Kansi mwewo nimwe wokonzeka keno kungachitike chipolowe?

Mapeto a chino chalo pakuvwendela, tuyembekezela kuchitika kwa chipolowe, kulijilana mfuti, komasoti kuyangijilika kwa nkhondo. (Chv 6:4) Kansi tingakonzekele tyani mavuto akusogolo?

• Onesheshani kuti nimwe wokonzekela kuti muzapitilije kunkhala wokhulupilika: Konzekelani mfundo za m’Baibolo na nkhani ziyakine zingazakuyavyani kuti muzadalile Yehova na gulu yake komasoti kuti muzapitilije kusaloŵelela mu ndale. (Miy 12:5; jr-CN pedji 125-126 ndim. 23-24) Ino ni nthawe yakuti titang’ishe ushamwali wasu na ŵanthu a mumpingo.—1Pe 4:7, 8

• Onesheshani kuti muli na vinthu vonse vofunikila vingazakuyavyani kuti muzapitilije kunkhala na moyo komasoti wathanzi: Mukoganizilatu vamungazachita kuti muzankhale wotetezeka keno mungazakwanishalini kufuma pang’anda ndipo mufunika kusunga chakulya chokwanila. Komasoti, mukoganizilatu vamukuti muzachite keno pangazafunikila kuti muzafumepo pang’anda. Muwonesoti vinthu vamuliike mu kachola kanu konzekela pakachitika masoka, muikemosoti vinthu volitetezelako (ma maski na magolovesi) komasoti ndalama. Mufunika kuziŵa mwamungalaŵijilane na akulu, komasoti mufunika kuwoneshesha kuti akulu aziŵa mwangalaŵijilane namwe.—Yes 32:2; g17.5-CN pedji 3-7

Nkati mwa chipolowe, pitilijani kuchita mwemwenzechitila nthawe zonse polambila Yehova, monga kupemphela, kuphunzila komasoti kusonkhana. (Afi 1:10) Mukopewa kuyenda-yenda kupatulapo keno pangafunikile. (Mt 10:16) Mukopasako ayanu vakulya komasoti vinthu viyakine vofunikila.—Aro 12:13.

LOLELANI VIDIYO YAKUTI KANSI MWEWO MWAKONZEKELA MASOKA ACHILENGEDWE? NDIPO PAVULI PAKE YANKHANI MAKONSHO AŴA:

• Kansi Yehova angatiyavye tyani nkati mwa masoka?

• Kansi ni vinthu votyani vothandiza vatingachite kuti tikonzekele?

• Kansi tingaŵayavye tyani ayasu amene akhuziwa na masoka?