Mukosenga akulu kuti akuyavyeni

1. Kansi Yehova owonesha tyani kuti mbelele zake ni zantengo wapalulu kuli yove?

YEHOVA owona kuti mbelele zake ni zantengo wapalulu ngako. Yove egula mbelele zamene izo pokatishila ntchito milopa ya Yesu ndipo eika akulu mumpingo kuti akozisamalila. (Ntchi. 20:28) Mulungu ofuna kuti mbelele zake zikosamaliliwa mwachikondi. Mosogolelewa na Khilisitu, akulu otang’isha mbelele zamene izi komasoti kuziteteza ku vinthu vamene vingaziwononge mwauzimu.—Yes. 32:1, 2.

2. Mokatijana na lemba ya Ezekieli 34:15, 16, kansi ni ŵanthu otyani ŵakuyavya ngako Yehova?

² Yehova ozidela nkhaŵa ngako mbelele zake zonse, ngako-ngako zala zamene zukumana na mavuto. Pokatishila ntchito akulu, Mulungu oyavya Akhilisitu amene okumana na mavuto mwauzimu. (Ŵelengani Ezekieli 34:15, 16.) Koma olo ni tetyo, Mulungu ofunasoti kuti tikosakila thandizo pakafunikila. Pa nthawe monga ni yamene iyo, tufunikila kupemphela mofumila pansi pantima kuti Mulungu atiyavye pokatishila ntchito “achiŵeta na aphunzisi” a mumpingo.—Aife. 4:11, 12.

3. Kansi kuganizila za udindo wali nawo akulu kungatiyavye tyani tonse?

³ Munkhani ino, tikambilane makonzedwe ŵechinkhazikisha Yehova kuti akotiyavya mwauzimu pokatishila ntchito akulu. Tikambilanesoti mayankho amakonsho aŵa okonkhapo: Kansi ni pa nthawe yotyani yatingasenge akulu kuti atiyavye? Ndaŵa yanji tufunikila kuchita vamene ivi? Ndipo ove angatiyavye tyani? Payakine mwewo paliye vuto iliyonse yamukumana nayo palipano. Koma olo ni tetyo, mayankho amakonsho amene aŵa angakuyavyeni kuti mukotembeja ngako makonzedwe amene aŵa ŵechinkhazikisha Mulungu, ndipo vamene ivi vingapulumushe moyo wanu.

KANSI NI PA NTHAWE YOTYANI ‘PATINGAITE AKULU’?

4. Ndaŵa yanji tinganene kuti lemba ya Yakobo 5:14-16, 19, 20 yunena za kulwala mwauzimu? (Onanisoti vithunzi.)

⁴ Mu mawu oyambilila ŵechilemba ntumwi Yakobo ofotokoza makonzedwe amene aŵa ŵechinkhazikisha Mulungu kuti akotiyavya mwauzimu, ekonsha kuti: “Kansi pakati panu pali aliyense wamene olwala? Aite akulu a mpingo.” (Ŵelengani Yakobo 5:14-16, 19, 20.) Tikawona nkhani yonse pa lemba yamene iyi, tukwanisha kuwona kuti mawu ŵechilaŵila Yakobo onena za matenda auzimu. Mwachisanzo, lemba yamene iyi yulimbikisa ŵanthu amene olwala kuti aite akulu, osati adokota. Komasoti Yakobo ofotokoza kuti munthu wolwala wamene uyo angapole matenda ŵake pavuli pakuti machimo ŵake akhululukiliwa. Pankhani ziyakine, vinthu vakufunikila kuchita munthu wamene olwala mwauzimu ni volingana na vakufunikila kuchita kuti apole matenda ngawo-ngawo. Tikalwala matenda ngawo-ngawo, tuluta kuyawonana na dokota, kumufotokozela mwatumvwila komasoti kukonkheja malangizo ŵake. Molingana na vamene ivi, tikalwala mwauzimu tufunikila kuluta kuyauja akulu, kuŵafotokozela nkhani yonse komasoti kukonkheja malangizo a mmalemba ŵangatipase.

