NKHANI YOPHUNZILA N.° 24
Yehova—ni wokhululuka nkulu ngako
“Mwewo Yehova nimwe Mulungu muweme ndipo nimwe wokonzeka kukhululuka. Kuwama ntima kosasila kwamuŵawonesha onse ŵala oita pali mwewo ni kukulu.”—SAL. 86:5.
NYIMBO N.° 43 Pemphelo yotembeja Mulungu
VATIKUTI TIPHUNZILEa
1. Kansi Mfumu Solomo etiphunzisa chinji pa Mlaliki 7:20?
MFUMU Solomo elemba kuti: “Paliye munthu wolungama pachalo wamene ochita viweme veka-veka osachimwa.” (Mlal. 7:20) Vamene ivi n’vachendi ngako! Tonse nise ochimwa. (1 Yoh. 1:8) Tetyo, tonse tufunika kukhululukiliwa na Mulungu komasoti ayasu.
2. Kansi munthu akakhululukiliwa na shamwali wake wapantima akumvwa tyani?
2 Mosakaikila, mwewo mukumbukila nthawe yemwikhumudwisapo shamwali wanu wapantima. Mwewo mwifunishisha kukambilana nkhani yamene iyo nowamya ushamwali wanu, tetyo mwemupepesa mofumila pansi pantima. Kansi mwechimvwa tyani shamwali wanu pechikukhululukilani na ntima wonse? Kansi mwiyamba kumvwa luweme? Kansi vikuchitishani kunkhala wosangalala?
3. Kansi tikambilane chinji mu nkhani ino?
3 Sewo tufuna kuti Yehova ankhale Shamwali wasu wapantima, koma nthawe ziyakine tingalaŵile olo kuchita vinthu vamene vingamukhumudwise. Lomba ndaŵa yanji tingankhale osimikijila kuti Yehova ni wofunishisha kutikhululukila? Kansi pali kusiyana kotyani pakati pa kukhululukila munthu kwakuchita Yehova na kwatuchita sewo? Lomba kansi niŵani angakhululukiliwe na Mulungu?
YEHOVA NI WOKONZEKA KUKHULULUKA
4. Ndaŵa yanji tingankhale osimikijila kuti Yehova ni wokonzeka kukhululuka?
4 Mawu a Mulungu otisimikijila kuti Yehova ni wokonzeka kukhululuka. Yehova elifotokoza yeka kwa Mose pa Lupili ya Sinai, ndipo kupitila mwa mngelo enena kuti: “Yehova, Yehova, Mulungu wachifundo na wachisomo, asakalipa kamangu komasoti wozula na kuwama ntima kosasila na choonadi. Wosungila mibadwo masauzande kuwama ntima kosasila, wokhululukila volakwa na machimo.” (Eks. 34:6, 7) Yehova ni Mulungu muweme ntima na wachifundo wamene nthawe zonse onkhala wokonzeka kukhululukila ŵanthu ochimwa amene alapa.—Neh 9:17; Sal. 86:15.
Yehova oziŵa vonse vatichitikila pa moyo wasu vamene vatipangisha kunkhala na umunthu watili nawo (Onani ndime 5)
5. Mokatijana na Salimo 103:13, 14, kansi Yehova ochita chinji chifukwa chakuti oŵaziŵa luweme ŵanthu?
5 Monga Nyamalenga wasu Yehova oziŵa vonse vokhuza sewo. Ganizilani tyala! Yove oziŵa chilichonse chokhuza munthu aliyense pano pachalo. (Sal. 139:15-17) Tetyo, yove okwanisha kuwona vinthu vonse vatuphoniya vetitolela kuli makolo ŵasu. Yove mpaka oziŵa vonse vatichitikila pa moyo wasu vamene vatipangisha kunkhala na umunthu watili nawo. Kansi Yehova ochita chinji chifukwa chakuti otiziŵa luweme? Ivi vumuchitisha kuti akochita nase vinthu mwachifundo.—Sal. 78:39; ŵelengani Salimo 103:13, 14.
