. Ntumwi Yohani elemba pemphelo yamene iyo, ndipo yupezeka mu chapitala 17 cha buku ya Yohani.

² Munkhani ino tiwone vinthu viyakine vatingaphunzilepo kufumila mupemphelo yechipeleka Yesu. Kansi ni chinji chenzemudesa nkhaŵa ngako Yesu akaliye paiwa? Kansi pemphelo yamene iyi yuwonesha tyani chinthu chamene chenze chofunika ngako kuli yove pautumiki wake wonse wapano pachalo? Tiyeni tikambilane mayankho amakonsho amene aŵa.

“NEWO NAŴAZIŴISHA ZINA YANU”

3. kansi Yesu elaŵila chinji vokhuza zina ya Yehova, ndipo enzetanthauza chinji? (Yohani 17:6, 26)

³ Mupemphelo yechipeleka, Yesu enena kuti: “Newo nachitisha kuti ove aziŵe zina yanu.” Sewo tuziŵa kuti nkhani yamene iyi yenze yofunika ngako kuli Yesu chifukwa chakuti elaŵila mfundo yamene iyi maulwendo aŵili onse. (Ŵelengani Yohani 17:6, 26.) Kansi yove enzetanthauza chinji? Kansi yove enzefunikila kuchita kuŵafotokozela ophunzila ŵake kuti zina ya Mulungu ni Yehova? Ophunzila a Yesu enze Ayuda, tetyo ove enzeziŵa kale kuti zina ya Mulungu ni Yehova. Zina yamene iyo yenzepezeka maulwendo masauzande anyinji mu Malemba Achihebeli. Tetyo, Yesu enzenenalini vokhuza zina ngayo-ngayo ya Mulungu. Mmalomwake enzenena vayupanamila zina yamene iyo. Yove eyavya ophunzila ŵake kuti amuziŵe luweme Yehova kupamikijapo volinga vake vokhuza chalo komasoti ŵanthu, vinthu vawachita, vakuti azachite kusogolo komasoti minkhalidwe yake. Paliye muyakine wamene omuziŵa luweme ngako Yehova kupambana Yesu.

4-5. (a) Kansi ni chinji chuchitisha kuti zina ya munthu muyakine inkhale yapadela ngako kuli sewo? (b) Kansi ophunzila a Yesu eiziŵa tyani zina ya Yehova?

⁴ Mwachisanzo, tiyelekezele kuti mumpingo mwanu muli nkulu muyakine zina yake Davide wamenesoti ni dokota wa upaleshoni. Mwewo mwankhala mumuziŵa nkwasu wamene uyo kwa vyaka vinyinji. Koma nsiku iyakine muwona kuti moyo wanu uli pangozi ndipo mufunikila dokota kuti akuyavyeni. Pavuli pake mwewo muutukila kuchipatala kwakukatila ntchito nkwasu wamene uyo, ndipo yove opulumusha moyo wanu pokatishila ntchito luso yake yaudokota. Mwewo mungayambe kumukonda ngako nkwasu wamene uyo kupambana poyamba, ndipo mukamvwa zina yake mungoganizila vinthu vechikuchitilani. David akalimphela nkulu monga nimwemwenzemuziŵila kale koma lomba nidokotasoti wamene epulumusha moyo wanu.

⁵ Molingana navamene ivi, ophunzila a Yesu enzeiziŵa kale zina ya Yehova. Koma zina yamene iyo yenkhala na tanthauzo ikulu ngako kuli ove chifukwa cha vinthu vechichita Yesu pautumiki wake. Ndaŵa yanji tunena teti? Chifukwa chakuti Yesu enzewonesha minkhalidwe ya Atata ŵake kupitila muvinthu vonse venzelaŵila komasoti venzechita. Tetyo, ophunzila amene awo ‘emuziŵa’ luweme Yehova pechiwona mwenzephunzisila Yesu nowona mwenzechitila vinthu na ŵanthu ayakine.—Yoh 14:9; 17:3.

