Mukodalila Yehova wamene ni Mwala wanu

1. Mokatijana na Salimo 18:46, kansi Davide emuyelekezela na chinji Yehova?

NTHAWE ziyakine, tingakumane na mavuto mwazizizi amene angachitishe moyo wasu kunkhala wovuta olo—kuuchinjilatu. Koma tutembeja ngako kuti Yehova otiyavya! Munkhani yapita, tephunzila kuti Yehova ni Mulungu wamoyo komasoti niwokonzeka nthawe zonse kutiyavya. Tikalondela thandizo kufumila kuli yove vutiyavya kusimikijila kuti “Yehova ni wamoyo!” (Ŵelengani Salimo 18:46.) Koma pavuli pakuti wanena kuti Mulungu niwamoyo, Davide emuyelekezela na chinthu chiyakine chamene chiliye moyo, yove eita Yehova kuti “Mwala wangu.” Kansi vamene—ivi vutanthauza chinji?

2. Ndaŵa yanji nivochitisha chidwi kuti Davide eita Yehova kuti “Mwala wangu”?

² Munkhani ino, tikambilane chifukwa chake Yehova otomolewa kuti mwala, na vatingaphunzile vokhuza yove pankhani yamene iyi. Tiphunzilesoti vatingachite kuti tikowona Yehova kunkhala Mwala wasu. Posilijila pake, tikambilane vatingachite pokonkheja minkhalidwe ya Yehova.

CHIFUKWA CHAKE YEHOVA OYELEKEZELEWA NA MWALA

3. Kansi nthawe zinyinji Baibolo yuŵakatishila ntchito munjila zotyani mawu akuti “mwala”? (Onani chithunzi .)

³ Baibolo yuyelekezela Yehova na “Mwala” pofuna kuti tiziŵe luweme minkhalidwe yake. Nthawe zinyinji poimba nyimbo zotamanda Yehova chifukwa cha minkhalidwe yake yodabwisa, atumiki a Mulungu enzemuyelekezela na Mwala. Ulwendo woyamba m’Baibolo pakutomolewa Yehova kuti ni “Mwala”, ni pa Deuteronomo 32:4. Popemphela, Hana enena kuti “paliye Mwala wolingana na Mulungu wasu.” (1 Sam. 2:2) Mneneli Habakuku etomola Yehova kuti “Mwala wangu.” (Hab. 1:12) Munthu wamene elemba Salimo 73 eita Mulungu kuti “Mwala wantima wangu.” (Sal. 73:26) Olo pa nthawe yenzeliziŵikisha kuli ŵanthu antundu wake, Yehova eliyelekezela na mwala. (Yes. 44:8) Tiyeni tikambilane minkhalidwe itatu yamene yuwonesha kuti Yehova ni mwala na vatingachite kuti tikomuwona kuti ni “Mwala wasu.”—Deut. 32:31.

4. Kansi Yehova ni malo othaŵilako mwanjila yotyani? (Salimo 94:22)

⁴ Yehova ni malo ŵasu othaŵilako. Pa nthawe ya chimphepo champhamvu sewo tingafwane malo otetezeka kuchinkhwema. Molingana na vamene ivi Yehova angatiteteze tikankhala pamavuto. (Ŵelengani Salimo 94:22.) Yehova oteteza moyo wasu wauzimu. Mulungu otisimikijila kuti paliye vuto iliyonse yatingakumane nayo yamene ingatiwononge mpaka kale-kale. Koma yove watilonjezasoti kuti azatichitile vinyinji ngako kupambana vamene ivi. Kusogolo, Mulungu azafumyepo mavuto onse komasoti vinthu vamene vutidesa nkhaŵa.—Ezek. 34:25, 26.