5. Kansi ni chinji chingatiyavye kuziŵa keno ushamwali wasu na Yehova wayamba kufoka?

⁵ Mu buku ya Yakobo chapitala 5, Yakobo otilimbikisa kuti tikofotokozela akulu tikawona kuti ushamwali wasu na Yehova wayamba kufoka. Ni chinthu chanzelu ngako kusakila thandizo tikaliye chita chimo ikulu yamene ingawononge ushamwali wasu na Mulungu! Tufunikila kulifufuza mofumila pansi pa ntima. Malemba otichenjeja kuti tikopewa kulisempha na maganizo awenye pa nkhani ya mwaulili moyo wasu wauzimu. (Yako. 1:22) Akhilisitu ayakine oyambilila aku Sade, enzelisempha na maganizo awenye ndipo Yesu eŵachenjeja vokhuza vuto yauzimu yamene iyo. (Chiv. 3:1, 2) Njila imozi yatingalifufuzile mwauzimu ni kulinganija khama yatuwonesha palipano potumikila Mulungu na yetenze nayo poyamba. (Chiv. 2:4, 5) Tingalikonshe kuti: ‘Kansi nusangalala keno nuŵelenga Baibolo komasoti kuganizila monga ni mwenenzechitila poyamba? Kansi nthawe ziyakine nulutalini kumisonkhano? Kansi naleka kukata ntchito mwakhama mu utumiki? Kansi nthawe zinyinji nuganizila ngako vinthu vosangulusha komasoti katundu ndipo vuniwonongela nthawe ikulu?’ Keno mwayankha kuti eye pakonsho iyakine mwa makonsho amene aŵa, vingawoneshe kuti ushamwali wanu na Yehova wayamba kufoka ndipo mufunikila kuchitapo kanthu kuti vinthu osati viipe ngako. Keno tingakwanishelini kuwamyasoti ushamwali wasu na Yehova paliye kuyavyiwa olo keno tifwaya kale mfundo za Yehova, tufunikila kusenga akulu kuti atiyavye.

6. Kansi ŵanthu amene echita machimo akulu-akulu ofunikila kuchita tyani?

⁶ Ni vowonekelatu kuti munthu akachita chimo ikulu yamene ingachitishe kuti achosewe mumpingo, ofunikila kuyafotokoza kuli akulu (1 Ako. 5:11-13) Munthu wamene wachita chimo ikulu, angakwanishelini payeka kuwamya ushamwali wake na Yehova. Kuti Yehova atikhululukile pokatishila ntchito nsembe ya dipo, sewo tufunikila ‘kuchita vinthu vuwonesha kulapa.’ (Ntchi. 26:20) Ntchito zamene izo zupamikijapo kuuja akulu keno tachita chimo.

7. Kansi ni ŵanisoti amene ofunikila kuyavyiwa na akulu?

⁷ Akulu ofunishishasoti kuyavya ŵanthu amene ovutika kulimbana na vilako-lako viipa. (Ntchi. 20:35) Nthawe ziyakine vingakuvuteni ngako kulimbana na vilako-lako vanu viipa keno poyamba mwenzekatishila ntchito mankhwala osokoneza tonfwe, kololela vinthu volaula olo kuchita minkhalidwe ya chiwelewele. Mwewo mungafunikile thandizo kuti mukwanishe kulimbana na mavuto amene aŵa. Mungachite luweme kulaŵila na nkulu wamene angakumvwishileni luweme, kukupasani malangizo oyavya komasoti kukusimikijilani kuti mungakwanishe kukondwelesha Yehova mwakupitilija kulimbana na vilako-lako vamene ivo viipa. (Mlal. 4:12) Mukafoka pa nkhondo yamene iyi, akulu angakuyavyeni pokukumbushani kuti mwewo nimwe munthu wolichefya komasoti kuti muwona kuti ushamwali wanu na Yehova ni chinthu chofunika ngako.—1 Ako. 10:12.

