Vangachite akulu poyavya ŵanthu ochosewa mumpingo

1-2. (a) Kansi Yehova akumvwa tyani keno munthu wachita chimo ndipo ofunalini kulapa? (b) Kansi Yehova oyembekezela chinji kuli ŵanthu amene achita chimo?

YEHOVA olekelelalini vinthu viipa; ndipo ofunalini kuti ŵanthu akochita machimo. (Sal. 5:4-6) Yehova ofuna kuti sewo tikomvwila malamulo ŵake amene ali m’Baibolo. N’chendi kuti Yehova oyembekezelalini kuti tikochita vinthu mosaphoniyesha kalikonse chifukwa chakuti nise ŵanthu ochimwa. (Sal. 130:3, 4) Panthawe imo na imo, yove olekelelalini kuti ‘ŵanthu asayopa Mulungu akowona kuwama ntima kwake kukulu kunkhala chifukwa chakuti akochitila vinthu viipa.’ (Yuda 4) Ndipo Baibolo yunena za ‘kuwonongewa kwa ŵanthu asayopa Mulungu’ pa nkhondo ya Mulungu ya Alumagedo.—2 Pet. 3:7; Chiv. 16:16.

² Koma olo n’tetyo, Yehova ofunalini kuti munthu aliyense azawonongewe. Molingana na mwetifotokozela kale munkhani zoyambilila m’magazini ino, Baibolo yunena momvwika luweme kuti Mulungu “ofuna kuti ŵanthu onse alape.” (2 Pet. 3:9) Akulu Achikhilisitu okonkheja kuleza ntima kwa Yehova poyavya ŵanthu amene achita chimo kuti achinje nonkhalasoti paushamwali uweme na Yehova. Koma olo n’tetyo, nthawe ziyakine munthu akachita chimo olapalini. (Yes. 6:9) Ŵanthu ayakine opitilija kuchita vinthu viipa olo kuti akulu oŵayavya moweleja-weleja kuti alape. Kansi n’chinji chamungachite vikankhala teti?

“MUCHOSENI MUNTHU MUIPA WAMENE UYO”

3. (a) Kansi Baibolo yunena kuti tikochita tyani na ŵanthu amene ofunalini kulapa pavuli pakuti achita chimo? (b) Ndaŵa yanji tinganena kuti keno munthu okana kulapa pavuli pakuti wachita chimo, olisankhila yeka kuchosewa mumpingo?

³ Keno munthu muyakine wachita chimo ndipo ofunalini kulapa, akulu paliye muyakine mwangachitile, koma ofunika kukonkheja malangizo opezeka pa 1 Akolinto 5:13 amene onena kuti: “Muchoseni munthu muipa wamene uyo pakati panu.” Munthu akachita chimo oziŵa kuti angachosewe mumpingo keno ofunalini kulapa. Tetyo, vunkhala monga olisankhila yeka kuti achosewe mumpingo. Yove oweja vinthu vechikomola yeka. (Agal. 6:7) Ndaŵa yanji tinganene tetyo? Chifukwa chakuti yove okana kukonkheja malangizo ŵakumupasa akulu pomuyavya kuti alape. (2 Maf. 17:12-15) Vochita vake vuwonesha kuti yove ofunalini kumvwila malamulo a Yehova.—Deut. 30:19, 20.

4. Ndaŵa yanji popelekewa chilengezo kumpingo keno munthu okana kulapa pavuli pakuti wachita chimo?

⁴ Keno munthu asafuna kulapa wachosewa mumpingo, akulu opeleka chilengezo ku mpingo kuti niwa Mbonilini soti. Cholinga cha chilengezo chamene icho n’kumuchitishalini nsoni. Mmalo mwake, nikuyavya mpingo kuti ukonkheje malangizo am’Malemba amene onena kuti “muleke kukatijana” na munthu wamene uyo “olo kulya naye munthu wamene uyo yayi.” (1 Ako. 5:9-11) Malangizo amene aŵa opelekewa pa vifukwa viweme. Ntumwi Paulo elemba kuti: “Isiti itontho yufufumisha ntanda wonse wa unga wokanya-kanya.” (1 Ako. 5:6) Keno munthu wamene ofunalini kulapa ochosewalini mumpingo, ayakine angayambe kuganiza kuti kumvwila malamulo a Yehova n’kosafunika.—Miy. 13:20; 1 Ako. 15:33.

