Dalilani Mulungu kuti munkhale na banja yosangalala

Yehovaa Mulungu niye eyambisha ukwati woyambilila. Baibolo yutiuja kuti yove epanga mwanakazi woyambilila “nomupeleka kuli mwanalume.” Adamu ekondwela ngako ndipo enena kuti: “Uyu niye chifupa cha mafupa ŵangu na m’nyomfu wa m’nyomfu wangu.” (Genesis 2:22, 23) Olo masiku ŵano Yehova ofuna kuti ŵanthu olungulana akonkhala osangalala.

Mukalungula mungaganizile kuti vinthu vonse vikoyenda luweme. Koma kulaŵila chendi, olo kuti ŵanthu olungulana angaŵe okondwela ngako, nthawe ziyakine angakumane na mavuto. (1 Akorinto 7:28) M’kabulosha kano, mufwanemo mfundo za m’Baibolo zamene zingayavye banja yanu kunkhala yosangalala keno mungazikatishile ntchito.—Salimo 19:8-11.

1 CHITANI MBALI YECHIKUPASANI YEHOVA

VAYUNENA BAIBOLO: Mwanalume niye mutu wa banja.—Aefeso 5:23.

Keno nimwe mutu wa banja, Yehova ofuna kuti mukomusamalila mwanakazi wanu mosangalala. (1 Petulo 3:7) Yove epanga mwanakazi kuti akokuwamililani ndipo ofuna kuti namwe mukomulemekeza nomukonda. (Genesis 2:18) Mufunikila kukonda nkazi wanu noika vofuna vake pasogolo.—Aefeso 5:25-29.

Keno nimwe mwanakazi, Yehova ofuna kuti mukolemekeza ngako mwanalume wanu nomuyavya kukwanilisha udindo wake. (1 Akorinto 11:3; Aefeso 5:33) Mukochilikiza vosankha vake ndipo mukokatijana naye kufumila pansi pa ntima. (Akolose 3:18) Keno muchita tetyo, munkhale wa ntengo wapatali m’menso mwa mwanalume wanu na mwa Yehova.—1 Petulo 3:1-6.

VAMUNGACHITE:

• Konshani muyanu wamuukwati vamungachite kuti muŵe mwanalume olo mwanakazi muweme. Mvwishilani mosamala ngako ndipo chinjani vawakuujani kuti muchinje.

• Nkhalani woleza ntima. Ndipo ziŵani kuti, vingatole nthawe kuti monse muphunzile mwamungochitila kuti mukokondwelesa muyanu wamuukwati.

2 MUKOSAMALILA VAKUFUNAKO MUYANU WAMUUKWATI

VAYUNENA BAIBOLO: Mufunikila kuika pasogolo vakufuna muyanu wamuukwati. (Afilipi 2:3, 4) Mukowona muyanu kunkhala wofunika ngako, ndipo mukokumbukila kuti Yehova ofuna kuti atumiki ŵake akonkhala “oukanta ntima” kwa onse. (2 Timoteyo 2:24) “Mawu ali n’nga ni kulasa kwa chipula, koma lilimi ya munthu wanzelu yupojeka.” Tetyo mukosankha mawu ŵanu mosamala. (Miyambo 12:18) Nzimu wa Yehova ukokuyavyani kuti polaŵila na muyanu mukomuwamila ntima nomuwonesha chikondi.—Agalatiya 5:22, 23; Akolose 4:6.

VAMUNGACHITE:

• Mukaliye kambilana nkhani iliyonse yofunika ngako na Mwanalume olo Mwanakazi ŵanu, pemphelani kwa Mulungu kuti akuyavyeni kunkhala odekha komasoti kuti munkhale na maganizo aweme.

• Ganizilani mosamala vamufuna kuti mulaŵile komasoti mwamungavilaŵilile.

3 MUKOCHITILA VINTHU PAMOZI

VAYUNENA BAIBOLO: Mukalungulana munkhala “muŵili umo” na muyanu wamuukwati. (Mateyu 19:5) Koma olo n’tetyo mukhala mphela ŵanthu aŵili osiyana. Ivi vikochitisha kuti mukosiyana maganizo, tetyo mufunikila kuphunzila kunkhala okatijana m’maganizo na m’vochita. (Afilipi 2:2) Mufunikila kukatijana popanga vosankha. Baibolo yunena kuti: “Volinga vunkhazikika ŵanthu akakambilana.” (Miyambo 20:18) Tetyo, popanga vosankha vikulu-vikulu, mufunikila kulola kuti mfundo za m’Baibolo zikokusogolelani.—Miyambo 8:32, 33.

VAMUNGACHITE:

• M’malo mongomuuja muyanu maganizo ŵanu, mukomuuja mwamumvwila.

• Mukokonshana mukaliyechita kalikonse.