8. Kansi tufunikila kuyafotokoza kuli akulu tikaphoniyesha chinthu chilichonse? Fotokozani

⁸ Ni vutolini iliyonse yauzimu yatingalute nayo kuli akulu kuti atiyavye. Mwachisanzo, nthawe ziyakine mungalaŵile vinthu mosawama ntima kuli nkwasu olo kalongosi, payakinesoti kumukalipila. Mmalo moluta kuyafotokozela akulu nkhani yamene iyo, mungachite luweme kukonkheja malangizo a Yesu okhuza kunkhazikisha ntendele na nkwasu olo kalongosi wamene uyo. (Mat. 5:23, 24) Mungachite luweme kuŵelenga nkhani zokhuza kufasa, kuleza ntima komasoti kulilesha na cholinga chakuti osati muzavutike kuwonesha minkhalidwe yamene iyo paulwendo wokonkhapo. Mukawona kuti mukalifunikila mphela thandizo pankhani yamene iyi, mungasenge nkulu kuti akuyavyeni. Mu kalata yake yechilembela mpingo wa Afilipi, ntumwi Paulo esenga nkwasu muyakine wamene Baibolo yunenalini zina yake kuti ayavye Eodiya na Suntuke kuti asilije kuphoniyana maganizo kwawo. Molingana na vamene ivi, nkulu wa mumpingo mwanu angakuyavyeni kuti vinthu vikuyendeleni luweme.—Afil. 4:2, 3.

NDAŴA YANJI TUFUNIKILA KUITA AKULU?

9. Ndaŵa yanji tufunikilalini kulola kuti nsoni zitikangishe kufotokozela akulu kuti atiyavye? (Miyambo 28:13)

⁹ Sewo tufunikila chikhulupililo komasoti kutang’a ntima kuti tikwanishe kuulula kuli akulu keno tachita chimo komasoti kuti atiyavye kulimbana na vilako-lako vasu viipa. Tufunikilalini kulola kuti nsoni zitikangishe kusenga akulu kuti atiyavye. Ndaŵa yanji? Chifukwa chakuti keno tukonkheja makonzedwe a Yehova, tuwonesha kuti tumukhulupilila komasoti kuti tudalila malangizo ŵakutipasa kuti tipitilije kunkhala na moyo uweme mwauzimu komasoti chikhulupililo chotang’a. Sewo tuziŵa kuti tufunikila kuyavyiwa na yove kuti tipitilije kuchita vinthu viweme. (Sal. 94:18) Komasoti keno tachita chimo, Mulungu angatiwoneshe chifundo chikulu tikaulula nochinja vochita vasu.—Ŵelengani Miyambo 28:13.

10. Kansi ni chinji chingachitike keno sewo tufisa machimo ŵasu?

¹⁰ Mmalo mwakuti Mulungu atidalise, vinthu vingatiipile ngako keno tufisa machimo ŵasu mmalo moŵaulula kuli akulu. Mfumu Davite penzefisa machimo ŵake, enzevutika mwamaganizo, mwakuthupi komasoti mwauzimu. (Sal. 32:3-5) Molingana na matenda olo chilonda, vuto yauzimu ingakulile-kulile tikaleka kuchitapo kanthu kuti tipole. Yehova oziŵa kuti vamene ivi vingatichitikile, ni chifukwa chake otisenga kuti ‘tinkhalesoti paushamwali uweme na yove’ pokatishila ntchito njila zakutiyavyila mwauzimu.—Yes. 1:5, 6, 18.

11. Kansi ayakine vingaŵakhuze tyani keno tufisa machimo akulu-akulu?

¹¹ Keno tufisa machimo akulu-akulu, vingakhuzesoti ŵanthu ayakine. Kuchita vamene ivi kungakangishe mzimu wa Mulungu kuti ukokata luweme ntchito mumpingo, ndipo ntendele wa akwasu na akalongosi ungankhale pangozi. (Aife. 4:30) Molingana na vamene ivi, tikaziŵa kuti Mkhilisitu muyakine wachita chimo ikulu, tufunikila kumuja kuti akafotokoze kuli akulu.a Kufisa chimo ikulu yawachita muyasu kungachitishe kuti nase tinkhale na mulandu. (Lev. 5:1) Chikondi chasu kwa Yehova chufunikila kutilimbikisa kuchitapo kanthu komasoti kulaŵila vinthu vachendi. Tikochita tetyo, mpingo ungapitilije kunkhala utuŵa komasoti tingayavye munthu wamene uyo kuti ankhalesoti paushamwali uweme na Yehova.

