Mwamungasilijile mavuto

Mukangoyamba moyo uyakine mwewo pamozi na muyanu wamuukwati, mavuto osiyana-siyana angayambe kuwonekela. Chingachitishe mavuto amene aŵa ni kusiyana kwa malingalilo, mwamuwonela vinthu komasoti na mwamuvichitila. Nthawe ziyakine mavuto angafumile kuyakine, olo chifukwa cha vinthu viyakine vosayembekezeleka.

Masiku ayakine tingafune kupewa mavuto, koma Baibolo yutilangiza kuti tufunikila kulimbana nawo. (Mateyu 5:23, 24) Pokatishila ntchito mfundo za m’Baibolo, mufwane thandizo pa mavuto ŵanu.

1 KAMBILANNANI VUTO YAMENE IYO

VAYUNENA BAIBOLO: “Pali . . . nthawe yolaŵila.” (Mlaliki 3:1, 7) Mukowoneshesha kuti mupatula nthawe yokambilana za mavuto ŵanu. Osamufisila mavuto ŵanu, mwamumvwila koma muujeni vamuganiza muyanu pa nkhani yamene iyo. Nthawe zonse “mukolaŵila vachendi” kuli muyanu wamuukwati. (Aefeso 4:25) Olo kuti mwakalipijana tyani, mufunikila kupewa maganizo ofuna kuniyatana. Kuyankha modekha kungachitishe kuti nkhani osati ikule komasoti pangaŵelini nkangano ukulu.—Miyambo 15:4; 26:20.

Olo kuti mungasiyane malingalilo, chofunika ni kunkhala muweme ntima ndipo osaluŵa kuwonesha chisangalalo na ulemu kuli muyanu wamuukwati. (Akolose 4:6) Yejani kusilija vuto mokulumija ndipo osaleka kulaŵijana.—Aefeso 4:26.

VAMUNGACHITE:

• Sankhani nthawe iweme yokambilana za mavuto ŵamukumana nawo.

• Keno muyanu olaŵila osamutenda mawu. Namwe mulaŵile ikafwika nthawe yanu.

2 TETEKELANI KUTI MUVWISHISHE

VAYUNENA BAIBOLO: “Nkhalani na chikondi ngacho-ngacho muyake na muyake. Powoneshana ulemu nkhalani pasogolo.” (Aroma 12:10) Kumvwishila luweme niye chinthu chofunika ngako. Yejani kumvwishisha maganizo a muyanu “mwachifundo . . . komasoti molichefya.” (1 Petulo 3:8; Yakobo 1:19) Osangotalijilawenye kuti mutetekela koma mutetekelalini. Lekejani poyamba vamuchita ndipo tetekelani, olo musengeni kuti mukambilane nthawe iyakine. Keno muwona muyanu wamuukwati n’nga ni muyanu osati mdani wanu, niye kuti “mukokalipalini kamangu.”—Mlaliki 7:9.

VAMUNGACHITE:

• Mvwishilani mosamala olo kuti vakulaŵila muyanu vukukondweleshanilini.

• Yejani kumvwisha mwakumvwela muntima wake. Mukowona mwachuwonekela chinso chake komasoti kumvwa mwakulaŵilila.

3 MUKOCHITA VAMWAPANGANA

VAYUNENA BAIBOLO: “Kukata ntchito iliyonse kupindulisha, koma kungolaŵila tyala mawu kusaukisha.” (Miyambo 14:23) Kupangana mwamungasilijile vuto nikosakwanila, koma mufunikila kuchita vamwapangana. Kuchita vamene ivi kungafunikile nkhama, koma pavuli pake kungakupindulisheni. (Miyambo 10:4) Keno museŵenzela pamo monga banja, “mufwane madaliso a nyinji” pa ntchito yanu.—Mlaliki 4:9.

VAMUNGACHITE:

• Ganizilani njila zamungakatishile ntchito kuti musilije mavuto ŵanu.

• Nthawe na nthawe mukowona kuti muchinja.