Makonsho ofumila kuli oŵelenga

Kansi ophunzila 70 ŵenze etuma Yesu nthawe iyakine kuti akalalikile enze kuni yove penzeyambisha Mwambo wa Chakulya Chanchingulo cha Ambuye? Kansi enze eleka kuyenda naye pamozi?

Tufunikalini kuganiza kuti chifukwa chakuti ophunzila 70 penzeve Yesu penzeyambisha Mwambo wa Chakulya chanchingulo cha Ambuye, niye kuti Yesu enze eŵakana kapena kuti enze eleka kuyenda naye pamozi. Yesu enzengofuna kunkhala na atumwi ŵake panthawe yamene iyo.

Yesu enzesanglala na magulu onse aŵili a ophunzila ŵake; atumwi 12 komasoti ophunzila 70. Poyamba, yove esankha ŵanthu 12 pakati pa ophunzila ŵake anyinji amene eŵaita kuti atumwi. (Luk. 6:12-16) Yove enze ku Galileya ‘pechisonkhanisha atumwi 12, . . . noŵatumija kuti akalalikile za Ufumu wa Mulungu komasoti kupojeka ŵanthu.’ (Luk. 9:1-6) Pavuli pake, Yesu penze ku Yudeya “esankha ŵanthu ayakine 70 noŵatumija aŵili-aŵili.” (Luk. 9:51; 10:1) Tetyo, Yesu enze pamozi na ophunzila ŵake m’madela osiyana-siyana ŵechilalikila uthenga uweme.

Ayuda amene echizankhala ophunzila a Yesu enzefunika kuchita mwambo wa Pasika chaka chilichonse pamozi na mabanja ŵawo. (Eks. 12:6-11, 17-20) Penze esala patontho kuti apaiwe, Yesu pamozi na ophunzila ŵake eluta ku Yerusalemu. Koma yove aliyeite ophunzila ŵake onse,—amene enze ofumila ku Yudeya, ku Galileya, komasoti ku Pereya kuti achite naye pamozi mwambo wa Pasika. N’vowonekelatu kuti panthawe yamene iyi Yesu enzengofuna atumwi ŵake ŵeka kuti ankhale naye pamozi panthawe yamene iyo. Yove euja atumwi ŵake kuti: “Nankhala nufunishisha ngako kuti nilye Pasika wamene uyu pamozi na mwewo nikaliyeyamba kunzunziwa.”—Luk. 22:15.

Yove enze na vifukwa viweme vonenela mawu amene aŵa. Yesu enze esala patontho kuti afwe monga “Mwana wa mbelele wa Mulungu wamene ofumya uchimo wa chalo.” (Yoh. 1:29) Vamene ivi venzefunika kuchitikila ku Yerusalemu amene ni malo ŵenzepelekela nsembe kwa Mulungu. Mwana wa mbelele wenzekulya Aisiraeli pa mwambo wa Pasika, wenzeŵakumbusha vechichita Yehova poŵamasula ku Iguputo. (1 Ako. 5:7, 8) Koma kupitila munsembe yake, Yesu enzeyembekezela kuŵachitila vinyinji ngako kupambana vamene ivo. Yove enzeyembekezela kumasula mitundu yonse ya ŵanthu kuuchimo na imfwa. (Aife. 2:20-22) Chifukwa chansembe ya Yesu, atumwi 12 amene awo enzeyembekezela kunkhala fandeshoni ya mpingo wa Chikhilisitu. N’vochitisha chidwi kuti tauni ituŵa ya Yerusalemu wakululu ili na “myala 12 yomangila fandeshoni”, ndipo pamyala yamene iyo palilembe “mazina 12 ŵa atumwi 12 a Mwana wa mbelele.” (Chiv. 21:10-14) N’chendi, atumwi okhulupilika a Yesu enzefunika kupasiwa udindo ukulu ngako pokwanilisha chifunilo cha Mulungu. Tetyo, n’pomvwika kuti Yesu enzefuna kunkhala nawo pamozi panthawe yosilijila ya mwambo wa Pasika, komasoti penzeyambisha mwambo uyakine—wamene ni Chakulya chanchingulo cha Ambuye.

Ophunzila a Yesu 70 pamozi na ayakine, enzelini pamozi na Yesu pachakulya chamene icho. Koma olo n’tetyo, ophunzila onse amene ewonesha kuti enze okhulupilika enzeyembekezela kupindula na mwambo wechiyambisha Yesu,—wamene ni Chakulya chanchingulo cha Ambuye. Onse mwa ophunzila amene awo amene echizankhala Akhilisitu ozozewa pavuli pake, enzeyembekezela kuloŵa m’pangano ya Ufumu yechitomola Yesu penze na atumwi ŵake 12 usiku wamene uyo.—Luk. 22:29, 30.