KANSI AKULU OTIYAVYA TYANI?

12. Kansi akulu oyavya tyani ŵanthu amene ni ofoka mwauzimu?

¹² Akulu ephunzisiwa mwangachitile poyavya ŵanthu amene ni ofoka mwauzimu. (1 Ates. 5:14) Keno mwachita chimo ikulu, akulu angakukonsheni makonsho kuti aziŵe mwamuganizila komasoti mwamumvwila muntima mwanu. (Miy. 20:5) Mwewo mungaŵapepushile ntchito keno mulaŵila momasuka, olo kuti vingankhale vovuta kuli mwewo chifukwa cha chinkhalidwe chanu, umunthu wanu olo chifukwa chakuti muchita nsoni na vinthu vamwachita. Ndipo osati mukodela nkhaŵa kuti mungalaŵile vinthu visali vamene. (Yobu 6:3) Mmalo mochita vinthu mosaganiza luweme chifukwa chokulumija, akulu angayeje-yeje kumvwishila mosamala kuti aziŵe nkhani yonse akaliye kukupasani malangizo. (Miy. 18:13) Akulu oziŵa kuti kupeleka thandizo yakufunikila munthu muyakine kungatole nthawe. Tetyo ove okumbukila kuti angafunikile kutandala na munthu muyakine moweleja-weleja kuti amuyavye mwanjila iweme.

13. Kansi malangizo ofumila mu Malemba komasoti mapemphelo ŵakupeleka akulu angatiyavye tyani? (Onanisoti vithunzi.)

¹³ Akulu ofunalini kuti mwewo mukolimvwila chisoni mopitilila malile chifukwa cha vinthu vamwachita. Mmalo mwake, ove angakupempheleleni kuti Mulungu akuyavyeni. Yehova angayankhe mapemphelo ŵawo amene awo ndipo angakuyavyeni ‘mwamphamvu ngako.’ Vamene ivi vingakutang’isheni komasoti kukutonthojani kupambana mwamungaganizile. Thandizo yangapeleke akulu kuli munthu wamene uyo ingapamikijeposoti ‘kumuzoleka mafuta mu zina ya Yehova.’ (Yako. 5:14-16) “Mafuta” amene aŵa otanthauza choonadi cha mmawu a Mulungu. Pokatishila ntchito Baibolo mwaluso, akulu angakuyavyeni kuti ntima wanu unkhale pansi komasoti kukutonthojani, ndipo mungayambesoti kunkhala paushamwali uweme na Yehova. (Yes. 57:18) Malangizo ofumila mu Malemba ŵangakupaseni, angakuyavyeni kuti musimikijile na ntima wonse kuti mukochita vinthu viweme. Kupitila muli ove, mwewo mungakwanishe kumvwa Mawu a Yehova okuujani kuti: “Njila ni iyi. Yendani munjila yamene iyi.”—Yes. 30:21.

14. Mokatijana na Agalantiya 6:1, kansi akulu oyavya tyani ŵanthu amene ayamba kuyenda “mu njila yophoniyeka mosaziŵa”? (Onanisoti chithunzi.)

¹⁴ Ŵelengani Agalantiya 6:1. Mkhilisitu wamene ‘oyenda munjila yophoniyeka’ ochitalini vinthu mokatijana na mfundo zolungama za Yehova. Ove angasankhe vinthu mosaganiza luweme olo kuchita chimo ikulu. Chifukwa cha chikondi, akulu ‘oyeja kumuyavya munthu wamene uyo na mzimu wofasa.’ Mawu Achigiliki ŵechikatishila ntchito pa lemba yamene iyi akuti “kumuyavya” enzeŵakatishila ntchito pofotokoza venzechita dokota keno bonzo yatyoka pofuna kuti ikatanesoti luweme. Dokota muweme ochita vinthu mosamala ngako akafuna kuwamya bonzo yotyoka kuti munthu wamene uyo osati amvwe kuŵaŵa ngako. Akulu akafuna kupeleka malangizo kuli munthu wamene oyenda munjila yophoniyeka ofunalini kuti munthu wamene uyo atamane ngako. Mmalo mwake, ove ochita vonse vangakwanishe pomulangiza mwachikondi. Ove olangiziwasoti kuti ‘akonkhala osamala.’ Poyavya munthu muyakine kuti akokatishila ntchito mfundo zamu Baibolo, ove okumbukila kuti nawosoti ophoniyesha vinthu viyakine. Poganizila mfundo yamene iyi ove opewa kuganiza kuti ni aweme ngako kupambana munthu wamene uyo wakuyavya. Komasoti oyeja-yeja kuchita vinthu molichefya nowonesha kuwama ntima.—1 Pet. 3:8.

