NKHANI YOPHUNZILA N.° 7
NYIMBO N.° 15 Tamandani mwana woyamba wa Yehova!
Kansi kukhululuka kwa Yehova kukukhuzani tyani?
“Mwewo mukhululuka na ntima wonse.”—SAL. 130:4.
CHOLINGA CHANKHANI
Munkhani ino, tikambilane mafanizo amphamvu ŵayukatishila ntchito Baibolo, amene atiyavye kuti tikomutembeja ngako Yehova chifukwa chakuti otikhululukila na ntima wonse aliyense payeka-payeka.
1. Ndaŵa yanji ninkhanilini ipepu kuziŵa vakutanthauza munthu akanena kuti watikhululukila?
MAWU akuti “nakukhululukila”, angatinkhajike ntima pansi, ngako-ngako tikaziŵa kuti vinthu vatalaŵila olo vatachita vakhumudwisa muyasu! Koma kansi mawu akuti “nakukhululukila”, otanthauza chinji ngako-ngako? Kansi munthu akalaŵila teti otanthauza kuti mupitilije kukatijana monga ni mwemwenzechitila poyamba? Olo otanthauza tyala kuti ofunalini kuti mukambilanesoti vokhuza nkhani yamene iyo? Ninkhanilini ipepu kuziŵa vakutanthauza munthu akatiuja kuti watikhululukila.
2. Kansi Malemba ofotokoza tyani vakuchita Yehova pokhululukila ŵanthu? (Onanisoti mawu amnyansi.)
2 Vakuchita Yehova potikhululukila sewo taŵanthu ochimwa, n’vosiyana ngako na vatuchita tikaphoniyelana seka-seka. Yehova otikhululukila munjila yapalulu ngako. Ponena vokhuza Yehova, wamasalimo elemba kuti: “Chifukwa mwewo mukhululuka na ntima wonse, kuti ŵanthu akokuyopani.”a (Sal. 130:4) N’chendi, Yehova ‘okhululuka na ntima wonse.’ Yove ni chisanzo chiweme ngako pankhani ya kukhululuka kwachendi. Pa vochitika viyakine, olemba Baibolo ekatishila ntchito mawu Achihebeli amene onena vakuchita Mulungu yeka, osati vakuchita ŵanthu pokhululukila ayawo.
3. Kansi kukhululuka kwa Yehova kusiyana tyani na kwa ŵanthu? (Yesaya 55:6, 7)
3 Yehova akakhululukila munthu, ofinvya chimo yake. Ndipo oyambasoti kukatijana naye ngako monga ni mwenzechitila poyamba. Kukhululuka kwa Yehova nikodabwisa ngako, ndipo kuwonesha kuti yove niwopasa.—Ŵelengani Yesaya 55:6, 7.
4. Kansi Yehova otiyavya tyani kuziŵa kukhululuka ngako-ngako?
4 Keno vakuchita Yehova potikhululukila vulinganalini na vatuchita sewo taŵanthu ochimwa, kansi tingakuziŵe tyani kukhululuka ngako-ngako? Yehova otiyavya pokatishila ntchito mafanizo amphamvu amene ofotokoza vakuchita yove pokhululukila ŵanthu. Munkhani ino, tikambilane ayakine mwamafanizo amene aŵa. Mafanizo amene aŵa owonesha vakuchita Yehova pochosa machimo ŵasu notiyavyasoti kuti tiwamye ushamwali wasu na yove ukawonongeka. Kukambilana mafanizo amene aŵa, kutiyavye kuti tikoŵatembeja ngako Atata ŵasu achifundo chikulu, amene otikhululukila kupitila munjila zinyinji ngako.
