NKHANI YOPHUNZILA N.° 33
NYIMBO N.° 130 Mwaokhululukilana
Vakufuna Yehova kuti mpingo ukochita na ŵanthu amene achita chimo ikulu
“Keno muyakine wachita chimo, tili naye wotiyavya.” —1 YOH. 2:1.
CHOLINGA CHANKHANI
Tiwone phunzilo iyakine yofunika yatingaphunzilepo kufumila pa vinthu vechitika mumpingo waku Kolinto mkwasu muyakine pechichita chimo ikulu.
1. Kansi n’chinji chakufuna Yehova kuli ŵanthu onse?
YEHOVA pechilenga ŵanthu, eŵapasa ufulu wolisankhila ŵeka vochita. Sewo tukatishila ntchito mphaso yamene iyi nthawe zonse tikafuna kupanga vosankha. Chosankha chofunika ngako changapange munthu aliyense, nikulipeleka kwa Yehova kuti ankhale m’banja ya ŵanthu ŵake. Yehova ofuna kuti munthu aliyense achite vamene ivi. Ndaŵa yanji? Chifukwa chakuti yove okonda ŵanthu komasoti ofuna kuti vinthu vikoŵayendela luweme. Yove ofuna kuti ankhale paushamwali uweme na ŵanthu komasoti kuŵapasa moyo wosasila.—Deut. 30:19, 20; Agal. 6:7, 8.
2. Kansi Yehova akumvwa tyani keno munthu wochimwa ofunalini kulapa? (1 Yohani 2:1)
2 Koma olo n’tetyo, Yehova okakamijalini munthu aliyense kuti akomutumikila. Yove ofuna kuti munthu aliyense alisankhile yeka vakufuna kuti achite. Kansi Mulungu ochita tyani keno Nkhilisitu wobatizika wafwaya malamulo ŵake nochita chimo ikulu? Keno yove ofunalini kulapa ochosewa mumpingo. (1 Ako. 5:13) Koma olo n’tetyo, Yehova oyembekezela na ntima wonse kuti munthu wochimwa ajokelesoti kuli yove. Kulaŵila chendi, chifukwa chikulu chechitisha Yehova kuti apeleke dipo—n’chakuti ofuna kukhululukila ŵanthu amene alapa machimo ŵawo. (Ŵelengani 1 Yohani 2:1.) Yehova ni Mulungu wachikondi ngako ndipo olimbikisa ŵanthu amene achita machimo akulu-akulu kuti alape.—Zek. 1:3; Alo. 2:4; Yako. 4:8.
3. Kansi tikambilane chinji munkhani ino?
3 Yehova otiuja mwakuuwonela uchimo komasoti mwakuwonela munthu wamene wachita chimo ikulu. Ndipo yove ofuna kuti nase tikochita chimozi-mozi. Munkhani ino, tikambilane mwatingachitile vamene ivi. Pamuŵelenga nkhani ino, onani (1) vewichita mpingo waku Kolinto posamalila chimo ikulu munthawe ya Akhilisitu oyambilila, (2) malangizo ŵechipeleka ntumwi Paulo mkwasu wamene echita chimo pechilapa, komasoti (3) mwakumvwila Yehova keno Nkhilisitu wachita chimo ikulu.
VEWICHITA MPINGO MUNTHAWE YA AKHILISITU OYAMBILILA NA MUNTHU WAMENE ECHITA CHIMO IKULU
4. Kansi n’chinji chechitika mumpingo waku Kolinto munthawe ya Akhilisitu oyambilila? (1 Akolinto 5:1, 2)
4 Ŵelengani 1 Akolinto 5:1, 2. Paulwendo wake wachitatu waumishonale, Paulo echimvwa nkhani iyakine yosokoneza maganizo yokhuza mpingo waku Kolinto wamene wenze wechingonkhazikishiwa kwalombapano. Mkwasu muyakine mumpingo wamene uyo, enzechita chiwele-wele na amayi ŵake opeza. Ndipo chiwele-wele chake chenze chakuti “olo ŵanthu amitundu iyakine ochichitalini”! Koma mpingo wenzewona kuti paliye vuto iliyonse kuti mkwasu wamene enzechita nkhalidwe yamene iyo apitilije kunkhala mumpingo. Payakine Akhilisitu mumpingo enzeganiza kuti nkhalidwe yamene iyo wenze umboni wakuti Mulungu niwachifundo komasoti omvwisha kuti ŵanthu aliye ungwilo. Koma Yehova olekelelalini minkhalidwe iipa pakati pa ŵanthu ŵake. Chifukwa cha nkhalidwe yake iipa yamene iyo, ŵanthu ayakine amene enzetumikilalini Yehova enzedabwa ndipo enzelawila vinthu viipa vokhuza ŵanthu a Yehova. Mwanalume wamene uyo sembe esokonezasoti Akhilisitu ayakine amene ŵenzekatijana nawo. Lomba, ni malangizo otyani ŵechipeleka Paulo kuli mpingo wamene uyu?
