Mukowonesha kuti mutembeja ‘mphaso za analume’

1. Kansi ni mphaso ziyakine zotyani zechitipasa Yesu?

PALIYE munthu wopasa monga ni Yesu pano pa chalo. Yove penzepano pachalo, enzekatishila ntchito mphamvu zake zodabwisa kuti ayavye ayakine. (Luk. 9:12-17) Yove epeleka mphaso ikulu ngako pechilolela kupeleka moyo wake chifukwa cha sewo. (Yoh. 15:13) Kufumila pechiushiwa, Yesu wankhala opitilija kuwonesha ntima wopasa. Monga nimwechitilonjezela, yove wasenga Yehova kuti atipase mzimu wake utuŵa kuti utiphunzise komasoti kutitang’isha. (Yoh. 14:16, 17, mawu amnyansi; 16:13) Kupitila mumisonkhano ya mpingo, Yesu otiphunzisa mwatingalalikilile kuli ŵanthu onse komasoti kupanga ophunzila.—Mat. 28:18-20.

2. Kansi niŵani amene ali m’gulu ya ‘mphaso za analume’ zutomolewa pa Aifenso 4:7, 8?

² Ganizilani mphaso ziyakine zechitipasa Yesu. Mtumwi Paulo elemba kuti Yesu pechikwela kululu, “epeleka analume kuti ankhale mphaso.” (Ŵelengani Aifenso 4:7, 8.) Paulo efotokoza kuti Yesu epeleka analume amene aŵa kuti akoyavya mpingo munjila zosiyana-siyana. (Aife. 1:22, 23; 4:11-13) Masiku ŵano, ‘mphaso za analume’ zamene izi zupamikijapo atumiki othandiza, akulu, komasoti opanamila madela.a Koma olo n’tetyo, analume amene aŵa aliye ungwilo, n’chifukwa chake ophoniyesha vinthu viyakine. (Yako. 3:2) Koma Ambuye ŵasu Yesu Khilisitu, oŵakatishila ntchito kuti atiyavye. Kulaŵila chendi, analume amene aŵa ni mphaso zofumila kuli yove.

3. Pelekani chisanzo chowonesha vatingachite poyavya enekwasu amene ni ‘mphaso za analume.’

³ Yesu eika ‘mphaso za analume’ zamene izi kuti zikoyavya mpingo kuti unkhale wotang’a. (Aife. 4:12) Ntchito yakukata analume amene aŵa tingaiyelekezele na ntchito yomanga Ng’anda ya Ufumu. Akhilisitu ayakine okata ntchito yomanga Ng’anda ya Ufumu. Ayakine oyavya pa ntchito yamene iyo popeleka chakulya, kunyamula vipangizo, komasoti mwanjila ziyakine. Molingana na vamene ivi sewo tingayavye atumiki othandiza, akulu, komasoti opanamila dela kupitila mu vinthu vatuchita komasoti vatulaŵila. Tiyeni tiwone mwatingapindulile na ntchito yawo komasoti vatingachite powonesha kuti tutembeja Yesu wamene niye etipasa ‘mphaso za analume’ zamene izi.

ATUMIKI OTHANDIZA OCHITA “UTUMIKI WOYAVYA ŴANTHU”

4. Kansi ni vinthu votyani venzechita atumiki othandiza munthawe ya Akhilisitu oyambilila pochita “utumiki woyavya ŵanthu”?

⁴ Munthawe ya Akhilisitu oyambilila, enekwasu ayakine enzeikiwa kuti akotumikila monga atumiki othandiza. (1 Tim. 3:8) Vuwoneka kuti enekwasu amene awo, enzechita utumiki wechilemba Paulo kuti “utumiki woyavya ŵanthu.” (1 Ako. 12:28) Chifukwa cha vamene ivi, payakine atumiki othandiza enzekata ntchito zofunika ngako poyavya mpingo, vamene venzeyavya kuti akulu akokata luweme ntchito yophunzisa komasoti yoŵetela. Mwachisanzo, payakine atumiki othandiza enzeyavya pa ntchito yokopela Malemba olo kugula vinthu venzefunikila pa ntchito yokopela.