5. Kansi Yehova angankhale tyani malo ŵasu othaŵilako?

⁵ Njila imozi yatingafwanile chitetezo kuli Yehova ni kupemphela. Tikapemphela, Yehova otipasa “ntendele wa Mulungu” wamene uteteza mitima yasu komasoti maganizo ŵasu. (Afil. 4:6, 7) Onani vamene vechitikila mkwasu muyakine zina yake Artem, wamene eikiwa m’djeli chifukwa cha chikhulupililo chake. Yove enzekonshewa moweleja-weleja na wofufuza wankhanza wamene enzemuyofwa komasoti kumuchitisha nsoni. Artem enena kuti: “Nthawe zonse wofufuza wamene uyo akaniita nenzechita wowa ngako. . . . Nenzepemphela kwa Yehova nthawe zonse kuti anipase ntendele wamuntima komasoti nzelu. Olo kuti nezetamanishiwa nepitilija kunkhala woleza ntima. . . . Venze monga nili nkati mwampanda wotang’a chifukwa chakuti Yehova enzeniyavya.”

6. Ndaŵa yanji tufunika kudalila Yehova nthawe zonse? (Yesaya 26:3, 4)

⁶ Yehova niwodalilika. Molingana na lupili olo mwala ukulu wamene vingakwanishikelini kuti uchoke pa malo ŵake, Yehova ochinjalini ndipo niwokonzeka nthawe zonse kuti atiyavye. Ndipo tingakwanishe kumudalila Mulungu chifukwa chakuti yove ni “Mwala mpaka kale-kale.” (Ŵelengani Yesaya 26:3, 4.) Yehova azankhalepo mpaka kale-kale ndipo niwokonzeka kukwanilisha malonjezo ŵake, kuyankha mapemphela ŵasu, komasoti kutiyavya tikafunikila thandizo. Tingamukhulupilile soti Yehova chifukwa chakuti niwokhulupilika kuli atumiki ŵake. (2 Sam. 22:26) Yove azaluŵelini vonse vatumuchitila, ndipo azatipase mphaso.—Ahe. 6:10; 11:6.

7. Kansi n’chinji chamene chingachitike keno sewo tudalila Yehova? (Onanisoti chithunzi.)

⁷ Tingawoneshe kuti Yehova ni Mwala wasu keno tumudalila na ntima wonse. Sewo tukhulupilila na ntima wonse kuti keno tumumvwila olo pa nthawe yatili pa mavuto vinthu vikotiyendela luweme. (Yes. 48:17, 18) Nthawe iliyonse yatawona thandizo ya Yehova chikhulupililo chasu chutang’a ndipo tusimikijila ngako kuti ni Yehova yeka wamene otiyavya kulimbana na mavuto onse ŵatukumana nawo olo akule tyani. Nthawe zinyinji tikakumana na mavuto akulu tuona kufunika kwa kudalila ngako Yehova. Vamene ivi niye vechitikila mkwasu Vladimir wamene enena kuti: “Pa nthawe yenenze mudjeli, ushamwali wangu na Yehova niye pewitang’a ngako. Nephunzila kukhulupilila ngako Yehova chifukwa nenze neka-neka kudjeli ndipo sembe niliyekwanishe kuchinja vinthu.”

8. (a) Ndaŵa yanji tinganene kuti Yehova ochinjalini? (b) Ndaŵa yanji n’chinthu chiweme ngako kuwona Yehova kunkhala Mwala wasu? (Salimo 62:6, 7)

⁸ Yehova ochinjalini. Molingana na mwala ukulu wamene unganyang’anyelini, minkhalidwe ya Yehova komasoti cholinga chake vuchinjalini. (Mal. 3:6) Adamu na Hava pechipandukila Yehova, Mulungu aliyechinje cholinga chake chokhuza ŵanthu. Ntumwi Paulo enena kuti Mulungu “angalikanelini yeka.” (2 Tim. 2:13) Kutanthauza kuti Yehova angalekelini kuwonesha minkhalidwe yake iweme pokwanilisha cholinga chake ndipo angachinjelini mfundo zake mosasamala kanthu za vinthu vamene vingachitike olo vangachite ŵanthu ayakine. Tikomudalila Mulungu chifukwa ochinjalini, komasoti tukhulupilila kuti yove azatiyavye tikakumana na mavuto ndipo azakwanilishe malonjezo ŵake onse akusogolo.—Ŵelengani Salimo 62:6, 7.