5. Kansi tikoŵawona tyani ŵanthu amene ni ochosewa, ndipo ndaŵa yanji?

⁵ Lomba, tikoŵawona tyani Akhilisitu amene achosewa mumpingo? Olo kuti tufunikalini kukatijana nawo tikopewa kuganiza kuti ove aliye chiyembekezo chilichonse. Mmalo mwake, ove ali monga ni mbelele zosokela. Mbelele ikapatuka pa gulu ya ziyake ingakwanishesoti kujokela. Mukokumbukila kuti munthu wamene uyo epeleka moyo wake kwa Yehova. Chomvwisha chisoni n’chakuti yove pali pano okwanilishalini lonjezo yechichita kuti azapitilije kunkhala wokhulupilika kwa Mulungu, ndipo kuchita vamene ivi ni ngozi ikulu ngako. (Eze. 18:31) Koma olo n’tetyo, nthawe paikalipo komasoti Yehova pakaliwonesha chifundo chake kuli ŵanthu amene ochita machimo, ŵanthu amene awo ali na mwayi wochinja. Kansi akulu angawoneshe tyani kuti oyembekezela kuti ŵanthu amene echita machimo ajokelesoti mumpingo?

VAKUCHITA AKULU POYAVYA ŴANTHU OCHOSEWA

6. Kansi ni vinthu votyani vakufunikila kuchita akulu poyavya munthu wochosewa?

⁶ Kansi munthu akachosewa akulu olekelatu kuyeja-yeja kumuyavya kuti ajokelesoti kwa Yehova? N’tetyo lini! Akulu akafuna kuziŵisha munthu wamene wachita chimo kuti achosewe mumpingo, komiti ya akulu yumufotokozela vinthu vangachite kuti ajokelesoti mumpingo. Koma olo n’tetyo, akulu akochita vinyinji pomuyavya. Akulu akomufotokozela munthu wamene wachita chimo akachosewa kuti akokumana naye pakapita myezi itontho, kuti awone keno wachinja ntima wake. Keno munthu wamene wachita chimo ofuna kukumanasoti na akulu, ove akomusenga mowama ntima kuti alape nojokelasoti mumpingo. Olo kuti munthu wamene uyo aliyelape paulwendo woyamba, akulu akoyeja-yeja mphela kuti akumane naye pomuyavya kuti alape.

7. Kansi akulu angamukonkheje tyani Yehova wamene ni wachifundo pochita vinthu na ŵanthu ochosewa mumpingo? (Yeremiya 3:12)

⁷ Akulu oyeja-yeja kukonkheja chifundo cha Yehova pochita vinthu na munthu wamene wachosewa mumpingo. Masiku akuvuli, Yehova enzeyembekezelalini kuti ŵanthu ŵake Aisiraeli ayambe alapa kuti aŵayavye. Mmalo mwake, yove niye enzeyamba kuchitapo kanthu kuti aŵayavye olo kuti ove enze akaliye wonesha chizindikilo chilichonse chowonesha kuti alapa. Munkhani yachiŵili m’magazini ino, Yehova euja Hoseya kuti amukhululukile mwanakazi wake olo kuti yove enze akaliyeleka kuchita chimo ikulu. Pokatishila ntchito fanizo yamene iyi Yehova ephunzisa ŵanthu ŵake kuti yove ali na chifundo chikulu. (Hos. 3:1; Mal. 3:7) Pokonkheja Yehova, akulu Achikhilisitu ofunishisha kuyavya munthu wamene wachita chimo kuti alape nojokelasoti mumpingo, ndipo ove ochitalini vinthu vamene vingamukangishe kuchita vamene ivi.—Ŵelengani Yeremiya 3:12.

8. Kansi fanizo ya Yesu ya mwana woloŵelela yutiyayva tyani kuziŵa kuti Yehova ni wachifundo? (Luka 15:7)

⁸ Kumbukilani fanizo ya Yesu ya mwana woloŵelela yetikambilana munkhani yachiŵili m’magazini ino. Atata ŵake pechingoti amuwona “emuutukila nomukumbatila ndipo emukising’a mwachikondi.” (Luk. 15:20) Onani kuti atata ŵake aliye yembekezele kuti mwana wawo ayambe wasenga kuti amukhululukile. Mmalo mwake, ove niye eyamba kuchitapo kanthu monga nimwangachitile tata aliyense wachikondi. Umu niye mwakumvwila Yehova akaganizila za ŵanthu amene eleka kumutumikila, ndipo akulu ofunikila kuchita vonse vangakwanishe pomukonkheja. Ove ofuna kuti mbelele yosokela yamene iyo ‘ijokele kung’anda.’ (Luk. 15:22-24, 32) Keno munthu wochimwa walapa, Yehova, Yesu, angelo komasoti mpingo wonse usangalala ngako!—Ŵelengani Luka 15:7.