5. Kansi Paulo euja mpingo kuti uchite chinji, ndipo n’chinji chenzetanthauza? (1 Akolinto 5:13) (Onanisoti chithunzi.)
5 Ŵelengani 1 Akolinto 5:13. Yehova, eujila Paulo kuti alembe kalata ndipo efotokoza kuti mwanalume wamene uyo wamene enzefunalini kulapa achosewe mumpingo. Kansi Akhilisitu okhulupilika enzefunikila kumuwona tyani? Paulo eŵafotokozela kuti ‘aleke kukatijana’ naye. Kansi vamene ivi venzetanthauza chinji? Paulo efotokoza kuti lamulo yamene iyo yenzepamikijaposoti kupewa ‘olo kulya naye [chakulya] munthu wotetyo.’ (1 Ako. 5:11) Kulya chakulya pamozi na munthu wotetyo, kungachitishesoti kuti tiyambe kukatijana naye. N’vowonekelatu kuti Paulo enzetanthauza kuti mpingo wamene uyo wenzefunikalini kukatijana naye mwanalume wamene uyo. Malangizo ŵechipeleka sembe eteteza Akhilisitu amumpingo wamene uyo kuti osati atolele minkhalidwe yake iipa. (1 Ako. 5:5-7) Kuyangijila pamene apo, kuleka kukatijana naye sembe kwemuyavya kuziŵa kuti echita chinthu chiipa ngako pamenso pa Yehova ndipo sembe echita nsoni nolapa
Mulungu eujila Paulo kuti apeleke malangizo onena kuti mwanalume wochimwa wamene enzefunalini kulapa achosewe mumpingo (Onani ndime 5.)
6. Kansi mpingo wechita tyani pewilondela kalata ya Paulo, ndipo mwanalume wamene enzechita chimo echita tyani?
6 Pavuli pakuti watumija kalata yake kuli Akhilisitu aku Kolinto, Paulo eyamba kulikonsha keno mpingo wamene uyo ukonkheje malangizo ŵechilemba. Papita nthawe, Tito emuletela uthenga wamene wemukondwelesha ngako. Mpingo wamene uyo, wiŵalondela luweme ngako malangizo wechilemba Paulo mukalata yake. (2 Ako. 7:6, 7) Akhilisitu amumpingo wamene uyo ekonkheja malangizo ŵake. Kuyangijila pamene apo, pavuli pa myezi inyinji kufumila pa nthawe yechitumija kalata yake Paulo, mwanalume wamene uyo wamene echita chimo elapa! Yove enze echinja vochita vake komasoti mwenzewonela vinthu noyamba kukonkheja mfundo zolungama za Yehova. (2 Ako. 7:8-11) Kansi pavuli pake Paulo elangiza mpingo kuti uchite chinji?
MWEWENZECHITILA VINTHU MPINGO NA MUNTHU WAMENE ELAPA
7. Kansi kuchosa munthu wamene echita chimo mumpingo kwenze na vokonkhapo votyani viweme? (2 Akolinto 2:5-8)
7 Ŵelengani 2 Akolinto 2:5-8. Paulo ewona kuti ‘Kuzuzuliwa na ŵanthu anyinji [kwenze] kokwanila kuli munthu wamene uyo.’ M’mawu ayakine tinganene kuti chilango chechipasiwa, chenze chekwanilisha cholinga chake. Kansi cholinga chake chenze chotyani? Cholinga chake chenze kumuyavya mwanalume wamene uyo kuti alape.—Ahe. 12:11.