“ALOLELENI CHIFUKWA CHA ZINA YANU YAMWANIPASA”

6. Kansi Yehova epasa Yesu zina yake mwa njila yotyani? (Yohani 17:11, 12)

⁶ Mupemphelo yechipeleka, Yesu epemphelela ophunzila ŵake ponena kuti: “Aloleleni chifukwa cha zina yanu yamwanipasa.” (Ŵelengani Yohani 17:11, 12.) Kansi vamene ivi vutanthauza kuti Yesu sembe eyamba kuziŵika kuti Yehova? Yayi. Yesu pechiyamba kulaŵila vokhuza zina ya Yehova enena kuti “zina yanu.” Tetyo, Yesu aliye yambe kuziŵika na zina yakuti Yehova. Lomba kansi Yesu enzetanthauza chinji pechinena kuti epasiwa zina ya Mulungu? Choyamba, Yesu enzepanamila Yehova komasoti enze womulaŵilila. Yove ewela muzina ya Atata ŵake komasoti enzechita ntchito zamphamvu pokatishila ntchito zina yamene iyo. (Yoh. 5:43; 10:25) Komasoti zina yakuti Yesu yutanthauza kuti “Yehova ni Mpulumusi.” Nivowonekelatu kuti zina ya Mulungu yamene iyi yenze yokatijana ngako na zina ya Yesu.

7. Pelekani chisanzo chuwonesha mwechilaŵilila Yesu mmalo mwa Yehova.

⁷ Kuti timvwishe chifukwa chake Yesu enze wolaŵila mmalo mwa Yehova, tiyeni tiganizile chisanzo ichi chokonkhapo. Wolamulila angatume munthu muyakine kuti akalaŵile na ŵanthu ayakine mmalo mwa yove. Tetyo, mawu ŵangalaŵile munthu wotumiwa wamene uyo, onkhala na mphamvu yolingana na wolamulila wamene uyo. Molingana na vamene ivi, Yesu enze na mphamvu zolaŵila mmalo mwa Yehova chifukwa etumiwa na yove.—Mat. 21:9; Luk. 13:35.

8. Ndaŵa yanji Yehova enena kuti zina yake yenze “muli” Yesu olo pa nthawe yenze akaliye wela pano pa chalo? (Ekisodo 23:20, 21)

⁸ Baibolo yunena kuti Yesu ni “mawu” chifukwa chakuti Yehova omukatishila ntchito popeleka mauthenga kuli angelo komasoti ŵanthu. (Yoh. 1:1-3) Vuwoneka kuti Yesu niye mngelo wechituma Yehova kuti akasogolele Aisilaeli paulwendo wawo wofuma ku Iguputo. Pouja Aisilaeli kuti akomumvwila mngelo wamene uyo, Yehova enena kuti: “Chifukwa chakuti zina yangu ili muli yove.”a (Ŵelengani Ekisodo 23:20, 21.) Zina ya Yehova yenze “muli” Yesu mwanjila yakuti yove niye opanamila Yehova komasoti niye osogolela poteteza komasoti kutuŵisha zina ya Atata ŵake.

“ATATA, LEMEKEZANI ZINA YANU”

9. Kansi zina ya Yehova yenzeyofunika tyani kuli Yesu? Fotokozani.

⁹ Monga nimwatawonela, olo panthawe yenze akaliyewela pano pachalo, Yesu enzewona kuti zina ya Yehova yenze yofunika ngako kuli yove. Tetyo, nivosadabwisa kuti zina ya Yehova yenze yokatijana ngako na vinthu vonse venzechita Yesu panthawe yenzepano pachalo! Chakumapeto kwa utumiki wake, Yesu epemphela kwa Yehova kuti: “Atata, lemekezani zina yanu.” Nthawe yamene iyo Atata ŵake eyankha moŵilikija kufumila kululu kuti: “Nailemekeza ndipo nizailemekeze soti.”—Yoh. 12:28.

10-11. (a) Kansi Yesu eilemekeza tyani zina ya Yehova? (Onani soti chithunzi.) (b) Kansi ndaŵa yanji zina ya Yehova yufunikila kuituŵisha?

¹⁰ Nayesoti Yesu elemekeza zina ya Atata ŵake. Motyani? Njila imozi yechichitila vamene ivi ni kuujako ayakine vokhuza minkhalidwe yochitisha chidwi komasoti ntchito za Atata ŵake. Koma olo ni tetyo, Yesu enzefunikila kuchita vinyinji kuti akwanishe kulemekeza zina yamene iyo. Zina ya Yehova komasoti mbili yake venzefunikila kutuŵishiwa. Yesu ewonesha kuti kuchita vamene ivi nikofunika pa nthawe yechiphunzisa ophunzila ŵake pemphelo yachisanzo. Yove enena kuti: “Atata ŵasu muli kululu, zina yanu ituŵishiwe.”—Mat. 6:9.