6. Kansi Yehova ewonesha tyani kuti ni wofunishisha kukhululuka?
6 Yehova ewonesha kuti ni wofunishisha kukhululuka. Yove omvwisha kuti chifukwa cha vinthu vechichita munthu woyambilila Adamu, tonse nise ochimwa ndipo pamapeto pake tikufwa. (Aro. 5:12) Paliye chatingachite kuti tiliteteze seka olo kuteteza munthu muyakine ku uchimo na imfwa. (Sal. 49:7-9) Olo n’tetyo, Mulungu wasu wachikondi ewonesha chifundo ndipo epanga makonzedwe akuti timasuke. Kansi echita chinji? Monga mwayufotokozela lemba ya Yohane 3:16, Yehova etumija Mwana wake wovyalika yeka kuti azatifwile. (Mt. 20:28; Aro. 5:19) Yesu etifwila kuti amasule aliyense wala omukhulupilila. (Ahe. 2:9) Vimuŵaŵa ngako Yehova kuwona Mwana wake wokondewa akufwa imfwa yoŵaŵa komasoti yochitisha nsoni! Kulaŵila chendi, kuti Yehova ofunalini kutikhululukila sembe aliyelole kuti Mwana wake afwe.
7. Kansi ni visanzo viyakine votyani va m’Baibolo va ŵanthu ŵechikhululukila Yehova na ntima wonse?
7 M’Baibolo muli visanzo va ŵanthu ŵechikhululukila Yehova na ntima wonse. (Aef. 4:32) Kansi mwewo muganizila za ŵani? Payakine muganizila za Mfumu Manase. Munthu muipa wamene uyu echimwila Yehova pochita machimo akulu-akulu. Yove enzelambila Mulungu wawenye ndipo enzelimbikisa ayakine kuti akochita chimozi-mozi. Yove epaya ŵana ŵake, noŵapeleka monga nsembe kuli milungu yawenye. Yove mpaka efwika poika chifano choŵaza m’kachisi wopatulika wa Yehova. Ponena za yove, Baibolo yunena kuti: “Yove echita vinthu vinyinji viipa pamenso pa Yehova komasoti vomukalipisha.” (2 Mbiri 33:2-7) Olo n’tetyo, Manase pechiwonesha kulapa mofumila pansi pantima, Yehova emukhululukila na ntima wonse. Ndipo Mulungu emulola kuti ankhalesoti mfumu. (2 Mbiri 33:12, 13) Payakine muganizilasoti za Mfumu Davide, wamene echimwila Yehova pochita machimo akulu-akulu monga chigololo kupamikijapo na kupaya munthu. Olo n’tetyo, Davide pechivomeleja machimo ŵake nolapa kufumila pansi pantima, Yehova emukhululukilasoti. (2 Sam. 12:9, 10, 13, 14) N’chendi, tingankhale osimikijila kuti Yehova ni wofunishisha kukhululuka. Ndipo monga mwatawonela, pali kusiyana pakati pa kukhululukila munthu kwakuchita Yehova na kwatuchita sewo.
YEHOVA NIYE ALI TYALA NA LUSO YOKHULULUKA
8. Ndaŵa yanji tinganene kuti Yehova niye ali na udindo wapadela wonkhala Woweluza?
8 Yehova niye “Woweluza wa chalo chonse.” (Gen. 18:25) Woweluza muweme ofunikila kuŵamvwisha bwino ngako malamulo. Yehova niye Woweluza wasu, ndipo yove oŵamvwisha bwino ngako malamulo chifukwa chakuti niyesoti Wotipasa malamulo. (Yes. 33:22) Paliyesoti muyakine kupatulapo Yehova wamene ali na nzelu zinyinji komasoti mphamvu yosiyanisha chiweme na chiipa. Kansi woweluza muweme ofunikilasoti chinji? Yove ofunikila kuziŵa nkhani yonse pa mulandu akaliyepeleka chigamulo. Pa nkhani yamene iyi, Yehova niye tyala woyenelela kunkhala Woweluza.
