Mukosimikijila kuti Yehova okhululuka

1-2. Kansi tikumvwa tyani tikaziŵa kuti Yehova otikhululukila machimo ŵasu? (Onanisoti chithunzi .)

MFUMU Davite enzeziŵa kuti nthawe ziyakine munthu angaliimbe mulandu chifukwa cha machimo ŵechichita kuvuli. (Sal. 40:12; 51:3; mawu apalulu) Davite ephoniyesha vinthu viyakine vikulu-vikulu pa moyo wake. Koma olo ni tetyo, yove elapa mofumila pansi pa ntima ndipo Yehova emukhululukila. (2 Sam. 12:13) Pavuli pake, Davite esangalala pechiziŵa kuti Yehova wamukhululukila.—Sal. 32:1.

² Molingana na Davite, sewo nase tusangalala tikaziŵa kuti Yehova watichitila chifundo komasoti watikhululukila machimo ŵasu. Ni votang’isha ngako kuziŵa kuti Yehova ni wokonzeka kutikhululukila machimo ŵasu olo akulu-akulu, keno talapa mofumila pansi pa ntima noŵaulula komasoti kuyeja-yeja kuti osati tiwelejelesoti! (Miy. 28:13; Ntchi. 26:20; 1 Yoh. 1:9) Ndipo nise osangalala ngako chifukwa choziŵa kuti Yehova akatikhululukila machimo ŵasu otiimbalini soti mulandu olo kutipasa chilango chifukwa cha chimo yamene iyo!—Eze. 33:16.

3-4. Kansi kalongosi muyakine echimvwa tyani pechibatizika, ndipo tikambilane chinji munkhani ino?

³ Nthawe ziyakine tingayambe kukaikila keno Yehova etikhululukila chendi. Jennifer naye enzekumvwa tetyo. Makolo ŵake eyamba kumuphunzisa vokhuza Yehova kufumila ali ntontho. Yove penzekula eyamba kuchita vinthu viipa mofisa. Koma papita vyaka vinyinji, yove echinja nkhalidwe yake ndipo elipeleka kwa Yehova nobatizika. Yove enena kuti: “Nthawe zinyinji nenzechita chiwelewele, kukolwa, kukulumija kukalipa komasoti nenzekonda ngako ndalama. Pavuli pake, nekumbukila vayunena Baibolo kuti chifukwa cha nsembe ya Khilisitu, Yehova otikhululukila machimo ŵasu. Koma olo kuti nelapa nosenga Yehova kuti anikhululukile, nenzekhulupililalini kuti yove wanikhululukila.”

⁴ Kansi nthawe ziyakine vukuvutani kusimikijila mu ntima mwanu kuti Yehova ekukhululukilani vinthu vemwiphoniyesha kuvuli? Mukokumbukila kuti Yehova ni wachifundo chikulu. Davite enzesimikijila kuti Yehova emukhululukila, ndipo yove ofuna kuti sewo nase tikosangalala monga ni mwechichitila Davite pechikhululukiliwa. Yove enzekhulupilila kuti Yehova wamukhululukila chifukwa ni wachifundo chikulu ngako. Yehova ofuna kuti mwewo namwe mukolimvwa tetyo. Munkhani ino, tikambilane chifukwa chake tufunikila kukhululukiliwa na Yehova komasoti vinthu vingatiyavye kukhulupilila kuti watikhululukila chendi.

NDAŴA YANJI TUFUNIKILA KUKHULUPILILA KUTI YEHOVA WATIKHULULUKILA?

5. Kansi Satana ofuna kuti tikokhulupilila chinji? Pelekani chisanzo.

⁵ Tikokhulupilila kuti Yehova otikonda komasoti kutikhululukila, tingapewe kukhulupilila vinthu vawenye vakulaŵila Satana. Mukokumbukila kuti Satana ofuna kuti muleke kutumikila Yehova. Yove azachite vonse vangakwanishe pofuna kukwanilisha cholinga chake. Satana angachite vonse vangakwanishe pofuna kutichitisha kukhulupilila kuti Yehova angatikhululukilelini machimo ŵasu. Ganizilani za mwanalume waku Kolinto wamene echita chimo ya chiwelewele nochosewa mumpingo. (1 Ako. 5:1, 5, 13) Pavuli pakuti walapa, Satana enzefuna kuti ŵanthu a mumpingo osatiamukhululukile mwanalume wamene uyo nomujoshela mumpingo. Ndipo kuti ŵanthu a mumpingo aliye mukhululukile, sembe mwanalume wamene uyo eganiza kuti Yehova angamukhululukilelini. Komasoti kuti mpingo wikana kumukhululukila, mwanalume wamene uyo sembe eganiza kuti Yehova angamukhululukilelini soti. Yove sembe ekhumudwa ngako noleka kutumikila Yehova. Vamene ivi niye venzefuna Satana. Masiku wanosoti, Satana ofuna kuti sewo tikowona kuti Yehova angatikhululukilelini machimo ŵasu na cholinga chakuti tileke kutumikila Yehova. Koma sewo “tuziŵa luweme volinga vake.”—2 Ako. 2:5-11.