5. Kansi ni ntchito zotyani zakukata atumiki othandiza masiku ŵano?

⁵ Ganizilani ntchito ziyakine zofunika ngako zakukata atumiki othandiza mumpingo. (1 Pet. 4:10) Ove angapasiwe udindo wololela ma akaunti olo magawo ampingo, kulembela mabuku noŵayaŵila kuli Ofalisa, kukatishila ntchito vipangizo vokujila mawu na vowoneshela mavidiyo, kutumikila monga akalinde komasoti kusamalila Ng’anda ya Ufumu. Ntchito zonse zamene izi ni zofunika ngako kuti mpingo ukoyenda luweme. (1 Ako. 14:40) Kuyangijila pamene apo, atumiki othandiza ayakine osogoja mbali za misonkhano komasoti Moyo wasu wachikhilisitu, kupamikijapo kulaŵila nkhani za onse. Ntumiki wothandiza angapasiwesoti ntchito yoyavya nkulu wopanamila kagulu kautumiki wakumunda. Nthawe ziyakine, atumiki othandiza oyenelela angalute pamozi na akulu kuyachita ulwendo wa uchiŵeta.

6. Kansi tili na vifukwa votyani vowoneshela kutembeja ntchito yakukata atumiki othandiza?

⁶ Kansi ntchito ya atumiki othandiza yupindulisha tyani mpingo? Kalongosi muyakine waku Bolivia zina yake Beberly,b enena kuti “Ntchito yakukata atumiki othandiza yuniyavya kuti nikosangalala ngako na misonkhano. Chifukwa cha atumiki othandiza, newo nukwanisha kuimba nyimbo, kupeleka ndemanga, kumvwishila nkhani, kupindula na mavidiyo kupamikijapo vithunzi. Atumiki othandiza okata ntchito yoteteza ŵanthu pamisonkhano, komasoti oyavya ŵanthu amene angakwanishelini kumvwishila misonkhano pamenso na pamenso kuti apindule na mapulogilamu pokatishila ntchito njila ziyakine. Misonkhano ikasila, ove osogolela pa ntchito yotuŵisha, kusamalila ma akaunti komasoti kuwoneshesha kuti tili na mabuku ŵatufunikila. Ntchito zakukata atumiki othandiza, zunikondwelesha ngako!” Leslie, wamene onkhala ku Colombia ndipo mwanalume wake otumikila monga nkulu, enena kuti: “Mwanalume wangu ofunika kuyavyiwa na atumiki othandiza kuti yove akokwanisha kusamalila mautumiki ŵake osiyana-siyana. Paliye kuyavyiwa na atumiki othandiza, sembe onkhala bize ngako, tetyo newo nusangalala chifukwa cha ntima wawo wofunishisha kuyavya.” Tukaikilalini kuti namwe mukumvwa monga nimwechimvwila ove.—1 Tim. 3:13.

7. Kansi tingaŵatembeje tyani atumiki othandiza? (Onanisoti chithunzi.)

⁷ Olo kuti tusangalala chamuntima tikaganizila ntchito zakukata atumiki othandiza, Baibolo yutilimbikisa kuti: “Woneshani kuti nimwe otembeja.” (Akol. 3:15) Nkulu muyakine waku Finland zina yake Cristóvão, ewonesha kutembeja pechilaŵila kuti, “Newo nulemba kalata olo mesedji noikamo lemba kuti nitembeje chinthu chiyakine chechichita ntumiki wothandiza chamene chenitang’isha ngako, komasoti powonesha kutembeja chifukwa cha ntchito yakukata.” Pascal na Jael, amene onkhala ku New Caledonia, opemphelela atumiki othandiza. Pascal enena kuti, “kwalombapano ngako tankhala tumusenga Yehova m’pemphelo, kumupapatila, komasoti kumutembeja chifukwa cha enekwasu osogolela mumpingo wasu.” Yehova omvwishila mapemphelo otetyo ndipo mpingo wonse upindula.—2 Ako. 1:11.

