Vingakuyavyeni kuti mukophunzila nthawe zonse
KANSI mwewo vukuvutani kuti mukophunzila Baibolo pamweka monkhazikika komasoti mosangalala? N’vowonekelatu kuti tonse vamene ivi vutichitikila nthawe ziyakine. Koma ganizilani za vinthu viyakine vamene tukwanisha kuvichita monkhazikika, monga kusamba. Kukulukuta, kufuna nthawe komasoti khama, koma pavuli pake tikumvwa luweme ngako muntima! Nakosoti kuphunzila Baibolo tingakulinganije na ‘kusamba m’manzi a Mawu a Mulungu.’ (Aife. 5:26) Ganizilani vinthu viyakine vamene vingakuyavyeni pophunzila Baibolo:
Mukokonkheja mndandanda nsondo iliyonse. Kuphunzila Baibolo pamweka ni ‘chinthu chofunika ngako’, ndipo Nkhilisitu ofunikalini kukuwaya-waya. (Afil. 1:10) Kuti mukokonkheja ndandanda yanu yakuphunzila, tyani kuiika pamalo aweme kuti mukoiwona pafupi-pafupi, monga pachipupa olo pachiseko cha filidji? Mungachitesoti luweme kuseting’a alamu pachipangizo chanu chamakono kuti ikokukumbushani nthawe yophunzila ikasala patontho kukwana.
Sankhani nthawe komasoti njila yophunzilila iweme kuli mwewo. Kansi ni mbali yotyani yamuchita luweme? Mwachisanzo, kansi mwewo mukwanisha kuika maganizo ŵanu pamozi keno muphunzila kwa wani awa? Olo payakine musangalala kuphunzila Baibolo kwa nthawe itontho ndipo muchita vamene ivo kaŵili-kaŵili? Mwewo niye amene muziŵa njila ingankhale iweme ngako kuli mwewo. Tetyo, mukoganizila mfundo zamene izi pamukonza ndandanda yanu yophunzilila. Keno musangalalalini kuphunzila kwanthawe itali pokonkheja vemwilemba pandandana yanu, tyani kuyeja kuphunzila kwa 10 minesi? Kuphunzila Baibolo kwa 10 minesi kuli luweme ngako kusiyana na kulekelatu kuphunzila.—Afil. 2:13.
Mukosankhilatu nkhani zamukuti muzaphunzile. Keno nthawe zonse muyembekezela kuti nthawe yophunzila ikwane kuti musankhe bwino vinthu vamungaphunzile, mungakwanishelini ‘kuikatishila ntchito luweme nthawe yanu.’ (Aife. 5:16) Muwona tyani kulembelatu ndandanda ya nkhani zamukuti mukophunzila? Mwachisanzo, keno muli na konsho pankhani iyakine yamene muimvwishalini luweme, mungailembe pamndandanda kuti muzaiphunzile. Komasoti mukasilija kuphunzila, mungalembesoti vinthu viyakine vamungakonde kuti muzaphunzile paulwendo wokonkhapo.
Mukochinja vinthu pakafunikila. Mukoyeja kuchinja vinthu viyakine vili pa ndandanda yanu, monga kukula kwa nthawe yamuphuzila komasoti nkhani zamusankha kuti muphunzile. Ziŵani kuti chofunika ngako ni—kuphunzila monkhazikika,—osati nthawe yamwasankha, kukula kwanthawe yamuphunzila, olo vinthu vamuphunzila.
Kuphunzila monkhazikika n’kopindulisha ngako. Kutiyavya kunkhala paushamwali uweme na Yehova, tuchita vinthu mwanzelu, komasoti tikumvwa bwino muntima.—Yos. 1:8.