NKHANI YOPHUNZILA N.° 34
NYIMBO N.° 107 Mulungu niye chisanzo chikulu cha chikondi
Vangachite akulu powonesha chikondi na chifundo keno munthu wachita chimo
“Mulungu okuwonesha kuwama ntima kwake kukulu [. . .] nacholinga chakuti ulape.”—ALO. 2:4.
CHOLINGA CHANKHANI
Tiwone vangachite akulu kuti ayavye ŵanthu amene achita machimo akulu-akulu mumpingo.
1. Kansi n’chinji chingachitike pavuli pakuti munthu wachita chimo?
MUNKHANI yapita, tewona vechichita ntumwi Paulo na munthu waku Kolinto wamene echita chimo ikulu. Munthu wamene uyo enzefunalini kulapa ndipo enzefunika kuchosewa mumpingo. Koma olo n’tetyo, lemba pafumila mutu wa ino nkhani yuwonesha kuti olo munthu wamene wachita chimo ikulu angakwanishe kulapa. Yove angalape pavuli pakuti wayavyiwa. (Alo. 2:4) Kansi akulu angachite tyani poyavya munthu kuti alape?
2-3. Kansi tufunikila kuchita chinji tikaziŵa kuti Nkhilisitu muyasu wachita chimo ikulu, ndipo ndaŵa yanji?
2 Akaliye kumana na munthu kuti amuyavye, akulu ofunika kuziŵa nkhani yonse poyamba. Kansi tingachite tyani tikaziŵa kuti Nkhilisitu muyasu wachita chimo ikulu yamene ingachitishe kuti achosewe mumpingo? Tufunika kumulimbikisa kuti akauje akulu kuti amuyavye.—Yes. 1:18; Mach. 20:28; 1 Pet. 5:2.
3 Lomba tingachite tyani keno yove okana kuti akalaŵile kuli akulu? Vikankhala tetyo, sewo tingachite luweme kuluta kuyauja akulu kuti munthu wamene uyo alondele thandizo yakufunikila. Tikachita tetyo, tingawoneshe kuti tili na chikondi chifukwa tufunalini kuti timuluze mkwasu olo kalongosi wamene uyo. Keno yove opitilija kuchita vinthu viipa, angawononge ushamwali wake na Yehova. Yove angawonongesoti mbili iweme ya mpingo. Tetyo, tufunika kuchitapo kanthu motang’a ntima powonesha kuti tukonda Yehova komasoti mkwasu olo kalongosi wamene uyo.—Sal. 27:14.
VAKUCHITA AKULU POYAVYA ŴANTHU AMENE ACHITA CHIMO IKULU
4. Kansi akulu onkhala na cholinga chotyani akakumana na munthu wamene wachita chimo ikulu?
4 Munthu muyakine akachita chimo ikulu mumpingo, bungwe ya akulu ikosankha akulu atatu amene niwoyenelela kuti ankhale komiti.a Akulu amene awo, ofunika kuchita vinthu molichefya. Panthawe yakuyavya munthu wamene wachita chimo kuti alape, ove ofunikalini kuchita mukakamija kuti achinje. (Deut. 30:19) Akulu oziŵa kuti ni ŵanthulini onse amene angawoneshe ntima wolapa monga nimwechichitila mfumu Davide. (2 Sam. 12:13) Ŵanthu ayakine akachita chimo, angakane kumvwila malangizo ofumila kwa Yehova. (Gen. 4:6-8) Koma olo n’tetyo, cholinga cha akulu n’kuchita vonse vangakwanishe poyavya munthu wamene wachita chimo kuti alape. Kansi akulu ofunikila kukumbukila chinji akakumana na munthu wamene wachita chimo?
5. Kansi akulu ofunikila kuganizila malangizo otyani akakumana na munthu wamene wachita chimo? (2 Timoteyo 2:24-26) (Onanisoti chithunzi.)
5 Akulu owona kuti munthu wamene wachita chimo ni mbelele ya ntengo wapatali yamene yasokela. (Luk. 15:4, 6) Chifukwa cha vamene ivi, ove akakumana naye olaŵilalini mwankhanza olo kuchita naye vinthu mosawama ntima; akulu ofunikalini kumukonsha tyala makonsho kuti aziŵe nkhani yonse. M’malomwake, ove owonesha minkhalidwe yutomolewa pa 2 Timoteyo 2:24-26. (Ŵelengani.) Akulu opitilija kuchita vinthu mowama ntima, modekha, komasoti mwachifundo kuti amufwike pantima munthu wamene wachita chimo ikulu.
Molingana na venzechita achiŵeta akale-kale, akulu oyeja-yeja kuti afwane mbelele zosokela (Onani ndime 5.)