8. Kansi Paulo euja mpingo kuti uchite chinji pavuli pake?
8 Tetyo, Paulo elangiza mpingo kuti “mukhululukileni na ntima wonse nomutonthoja” mkwasu wamene echita chimo komasoti “mumusimikijile kuti mumukonda.” Onani kuti Paulo enzefuna kuti mpingo uchite vinyinji kuyangijila pakumulondelasoti m’gulu ya ŵanthu a Yehova. Paulo enzefuna kuti enekwasu amumpingo wamene uyo amuwoneshe kupitila m’mawu komasoti vochita vawo kuti amukhululukila komasoti omukonda. Monga vokonkhapo vake, mkwasu wamene uyo sembe ewona kuti ayake asangalala chifukwa chakuti yove wajokelasoti mumpingo.
9. Ndaŵa yanji ŵanthu ayakine sembe aliyemukhululukile munthu wochimwa wamene elapa?
9 Ayakine sembe aliye sangalale poyamba pechimvwa kuti mwanalume wamene uyo wajokelasoti mumpingo. Ndaŵa yanji tunena teti? Akhilisitu ayakine payakine enze akali okhumudwa chifukwa chakuti vinthu vechichita mwanalume wamene uyo vileta mavuto anyinji mumpingo. Payakinesoti Akhilisitu ayakine enze akali okhumudwa chifukwa chakuti vinthu vechichita veŵakhumudwisa. Ŵanthu anyinji mumpingo enzeyeja-yeja kuti akomvwila malamulo a Yehova. Tetyo, payakine enzewona kuti nikusoŵa chilungamo kulola munthu wamene echita chimo ikulu kuti ajokelesoti mumpingo. (Yelekezelani na Luka 15:28-30.) Ndaŵa yanji kwenze kofunika ngako kuti mpingo uwoneshe chikondi ngacho-ngacho kuli mkwasu wamene ejokela?
10-11. Kansi n’chinji chingachitike keno akulu ofunalini kukhululukila munthu wochimwa wamene walapa?
10 Ganizilani vingachitike keno akulu okana kuti munthu wamene walapa ajokele mumpingo, olo Akhilisitu mumpingo ofunalini kuti amuwoneshe chikondi pavuli pakuti wajokela. Yove angankhale na chisoni “chopitilila malile” ndipo angafoke. Vamene ivi vingachitishe kuti akoganiza kuti aliyesoti chiyembekezo chilichonse chifukwa cha vinthu viipa vechichita. Munthu wotetyo, angalekeletu kuyeja-yeja kuti awamyesoti ushamwali wake na Mulungu.
11 Chinthu chiipa ngako n’chakuti keno enekwasu na akalongosi mumpingo okana kukhululukila munthu wamene elapa pavuli pakuti wachita chimo, ushamwali wawo na Yehova ungankhale pangozi. Ndaŵa yanji? Chifukwa chakuti ove angawoneshelini kuti okonkheja Yehova wamene okhululukila ochimwa keno alapa. M’malo mwake angawoneshe kuti okonkheja Satana wamene niwankhanza komasoti aliye chifundo. Ove angankhale monga nivipangizo vakukatishila ntchito Mdyelekezi powononga moyo wauzimu wa ŵanthu.—2 Ako. 2:10, 11; Aife. 4:27.
12. Kansi mpingo ungamukonkheje tyani Yehova?
12 Kansi mpingo waku Kolinto sembe wechita tyani kuti ukonkheje Yehova osati Satana? Ove sembe echita tetyo mwakukonkheja njila yakuchitila vinthu Yehova na ŵanthu amene alapa pavuli pakuti achita chimo. Onani vechinena ŵanthu ayakine elemba Baibolo vokhuza Yehova. Ponena za Mulungu Davide enena kuti: “Nimwe muweme komasoti nimwe wokonzeka kukhululuka.” (Sal. 86:5) Mika elemba kuti: “Kansi pali Mulungu muyakinesoti wolingana na mwewo wamene okhululukila vophoniya na machimo?” (Mik. 7:18) Komasoti Yesaya enena kuti: “Munthu muipa asiye njila yake, ndipo wowononga ayake asiye maganizo ŵake. Yove ajokele kwa Yehova ndipo azamuchitile chifundo. Ajokele kwa Mulungu wasu, chifukwa azamukhululukile na ntima wonse.”—Yes. 55:7.
13. Ndaŵa yanji venze vofunika kumuwejelesha munthu wamene echita chimo mumpingo pavuli pakuti walapa? (Onanisoti bokosi yakuti “Kansi mwanalume waku Kolinto ewejeleshewa panthawe yanji?”)