15. Kansi tufunikila kuchita tyani keno tulimbana na vuto iyakine?

¹⁵ Sewo tingakwanishe kuŵadalila akulu a mumpingo. Ove oziŵa luweme mwangasungile nkhani zasu za chisinsi, kukatishila ntchito Baibolo potipasa malangizo mmalo modalila nzelu zawo komasoti kutiyavya kunyamula katundu wasu. (Miy. 11:13; Agal. 6:2) Akulu ali na minkhalidwe komasoti maluso osiyana-siyana. Koma sewo tingakwanishe kulaŵila na nkulu aliyense tikakumana na mavuto. Tikokumbukila kuti ni posafunikila kusenga malangizo mwachisawawa pofuna tyala kuti tifwane malangizo okatijana na vaufuna ntima wasu. Keno tuchita tetyo, tingalingane na ŵanthu amene ofuna tyala kuujiwa “vinthu vuŵawamila mmatu mwawo” mmalo moujiwa “vinthu vachilungamo” vofumila mu Mawu a Mulungu. (2 Tim. 4:3) Keno tufotokozela nkulu vuto iyakine yatakumana nayo, yove angatikonshe keno pali nkulu muyakine watafotokozelako kale komasoti malangizo awatipasa. Ndipo molichefya, yove angakonshe akulu ayakine kuti amuyavye kuziŵa vangachite pa nkhani yamene iyo.—Miy. 13:10.

UDINDO WALI NAWO MUNTHU ALIYENSE PAYEKA

16. Kansi tonse ali na udindo wotyani?

¹⁶ Olo kuti akulu ali na udindo wololela mbelele za Mulungu, ove opewa kuzisankhila vochita. Aliyense wa sewo ali na ufulu wolisankhila yeka vochita kuti ankhale na moyo wolipeleka kwa Mulungu. Aliyense wa sewo azayankhe yeka kwa Mulungu pa nkhani ya vinthu vakulaŵila komasoti vakuchita. Moyavyiwa na Mulungu, sewo tingapitilije kunkhala okhulupilika olo kuti tukumana na mavuto. (Alo. 14:12) Ni chifukwa chake akulu opewa kutisankhila vochita, koma mmalo mwake ove otiyavya kuziŵa maganizo a Yehova pa nkhani iyakine pokatishila ntchito Baibolo mmalo motisankhila vochita. Keno tukatishila ntchito malangizo ŵawo ofumila mu Malemba, tingaliphunzise ‘kukatishila ntchito luso yasu yoganiza’ vamene vingatiyavye kuti tikopanga vosankha mwanzelu.—Ahe. 5:14.

17. Kansi ni chinji chakufuna Yehova kuli sewo?

¹⁷ Tili na mwayi ukulu ngako wonkhala mbelele za Yehova! Yehova etumija Yesu wamene ni “chiŵeta muweme” kuti azatipelekele dipo na cholinga chakuti tinkhale na mwayi wakuzafwana moyo wosasila. (Yoh. 10:11) Ndipo kupitila muli akulu, Yehova okwanilisha mawu ŵechilonjeza akuti: “Nizakupaseni achiŵeta amene ochita vinthu vokatijana na vanufuna newo ndipo azakuyavyeni kuti muziŵe vinthu vinyinji komasoti kuti munkhale omvwisha vinthu.” (Yer. 3:15) Tikalwala mwauzimu olo tikafoka, tufunikilalini kuwaya-waya kusenga akulu kuti atiyavye. Keno tuchita tetyo, tizakwanishe kuwona luweme mwakuŵakatishila ntchito Yehova kuti atiyavye.