6. Kansi akulu angakonzekeleshe tyani mitima yawo akaliye kumana na munthu wamene wachita chimo? (Aloma 2:4)
6 Akulu okonzekelesha ntima wawo. Ove oyeja-yeja kukonkheja Yehova pochita vinthu na munthu wamene wachita chimo, ndipo okumbukila vechilaŵila Paulo kuti: “Mulungu okuwonesha kuwama ntima kwake kukulu [. . .] na cholinga chakuti ulape.” (Ŵelengani Aloma 2:4.) Akulu ni achiŵeta, ndipo ofunika kukonkheja malangizo komasoti njila yakukatishila ntchito Yesu Khilisitu posogolela mpingo. (Yes. 11:3, 4; Mat. 18:18-20) Akaliye kumana na munthu wamene wachita chimo, akulu amene ali mukomiti ofunikila kusenga Mulungu kuti aŵayavye kukwanilisha cholinga chawo chamene nikuyavya munthu wamene uyo kuti alape. Ove ofunika kufufuza m’Malemba komasoti n’vofalisa vasu vokhuza nkhani yamene iyo, komasoti kusenga Mulungu kuti aŵayavye kuchita vinthu mwanzelu. Ove ofunika kukambilana vinthu viyakine vakuziŵa vokhuza munthu wamene uyo vamene payakine niye vechitisha kuti achite chinthu chiipa.—Miy. 20:5.
7-8. Kansi akulu angakonkheje tyani kuleza ntima kwa Yehova akakumana na munthu wamene wachita chimo?
7 Akulu okonkheja kuleza ntima kwa Yehova. Ove okumbukila venzechita Yehova na ŵanthu amene echita machimo kuvuli. Mwachisanzo, Yehova echita vinthu mowama ntima ngako na Kaini. Yove emuuja za vinthu viipa vangakumane navo akaleka kuchinja, komasoti madaliso ŵangafwane akachinja. (Gen. 4:6, 7) Yehova etuma mneneli Natani kuti akapeleke malangizo kuli Davide. Natani ekatishila ntchito fanizo yamene yemuyavya Davide kuti alape. (2 Sam. 12:1-7) Komasoti Yehova ‘enzepitilija kutumija’ aneneli ŵake “moweleja-weleja” kuli ntundu wa Aisiraeli wamene wenze wosamvwila. (Yer. 7:24, 25) Mulungu enzeyembekezelalini kuti ŵanthu ŵake alape poyamba kuti ayambe bwino kuŵayavya. M’malo mwake, yove niye enzeyamba kuchitapo kanthu poŵachenjeja kuti alape.
8 Akulu okonkheja chisanzo cha Yehova akafuna kuyavya ŵanthu amene achita chimo ikulu. Ove ochita nawo vinthu “moleza ntima ngako” mokatijana na mwayunenela lemba ya 2 Timoteyo 4:2. Tetyo, nthawe zonse nkulu ofunika kunkhala woleza ntima komasoti wodekha poyavya munthu wamene wachita chimo kuti achinje. Keno nkulu ochita vinthu mwaukali, munthu wamene wachita chimo angalondelelini malangizo ŵakumupasa ndipo angafunelini kuti alape.
9-10. Kansi akulu angayavye tyani munthu wamene wachita chimo kuganizila kuipa kwa vinthu vawachita?
9 Akulu oyeja-yeja kuti aziŵe vechitisha kuti munthu wamene uyo achite chimo ikulu. Kansi n’chinji chechitisha kuti ushamwali wake na Yehova uwonongeke? Kansi yove enze eleka kuphunzila Baibolo nthawe zonse olo kuluta muutumiki? Kansi yove enze eleka kupemphela kwa Yehova monkhazikika? Kansi olola kuti vilako-lako viipa vikomusogolela? Kansi ni ŵanthu otyani ŵakutandala nawo, ndipo nivinthu votyani vosangalasa vakukonda? Kansi vinthu vamene ivi vukhuza tyani ntima wake? Kansi yove oziŵa mwakumvwila Atata ŵake Yehova chifukwa cha chinthu chiipa chawachita?
10 Akulu angamukonshe makonsho munthu wamene uyo amene angamuyavye kuganizila vinthu vechitisha kuti ushamwali wake na Yehova uwonongeke nochita chimo. (Miy. 20:5) Ove ochita vamene ivi mowama ntima ndipo omukonshalini nkhani zachisinsi zamene ove ofunikalini kuziziŵa. Kuyangijila pamene apo, ove angakatishilesoti ntchito fanizo poyavya munthu wamene uyo kuwona kuti chimo yaŵachita niikulu, monga ni mwechichitila Natani na Davide. Pakukumana kwawo koyamba, payakine munthu wamene uyo angalimvwile chisoni chifukwa cha vinthu viipa vechichita. Ndipo yove angalape mofumila pansi pantima.