9. Kansi Yehova oziŵa votyani posankha kukhululukila munthu?
9 Mosiyana na oweluza a umunthu, Yehova nthawe zonse oziŵa nkhani yonse pa mulandu uliwonse. (Gen. 18:20, 21; Sal. 90:8) Yove paliye chakukangiwa kuziŵa pa vinthu vakuwona ŵanthu na kumvwa. Yove omvwisha bwino ngako mwamene vochita va munthu mwavukhuzila chibadwa chake, mwechiphunzisiliwa, mwechikulila, kwakunkhala, maganizo ŵake komasoti mwakumvwila muntima. Yehova okwanishasoti kuziŵa vili muntima. Yove omvwisha bwino ngako chifukwa chupangisha munthu kuti achite chinthu chiyakine. Paliye chinthu chilichonse chingafisike kwa Yehova. (Ahe. 4:13) Tetyo, Yehova akakhululukila munthu n’chifukwa chakuti oziŵa nkhani yonse.
Yehova ni wolungama ndipo okondelalini. Yove angaguliwelini kuti achite vinthu vachinyengo (Onani ndime 10)
10. Ndaŵa yanji tinganene kuti Yehova nthawe zonse oweluza mwachilungamo? (Deuteronomo 32:4)
10 Yehova nthawe zonse oweluza mwachilungamo. Yove okondelalini olo patontho. Yehova okhululukilalini munthu chifukwa chakuti owoneka luweme, ni wolemela, ni wofunika ngako olo chifukwa chakuti ali na maluso anyinji. (1 Sam. 16:7; Yak. 2:1-4) Paliye aliyense angamukakamije Yehova kuchita chinthu chilichonse olo kumugula kuti achite vinthu vachinyengo. (2 Mbiri 19:7) Yove opangalini vosankha chifukwa chakuti wakhumudwa olo chifukwa cha mwakumvwila. (Eks. 34:7) Mosakaikila, Yehova ni Woweluza muweme chifukwa chakuti yove omvwisha chilichonse chokhuza sewo komasoti mwavilili vinthu pa moyo wasu.—Ŵelengani Deuteronomo 32:4.
11. Kansi kukhululukila kwakuchita Yehova kusiyana tyani na kwakuchita ŵanthu?
11 Olemba Malemba Achiheberi eziŵa kuti kukhululukila kwakuchita Yehova n’kwapadela. Pa vifukwa viyakine ove ekatishila ntchito mawu Achiheberi ŵayufotokoza buku iyakine kuti mawu amene awo “akungofotokoza tyala mwakuchitila Mulungu pokhululukila munthu wochimwa. Mawu amene aŵa ofotokozalini malile ŵali nawo munthu pokhululukila muyake.” Ni Yehova yeka tyala wamene ali na mphamvu zokhululukila munthu wochimwa wamene walapilatu. Kansi n’chinji chuchitika Yehova akatikhululukila?
12-13. (a) Kansi munthu osangalala na chinji akakhululukiliwa na Yehova? (b) Kansi Yehova akakhululukila munthu, mapindu ŵake otola nthawe itali tyani?
12 Keno tuvomeleja mfundo yakuti Yehova watikhululukila tunkhala osangalala na “nyengo zosisimusa,” kupamikijapo ntendele wa m’maganizo na chikumbuntima chituŵa. Tingolimvwa tetyo keno “Yehova” watikhululukila. (Mac. 3:19) Yehova akatikhululukila otilola kunkhalasoti azishamwali ŵake ndipo vunkhala monga tiliyechimweko olo patontho.
13 Pavuli pakuti Yehova watikhululukila, yove azatiimbelini mulandu olo kutilanga chifukwa cha chimo yamene iyo. (Yes. 43:25; Yer. 31:34) Yehova oŵaika kutali machimo ŵasu “monga mwakulitalimphilane kummawa na kunchingulo.”b (Sal. 103:12) Keno tuganizila mwakutikhululukila Yehova, tumutembeja ngako komasoti tumuyopa. (Sal. 130:4) Koma kansi ni ŵanthu otyani angakhululukiliwe na Yehova?
KANSI NI ŴANTHU OTYANI ANGAKHULULUKILIWE NA YEHOVA?