9. Kansi mwaphunzila chinji kufumila pa vechitikila Tatyana?

⁹ Tikoganizila minkhalidwe iweme ya Yehova komasoti cholinga chali nacho chokhuza chalo komasoti ŵanthu, vingatiyavye kuti tipitilije kunkhala oleza ntima nopitilija kunkhala okhulupilika tikakumana na mavuto. (Sal. 16:8) Vamene ivi niye vechitikila kalongosi muyakine zina yake Tatyana wamene eikiwa mu djeli yosafuma pa ng’anda chifukwa cha chikhulupililo chake. Yove enena kuti: “Nenzekhala neka-neka. Kuchita vamene ivi kwenze kovuta ngako poyamba. Nthawe zinyinji nenzenkhala wokhumudwa ngako.” Koma pavuli pake yove eyamba kuganizila cholinga chali nacho Yehova kuli ŵanthu, ndipo ewona kuti kuchita vamene ivo kwenze kofunika kuti akwanishe kupilila mavuto ŵenzekumana nawo. Vamene ivi vemuyavya kuti ankhale woleza ntima. Yove enena kuti: “Kumvwisha luweme vinthu venzechitisha kuti nikumane na mavuto amene awo, kweniyavya kukumbukila kuti nuchita vamene ivo chifukwa cha Yehova. Vamene ivi veniyavya kuti nileke kuganizila za newo neka.”

10. Kansi tingachite chinji palipano kuti Yehova ankhale Mwala wasu?

¹⁰ Kwalombapano ngako sewo tizakumane na mavuto akulu ngako ndipo tizafunike kudalila Yehova kupambana kale yonse. Chifukwa cha vamene ivi tufunika kudalila ngako Yehova lomba teti, ndipo tikokhulupilila kuti Yehova azatipase vinthu vonse vatufunikila kuti tipitilije kunkhala okhulupilika kuli yove. Kansi tingachite tyani vamene ivi? Tikoŵelenga nkhani za m’Baibolo za atumiki a Yehova a masiku akuvuli komasoti nkhani zenekwasu na akalongosi amasiku ŵano amene Yehova eŵayavya kuti akwanishe kupilila mavuto ŵawo. Pamuŵelenga nkhani zamene izi, mukoganizila vechichita Yehova kuti ayavye atumiki ŵake. Mukopatula nthawe yoziganizila luweme. Mukachita tetyo vizakuyavyeni kuwona luweme kuti Yehova ni Mwala wanu.

MUKOKONKHEJA MINKHALIDWE YA YEHOVA

11. Ndaŵa yanji sewo tufuna kukonkheja minkhalidwe ya Yehova? (Onanisoti bokosi yakuti “Volinga vangankhale navo enekwasu achilumbwana.”)

¹¹ Pofwika pano, tawona minkhaliye iyakine ya Yehova yamene yutiyavya kumvwisha chifukwa chake yove oyelekezelewa na mwala. Lomba tiyeni tikambilane vatingachite pokonkheja minkhalidwe yamene iyi. Tikoyeja-yeja mwakhama kukonkheja minkhalidwe ya Yehova tizatang’ishe enekwasu na akalongosi. Mwachisanzo, Yesu epasa Simoni zina yakuti Kefa (yamene kumasulila kwake ni “Petulo.”) Zina yamene iyi yutanthauza “pisi ya Mwala.” (Yoh. 1:42) Pochita vamene ivi Yesu enzetanthauza kuti Petulo akotang’isha enekwasu amumpingo noŵayavya kutang’isha chikhulupililo chawo. Akulu amumpingo oyelekezelewa na “chimfule cha mwala ukulu.” Vamene ivi vutanthauza kuti akulu oteteza—enekwasu na akalongosi mumpingo. (Yes. 32:2) N’vowonekelatu kuti aliyense wasewo osati akulu ŵeka, angakwanishe—kukonkheja mikhalidwe ya Yehova notang’isha ayakine mumpingo.—Aife. 5:1.