13 Kuti awoneshe kuti okonkheja Yehova, Akhilisitu aku Kolinto enzefunikila kumulondela mwanalume wamene elapa nomusimikijila kuti omukonda. Pokonkheja malangizo ŵechiŵapasa Paulo akuti amulondele mwanalume wamene uyo, Akhilisitu amumpingo ewonesha kuti enze “omvwila pa vinthu vonse.” (2 Ako. 2:9) N’chendi kuti penze pakaliye pita myezi inyinji kufumila pechichosewa mumpingo mwanalme wamene uyo, koma chilango chechipasiwa chemuyavya ngako kuti awoneshe kuti walapa. Tetyo akulu enzeve chifukwa chilichonse chowaya-waya kuti amujoshele mumpingo.
MWATINGAKONKHEJELE YEHOVA POWONESHA CHILUNGAMO KOMASOTI CHIFUNDO
14-15. Kansi tuphunzilapo chinji tikaganizila vewichita mpingo waku Kolinto posamalila chimo ikulu? (2 Petulo 3:9) (Onanisoti chithunzi.)
14 Vewichita mpingo wakale wa Akolinto posamalila chimo mumpingo, vilembewa m’Baibolo “kuti vitilangize.” (Alo. 15:4) Nkhani yamene iyi yutiphunzisa kuti Yehova olekelelalini machimo akulu-akulu pakati pa ŵanthu ŵake. Ŵanthu ayakine angaganize kuti chifukwa chakuti Yehova ni Mulungu “wachifundo” angalole kuti munthu wochimwa wamene olapalini apitilije kunkhala mumpingo, koma Yehova owoneshalini chifundo chake mwanjila yamene iyi. Yehova ni Mulungu wachifundo, koma olekelelalini vinthu viipa; mmalo mwake, yove olemekeza mfundo zake. (Yuda 4) Kuyangijila pamene apo, kuti Mulungu olekelela minkhalidwe iipa, yove angawoneshelini kuti ni Mulungu wachifundo napatontho kumo, chifukwa vamene ivi vingaike ŵanthu onse mumpingo pangozi.—Miy. 13:20; 1 Ako. 15:33.
15 Koma olo n’tetyo, sewo tuziŵa kuti Yehova ofunalini kuti munthu aliyense azawonongewe. Yove ofuna kuti ŵanthu onse azapulumuke. Mulungu ochitila chifundo ŵanthu amene achinja ntima wawo ndipo ofunasoti kuwamya ushamwali wawo na yove. (Eze. 33:11; ŵelengani 2 Petulo 3:9.) Chifukwa cha vamene ivi, mwanalume waku Kolinto pechilapa noleka kuchita vinthu viipa, Mulungu ekatishila ntchito Paulo kuti afotokozele mpingo kuti umukhululukile munthu wamene uyo nomulondelasoti.
Poganizila chikondi komasoti chifundo cha Yehova, mpingo ulondela na manja aŵili Nkhilisitu wamene wajoshelewa (Onani ndime 14-15.)
16. Kansi tikumvwa tyani tikakumbukila vewichita mpingo waku Kolinto posamalila chimo ikulu?
16 Chisanzo cha Akhilisitu aku Kolinto chuwonesha kuti Yehova ni wachikondi komasoti ochita vinthu mwachilungamo. (Sal. 33:5) Kansi vamene ivi vukuchitishanilini kunkhala na ntima wofuna kumulemekeza ngako Mulungu wasu? Tutembeja ngako kuti Yehova niwachifundo chifukwa chakuti sewo tonse nise ochimwa ndipo tufunikila kukhululukiliwa. Tutembejasoti ngako kuti Yehova etipasa dipo kuti akotikhululukila machimo ŵasu. N’chinthu chotonthoja ngako kuziŵa kuti Yehova okonda ŵanthu ŵake komasoti ofuna kuti vinthu vikoŵayendela luweme!
17. Kansi tizakambilane chinji munkhani zokonkhapo?
17 Keno munthu muyakine wachita chimo ikulu, kansi akulu masiku ŵano angakonkheje tyani chikondi cha Yehova nomuyavya kuti alape? Kansi Akhilisitu mumpingo ofunikila kuchita tyani akulu akasankha kuti achose olo kuwejelesha munthu muyakine? Tizakambilane makonsho amene aŵa munkhani zokonkhapo.
NYIMBO N.° 109 Tikokondana kufumila pansi pa ntima