9. Kansi Yehova ofuna kuti ŵanthu amene achita chimo achite chinji?

⁹ Pofwika pano tawona kuti Yehova ofunalini kuti ŵanthu ochimwa amene ofunalini kulapa, apitilije kunkhala mumpingo. Koma olo n’tetyo, yove oŵatailatulini ŵanthu amene achita chimo. Yove ofuna kuti ove ajokele. Lemba ya Hoseya 14:4, yufotokoza luweme mwakumvwila Yehova keno munthu walapa pavuli pakuti wachita chimo. Ndipo yunena kuti: “Nizasilije kusakhulupilika kwawo. Nizaŵakonde mwakufuna kwangu. Chifukwa naleka kuŵakalipila.” Kukumbukila mwakumvwila Yehova keno munthu walapa, kuŵayavya akulu kuti akonkhala tchelu kuti awone chizindikilo chilichonse chowonesha kuti munthu walapa. Ndipo mawu amene aŵa osimikijila munthu aliyense wamene eleka kutumikila Yehova kuti yove akalimukonda ndipo ofuna kuti ajokele.

10-11. Kansi akulu angachite tyani poyavya ŵanthu amene echosewa kale mumpingo?

¹⁰ Kansi akulu angachite tyani poyavya ŵanthu amene echosewa kale-kale mumpingo? Payakine ŵanthu amene awo eleka kuchita vinthu vamene vechitisha kuti achosewe mumpingo. Nthawe ziyakine angafwike poluŵa vechichita kuti achosewe mumpingo. Mulimonse mwavingankhalile, akulu azayeje-yeje kuziŵa kwakunkhala noluta kuyaŵatandaja. Poŵatandaja, akulu akopemphela nawo noŵasenga mowama ntima kuti ajokele mumpingo. N’vowonekelatu kuti keno munthu wankhala kunja kwa gulu kwa vyaka vinyinji yove angankhale wofoka ngako mwauzimu. Koma olo n’tetyo, keno yove owonesha kuti ofuna kuti ajokelesoti mumpingo, akulu azapange makonzedwe kuti munthu muyakine akophunzila naye Baibolo olo panthawe yakaliye jokela mumpingo. Mulimonse mwavingankhalile, akulu niye angapange makonzedwe akuti munthu wamene uyo akophunzila Baibolo.

¹¹ Pokonkheja Yehova wamene ni wachifundo, akulu azachite vonse vangakwanishe poyavya ŵanthu amene achita chimo kuziŵa kuti mwayi wojokela ukalipo. Keno munthu wamene wachita chimo wawonesha kuti walapa angamujoshele mumpingo pakaliye pita nthawe itali.—2 Ako. 2:6-8.

12. (a) Kansi akulu ofunikila kunkhala osamala ngako pavochitika votyani? (b) Ndaŵa yanji tufunikila kupewa kuganiza kuti ŵanthu amene achita machimo antundu uyakine Yehova angaŵachitilelini chifundo? (Onanisoti mawu amnyansi.)

¹² Pavochitika viyakine, akulu ofunika kunkhala osamala ngako akaliye joshela munthu muyakine mumpingo. Mwachisanzo, keno munthu wamene uyo echita mulandu wombwitila mwana, enzechita mpatuko, olo enzefuna kusilija banja yake, akulu ofunikila kusimikijila poyamba keno munthu wamene uyo walapa chendi. (Mal. 2:14; 2 Tim. 3:6) Ove ofunikila kuteteza gulu ya mbelele. Panthawe imo na imo, tufunikila kuziŵa kuti Yehova olondela munthu aliyense wamene walapa mofumila pansi pantima noleka kuchita vinthu viipa. Tetyo, olo kuti akulu ofunika kuchita vinthu mosamala ngako na ŵanthu amene echitila ayawo vinthu viipa ngako, ofunikila kupewa kuganiza kuti Mulungu angaŵachitilelini chifundo chifukwa cha machimo akulu ŵechichita.a—1 Pet. 2:10.