11. Kansi Yesu enzeŵawona tyani ŵanthu ochimwa?
11 Akulu oyeja-yeja kuti akokonkheja Yesu. Yesu eyavya Paulo pomukonsha konsho ya nzelu kuti: “Saulo, Saulo, kansi uninzunzilanji?” Pokatishila ntchito konsho yamene iyi, Yesu emuyavya Paulo kuziŵa kuti vinthu venzechita ni viipa. (Mach. 9:3-6) Komasoti pankhani ya “mayi wala Yezebeli,” Yesu enena kuti: “Namupasa nthawe kuti alape.”—Chiv. 2:20, 21.
12-13. Kansi akulu angapeleke tyani nthawe kuli munthu wamene wachita chimo kuti alape? (Onanisoti chithunzi.)
12 Pokonkheja Yesu, akulu ofunikila kupewa kukulumija kuganiza kuti munthu wamene uyo angalapelini. Olo kuti ŵanthu ayakine angalape panthawe yoyamba yakumana na komiti ya akulu, ayakine angafunikile kukumana na akulu maulwendo oweleja-weleja kuti alape. Tetyo, akulu ofunika kukumana na munthu wamene wachita chimo moweleja-weleja. Pavuli pakuti wakumana na komiti ya akulu, munthu wamene wachita chimo angayambe kuganizila ngako za vinthu vawaujiwa. Yove angalichefye nopemphela kwa Yehova kuti amukhululukile. (Masal. 32:5; 38:18) Tetyo, paulwendo wokonkhapo munthu wamene uyo angawoneshe ntima wosiyana na wechiwonesha paulwendo woyamba.
13 Pofuna kuyavya munthu wamene wachita chimo kuti alape, akulu owonesha chifundo komasoti kuwama ntima. Ove omusenga Yehova kuti adalise khama yawo ndipo oyembekezela kuti mkwasu wamene uyo azachinje ntima wake nolapa.—2 Tim. 2:25, 26.
Akulu angakumane na munthu wamene wachita chimo moweleja-weleja pomupasa nthawe kuti alape (Onani ndime 12.)
14. Kansi niŵani owamila kulondela ulemu keno munthu walapa pavuli pakuti wachita chimo, ndipo ndaŵa yanji?
14 Munthu wamene wachita chimo akalapa vunkhala vokondwelesha ngako! (Luk. 15:7, 10) Kansi niŵani owamila kulondela ulemu vamene ivi vikachitika? Kansi ni akulu? Ganizilani vechilemba Paulo vokhuza ŵanthu amene achita chimo ponena kuti: “Payakine Mulungu angaŵalole kuti alape.” (2 Tim. 2:25) Tetyo, ni Yehova oyavya Nkhilisitu kuti achinje kaganizidwe komasoti vochita vake, osati munthu. Paulo efotokoza vinthu viweme vamene vuchitika pavuli pakuti munthu walapa. Yove angaziŵe vinthu vinyinji vachendi vokhuza chonadi, nzelu zingamuwelele, komasoti angapulumuke kumaukuka a Satana.—2 Tim. 2:26.
15. Kansi akulu angapitilije tyani kuyavya munthu wamene wachita chimo pavuli pakuti walapa?
15 Keno munthu walapa pavuli pakuti wachita chimo, komiti ya akulu ingapange makonzedwe kuti achitiliwe ulwendo wa uchiŵeta pofuna kumuyavya kuti apitilije kulondela thandizo yakufunikila polimbana na maukuka a Satana Mdyeleke kuti akochita vinthu viweme. (Ahe. 12:12, 13) Akulu oujalini munthu aliyense nkhani yonse yokhuza chimo yaŵachita munthu wamene uyo. Lomba ni vinthu votyani vaungaujiwe mpingo?
“UKOŴAZUZULA PA MENSO PA ŴANTHU ONSE”
16. Mokatijana na 1 Timoteyo 5:20, kansi Paulo enzetanthauza chinji pechinena kuti “ŵanthu onse”?
16 Ŵelengani 1 Timoteyo 5:20. Paulo elembela nkulu muyake Timoteyo mawu amene aŵa, ndipo emuuja mwatingachitile vinthu na “ŵanthu amene ali na chiyoloŵezi chochita chimo.” Kansi yove enzetanthauza chinji? Yove pechinena kuti pamenso pa “ŵanthu onse”, enzetanthauzalini ŵanthu onse mumpingo. M’malo mwake, enzetanthauza za ŵanthu atontho mumpingo amene oziŵa kale kuti munthu wamene uyo echita chimo. Ŵanthu amene aŵa angankhale ŵala amene emuwona, olo echimvwa kuti munthu wamene uyo echita chimo. Akulu ofunikila kuŵaziŵisha ŵanthu amene aŵa kuti nkhani ya munthu wamene echita chimo yasamaliliwa ndipo wazuzuliwa.