YEHOVA OTAYA KUTALI MACHIMO ŴASU
5. Kansi n’chinji chuchitika pavuli pakuti Yehova watikhululukila?
5 Nthawe zinyinji, Baibolo yulinganija machimo na katundu wolema. Pofotokoza vokhuza machimo ŵake, Mfumu Davide inena kuti: “Vophoniya vangu vakwela kupitilila mutu wangu. Ningakwanishelini kuvitwika chifukwa vulema ngako monga nikatundu wolema.” (Sal. 38:4) Koma Yehova okhululuka machimo aŵanthu amene alapa. (Masal. 25:18; 32:5) Mawu ŵechimasulila kufumila ku Chihebeli akuti “kukhululuka” angatanthauze “kunyamula mmululu” olo “kutwika.” Yehova tingamulinganije na munthu wamphamvu wamene mophiphilisila, otilondela ntolo wamachimo pamutu pasu nonyamula kuyaika kutali.
“Mwenikhululukila” (Sal. 32:5)
6. Kansi Yehova oŵaika kutali tyani machimo ŵasu?
6 Baibolo yukatishilasoti ntchito fanizo iyakine yamene yuwonesha kuti Yehova oŵaika kutali ngako machimo ŵasu. Lemba ya Salimo 103:12 yunena kuti: “Monga ni mwakulitalimphile kwayufumila zuŵa na kwayuloŵela, Mulungu waikasoti vophoniya vasu kutali na sewo.” Kwayufumila zuŵa n’kutali ngako na kwayuchomela. Mbali ziŵili zamene izi zukumanalini. M’mawu ayakine tinganene kuti Yehova otola machimo ŵasu noŵaika kutali ngako na sewo kupambana mwatingaganizile. Mitima yasu yunkhala pansi tikaganizila mwakutikhululukila Yehova!
“Molingana na mwakulitalimphile kwayufumila zuŵa na kwayuloŵela” (Sal. 103:12)
7. Kansi Baibolo yufotokoza kuti Yehova ochita nawo tyani machimo ŵasu? (Mika 7:18, 19)
7 Koma kansi Yehova akatola machimo ŵasu notiikila kutali, opitilija mphela kuŵasunga? Yayi. Ponena za Yehova, Mfumu Hezekiya elemba kuti: “Machimo ŵangu onse mwaŵaponyela kuvuli kwanu.” Mawu amnyansi pa lemba yamene iyi onena kuti “mwachosa machimo ŵangu onse kuti osati muŵawonesoti.” (Yes. 38:9, 17; mawu amnyansi.) Fanizo yamene iyi yuwonesha kuti Yehova otola machimo aŵanthu olapa noŵataya kuti osati aŵawonesoti. Mawu amene aŵa angatanthauzesoti kuti: “Mwachitisha [machimo ŵangu] kunkhala monga aliyechitike.” Komasoti Baibolo yusimikijila mfundo yamene iyi pokatishila ntchito fanizo iyakine ili palemba ya Mika 7:18, 19. (Ŵelengani.) Palemba yamene iyi, Yehova ofotokozewa kuti otaila machimo ŵasu munyanja pamalo onoka. Kale-kale, ŵanthu enzekwanishalini kutola chinthu chikataiwa munyanja pamalo onoka.
“Machimo ŵangu onse mwaŵaponyela kuvuli kwanu” (Yes. 38:17)
“Machimo ŵasu onse muzaŵaponye m’nyanja pamalo onoka” (Mik. 7:19)
8. Kansi taphunzila chinji pofwika pano?
8 Mafanizo ŵatakambilana, atiyavya kuziŵa kuti Yehova akatikhululukila otilondela ntolo wamachimo ŵasu. Davite aliyetale wenye pechinena kuti, “osangalala ni ŵanthu amene akhululukiliwa vochita vawo vosamvwila malamulo. Wosangalala ni munthu wamene Yehova azaŵelengelelinisoti chimo yake.” (Alo. 4:7, 8) Kukhululuka kwamene uku niye kukhululuka ngako-ngako!
