Makonsho ofumila kuli oŵelenga
Kansi “angelo ochita kusankhiwa” amene otomolewa pa 1 Timoteyo 5:21 niŵani?
Ntumwi Paulo elembela kalata Timoteyo wamene enze nkulu muyake ndipo emuuja kuti: “Nukulamula mwamphamvu pamenso pa Mulungu na Khilisitu komasoti angelo ochita kusankhiwa kuti ukokonkheja malangizo amene aŵa paliye sankho olo kukondela.”—1 Tim. 5:21.
Poyamba, tiyeni tikambilane kuti kansi lemba yamene iyi yunenalini za angelo otyani. Lemba yamene iyi yunenalini za Akhilisitu a 144.000 amene ni ozozewa. Paulo penzelembela kalata Timoteyo, Akhilisitu ozozewa enze akaliyeyamba kuushiwa kuti akankhale kululu. Atumwi komasoti Akhilisitu ayakine ozozewa enze akaliyenkhala volengewa vauzimu, chifukwa cha vamene ivi ove sembe aliyenkhale “angelo ochita kusankhiwa.”—1 Ako. 15:50-54; 1 Ates. 4:13-17; 1 Yoh. 3:2.
Kuyangijila pamene apo, “angelo ochita kusankhiwa” angankhalelini angelo ŵala amene epanduka panthawe yachigumula. Angelo amene epanduka panthawe yachigumula enkhala kumbali ya Satana, komasoti niviŵanda ndipo ni adani a Yesu. (Gen. 6:2; Luk. 8:30, 31; 2 Pet. 2:4) Kusogolo, viŵanda vikaponyewe kuchisengu kwavyaka 1.000, ndipo pavuli pake vizawonongewe pamozi na Satana.—Yuda 6; Chiv. 20:1-3, 10.
Chifukwa cha vamene ivi “angelo ochita kusankhiwa” amene ŵechitomola Paulo, ofunikila kunkhala angelo amene okata ntchito pamozi na “Yehova komasoti Yesu Khilisitu” kululu amenesoti ŵechitomola Paulo muvesi yamene iyi.
Pali angelo masauzande anyinji ngako amene ni okhulupilika. (Ahe. 12:22, 23) Mokatijana na maumboni amene alipo, Yehova opelekalini mautumiki olingana kuli angelo onse. (Chiv. 14:17, 18) Mwachisanzo, panthawe iyakine Yehova etuma mngelo m’mozi kuti akawononge masodja okwanila 185.000 ŵa Asuli. (2 Maf. 19:35) Vuwoneka kuti angelo ayakine elondela utumiki “wosonkhanisha mu Ufumu [wa Yesu] vinthu vonse vosokoneza komasoti ŵanthu asamvwila malamulo.” (Mat. 13:39-41) Ayakine angapasiwe utumiki “wosonkhanisha osankhiwa” kuti akalute kululu. (Mat. 24:31) Komasoti pali ayakine amene ‘otiteteza munjila zasu zonse.’—Sal. 91:11; Mat. 18:10; yelekezelani na Mateyo 4:11; Luka 22:43.
Vuwoneka kuti “angelo ochita kusankhiwa” amene otomolewa pa 1 Timoteyo 5:21, ni angelo amene ali na utumiki woyavya posamalila mipingo. Nkhani yonse pa lemba yamene iyi yuwonesha kuti Paulo epeleka malangizo kuli akulu poŵayavya kuziŵa vangachite posamalila mpingo, komasoti kuti mpingo ufunikila kuchita vinthu mwaulemu na akulu. Komasoti akulu ofunikila kusamalila maudindo ŵawo “paliye sankho olo kukondela”, ndipo ofunikilalini kupanga vosankha mosaganiza luweme. Chifukwa chiweme chamene akulu ofunikila kukonkheja malangizo oujiliwa ŵechipeleka Paulo, n’chakuti otumikila “pamenso pa Mulungu na Khilisitu komasoti angelo ochita kusankhiwa.” Tetyo, n’vowonekelatu kuti angelo ayakine ali na utumiki woyavya posamalila mipingo. Ndipo ziyakine mwa ntchito zakukata angelo, nizoteteza atumiki a Mulungu, kusogolela pa ntchito yolalikila, komasoti opeleka malipoti kwa Yehova.—Mat. 18:10; Chiv. 14:6.