6. Kansi ni chinji chingatiyavye keno tukaikila kuti Yehova etikhululukila vinthu vetiphoniyesha kuvuli?

⁶ Tikokhulupilila kuti Yehova otikhululukila, tingaleke kuliimba mulandu. Tikachita chimo, mwachibadwa tuliimba mulandu. (Sal. 51:17) Kuchita vamene ivi ni kuweme. Chikumbuntima chasu chingatiyavye kuti tichinje minkhalidwe yasu. (2 Ako. 7:10, 11) Koma olo ni tetyo, keno tingapitilije mphela kuliimba mulandu kwa nthawe itali pavuli pakuti talapa machimo ŵasu, tingaleke kutumikila Yehova. Koma mmalo mwake, keno tukhulupilila kuti Yehova watikhululukila chendi, tingaleke kuliimba mulandu. Tikachita tetyo, tingatumikile Yehova tili na chikumbuntima chituŵa komasoti osangalala vamene ni vokatijana na chifunilo chake. (Akol. 1:10, 11; 2 Tim. 1:3) Kansi tingachinje tyani maganizo ŵasu noyamba kukhulupilila kuti watikhululukila chendi?

KANSI NI CHINJI CHINGATIYAVYE KUTI TIKOKHULUPILILA KUTI YEHOVA WATIKHULULUKILA?

7-8. Kansi Yehova otiuja chinji vokhuza yove, ndipo tingankhale osimikijila za chinji? (Ekisodo 34:6, 7)

⁷ Mukoganizila vechilaŵila Yehova vokhuza yove. Mwachisanzo, ganizilani vechilaŵila Yehova kuli Mose pa Lupili ya Sinai.a (Ŵelengani Ekisodo 34:6, 7.) Olo kuti Yehova ali na minkhalidwe inyinji iweme, yove euja Mose kuti ni “Mulungu wachifundo komasoti muweme ntima.” Kansi muganiza kuti munthu wamene okonda Yehova ndipo walapa, Mulungu angamukhululukilelini? Ni tetyolini! Keno Yehova angaleke kukhululukila munthu wotetyo, angawoneshe kuti ni wankhanza komasoti aliye chifundo.

⁸ Tikokhulupililasoti kuti Yehova angatitalijelini wenye chifukwa yove ni Mulungu wachendi. (Sal. 31:5) Keno ni vovuta kuli mwewo kukhulupilila kuti Yehova wakukhululukilani, mungachite luweme kulikonsha kuti: ‘Kansi nukhulupilila kuti Yehova ni wachifundo chendi komasoti muweme ntima ndipo angakhululukile munthu aliyense wamene walapa machimo ŵake? Keno mukhulupilila vamene ivi niye kuti namwesoti wakukhululukilani.’

9. Kansi lemba ya Salimo 32:5 yutiphunzisa chinji vokhuza mwakutikhululukila Yehova?

⁹ Mukoganizila mfundo zechilemba ŵanthu mu Baibolo moujiliwa na Yehova zokhuza kukhululuka kwake. Mwachisanzo, ganizilani za wolemba Baibolo muyakine zina yake Davite mwechifotokozela vokhuza mwakutikhululukila Yehova. (Ŵelengani Salimo 32:5.) Davite enena kuti “Mwewo mwenikhululukila vophoniya vangu komasoti machimo ŵangu.” Mawu Achihebeli emasuliliwa kuti “kukhululuka” mu vesi yamene iyi, angatanthauzesoti “kunyamula.” Tetyo, Yehova pechimukhululukila Davite, yove echimvwa monga kuti Yehova emuchosela ntolo wolema wenze enyamula. Davite esangalala pechiziŵa kuti Yehova wayambasoti kukondwela naye. (Sal. 32:2-4) Sewo nase tingankhale osangalala monga ni mwechisangalalila Davite. Tikalapa vophoniya vasu tufunikilalini kupitilija mphela kuliimba mulandu chifukwa cha vinthu vetiphoniya kuvuli. Mmalo mwake, tingankhale osangalala poziŵa kuti Yehova watikhululukila na ntima wonse.