YEHOVA OTUŴISHA MACHIMO ŴASU
9. Kansi Yehova okatishila ntchito mafanizo otyani pofotokoza vakuchita potikhululukila?
9 Yehova okatishilasoti ntchito mafanizo ayakine, pofuna kutiyavya kuziŵa mwakufinvyila machimo aŵanthu olapa pokatishila ntchito nsembe ya dipo. Mophiphilisila, Baibolo yunena kuti Yehova owasha notuŵisha machimo ŵasu. Vamene ivi, vuyayva kuti munthu ankhalesoti ntuŵa pamenso pa Yehova pavuli pakuti wachita chimo. (Sal. 51:7; Yes. 4:4; Yer. 33:8) Yehova efotokoza yeka vokonkhapo viweme va vinthu vamene ivi. Yove enena kuti: “Olo kuti machimo ŵanu ni asweta ngako azatuŵe ngako. Olo kuti ni asweta monga nimilopa, azatuŵe monga ni tonje.” (Yes. 1:18) N’vovuta ngako kutuŵisha mathotho asweta ngako pachovwala. Koma pokatishila ntchito fanizo, Yehova otisimikijila kuti angakwanishe kutuŵisha machimo ŵasu ndipo angawonekelinisoti.
“Olo kuti machimo ŵanu ni asweta ngako azatuŵe ngako. Olo kuti ni asweta monga nimilopa, azatuŵe monga ni tonje” (Yes. 1:18)
10. Kansi nimafanizosoti otyani ŵakukatishila ntchito Yehova owonesha kuti otikhululukila na ntima wonse?
10 Monga ni mweinenela nkhani yapita, uchimo ulinganijiwasoti na “nkhongole.” (Mat. 18:32-35) Tetyo, nthawe iliyonse yatachimwila Yehova, nkhongole yasu yukulila-kulila. Sewo tunkhala na nkhongole ikulu ngako kwa Mulungu! Koma Yehova akakhululuka machimo ŵasu, vunkhala monga watikhululukila nkhongole yenzefunika kutola mu akaunti yasu. Yove akatikhululukila, otiwonalinisoti kuti tili naye na nkhongole. Fanizo yamene iyi ni iweme ngako, chifukwa yuwonesha mwatumvwila muntima Yehova akatikhululukila!
“Mutikhululukile vophoniya vasu” (Mat. 6:12)
11. Kansi Baibolo yutanthauza chinji ikanena kuti Mulungu ‘ofinvya’ machimo ŵasu? (Machitidwe 3:19)
11 Yehova otikhululukilalini tyala nkhongole olo kuti machimo ŵasu, koma yove oŵafinvyasoti. (Ŵelengani Machitidwe 3:19.) Munthu akatikhululukila nkhongole, tingakwanishe kuganizila kukula kwa ndalama yenzeyembekezela kutola mu akaunti yasu. Koma olo n’tetyo, payakine ndalama yenze elemba kuti tizamupase ikaliyolemba m’buku mwake. Koma mosiyana na vamene ivi, chinthu chikafinvyiwa chuwonekalinisoti. Kuti timvwishe mfundo ya mufanizo yamene iyi, tufunika kukumbukila kuti ŵanthu kale-kale, enzekatishila ntchito inki yoyavija na penti komasoti chingamu, ndipo yenzevutalini kufinvyika. Munthu enzekwanisha kutola chofinvyila nofinvyilatu vechilemba. Tetyo, munthu ‘akafinvya’ nkhongole yechilemba, yenzewonekalinisoti. Ŵanthu enzekwanishalinisoti kuwona mawu ŵenze elemba poyamba. Venzenkhala monga m’buku yamene iyo enze aliyelembemo nkhongole. Tumutembeja ngako Yehova mofumila pansi pantima chifukwa chakuti otikhululukila machimo ŵasu komasoti oŵanfivya m’buku yake!—Sal. 51:9.
“Kuti machimo ŵanu afivyiwe” (Mach. 3:19)
12. Kansi fanizo ya nkumbi ukulu yutikhuza tyani?
12 Palisoti fanizo iyakine yakukatishila ntchito Yehova, yamene yufotokoza vakuchita potikhululukila machimo ŵasu. Yove onena kuti: “Nizafinvye vophoniya vako ndipo vizankhale monga naviziŵilija na nkumbi. Komasoti machimo ŵako azankhale monga naŵaziŵilija na nkumbi ukulu.” (Yes. 44:22) Yehova akatikhululukila, oŵawonalinisoti machimo ŵasu ndipo vunkhala monga waŵaziŵilija na nkumbi ukulu.