17. Keno ŵanthu anyinji mumpingo aziŵa kuti munthu muyakine wachita chimo, kansi nichilengezo chotyani chufunikila kupelekewa, ndipo ndaŵa yanji?
17 Nthawe ziyakine, vunkhala kuti ŵanthu anyinji aziŵa kale kuti munthu muyakine wachita chimo ikulu, keno akaliye niye kuti angaziŵe pasogolo pake. Vikankhala tetyo, mawu akuti “ŵanthu onse” angapamikijepo mpingo wonse. Tetyo, akulu angalengeze mumpingo kuti Nkhilisitu wamene uyo wazuzuliwa. Ndaŵa yanji? Paulo epeleka yankho yakuti: “Kuti ayakine onse ankhale na wowa.”
18. Kansi akulu angachite tyani keno mwana wobatizika wachita chimo? (Onanisoti chithunzi.)
18 Lomba tyani keno mwana wobatizika wamene akaliyekwanisha vyaka 18, wachita chimo ikulu? Bungwe ya akulu izasankhe akulu aŵili kuti akumane naye pamozi na makolo ŵake Achikhilisitu.b Cholinga cha akulu amene awo, nikuwona vakuchita kale makolo poyavya mwana wawo kuti alape. Keno mwana wamene uyo okonkheja malangizo wakumupasa makolo ŵake ndipo wachinja minkhalidwe olo kaganizidwe kake, akulu aŵili angasankhe kuti makolo ŵake apitilije kumuyavya. Akulu oziŵa kuti Yehova epeleka udindo kuli makolo wolangiza ŵana ŵawo mwachikondi. (Deut. 6:6, 7; Miy. 6:20; 22:6; Aife. 6:2-4) Pavuli pake, akulu akowonana na makolo kuti asimikijile keno mwana wamene uyo olondela thandizo yakufunikila. Kansi akulu angachite tyani keno mwana wobatizika okana kuchinja? Vikankhala tetyo, komiti ya akulu izakumane naye pamozi na makolo Achikhilisitu.
Mwana wobatizika akachita chimo ikulu, akulu akokumana naye pamozi na makolo ŵake Achikhilisitu (Onani ndime 18.)
“YEHOVA NIWACHIKONDI CHIKULU KOMASOTI WACHIFUNDO”
19. Kansi akulu oyeja-yeja tyani kukonkheja Yehova pochita vinthu na ŵanthu amene achita chimo?
19 Komiti ya akulu ili na udindo pamenso pa Yehova wowoneshesha kuti mpingo upitilije kunkhala utuŵa. (1 Ako. 5:7) Enekwasu am’komiti yamene iyi ochita vonse vangakwanishe poyavya munthu keno wachita chimo kuti alape. Komasoti ove oyembekezela kuti munthu wamene uyo azachinje. Ndaŵa yanji? Chifukwa chakuti ofuna kukonkheja Yehova wamene ni “wachikondi chikulu komasoti wachifundo.” (Yako. 5:11) Ntumwi Yohani enzechita vinthu mwachikondi na enekwasu na akalongosi. Yove elemba kuti: “Ŵana ŵangu okondewa, nukulembeleni vinthu vamene ivi kuti osati muchite chimo. Koma olo n’tetyo, keno muyakine wachita chimo tili naye wotiyavya wolungama, Yesu Khilisitu wamene ali na Atata.”—1 Yoh. 2:1.
20. Kansi tizakambilane chinji munkhani yosilijila m’Magazini ino?
20 N’vomvwisha chisoni kuti nthawe ziyakine, Nkhilisitu angakane kuti alape. Vikankhala tetyo, yove ofunika kuchosewa mumpingo. Kansi akulu angachite tyani vamene ivi vikachitika? Tizakambilane yankho ya konsho yamene iyi munkhani yosilijila m’Magazini ino.
NYIMBO N.° 103 Achiŵeta ni mphaso mwa Analume
a Kale, komiti yamene iyi ya akulu yenzeitiwa kuti komiti yachiweluzo. Koma chifukwa chakuti kuweluza ni mbali tyala ya ntchito yakukata, tikoiitalinisoti pokatishila ntchito mawu amene aŵa. M’malomwake, gulu yamene iyi tikoiita tyala kuti komiti ya akulu.
b Tikanena za makolo tutanthauzasoti ŵanthu amene ali na udindo wosamalila mwana wamene uyo.