12. Kansi tingachite tyani kuti tinkhale malo othaŵilako kuli enekwasu.

¹² Nkhalani malo othaŵilako kuli enekwasu na akalongosi. Enekwasu na akalongosi akakumana na masoka am’chilengedwe olo mavuto ayakine chifukwa chankhondo, nthawe ziyakine tingafunikile kuŵayavya mwakuthupi poŵapasa malo onkhala. ‘M’masiku ŵano osilijila’ vinthu viipile-ipile ndipo mosakaikila sewo tizafunikile kuti tikoyavyana muyake na muyake. (2 Tim. 3:1) Koma kuyangijila poŵayavya mwakuthupi, sewo tingayavyesoti enekwasu na akalongosi mwakuŵatonthoja noŵawonesha chikondi. Njila imozi yatingachitile vamene ivi, ni kutandala nawo pamisonkhano ku Ng’anda ya Ufumu na kuŵauja mawu otang’isha amene ŵangafunikile kumvwa. Sewo tufuna kuti Ng’anda zasu za Ufumu zinkhale malo antendele kuti enekwasu na akalongo akowoneshewa chikondi na kumvwa mawu otang’isha. Ŵanthu anyinji masiku ŵano ochitilana nkhanza. Vamene ivi vingachitishe enekwasu na akalongosi kusokonezeka maganizo olo kulimvwa kuti paliye wamene oŵakonda. Chifukwa cha vamene ivi enekwasu na akalongosi akafwika pamisonkhano, sewo tufuna kuchita vonse vatingakwanishe pofuna kuŵatang’isha noŵawonesha kuti tuŵakonda.

13. Kansi akulu angankhale tyani malo othaŵilako kuli ŵanthu ayakine? (Onanisoti chithunzi.)

¹³ Akulu ni malo othaŵilako kuli enekwasu na akalongosi amene okumana na mayeselo osiyana-siyana. Pakachitika ngozi zam’chilengedwe olo matenda amwazizizi, akulu mokulumija opanga makonzedwe kuti ayavye enekwasu na akalongosi. Ove okatishilasoti ntchito Baibolo kuti apeleke malangizo komasoti potang’isha ŵanthu ayakine. Enekwasu omasuka kusenga thandizo kuli nkulu wamene ni muweme ntima, womvwishila komasoti wamene oyeja-yeja kumvwa monga nimwakumvwila ove. Nkulu wamene owonesha minkhalidwe monga ni yamene iyi, oyavya enekwasu na akalongosi kulimvwa kuti okondewa. Vamene ivi vuŵayavya kuti akokonkheja mosavuta malangizo ofumila m’Baibolo ŵakulondela kuli akulu.—1 Ates. 2:7, 8, 11.

14. Kansi tingawoneshe tyani kuti nise odalilika?

¹⁴ Mukonkhala odalilika. Sewo tufuna kuti enekwasu na akalongosi akotidalila kuti tingaŵayavye panthawe ya mavuto. (Miy. 17:17) Koma kansi tingachite tyani kuti ove aziŵe kuti nise odalilika? Tufunika kuchita vonse vatingakwanishe pokonkheja Yehova nsiku iliyonse. Mwachisanzo, tikokwanilisha vatalonjeza ndipo tikochita vinthu panthawe yake. (Mat. 5:37) Komasoti tikoyeja-yeja kuyavya ŵanthu amene ofunikila thandizo. Kuyagijila pamene apo, tikokonkheja mwakhama malangizo amene ŵatulondela pochita mbali iliyonse yatingapasiwe mumpingo.

