Kansi tingapindule tyani na Laibulale ya pa Ng’anda ya Ufumu?

Kansi mungakonde kusakila vinthu viyakine kuti muyangijile chiziŵiso chanu cha m’Baibolo? Kansi mufuna kuziŵa lemba iyakine, munthu, malo, olo vinthu viyakine vutomolewa m’Baibolo? Olo payakine mufuna kuziŵa keno Mawu a Mulungu yangakuyavyeni pa vuto iyakine yamuli nayo? Keno n’tetyo, lutani ku laibulale ya pa Ng’anda ya Ufumu.

Kupezeka vinthu vuyavya pofufuza. Payakine mwewo muliye mabuku onse ofotokoza Baibolo olembewa na Mboni za Yehova m’chilaŵilo chanu. Koma laibulale ya pa Ng’anda ya Ufumu ili na mabuku anyinji anyowani. Ingankhalesoti na ma Baibolo osiyana-siyana, dikishonale iweme na malifalensi ayakine oyavya pofufuza. Mungakatishile ntchinto laibulale yamene iyi misonkhano ikaliyoyamba olo pavuli pa misonkhano. Keno pali kompyuta, payakine ili na Watchtower Library. Yamene iyi ni pulogilamu ya pakompyuta yamene ili na mabuku anyinji komasoti ni yosavuta pofufuza nkhani, mawu olo lemba.

Ni yoyavya kuli ŵala olaŵila nkhani za ophunzila mu Nsonkhano wa Utumiki komasoti moyo wasu wachikhilisitu. Mungakatishile ntchito laibulale ya pa Ng’anda ya Ufumu pokonzekela nkhani. Woyanganila nsonkhano wa Utumiki komasoti moyo wasu wachikhilisitu niye ali na udindo woyanganila laibulale. Owoneshesha kuti mabuku alombapano alimo soti aikiwa mwadongosolo. Yove olo okuphunzisani Baibolo angakuwonesheni mwamungapezele nkhani yamufuna. Koma mabuku a mu laibulale ofunikila lini kufuma mu Ng’anda ya Ufumu. Soti tufunikila kuŵasamalila luweme komasoti osalembamo.

Baibolo yunena kuti, kuti ‘timuziŵe chendi Mulungu,’ tufunika kusakila-sakila nzelu “monga chuma chofisika.” (Miyambo 2:1-5) Laibulale ya pa Ng’anda ya Ufumu ingakuyavyeni kuchita vamene ivi.

• Kansi ni vinthu vofufuzila votyani vamene vupezeka mu laibulale ya pa Ng’anda ya Ufumu?

• Kansi ni ŵani angakuyavyani kuti mukokatishila ntchito luweme laibulale?