AKULU AMUMPINGO ‘OKATA NTCHITO MWAKHAMA PAKATI PASU’

8. Ndaŵa yanji Paulo elemba kuti akulu amunthawe ya atumwi ‘enzekata ntchito mwakhama’? (1 Atesalonika 5:12, 13)

⁸ Akulu amunthawe ya atumwi enzekata ntchito mwakhama poyavya mpingo. (Ŵelengani 1 Atesalonika 5:12, 13; 1 Tim. 5:17) Ove ‘enzesogolela mumpingo’ —posogoja misonkhano komasoti kupanga vosankha monga bungwe ya akulu. Ove ‘enzelangiza’ enekwasu na akalongosi—popeleka malangizo mwasiteleti koma mwachikondi pofuna kuti mpingo unkhale wotetezeka. (1 Ates. 2:11, 12; 2 Tim. 4:2) N’vowonekelatu kuti analume amene aŵa enzekata ntchito mwakhama posamalila mabanja ŵawo, komasoti kuti apitilije kulitang’isha mwauzimu.—1 Tim. 3:2, 4; Tito 1:6-9.

9. Kansi masiku ŵano akulu osamalila maudindo otyani?

⁹ Akulu masiku ŵano onkhala bize ngako. Ove olalikila mwakhama. (2 Tim. 4:5) Akulu osogolela mwakhama ntchito yolalikila muutumiki wakumunda, olinganija ntchito yolalikila mugawo ya mpingo wawo, komasoti oyavya ofalisa kuti akolalikila komasoti kuphunzisa ŵanthu mokata ntima. Ove otumikilasoti monga oweluza achifundo komasoti aliye sankho. Nkhilisitu akachita chimo ikulu, akulu oyeja-yeja kumuyavya kuti awamyesoti ushamwali wake na Yehova. Komasoti owoneshesha kuti mpingo upitilije kunkhala utuŵa. (1 Ako. 5:12, 13; Agal. 6:1) Ntchito ikulu ngako yakukata akulu ni kuŵetela. (1 Pet. 5:1-3) Ove okamba nkhani za m’Baibolo zokonzekelewa luweme, oyeja-yeja kuziŵa wofalisa aliyense mumpingo, komasoti kuchita maulwendo auchiŵeta. Akulu ayakine, oyavyasoti pantchito yomanga olo kuwamyasoti Ng’anda za Ufumu, kusogolela pamisonkhano yachigawo komasoti kutumikila m’ma Komiti a Olaŵila na Azachipatala kupamikijapo m’ma Dipatimenti Opeleka Chiziŵisho cha Zachipatala. Akulu okata ntchito mwakhama chifukwa cha sewo!

10. Kansi tili na vifukwa votyani votembejela ntchito yakukata akulu?

¹⁰ Yehova elonjeza kuti achiŵeta auzimu akotisamalila luweme ndipo sewo ‘tikoyopalini kanthu olo kuchita wowa.’ (Yer. 23:4) Kalongosi muyakine waku Finland zina yake Johanna, ewona kukwanilishiwa kwa lemba yamene iyi amayi ŵake pechilwala matenda akulu. Yove enena kuti: “Olo kuti venzenivuta kufotokozela ayakine mwenenzemvwila muntima, nkulu muyakine wamene nenzemuziŵalini bwino-bwino enzenimvwishila mwachifundo nikamufotokozela nkhaŵa zangu, enzepemphela nane pamozi, komasoti kunisimikijila kuti Yehova onikonda. Nukumbukilalini mawu ŵechilaŵila, koma nizaluŵelini mwechiniyavyila kulimvwa kuti nine wotetezeka. Nukhulupilila kuti Yehova niye emutumija kuti azaniyavye panthawe yovuta yamene iyo.” Kansi akulu mumpingo mwanu okuyavyani tyani?