15. Kansi akulu amene ni odalilika opindulisha tyani mpingo?

¹⁵ Akulu amene ni odalilika nimphaso yofumila kwa Mulungu mumpingo. Mwanjila yotyani? Ofalisa akaziŵa kuti ali na mwayi wouja akulu akafunikila thandizo, odelalini nkhaŵa chilichonse. Enekwasu na akalongosi olimvwa kuti ni otetezeka komasoti okondewa akaziŵa kuti akulu ni okonzeka nthawe zonse kuŵayavya pakafunikila. Kuyangijila pamene apo, ofalisa oyamba kuŵadalila ngako akulu akaziŵa kuti nthawe zonse okatishila ntchito Baibolo na vofalisa vasu akafuna kupeleka malangizo mmalo malaŵila vinthu vammutu mwawo. Komasoti keno akulu okwanisha kusunga nkhani zachisinsi nokwanilisha akalonjeza chinthu, vuyavya kuti ofalisa akoŵadalila ngako.

16. Ndaŵa yanji tufunika kukonkheja malangizo a Yehova nthawe zonse?

¹⁶ Mukokonkheja malangizo a Yehova nthawe zonse. Keno tumvwila Yehova pachilichonse nokonkheja malangizo am’Baibolo tikafuna kupanga vosankha, tizankhale visanzo viweme kuli ayakine. Keno tupatula nthawe yophunzila Baibolo notang’isha chikhulupililo chasu mwa Yehova, tizakwanishe kunkhala okhulupilika kuli yove nopitilija kukonkheja mfundo zake zolungama. Tizaluŵilelini na viphunziso vawenye olo na kaganizidwe kasakatijana na vinthu vakutiphunzisa Mulungu kupitila m’Baibolo. (Aife. 4:14; Yako. 1:6–8) Tikamvwa nkhani ziipa pawailesi, sewo tupitilija kunkhala odekha chifukwa tukhulupilila kuti malonjezo a Yehova azakwanilishiwe. (Sal. 112:7, 8) Kuyangijila pamene apo, tingakwanishe kuyavya ŵanthu amene okumana na mavuto komasoti mayeselo.—1 Ates. 3:2, 3.

17. Kansi akulu angachite tyani poyavya enekwasu kuti apitilije kukhulupilila ngako Yehova?

¹⁷ Akulu ofunikalini kuchita vinthu mopitilila malile, mmalo mwake ofunika kuchita vinthu moganiza luweme, mwadongosolo, komasoti mololela. Komasoti akulu oyavya ayakine kuti apitilije kunkhala odekha na kuti akokhulupilila ngako Yehova. Ove olimbikisasoti enekwasu na akalongosi mumpingo kuti ‘akate mwamphamvu mawu okhulupilika.’ (Tito 1:9; 1 Tim. 3:1–3) Kupitila muli chisanzo komasoti ntchito yawo yoŵetela, akulu oyavya ofalisa mumpingo kuti akochita vinthu vauzimu monkhazikika monga kupezeka pamisonkhano, kulalikila, komasoti kuphunzila paŵeka. Keno enekwasu olimbana na mavuto ndipo ali na nkhaŵa, akulu oŵakumbusha za kufunika kwakuti akodalila Yehova nopitilija kuganizila vinthu vawatilonjeza.

18. Ndaŵa yanji sewo tufuna kutamanda Yehova komasoti kupitilija kunkhala naye paushamwali wotang’a? (Onanisoti bokosi yakuti “Njila yatingankhalile paushamwali wotang’a na Yehova.”)

¹⁸ Pavuli pakuti takambilana minkhalidwe yodabwisa ya Yehova, tingakatijane na mawu a Mfumu Davide wamene enena kuti: “Atamandike Yehova wamene ni Mwala wangu.” (Sal. 144:1) Sewo tingakwanishe kumudalila Yehova kwamoyo wonse. Sewo tukhulupilila kuti yove azapitilije mphela kutiyavya kuti tipitilije kunkhala naye paushamwali wotang’a olo pavuli pakuti takalamba: ndipo aliyense wasewo angakwanishe kunena kuti Yehova “ni Mwala wangu.”—Sal. 92:14, 15