“Nizafivye vophoniya vako ndipo vizankhale monga naviziŵilija na nkumbi” (Yes. 44:22)
13. Kansi tikumvwa tyani muntima Yehova akatikhululukila machimo ŵasu?
13 Kansi vamene ivi vukhuza tyani moyo wasu? Yehova akatikhululukila machimo ŵasu, tikopewa kupitilija kuliimba mulandu kwa moyo wasu wonse. Mulungu otikhululukila na ntima wonse pokatishila ntchito milopa ya Yesu Khilisitu. Mulungu opitilijalini kusunga vinthu viipa vetichita m’buku yake. Umu niye mwaukhuziliwa moyo wasu chifukwa chakuti Yehova otikhululukila na ntima wonse tikachita chimo.
YEHOVA OTILOLA KUNKHALASOTI AZISHAMWALI ŴAKE APANTIMA
Chifukwa chakuti Atata ŵasu akululu otikhululukila, vutiyavya kunkhala nawo paushamwali uweme (Onani ndime 14.)
14. Ndaŵa yanji tingakaikilelini kuti Yehova otikhululukila na ntima wonse? (Onanisoti vithunzi.)
14 Chifukwa chakuti Yehova otikhululukila na ntima wonse, sewo tili na mwayi wonkhala naye paushamwali uweme. Vamene ivi vutiyavyasoti kuti osati tikoliimba mulandu mopitilila malile. Tufunikilalini kuchita wowa noganiza kuti Yehova otisungila chakuntima ndipo osakila-sakila njila kuti atilange. Tufunikilalini kuyopa chifukwa chakuti yove angachitelini vamene ivi. Ndaŵa yanji tingamukhulupilile Yehova akanena kuti watikhululukila? Mowujiliwa, mneneli Yelemiya elemba kuti: “Newo nizaŵakhululukile vophoniya vawo, ndipo machimo ŵawo nizaŵakumbukilelinisoti.” (Yer. 31:34) Pokatishila ntchito mawu amene aŵa, ntumwi Paulo elemba mawu olinganako ndipo enena kuti: “Nizakumbukilelinisoti machimo ŵawo.” (Ahe. 8:12) Koma kansi vamene ivi vutanthauza chinji ngako-ngako?
“Machimo ŵawo nizaŵakumbukilelini soti” (Yer. 31:34)
15. Kansi mawu akuti Yehova opitilijalini kukumbukila machimo ŵasu otanthauza chinji?
15 M’Baibolo, mawu akuti “kukumbukila” otanthauzalini tyala kukumbukila chinthu chiyakine olo kuchiganizila. M’malo mwake, angatanthauze kukumbukila nochitapo kanthu. Chigaŵenga chipachikiwa pafupi na Yesu, chisenga kuti: “Yesu, mukanikumbukile mukayaloŵa mu Ufumu wanu.” (Luk. 23:42, 43) Pamene apa, chove chenzefunalini tyala kuti Yesu akakumbukile kuti kwenze chigaŵenga. Vechiyankha Yesu vuwonesha kuti azachitepo kanthu pochiusha chigaŵenga chamene icho. Tetyo, Yehova pechilaŵila kuti akokumbukilalinisoti machimo ŵasu, etanthauza kuti akolimbanalini nase chifukwa cha vinthu viipa vetichita. Yove akotipasalini chilango chifukwa cha machimo ŵechitikhululukila kale.
16. Kansi Baibolo yuufotokoza tyani ufulu watili nawo chifukwa chakuti Mulungu otikhululukila na ntima wonse?
16 Baibolo yukatishilasoti ntchito fanizo iyakine potiyavya kumvwisha luweme ufulu watunkhala nawo chifukwa chakuti Yehova otikhululukila na ntima wonse. Chifukwa cha uchimo watuvyalika nawo komasoti ntima wofuna kuchita vinthu viipa, sewo tenze monga ni “akapolo auchimo.” Koma chifukwa chakuti Yehova otikhululukila, tili monga ni akapolo amene ‘emasuliwa ku uchimo.’ (Alo. 6:17, 18; Chiv. 1:5) Kulaŵila chendi, tukhuziwa ngako mofumila pansi pantima chifukwa cha kukhululuka kwa Yehova.