11. Kansi tingaŵatembeje tyani akulu? (Onanisoti chithunzi.)

¹¹ Yehova ofuna kuti sewo tikoŵatembeja na ntima wonse akulu “amene okata ntchito mwakhama.” (1 Ates. 5:12, 13) Henrietta, wamene onkhalasoti ku Finland, enena kuti: “Akulu oyavya ayakine mofunishisha, koma vamene ivi vutanthauzalini kuti ove ali na nthawe ikulu kupambana ayakine komasoti mphamvu zinyinji ndipo ove okumanasoti na mavuto pa moyo wawo. Nthawe ziyakine nuwauja kuti: ‘Kansi mwewo muziŵa? Mwewo nimwe nkulu muweme ngako. Nenzefuna tyala kuti nikuujeni vamene ivi.’” Kalongosi muyakine waku Türkiyec zina yake Sera enena kuti: “Akulu ofunika kulimbikisiwa kuti apitilije kukata ntchito yawo mwakhama. Tingachite vamene ivi poŵalembela kalata, kuŵaita kuti tizalye nawo chakulya pamozi, olo kuloŵa nawo muutumiki wakumunda.” Kansi pali nkulu wamutembeja ngako chifukwa cha khama yakuwonesha mumpingo? Muwonesheni kuti mutembeja vinthu vakuchita.—1 Ako. 16:18.

OPANAMILA DELA OKATA NTCHITO YOTANG’ISHA MIPINGO

12. Kansi Yesu eikasoti gulu yotyani ya analume kuti akotang’isha mipingo? (1 Atesalonika 2:7, 8)

¹² Yesu Khilisitu epasasoti mpingo ‘mphaso za analume’ amene otumikila mwanjila ziyakine. Mosogolelewa na yove, akulu aku Yerusalemu etumija Paulo, Baranaba, komasoti ayakine monga opanamila madela. (Mach. 11:22) Ndaŵa yanji? Eŵatumija kuti akachite utumiki wolingana na wakuchita atumiki othandiza komasoti akulu; wamene nikutang’isha mipingo. (Mach. 15:40, 41) Analume amene aŵa enzelolela kusiya moyo uweme noika moyo wawo pangozi kuti aphunzise komasoti kutang’isha ayakine.—Ŵelengani 1 Atesalonika 2:7, 8.

13. Kansi opanamila madela okata ntchito zotyani?

¹³ Enekwasu opanamila madela onkhalila kufuluka-fuluka nthawe zonse. Ayakine, oyenda msenga wamakilomita mahandiledi anyinji kuti akafwike pa mpingo uyakine. Sondo iliyonse, mkwasu wopanamila dela olaŵila nkhani zinyinji, kuchita maulwendo auchiŵeta, kusogoja nsonkhano wa apainiya, nsonkhano wa akulu, komasoti nsonkhano wokonzekela utumiki wakumunda. Okonzekelasoti nkhani, kulinganija misonkhano ya dela komasoti ya chigawo. Yove ophunzisa m’masikulu ŵa apainiya, okonzekela misonkhano yapadela ya apainiya amudela yamene iyo komasoti osamalila nkhani ziyakine—kupamikijapo nkhani zokulumija zofumila ku ofesi ya nthambi.

14. Kansi ni vifukwa votyani vatili navo votembejela ntchito zakukata opanamila dela?

¹⁴ Kansi mipingo yupindula tyani na ntchito yapadela yakukata opanamila madela? Polaŵila vakuchita opanamila dela keno otandaja pampingo, mkwasu muyakine waku Türkiye enena kuti: “Nthawe iliyonse akawela kuzatitandaja onilimbikisa kuti nikochita vinyinji poyavya enekwasu na akalongosi. Natandajiwapo na opanamila madela anyinji, koma paliye wopanamila olo m’mozi wamene eniujapo kale kuti alibize komasoti aliye mpata wakuti angalaŵile nane.” Johanna watatomola poyamba, eloŵa muutumiki pamozi na wopanamila dela koma aliyefwane aliyense pang’anda, yove enena kuti, “Nizaluŵelini vechitika nsiku yamene iyo. Panthawe yamene iyi enekwangu aŵili enze echingofuluka kwalombapano ndipo nenze niŵayewa ngako. Wopanamila dela enitang’isha ngako ndipo eniyavya kuwona kuti patutumikila Yehova palipano, n’vosakwanishika kunkhala pamozi na achibale ŵasu komasoti ayasu nthawe zonse, koma m’chalo chanyowani tizankhale na nthawe ikulu yochitila vinthu pamozi.” Opanamila madela anyinji, ochitasoti chimozi-mozi potang’isha ŵanthu ayakine m’madela ŵakutumikila.—Mach. 20:37–21:1.