14. Kansi taphunzila chinji pofwika pano vokhuza chosankha cha Yehova pa nkhani yokhululuka?
14 Monga mwatawonela, Yehova okhululukila ŵanthu osati chifukwa chakuti chimo yamene iyo yenze ikulu olo itontho. Komasoti taphunzila kuti Yehova okatishila ntchito nzelu zake monga Nyamalenga wasu, Wopeleka malamulo na Woweluza posankha keno angamukhululukile munthu. Kansi ni vinthu votyani vakuganizila Yehova akaliyesankha kuti amukhululukile munthu olo yayi?
15. Mokatijana na Luka 12:47, 48, kansi n’chinthu chimozi chotyani chakuganizila Yehova?
15 Chinthu chimozi chakuganizila Yehova, n’chakuti wochimwa wamene uyo enzeziŵa kuti vamene ivo vakuchita n’vophoniyeka olo yayi. Yesu emvwikisha luweme vamene ivi monga mwayufotokozela lemba ya Luka 12:47, 48. (Ŵelengani.) Keno munthu ochitakonza pulani kuti achite vinthu vakuziŵa kuti Mulungu okondwelalini navo ndipo n’kuifya kuvichita, yove onkhala kuti wachita chimo ikulu. Yehova payakine angasankhe kusamukhululukila munthu wamene uyo. (Mk. 3:29; Yoh. 9:41) Olo n’tetyo, tufunika kuvomeleja kuti nthawe ziyakine tuziŵa kuti vetichita venze vophoniyeka. Vikankhala tetyo, kansi pali chiyembekezo chilichonse chakuti tikhululukiliwe? Eye! Chifukwa chakuti palisoti chinthu chiyakine chakuganizila Yehova posankha kutikhululukila.
Tingakhulupilile kuti Yehova atikhululukile keno talapa mofumila pansi pantima (Onani ndime 16-17)
16. Kansi kulapa kutanthuza chinji, ndipo ndaŵa yanji tufunika kulapa keno tufuna kuti Yehova atikhululukile?
16 Chinthu chiyakine chakuganizila Yehova, n’chakuti wochimwa wamene uyo walapa chendi olo yayi. Kansi kulapa kutanthauza chinji? Kulapa kutanthauza “kuchinja maganizo, vochita olo volinga.” Ivi vuyangijilaposoti kulimvwila chisoni chifukwa cha vinthu viipa vechichita olo kusachita vinthu viweme venzefunika kuchita. Munthu wamene walapa chendi onkhala na chisoni chifukwa cha vinthu viipa vechichita komasoti chifukwa cholola kuti ushamwali wake na Yehova uwonongeke, vamene vimuchitisha kuti achite vinthu vamene ivo viipa. Kumbukilani kuti Mfumu Manase na Davide echita machimo akulu-akulu; koma olo n’tetyo, Yehova eŵakhululukila chifukwa chakuti elapa kufumila pansi pantima. (1 Maf. 14:8) N’chendi, Yehova otikhululukila tyala akawona kuti talapa chendi. Koma kungolimvwila tyala chisoni chifukwa cha machimo ŵetichita n’kosakwanila. Tufunika kunkhala okonzeka kuchitapo kanthu.c Ndipo chamene ichi n’chinthu chiyakinesoti chakuganizila Yehova.
17. Kansi kutembenuka n’chinji, ndipo kungatiyavye tyani kuti tipewe kuwelejasoti machimo? (Yesaya 55:7)
17 Kutembenuka ni chinthu chiyakine chofunika ngako chakuganizila Yehova. Kutembenuka kutanthauza “kusintha.” M’mawu ayakine, munthu ofunika kulekelatu kuchita vinthu viipa, noyamba kuchita vinthu vakufuna Yehova kuti ŵanthu akochita. (Ŵelengani Yesaya 55:7.) Munthu wamene uyo ofunika kuchinja maganizo ŵake kuti akochita vinthu mokatijana na maganizo a Yehova. (Aro. 12:2; Aef. 4:23) Yove ofunika kunkhala wosimikija kufumila pansi pantima kuleka vochita vake viipa nochinja kaganizidwe kake. (Akol. 3:7-10) Kulaŵila chendi, chikhulupililo chasu pa nsembe ya Khilisitu, niye chuchitisha kuti Yehova atikhululukile notituŵisha ku uchimo. Yehova atikhululukile chifukwa cha nsembe yamene iyo akawona kuti tuyeja-yeja mwakhama kuchinja nkhalidwe yasu.—1 Yoh. 1:7.