“Mwemasuliwa ku uchimo” (Alo. 6:18)
17. Kansi Mulungu akatikhululukila machimo ŵasu vutiyavya tyani kuti tipole? (Yesaya 53:5)
17 Ŵelengani Yesaya 53:5. Fanizo yosilijila yatikuti tikambilane, yutilinganija na munthu wamene ali na matenda akulu. Chifukwa cha nsembe ya dipo yechipeleka Yehova kupitila muli Mwana wake, tinganene kuti etipojeka mophiphilisila. (1 Pet. 2:24) Nsembe ya dipo yukwanisha kuwamyasoti ushamwali wasu na Yehova ukawonongeka tikalwala matenda auzimu. Molingana na munthu wamene osangalala ngako akapola matenda akulu, sewo tusangalala tikapola mwauzimu komasoti Yehova akayambasoti kukondwela nase chifukwa chakuti watikhululukila.
“Chifukwa cha vilonda vake sewo tipojekewa” (Yes. 53:5)
MWAKUTIKHUZILA KUKHULULUKA KWA YEHOVA
18. Kansi taphunzila chinji pa mafanizo osiyana-siyana am’Baibolo okhuza kukhululuka kwa Yehova? (Onanisoti bokosi yakuti “Vakuchita Yehova potikhululukila.”)
18 Kansi taphunzila chinji pa mafanizo am’Baibolo ŵatakambilana okhuza vakuchita Yehova potikhululukila? Yehova akafuna kutikhululukila machimo ŵasu, okhululuka na ntima wonse ndipo oŵakumbukilalinisoti. Vamene ivi vutiyavya kunkhala pa ushamwali uweme na Atata ŵasu akululu. Koma pa nthawe imo na imo, tukumbukila kuti kukhululukiliwa na ntima wonse ni mphaso yofumila kwa Mulungu. Yehova otikhululukila na ntima wonse chifukwa cha chikondi komasoti kuwama ntima kwake kosasila, kwamene okuwonesha kuli ŵanthu ochimwa. Yove ochitalini vamene ivi chifukwa chakuti sewo nise oyenelela.—Alo. 3:24.
19. (a) Kansi n’chinji chatuwamila kutembeja? (Aloma 4:8) (b) Kansi tizakambilane chinji munkhani ikuza?
19 Ŵelengani Aloma 4:8. Aliyense wa sewo owamila kumutembeja Yehova chifukwa chakuti ni Mulungu wamene ‘okhululuka na ntima wonse’! (Sal. 130:4) Koma olo n’tetyo, kuti Yehova akotikhululukila tufunikila kuchita chinthu chiyakine chofunika ngako. Yesu efotokoza kuti: “Keno mukhululukilalini ŵanthu machimo ŵawo, Atata ŵanu azakukhululukilenilinisoti machimo ŵanu.” (Mat. 6:14, 15) Tetyo, n’vowonekelatu kuti n’kofunika ngako kukonkheja Yehova pankhani yokhululukila ayakine. Koma kansi tingachite tyani vamene ivi? Munkhani ikuza, tizaziŵe kuti kuchita vamene ivi kupamikijapo chinji.
NYIMBO N.° 46 Tukutembejani Yehova
a Mu Chihebeli choyambilila, ekatishila ntchito mawu akuti “kukhululuka” amene otanthauza tyala kukhululuka ngako-ngako, olo kuti alipo mawu ayakine okhuza kukhululuka ŵangakatishile ntchito. M’ma Baibolo anyinji muliye mawu amene aŵa apadela, koma Baibolo ya chalo chanyowani ya Malemba Opatulika, niyapadela tikawona mwechiimasulilila pa Salimo 130:4.