GAWO 2
Nkhalani wokhulupilika kuli muyanu wamuukwati
“Chamene Mulungu chawamanga pamozi munthu osati achipasule.”—Maliko 10:9.
Yehova ofuna kuti “tikokonda chilungamo.” (Mika 6:8) Ivi nviweme chifukwa chakuti keno muukwati muliye chilungamo, mungokhulupililanalini. Ndipo kukhulupililana ni kofunika ngako kuti chisangalalo chikule.
Masiku ŵano, kukhulupililana nikosoŵa muukwati. Kuti muteteze ukwati wanu, mufunikila kuyeja-yeja kuchita vinthu viŵili ivi.
1 MUKOWONA UKWATI WANU KUNKHALA CHINTHU CHOFUNIKA NGAKO
VAYUNENA BAIBOLO: “Mukosimikijila kuti vinthu vofunika ngako ni vini.” (Afilipi 1:10) Ukwati wanu ni chimozi mwa vinthu vofunika ngako pa moyo wanu. Tetyo mufunikila kuwuwona kunkhala chinthu cha ntengo wapatali.
Yehova ofuna kuti mukosamalila muyanu wamuukwati “nosangalala na moyo” muli pamozi. (Mlaliki 9:9) Yove olaŵila kuti, mufunikalini kusula muyanu wamuukwati, m’malo mwake mufunika kufwana njila yosangulushilana. (1 Akorinto 10:24) Mukochita vinthu vuwonesha kuti muyanu niwofunika ndipo mumukonda.
VAMUNGACHITE:
Onesheshani kuti mupatula nthawe yotandalila pamozi, komasoti mumvwishila mosamala keno muyanu wamuukwati olaŵila.
Osaganizila kuti muli “mweka” koma lomba muli na “muyanu”.
2 CHINJILIJANI NTIMA WANU
VAYUNENA BAIBOLO: “Aliyense ololeshesha mwanakazi mpaka kumukumbwila, wachita naye kale chigololo mu ntima mwake.” (Mateyu 5:28) Keno munthu akungonkhalila kuganizila za chiwelewele, m’mawu ayakine tingalaŵile kuti ni wosakhulupilika kuli muyake wamuukwati.
Yehova olaŵila kuti mufunikila “kuteteza ntima wanu.” (Miyambo 4:23; Yeremiya 17:9) Kuti muchite vamene ivi, mufunikila kuteteza menso ŵanu. (Mateyu 5:29, 30) Mukochita n’nga ni Yobu, wamene echita pangano na menso ŵake kuti osati aloleshe mwanakazi momukumbwila. (Yobu 31:1) Yeja-yejani kupewa vithunzi-thunzi vuonesha chinthaku. Ndipo pewani kukopana na munthu asali mwanalume olo mwanakazi wanu.
VAMUNGACHITE:
Vochita vanu vikowonesha ku ŵanthu kuti mukondana ngako na muyanu wamuukwati.
Ganizilani mwakumvwila muyanu wamuukwati, ndipo lekani kutandala na munthu aliyense wamene angachitishe muyanu wamuukwati kunkhala wosakondwela.