MUKOKHULUPILILA KUTI YEHOVA AKUKHULULUKILENI
18. Kansi takambilana chinji vokhuza kukhululuka kwa Yehova?
18 Tiyeni tikambilanesoti mwachidule mfundo zofunika ngako zatakambilana mu nkhani ino. Yehova niye chendi Wokhululuka nkulu ngako mu chilengedwe chonse. Ndaŵa yanji tinganene tetyo? Choyamba, yove nthawe zonse ni wokonzeka kukhululuka. Chachiŵili, yove oziŵa chilichonse chokhuza sewo. Oziŵa mwechitipangila ndipo niye angakwanishe kuziŵa keno talapa chendi. Ndipo chachitatu, yove otikhululukila na ntima wonse ndipo akatikhululukila, kuli yove vunkhala monga tiliyechimweko olo patontho. Vamene ivi vutichitisha kuti tinkhale na chikumbuntima chituŵa nonkhala ovomelejeka kuli yove.
19. Olo kuti nise osoŵa ungwilo ndipo tupitilija mphela kuchimwa, ndaŵa yanji tingankhale osangalala?
19 N’chendi kuti chifukwa chakuti tiliye ungwilo tikochimwa. Olo n’tetyo, tingatonthojewe na mawu opezeka m’buku yachipwitikizi yakuti Estudo Perspicaz das Escrituras, Volume 1, pedji 210, pamene ponena kuti: “Yehova ni wachifundo ndipo oziŵa vofoka va atumiki ŵake. Tetyo, ove ofunikalini kungonkhalila kulimvwila chisoni nthawe zonse chifukwa cha kusoŵa ungwilo komasoti volakwa vawo. (Sal. 103:8-14; 130:3) Keno ove ochita vonse vangakwanishe kuti akochita vinthu vukatijana na mfundo za Mulungu, angonkhala osangalala. (Afil. 4:4-6; 1 Yoh. 3:19-22).” Vamene ivi n’volimbikisa ngako!
20. Kansi tizakambilane chinji mu nkhani ikuza?
20 Tutembeja ngako kuti Yehova ni wokonzeka kutikhululukila keno talapa machimo ŵasu mofumila pansi pantima. Lomba kansi tingamukonkheje tyani Yehova pa nkhani yokhululuka? Kansi kukhululuka kwasu n’kolingana tyani na kukhululuka kwa Yehova, ndipo kusiyana mu njila zotyani? Ndaŵa yanji kumvwisha kusiyana kwamene uku n’kofunika? Nkhani ikuza izayankhe makonsho amene aŵa.
NYIMBO N.° 45 Kusinkhasinkha kwa ntima wangu
a M’Mawu ŵake, Yehova otisimikijila kuti ni wokonzeka kukhululukila ochimwa amene alapa. Olo n’tetyo, nthawe ziyakine tingolimvwa kuti nise osayenelela kukhululukiliwa. Mu nkhani ino, tikambilane chifukwa chake tingankhale osimikijila kuti Mulungu wasu ni wokonzeka nthawe zonse kutikhululukila keno talapa machimo ŵasu mofumila pansi pa ntima.
b Onani buku yakuti Yandikirani kwa Yehova, mutu 26, ndime 9.
c KUMVWIKISHA LUWEME: “Kulapa” kutanthauza kuchinja maganizo na kumvwa chisoni kufumila pansi pantima chifukwa cha vinthu viipa venzechita munthu vechileka. Kulapa ngako-ngako kunkhala na vitwazi vake, vamene ni kuchinja mwatuchitila vinthu pa moyo wasu.