¹¹ Kansi ndaŵa yanji zina ya Yehova yufunikila kutuŵishiwa? Chifukwa kale-kale mmunda wa Edeni Satana Mdyelekezi enyozesha zina ya Yehova Mulungu komasoti kumuyopejela vinthu viipa. Satana enena kuti Yehova niwawenye komasoti enzetana Adamu na Hava vinthu viweme. (Gen. 3:1-5) Pochita vamene ivi, Satana enzetanthauza kuti Yehova ochitalini vinthu viweme. Chifukwa chakuti Satana elaŵila vinthu vawenye vokhuza Yehova, wanthu angaganize kuti Yehova ni Mulungu muipa. Pavuli pake mu nthawe ya Yobu, Satana enena kuti ŵanthu otumikila Yehova chifukwa cha dyela. Mdyelekezi wamene uyu enenasoti kuti ŵanthu angaleke kutumikila Yehova keno okumana na mavuto, chifukwa chakuti omukondalini mofumila pansi pa ntima. (Yobu 1:9-11; 2:4) Penzefunikila nthawe yokwanila kuti aziŵike kuti wawenye niŵani pakati pa Yehova na Satana.

“NUPELEKA MOYO WANGU”

12. Kansi Yesu enze wofunishisha kuchita chinji chifukwa chakuti okonda zina ya Yehova?

¹² Chifukwa chakuti enzekonda Yehova, Yesu enzefuna kuchita vonse vangakwanishe kuti atuŵishe zina ya Yehova. Yesu enena kuti: “Nupeleka moyo wangu.” (Yoh. 10:17, 18) Yove enze wokonzeka kupeleka moyo wake chifukwa cha zina ya Yehova.b Ŵanthu aŵili oyambilila Adamu na Hava amene enze ŵanthu amngwilo epandukila Yehova ndipo enkhala kumbali ya Satana. Mosiyana na vamene ivi, Yesu enze wokonzeka kuwela pano pa chalo pofuna kuwonesha kuti okonda Yehova. Yesu echita vamene ivi mwa kunkhala na moyo wosayaŵanika. (Ahe. 4:15; 5:7-10) Yove epitilija mphela kunkhala wokhulupilika pamoyo wake wonse mpaka pa nthawe yechifwa imfwa yoŵaŵa ngako. (Ahe. 12:2) Mwanjila yamene iyi, yove ewonesha kuti okonda ngako Yehova komasoti zina yake.

13. Ndaŵa yanji Yesu enze na mwayi wapadela wowonesha kuti Satana niwawenye? (Onani soti chithunzi.)

¹³ Vinthu vechichita Yesu pa moyo wake vewonesha luweme ngako kuti Satana niye wawenye, osati Yehova! (Yoh. 8:44) Yesu enzemuziŵa luweme ngako Yehova kupambana munthu aliyense wamene enkhalako. Kuti vinthu viyakine vechilaŵila Satana vokhuza Yehova venze vachendi, Yesu sembe eziŵa. Koma Yesu epitilija kuteteza zina olo kuti mbili ya Yehova motang’a ntima. Olo pa nthawe yevenzewoneka monga Yehova wamusiya, Yesu elolela kufwa mmalo mopandukila Atata ŵake achikondi.—Mat. 27:46.c

“NASILIJA KUKATA NTCHITO YEMWINIPASA”

14. Kansi Yehova emudalisa tyani Yesu chifukwa cha kukhulupilika kwake?

¹⁴ Mu pemphelo yechipeleka usiku wakuti apaiwe mailo yake, Yesu enze na vifukwa viweme vonenela kuti: “Nasilija kukata ntchito yemwinipasa.” Yove enzekhulupilila kuti Yehova azamudalise chifukwa cha kukhulupilika kwake. (Yoh. 17:4, 5) Chikhulupililo chenze nacho muli Atata ŵake chiliye mukatishe mwala. Yehova aliye lole kuti Yesu apitilije kunkhala mmanda. (Ntchi. 2:23, 24) Yove emuukisha Yesu ndipo emupasa udindo wapalulu ngako kululu. (Afil. 2:8, 9) Pavuli pake Yesu eyamba kulamulila monga Mfumu ya Ufumu wa Mulungu. Kansi Ufumu wamene uyo uzachite chinji? Mbali yachiŵili ya pemphelo yachisanzo, yutiuja kuti: “Ufumu wanu uwele. Vofuna vanu [mwewo Yehova] vichitike pano pa chalo monga ni mwavilili kululu.”—Mat. 6:10.