10-11. Kansi mawu akuti “wokonzeka kukhululuka” otiuja chinji vokhuza Yehova? (Salimo 86:5)

¹⁰ Ŵelengani Salimo 86:5. Pa vesi yamene iyi, Davite enena kuti Yehova ni “wokonzeka kukhululuka.” Polaŵila za mawu amene aŵa, buku iyakine yufotokoza vokhuza Baibolo inena kuti: “[yove] ni ‘wokhululuka ndipo yamene iyi niye nkhalidwe yake.’” Ndaŵa yanji yove ochita vamene ivi? Mbali yokonkhapo ya vesi yamene iyi, yufotokoza kuti: “Muwonesha chikondi chokhulupilika komasoti chikulu kuli onse amene okuitani.” Munkhani yapita, tephunzila kuti Yehova owonesha chikondi chokhulupilika kuli ŵanthu amene omukonda ndipo oŵasiyelini. Chifukwa cha chikondi chake chokhulupilika, yove ‘oŵakhululukila na ntima wonse’ ŵanthu onse ochimwa amene alapa. (Yes. 55:7) Keno vukuvutani kukhulupilila kuti Mulungu ekukhululukilani vinthu vemwiphoniyesha kuvuli, mungachite luweme kulikonsha kuti: ‘Kansi nukhulupilila kuti Yehova ni wokonzeka kukhululukila ŵanthu onse amene alapa nomusenga kuti aŵachitile chifundo?’ Keno ni tetyo, ndaŵa yanji newo nukaikila kuti enikhululukila penimusenga kuti anichitile chifundo?

¹¹ Baibolo yutiujasoti kuti Yehova oziŵa mwechitilengela komasoti kuti tiliye ungwilo. Kuziŵa vamene ivi ni kotang’isha ngako. (Sal. 139:1, 2) Tiyeni tiwone vechilemba Davite mu Salimo iyakine vamene vingatiyavye kukhulupilila kuti Yehova ni wokonzeka kutikhululukila.

VINTHU VAKUKUMBUKILA YEHOVA VOKHUZA SEWO

12-13. Mokatijana na lemba ya Salimo 103:14, kansi Yehova okumbukila chinji vokhuza sewo, ndipo vamene ivi vumuchitisha kuti akotichitila chinji?

¹² Ŵelengani Salimo 103:14. Davite efotokoza chifukwa chimozi chamene chumuchitisha Yehova kunkhala wokonzeka kukhululukila ŵanthu amene alapa machimo ŵawo. Yove enena kuti Yehova “okumbukila kuti nise lito”, kutanthauza kuti nthawe zonse oziŵa kuti nise ochimwa, tuphoniyesha vinthu komasoti tiliye ungwilo. Tiyeni tiganizile tanthauzo ya vinthu vechinena Davite.

¹³ Davite enena kuti Yehova “oziŵa luweme mwechitiumbila.” Yehova elenga Adamu “kufumila ku lito.” Tetyo, yove oziŵa luweme mwechilengela ŵanthu komasoti vinthu vakufunikila. Mwachisanzo, ove ofunikila kulya, kuyona komasoti kupumula. Ndipo olo ŵanthu angwilo ofunikila vinthu vamene ivi. (Gen. 2:7) Koma Adamu na Hava pechichimwa, ŵanthu enkhalasoti lito mwanjila iyakinesoti. Monga ŵana ŵawo, sewo tilondela uchimo kuli ove wamene uchitisha kuti tikochita vinthu viipa. Yehova oziŵa kuti chifukwa chakuti tilondela uchimo kuli makolo ŵasu, tuphoniyesha vinthu nthawe ziyakine. Ndipo tikachita chimo nolapa, yove otichitila chifundo ndipo otikhululukila.—Sal. 78:38, 39.

14. (a) Kansi Davite enenasoti chinji vokhuza mwakutikhululukila Yehova? (Salimo 103:12) (b) Kansi chisanzo cha Davite chuwonesha tyani kuti Yehova okhululuka na ntima wonse? (Onani bokosi yakuti “Yehova okhululuka noluŵa vophoniya vasu.”)

¹⁴ Kansi tingaphunzilesoti chinji kufumila pa lemba ya Salimo 103 pa nkhani ya kukhululuka kwa Yehova? (Ŵelengani Salimo 103:12.) Davite elaŵila kuti Yehova akatikhululukila, oika kutali machimo ŵasu “molingana na kwayufumila zuŵa na kwayuloŵela.” Malo ŵayufumila zuŵa na malo ŵayuloŵela, ali kutali na kutali ngako. Kansi vamene ivi vutiuja chinji vokhuza machimo ŵakutikhululukila Yehova? Pa vesi yamene iyi, Buku iyakine inena kuti: “Mulungu oika machimo ŵasu kutali na sewo mwakuti vili monga ni vumba ya chinthu chiyakine yamene yumvwikalini soti.” Tetyo, tikokhulupilila kuti Mulungu oganizilalini soti olo kukumbukila machimo ŵetichita. Koma nthawe ziyakine vumba ya chakulya olo vinthu viyakine vingatichitishe kuganizila vinthu vechitika kuvuli. Koma Yehova akatikhululukila paliye chinthu chilichonse chingamuchitishe kuyambasoti kuganizila vinthu vetiphoniyesha notipasa chilango.—Eze. 18:21, 22; Ntchi. 3:19.