15. (a) Mokatijana na 3 Yohani 5-8, kansi tingawoneshe tyani kuti tutembeja ntchito yakukata opanamila madela? (Onanisoti chithunzi.) (b) Kansi tili na vifukwa votyani votembejela anakazi ŵa enekwasu osogolela mumpingo, ndipo tingachite tyani vamene ivi? (Onani bokosi yakuti “Tikokumbukila vakuchita anakazi ŵawo.”)

¹⁵ Ntumwi Yohani elimbikisa Gayo kuti alondele luweme enekwasu ayakine amene enze eluta kuyatandaja mpingo ndipo emuuja kuti “ukoyeja-yeja kuŵayavya munjila yangakondwele nayo Mulungu.” (Ŵelengani 3 Yohani 5-8.) Njila imozi yatingachitile vamene ivi nikuita wopanamila dela kuti tizalye naye chakulya pamozi. Njila iyakine nikuchilikiza makonzedwe awankhazikisha mpingo okhuza kutandaja kwake. Leslie, watatomola poyamba owonesha kutembeja kwake munjila ziyakinesoti. Yove enena kuti: “Nupemphela kuti Yehova akoŵasamalila noŵapasa vakufunikila pa moyo wawo. Newo pamozi na mwanalume wangu tuŵalembela makalata poŵauja mwakwatiyavyila kutandaja kwawo.” Mukokumbukila kuti opanamila madela ni ŵanthu aliye ungwilo monga ni sewo. Nthawe ziyakine ove olwala, onkhala na nkhaŵa, komasoti kufoka. Mawu ŵanu aweme komasoti mphaso yofumila pansi pa ntima yamungaŵapase, ingankhale yankho ya mapemphelo awopanamila dela wanu!—Miy. 12:25.

SEWO TUFUNIKILA KUSOGOLELEWA NA ‘MPHASO ZA ANALUME’

16. Mokatijana na Miyambo 3:27, kansi enekwasu angalikonshe makonsho otyani?

¹⁶ Akhilisitu kuzenguluka pachalo chonse, ofunikila enekwasu amene ni ‘mphaso za analume’ kuti akoŵasogolela. Keno mwewo nimwe mkwasu wobatizika, kansi ‘mungakwanishe kuŵayavya’? (Ŵelengani Miyambo 3:27.) Kansi nimwe wofunishisha kutumikila monga ntumiki wothandiza? Keno nimwe ntumiki wothandiza, kansi nimwe wofunishisha kukwanilisha cholinga chanu chotumikila monga nkulu?d Kansi mungakwanishe kuchinja vinthu viyakine pa moyo wanu kuti mukaloŵe Sikulu ya Akhilisitu Olalikila za Ufumu? Sikulu yamene iyi izakukonzekelesheni kuti Yesu akukatishileni ntchito mokwanila. Keno muwona kuti mungakwanishelini, pemphelani kwa Yehova. Mukomusenga kuti akupaseni mzimu wake utuŵa kuti mukwanishe kukata ntchito iliyonse yamwapasiwa.—Luk. 11:13; Mach. 20:28.

17. Kansi enekwasu amene ni ‘mphaso za analume’ ni umboni wakuti Mfumu yasu Yesu Khilisitu ochita chinji?

¹⁷ Enekwasu ŵawaika Yesu kuti ankhale ‘mphaso za analume’, ni umboni wakuti yove otisogolela masiku ŵano osilijila. (Mat. 28:20) Tutembeja ngako kuti tili na Mfumu yachikondi komasoti ya ntima wopasa yamene yuziŵa vinthu vatufunikila, ndipo yatipasa enekwasu kuti akotiyavya. Tetyo, mukofwana nthawe kuti muwoneshe kutembeja kwanu kuli analume akhama amene aŵa. Ndipo osaluŵa kutembeja Yehova, chifukwa niye opeleka “mphaso iliyonse iweme komasoti yamngwilo.”—Yako. 1:17.