15. Kansi ni chinthu chiyakine chotyani chakuti azachite Yesu?

¹⁵ Kwalombapano Yesu azaniyatane na adani a Mulungu ndipo azawononge ŵanthu aipa pa Alumagedo. (Chiv. 16:14, 16; 19:11-16) Pakaliye pita nthawe itali, yove azakate Satana nomuthusila “kuchisengu,” ndipo akokwanishalini kuchita chilichonse. (Chiv. 20:1-3) Yesu azayavye ŵanthu kuti ayambesoti kunkhala mwantendele komasoti amngwilo mu Ulamulilo wake wa vyaka 1.000. Yove azaushe ŵanthu akufwa. Azachitishe chino chalo kunkhalasoti paladaiso. Cholinga cha Yehova chizakwanilishiwe!—Chiv. 21:1-4.

16. Kansi ni chinji chikuti chizakwanilishiwe kumapeto kwa Ulamulilo wa vyaka 1.000?

¹⁶ Kansi ni chinji chatuyembekezela kuti chizachitike kumapeto kwa Ulamulilo wa yvaka 1.000? Uchimo wa ŵanthu komasoti kusoŵa ungwilo kuzasile. Ŵanthu azafunikilelini soti kuti Mulungu aŵakhululukile machimo ŵawo pokatishila ntchito dipo. Ŵanthu azafunikilelini soti kuti a 144.000 ankhale a nsembe komasoti kuti Yesu ankhale Nkulu wa ansembe wawo kuti ankhale pa ushamwali na Yehova. Komasoti “imfwa yamene ni mdani wasu wosilijila, izawonongewe.” Mmanda muzaŵeve kanthu. Ŵanthu akufwa azaushiwe kuti ankhalesoti na moyo. Munthu aliyense pano pa chalo azankhale wamngwilo.—1 Ako. 15:25, 26.

17-18. (a) Kansi ni chinji chikuti chizachitike kumapeto kwa Ulamulilo wa vyaka 1.000? (b) Kansi Yesu azachite chinji ikezekwana nthawe yakuti asilije kulamulila? (1 Akolinto 15:24, 28) (Onani soti chithunzi.)

¹⁷ Kansi ni chinji chatuyembekezela soti kuti chizachitike kumapeto kwa vyaka 1.000? Pa nthawe yamene iyo kuzachitike chinthu chiyakine chapadela ngako. Nkhani yokhuza kutuŵishiwa kwa zina ya Yehova izasile. Motyani? Mmunda wa Edeni, Satana enena kuti Yehova niwawenye komasoti kuti oŵalamulila lini mwachikondi ŵanthu. Kufumila pa nthawe yamene iyo, atumiki a Yehova ankhala owonesha moweleja-weleja kuti njila za Mulungu ni ziweme ngako. Tetyo, chakumapeto kwa Ulamulilo wa vyaka 1.000, mbili ya Yehova izatuŵishiwe mokwanila. Yove azawoneshe mwanjila yapalulu ngako kuti ni Tata wachikondi wamene onkhala kululu.

¹⁸ Pavuli pa ulamulilo wa vyaka 1.000 aliyense azaziŵe kuti vinthu vonse vechilaŵila Satana vokhuza Yehova ni vawenye. Kansi Yesu azachite chinji ikezekwana nthawe yakuti asilije kulamulila? Kansi yove azakonkheje chisanzo cha Satana nopandukila Yehova? Yayi! (Ŵelengani 1 Akolinto 15:24, 28.) Yesu azajoshele Ufumu wamene uyo kuli Atata ŵake. Mosiyana na Satana, yove azagonjele ulamulilo wa Yehova. Ni vowonekelatu kuti Yesu niwokonzeka kupeleka chilichonse chifukwa chakuti okonda Yehova.

19. Kansi zina ya Yehova yutanthauza chinji kuli Yesu?

¹⁹ Nivosadabwisa kuti Yehova epeleka zina yake mofunishisha kuli Yesu! Yesu wawonesha kuti opanamila Atata ŵake mosaphoniyesha kalikonse. Lomba kansi zina ya Yehova yutanthauza chinji kuli Yesu? Zina yamene iyi yutanthauza chilichonse chokhuza Yesu. Yove epeleka moyo wake mofunishisha chifukwa cha zina yamene iyo, ndipo azajoshele chilichonse mofunishisha kuli Atata ŵake kumapeto kwa Ulamulilo wa vyaka 1.000. Kansi sewo tingachite tyani pokonkheja chisanzo cha Yesu? Tizakambilane yankho ya konsho yamene iyi munkhani ikuza.