15. Kansi tingachite tyani keno tukaikila mphela kuti Yehova etikhululukila vinthu vetiphoniyesha kuvuli?

¹⁵ Kansi mawu a Davite ali pa lemba ya Salimo 103, angatiyavye tyani kukhulupilila kuti Yehova watikhululukila? Yehova okumbukila kuti sewo tiliye ungwilo. Ndipo Yehova okhululukila ŵanthu onse amene olimvwila chisoni chifukwa cha machimo ŵechichita kuvuli ndipo elapa. Vamene ivi niye vatufunikila kuchita. Tikokumbukila kuti Yehova otilonjeza kuti akokumbukilalini soti machimo ŵechitikhululukila kale. Tetyo, azatipaselini soti mulandu olo kutipasa chilango chifukwa cha machimo amene awo. Yehova oganizilalini soti za machimo ŵasu ŵetichita kuvuli. Sewo nase tufunikilalini soti kuŵakumbukila. (Sal. 130:3) Keno tukhulupilila kuti Yehova watikhululukila chendi, tingaleke kuliimba mulandu nopitilija kumutumikila mosangalala.

16. Pelekani chisanzo chamene chuwonesha kuyofya kopitilija mphela kuganizila machimo ŵechitikhululukila kale Yehova. (Onanisoti chithunzi.)

¹⁶ Ganizilani chisanzo ichi. Munthu akoyendesha motoka angaloleshe pachilola kuti awone vinthu vikuza kuvuli kwake. Angachite vamene ivi mwa apo na apo, koma vingankhale voyofya keno ololesha pa chilola chamene icho mosalekeja. Koma kuti ayendeshe luweme, ofunikila kulolesha kusogolo. Nthawe ziyakine, vingankhale luweme kuganizila vinthu vetiphoniyesha kuvuli, ndipo kuchita vamene kungatiyavye kuti osati tichitesoti vinthu vetiphoniyesha kuvuli. Koma keno tingapitilije kuganizila ngako chimo yechitikhululukila kale Yehova, tingankhalelini osangalala pa tumutumikila. Mmalo mwake, tufunikila kuika maganizo ŵasu onse potumikila Yehova nopitilija kuganizila vokhuza sogolo yawatilonjeza pa nthawe yamene vinthu vonse viipa “vizakumbukiliwelini soti.”—Yes. 65:17; Miy. 4:25.

PITILIJANI KUTANG’ISHA NTIMA WANU

17. Ndaŵa yanji tufunikila kupitilija kusimikijila kuti Yehova otikonda komasoti otikhululukila?

¹⁷ Tikosimikijila kuti Yehova otikonda ngako komasoti ni wokonzeka kutikhululukila. (1 Yoh. 3:19) Ndaŵa yanji? Chifukwa Satana apitilije kuyeja-yeja kutichitisha kukhulupilila kuti nise ochimwa ngako mwakuti Yehova angatikondelini ndipo angatikhululukilelini. Zamene izi ni njila ziyakine zakukatishila ntchito Satana pofuna kutikangisha kutumikila Yehova. Ndipo mapeto pakuvwendela, yove ayeje-yeje kuchita vonse vangakwanishe chifukwa oziŵa kuti wasala na ka nthawe katontho. (Chiv. 12:12) Koma tufunikila kulimbana naye nopitilija kutumikila Yehova mokhulupilika!

18. Kansi mungachite tyani kuti mukosimikijila kuti Yehova okukondani komasoti kuti ni wokonzeka nthawe zonse kukukhululukilani?

¹⁸ Mu nkhani yapita, tephunzila vatufunikila kuchita kuti tikosimikijila ngako kuti Yehova otikonda chendi. Mu nkhani ino, taphunzila vatingachite kuti tikokhulupilila kuti Yehova otikhululukila. Mwachisanzo, nthawe zonse tikokumbukila vechinena Yehova vokhuza yove. Tikofwana nthawe yoganizila ngako vayunena Baibolo vokhuza mwakutikhululukila Yehova. Tikokumbukila kuti Yehova oziŵa luweme kuti tiliye ungwilo ndipo otichitila chifundo. Komasoti tikokumbukila kuti yove otikhululukila na ntima wonse. Mukachita tetyo, muzalaŵile na ntima wonse monga ni mwechichitila Davite kuti, “Zikomo ngako Yehova chifukwa ‘mwenikhululukila vophoniya vangu komasoti machimo ŵangu’!”—Sal. 32:5.