VAUNGACHITE MPINGO

13. Kansi tusiyanisha tyani mwatuchitila vinthu na munthu wamene ezuzuliwa komasoti munthu wochosewa?

¹³ Mokatijana na vetikambilana munkhani yapita, nthawe ziyakine pakopelekewa chilengezo kuti munthu muyakine wazuzuliwa. Pavochitika monga ni vamene ivi, sewo tingapitilije kukatijana naye chifukwa chakuti yove walapa ndipo waleka kuchita vinthu viipa. (1 Tim. 5:20) Yove aliyechosewe mumpingo, ndipo ofunikila kutang’ishiwa pochitila vinthu pamozi na Akhilisitu ayake. (Ahe. 10:24, 25) Koma olo n’tetyo, vinthu vunkhala vosiyana ngako na munthu wamene wachosewa mumpingo. Sewo ‘tuleka kukatijana’ na munthu wamene uyo, ‘olo kulya naye chakulya.’—1 Ako. 5:11.

14. Kansi Akhilisitu angakatishile tyani ntchito chikumbuntima chawo chophunzisiwa Baibolo pochita vinthu na ŵanthu ochosewa? (Onanisoti chithunzi.)

¹⁴ Kansi vinthu vatakambilana vutanthauza kuti tikoŵatailatu ŵanthu amene achosewa mumpingo? Yayi. N’chendi kuti tufunikilalini kukatijana nawo. Koma keno munthu wamene uyo ni wachibale wasu olo munthu wetenzekatijana naye poyamba, tingamuitile kumisonkhano yampingo. Kansi tingachite tyani yove akawela pamisonkhano? Kuvuli, sewo tenzemupasalini moni munthu wotetyo. Koma pochitasoti vamene ivi, Nkhilisitu aliyense ofunikila kukatishila ntchito chikumbuntima chake chophunzisiwa Baibolo kuti aziŵe mwangachitile pankhani yamene iyi. Ayakine angawone kuti paliye vuto kupeleka moni olo kulondela munthu wochosewa akawela pamisonkhano. Koma olo n’tetyo, tufunikilalini kutandala naye.

15. Kansi ni chimo ya ntundu wanji yamene yutomolewa pa 2 Yohani 9-11? (Onanisoti bokosi yakuti “Kansi chimo yenzenena Yohani na Paulo yenze yolingana?”)

¹⁵ Ayakine angakonshe kuti, ‘Kansi Baibolo yunenalini kuti keno Nkhilisitu opeleka moni kuli munthu wotetyo onkhala monga ochita naye ntchito zake zamene izo ziipa?’ (Ŵelengani 2 Yohani 9-11.) Nkhani yonse pa vesi yamene iyi yuwonesha kuti malangizo amene aŵa onena za ŵanthu ampatuko komasoti ŵanthu amene olimbikisa ngako minkhalidwe iipa. (Chiv. 2:20) Tetyo, keno munthu muyakine olimbikisa ngako viphunziso va mpatuko olo minkhalidwe iyakine iipa, akulu ofunikilalini kumutandaja. Koma olo n’tetyo, ŵanthu otetyo angakwanishe kulapa. Koma ove akaliyelapa, sewo tufunikilalini kuŵapasa moni olo kuŵaitila kumisonkhano ya mpingo.

MUKOKONKHEJA YEHOVA WAMENE NI WACHIFUNDO

16-17. (a) Kansi Yehova ofuna kuti ŵanthu amene achita chimo achite chinji? (Ezekieli 18:32) (b) Kansi akulu angawoneshe tyani kuti okata ntchito pamozi na Yehova akafuna kuyavya munthu wamene wachita chimo?

¹⁶ Kansi taphunzila chinji munkhani 5 zili m’Magazini ino? Yehova ofunalini kuti munthu aliyense azawonongewe! (Ŵelengani Ezekieli 18:32.) Yove ofuna kuti ŵanthu amene achita chimo ankhalesoti naye paushamwali. (2 Ako. 5:20) N’chifukwa chake kufumila kale-kale, Yehova wankhala ochenjeja atumiki ŵake amene eleka kumutumikila—kuti alape nojokelasoti kuli yove. Akulu amumpingo ali na mwayi ukulu wokata ntchito pamozi na Yehova poyavya ŵanthu amene achita chimo kuti alape.—Alo. 2:4; 1 Ako. 3:9.

¹⁷ Ganizilani chisangalalo chikulu chamene chunkhala kululu keno ŵanthu ochimwa alapa! Atata ŵasu akululu Yehova, osangalala ngako keno mbelele yake yajokelasoti mumpingo. Chikondi chasu pa Yehova chukula ngako tikaganizila chifundo chake, komasoti kuwama ntima kwake kukulu.—Luk. 1:78.